1. Јаша долдугҹа гаршымыза һансы мәгсәди гоја биләрик?

 ЈАША ДОЛДУГҸА биздә горху јарана биләр ки, Јеһованын јолунда даһа әввәлки гәдәр јарарлы олмајаҹағыг. Дүздүр, ола биләр, әввәлки ҝүҹүмүз јохдур, амма газандығымыз һикмәти вә тәҹрүбәни ҝәнҹләрлә бөлүшәрәк онлара көмәк едә биләрик ки, баҹарыгларыны пүхтәләшдирсинләр вә үзәрләринә јени мәсулијјәтләр ҝөтүрсүнләр. Узун илләрдир ағсаггал кими хидмәт едән бир гардаш демишди: «Ҝөрүрдүм ки, гоҹалмышам, даһа әввәлки гәдәр чох иш ҝөрә билмирәм, амма үрәјим раһат иди, чүнки бу иши ҝөрәҹәк баҹарыглы ҝәнҹ гардашлар вар иди».

2. Бу мәгаләдә нәји мүзакирә едәҹәјик?

² Өтән мәгаләдә өјрәндик ки, јашлыларла јахындан таныш олмағын ҝәнҹләрә һансы фајдасы вар. Бу мәгаләдә исә мүзакирә едәҹәјик ки, тәвазөкарлыг, миннәтдарлыг вә сәхавәт кими хүсусијјәтләр јашлы мәсиһиләрә ҝәнҹләрлә әмәкдашлыг етмәјә вә беләликлә дә, бүтүн јығынҹаға фајда ҝәтирмәјә неҹә көмәк едә биләр.

3. Филиппилиләрә 2:3, 4 ајәләринә әсасән, тәвазөкарлыг нәдир вә бу, мәсиһиләрә неҹә көмәк едә биләр?

³ Јашлылар ҝәнҹләрә көмәк етмәк истәјирсә, тәвазөкар олмалыдырлар. Тәвазөкар инсан башгаларыны өзүндән үстүн тутур. (Филиппилиләрә 2:3, 4 ајәләрини охујун.) Бу хүсусијјәти тәзаһүр етдирән јашлы мәсиһиләр гәбул едир ки, адәтән һансыса иши бир јох, Мүгәддәс Китаба зидд ҝетмәјән вә еффектив олан бир нечә јолла ҝөрмәк олар. Буна ҝөрә дә  белә мәсиһиләр ҝөзләмир ки, кечмишдә һансыса иши неҹә ҝөрүбләрсә, бу ҝүн дә һамы ејни ҹүр ҝөрмәлидир (Ваиз 7:10). Дүздүр, онларын ҝәнҹ нәслә өјрәдә биләҹәкләри чох шеј вар, амма онлар билирләр ки, «бу дүнјанын сәһнәси дәјишир» вә онлара јени үсуллара өјрәшмәк лазым ҝәлә биләр (1 Кор. 7:31).

4. Рајон нәзарәтчиләри лавилиләр кими һансы әһвал-руһијјәни тәзаһүр етдирирләр?

⁴ Јашлы мәсиһиләр тәвазөкарлыгла гәбул едирләр ки, јаша долдугҹа әввәлки гәдәр чох иш ҝөрә билмирләр. Мәсәлән, рајон нәзарәтчиләри. Јетмиш јашына чатанда онлара башга хидмәт нөвү тәклиф олунур. Тәјинатларыны дәјишмәк онлара чәтин ҝәлә биләр. Чүнки баҹы-гардашлара хидмәт етмәкдән бөјүк мәмнунлуг дујурдулар. Онлар бу тәјинатларыны севирдиләр вә һәлә дә үрәкләри бу тәјинаты иҹра етмәк истәји илә алышыб-јаныр. Анҹаг баша дүшүрләр ки, бу иш ҝәнҹ әлләрә һәвалә олунса, даһа јахшы олар. Онлар бу саһәдә гәдим Исраилдә 50 јашына чатанда мүгәддәс чадырда хидмәтләрини дајандырмалы олан лавилиләрә бәнзәјирләр. Бу лавилиләрин севинҹи һансыса тәјинатдан асылы дејилди. Онлар истәнилән иши ҹанла-башла иҹра едирди вә ҝәнҹләрә әлләриндән ҝәлән көмәји ҝөстәрирдиләр (Сај. 8:25, 26). Бизим дөврүмүздә дә рајон нәзарәтчиси кими хидмәт етмиш гардашлар даһа әввәлки кими бир сыра јығынҹағы зијарәт етмәсәләр дә, тәјин олундуглары јығынҹаг үчүн әсл һәдијјәдирләр.

5. Данла Кејтидән нә өјрәндиниз?

 ⁵ Дан адлы бир гардаш 23 ил рајон нәзарәтчиси кими хидмәт едиб. О, јетмиш јашына чатанда јолдашы Кејти илә бирҝә хүсуси өнҹүл тәјин олунду. Онлар јени тәјинатларына неҹә ујғунлашдылар? Дан дејир ки, инди иши әввәлкиндән даһа чохдур! О, јығынҹагдакы мәсулијјәтләрини иҹра едир, гардашлара јығынҹаг хидмәтчиси олмаға көмәк едир, бир башгаларына исә бөјүк шәһәрләрдә вә һәбсханаларда тәблиғ етмәјин үсулларыны өјрәдир. Әзиз јашлы диндашларымыз, фәрги јохдур, тамвахтлы хидмәтдәсиниз, ја јох, башгаларына көмәк етмәк үчүн чох шеј едә биләрсиниз. Јени вәзијјәтә ујғунлашын, јени мәгсәдләр гојун, диггәтинизи едә биләҹәјиниз шејләрә ҹәмләјин.

6. Нәјә ҝөрә тәвазөкар олмаг һикмәтли давранышдыр? Нүмунә чәкин.

⁶ Тәвазөкар инсан һәмчинин өз мәһдудијјәтләрини билир (Мәс. 11:2). Тәвазөкар олдуғу үчүн о өзүндән баҹармадығы шеји ҝөзләмир. Бу да она севинҹини горумаға вә ишини ҹанла-башла ҝөрмәјә көмәк едир. Тәвазөкар инсаны машынла даға галхан сүрүҹүјә бәнзәтмәк олар. Үзү јохуша галхаркән сүрүҹү сүрәти азалтмалыдыр. Дүздүр, о, нисбәтән јаваш һәрәкәт едәҹәк, амма ирәлиләјәҹәк. Ејнилә, тәвазөкар инсан да билир, нә вахт «сүрәти азалтмалыдыр» ки, Јеһоваја хидмәтини давам етдирә билсин вә башгаларына фајда ҝәтирсин (Филип. 4:5).

7. Бәрзиллајын тәвазөкар олдуғу нәдән ҝөрүнүр?

⁷ Ҝәлин Бәрзиллајын нүмунәсинә нәзәр салаг. Давуд падшаһ Бәрзиллајы сарај әјаны олмаға дәвәт едәндә онун 80 јашы вар иди. О баша дүшүрдү ки, гоҹадыр, әввәлки ҝүҹү јохдур. Буна ҝөрә дә тәвазөкар давранараг падшаһын тәклифиндән имтина етди вә өз јеринә ҝәнҹ олан Кимһамы мәсләһәт ҝөрдү (2 Ишм. 19:35—37). Бәрзиллај кими, јашлы гардашлар да хидмәт етмәләри үчүн ҝәнҹләрә шәраит јарадыр.

8. Мәбәдин тикинтиси мәсәләсиндә Давудун тәвазөкар олдуғу неҹә ҝөрүндү?

⁸ Давуд падшаһ да ҝөзәл тәвазөкарлыг нүмунәсидир. О, Јеһоваја ев тикмәји һәдсиз дәрәҹәдә чох истәјирди. Анҹаг Јеһова дејәндә ки, бу шәрәфли иши ҝәнҹ Сүлејман едәҹәк, Давуд бу гәрара бојун әјди вә лајиһәни сидги-үрәклә дәстәкләди (1 Салн. 17:4; 22:5). Давуд дүшүнмәди ки, Сүлејман ҝәнҹ вә сәриштәсиз олдуғу үчүн өзү бу ишин өһдәсиндән даһа јахшы ҝәләрди (1 Салн. 29:1). О анлајырды ки, бу тикинти лајиһәсинин баша чатмасы ишә башчылыг едән инсанларын јашындан вә тәҹрүбәсиндән јох, Јеһовадан асылыдыр. Давуддан өрнәк алараг јашлы мәсиһиләр тәјинатлары дәјишәндә белә, Јеһоваја хидмәтдә фәал галырлар. Һәмчинин онлар билирләр ки, Јеһова ҝәнҹләрә әввәлләр онларын ҝөрдүјү ишин өһдәсиндән ҝәлмәјә көмәк едәҹәк.

9. Филиал комитәсинин үзвү олан бир гардашын тәвазөкар олдуғу нәдән ҝөрүнүр?

⁹ Бизим дөврдә тәвазөкарлыг саһәсиндә ҝөзәл өрнәк олан гардашлардан бири Шиҝео гардашдыр. 1976-ҹы илдә отуз јашы оланда о, филиал комитәсинин үзвү тәјин олунмушду. 2004-ҹү илдә исә филиал комитәсинин координатору тәјин олунду. Сонралар о ҝөрдү ки, артыг әввәлки гәдәр ҝүҹү јохдур вә иши ләнҝ ҝөрүр. О, бу барәдә дуа етди вә бу мәсулијјәти ҹаван гардашын иҹра етмәсинин мүсбәт ҹәһәтләри һаггында дүшүндү. Шиҝео гардаш артыг координатор кими хидмәт етмәсә дә, филиал комитәсинин үзвү кими хидмәтини ҹанла-башла  јеринә јетирир. Бәрзиллајын, Давуд падшаһын вә Шиҝео гардашын нүмунәсиндән ҝөрдүјүмүз кими, тәвазөкар инсан диггәти ҝәнҹләрин тәҹрүбәсизлијинә јох, ҝүҹүнә јөнәлдир. Онлара рәгиб ҝөзү илә јох, әмәкдаш кими бахыр (Мәс. 20:29).

10. Јашлы мәсиһиләр јығынҹагдакы ҝәнҹләрә неҹә јанашыр?

¹⁰ Јашлы мәсиһиләр ҝәнҹләрә Јеһованын һәдијјәси кими бахырлар вә онлара ҝөрә миннәтдардырлар. Јашлыларын ҝүҹләри зәифләјәндә бир шејә севинирләр ки, јығынҹагдакы мәсулијјәтләри иҹра етмәјә һазыр олан вә буну баҹаран ҝәнҹләр вар.

11. Рут 4:13—16 ајәләриндән ҝөрүндүјү кими, ҝәнҹләрин көмәјини миннәтдарлыгла гәбул етмәк һансы немәтләрә јол ачыр?

¹¹ Мүгәддәс Китабда ады чәкилән Наимә миннәтдарлыгла өзүндән кичијин көмәјини гәбул етмишди. О, бу саһәдә јашлы мәсиһиләр үчүн ҝөзәл өрнәкдир. Әввәл-әввәл Наимә дул галмыш ҝәлини Руту дилә тутду ки, өз халгынын јанына гајытсын. Амма Рут Наимә илә бирҝә Бејтләһмә ҝетмәк истәдијини, гәрарында гәти олдуғуну дејәндә, Наимә онун көмәјини ҝери чевирмәди (Рут 1:7, 8, 18). Бунун сајәсиндә һәр икисинә бөјүк немәтләр нәсиб олду! (Рут 4:13—16 ајәләрини охујун.) Тәвазөкар олмаг јашлы мәсиһиләри Наимәдән өрнәк ҝөтүрмәјә тәшвиг едәҹәк.

12. Һәвари Булусун миннәтдар инсан олдуғу нәдән ҝөрүнүр?

¹² Һәвари Булус она ҝөстәрилән көмәјә ҝөрә миннәтдар иди. Мәсәлән, о, ҝөндәрдикләри мадди јардыма ҝөрә Филиппи јығынҹағына миннәтдарлығыны билдирмишди (Филип. 4:16). Һәмчинин Тимутинин дәстәјини  гијмәтләндирдијини ифадә етмишди (Филип. 2:19—22). Бундан әлавә, Ромаја мәһбус кими апарыларкән ону руһландырмаға ҝәлән диндашларына ҝөрә Аллаһа шүкүр етмишди (Һәв. 28:15). Һәвари Булус гывраг инсан иди, тәблиғ етмәк вә јығынҹаглары мөһкәмләндирмәк үчүн минләрлә километр јол гәт едирди. Бунунла белә, о, гүрурлу дејилди, баҹы-гардашларын көмәјини гәбул едирди.

13. Јашлы мәсиһиләр ҝәнҹләрә миннәтдар олдугларыны неҹә ҝөстәрә биләр?

¹³ Әзиз јашлы диндашларымыз, јығынҹағыныздакы ҝәнҹләрә миннәтдарлығынызы мүхтәлиф јолларла ҝөстәрә биләрсиниз. Әҝәр онлар сизә нәглијјат, алыш-вериш вә диҝәр саһәләрдә көмәк ҝөстәрмәк истәјирләрсә, буну миннәтдарлыгла гәбул един. Буна Јеһованын мәһәббәтинин ифадәси кими бахын. Сизә көмәк әли узадан инсанла аранызда һеч ағлыныза ҝәлмәјән достлуг бағы јарана биләр. Һәмишә ҝәнҹ диндашларынызын руһани инкишафы илә марагланын, онлара дејин ки, јығынҹағын ишләринә ҹан јандыран ҝәнҹләри ҝөрәндә үрәјиниз фәрәһлә долур. Вахт ајырыб, онлара һәјатынызда баш вермиш һадисәләр барәдә данышын. Белә етмәклә, јығынҹаға ҹәлб етдији ҝәнҹләрә ҝөрә Јеһоваја шүкүр етдијинизи ҝөстәрәҹәксиниз (Кол. 3:15; Јәһ. 6:44; 1 Салон. 5:18).

14. Давуд падшаһын сәхавәтли олдуғу нәдән ҝөрүнүр?

¹⁴ Јашлы мәсиһиләр Давуд падшаһдан башга ваҹиб хүсусијјәти дә өјрәнә биләр. Бу, сәхавәт хүсусијјәтидир. Мәбәдин тикинтисини дәстәкләмәк үчүн Давуд шәхси сәрвәтиндән күлли мигдарда ианә етмишди (1 Салн. 22:11—16; 29:3, 4). Һалбуки мәбәдин тикинтиси онун јох, оғлу Сүлејманын адына јазылаҹагды. Ејнилә бизим дә тикинти лајиһәләриндә иштирак етмәјә артыг ҝүҹүмүз јол вермирсә, имканымыз дахилиндә бу лајиһәләри ианәләримизлә дәстәкләјә биләрик. Һәмчинин илләр әрзиндә газандығымыз тәҹрүбәни ҝәнҹләрлә бөлүшә биләрик.

15. Һәвари Булус Тимутијә гаршы неҹә сәхавәтли олмушду?

¹⁵ Сәхавәтли олмаг саһәсиндә һәвари Булус да бизим үчүн ҝөзәл өрнәкдир. О, тәблиғ сәјаһәтинә чыханда Тимутини она гошулмаға дәвәт едирди вә бу ҝәнҹ оғлана сәхавәтлә тәблиғ вә тәлим үсулларыны өјрәдирди (Һәв. 16:1—3). Булусдан алдығы тәлим сајәсиндә Тимути хош хәбәри мәһарәтлә тәблиғ едирди (1 Кор. 4:17). Тимути дә өз нөвбәсиндә Булусдан өјрәндији тәлим үсулларыны башгаларына өјрәдирди.

16. Шиҝео гардаш нәјә ҝөрә башгаларына тәлим кечирди?

¹⁶ Бизим дөврүмүздә дә јашлы мәсиһиләр горхмур ки, ҝөрдүкләри иши ҝәнҹләрә өјрәтсәләр, бирдән өзләри даһа лазым олмазлар. Мәсәлән, јухарыда ады чәкилән Шиҝео гардаш узун илләр филиал комитәсинин ҝәнҹ үзвләринә чох шеј өјрәтмишди. О, буну јашадығы өлкәдә Падшаһлыг ишинин рифаһы үчүн едирди. Беләҹә, еһтијаҹ јарананда тәлим кечмиш бир гардаш координатор кими ону әвәз етди. Шиҝео гардаш 45 илдән чох вахт әрзиндә филиал комитәсинин үзвү кими газандығы тәҹрүбәни ҝәнҹ гардашларла бөлүшмәјә давам едир. Онун кими гардашлар Аллаһын халгы үчүн әсл немәтдир!

17. Лука 6:38 ајәсинә әсасән, јашлылар башгаларына нә верә биләр?

¹⁷ Әзиз јашлы баҹы-гардашлар, сүрдүјүнүз өмүр ҝөстәрир ки, Јеһоваја сәдагәтлә  вә иманла хидмәт етмәк ән јахшы һәјат јолудур. Сиз өз нүмунәнизлә сүбут едирсиниз ки, Мүгәддәс Китаб принсипләрини өјрәнмәк вә онлара ујғун јашамаг үчүн әзм ҝөстәрмәјә дәјәр. Әввәлләр мүәјјән ишләрин неҹә ҝөрүлдүјү илә бағлы мүәјјән тәҹрүбәниз вар. Амма инди ҝөрүрсүнүз ки, јени үсуллара ујғунлашмаг лазымдыр. Тәзәликҹә вәфтиз олунан јашлы баҹы-гардашлар, сиз дә јығынҹаға бөјүк төһфә верә биләрсиниз. Мәсәлән, сиз гоҹа јашында Јеһованы танымағын неҹә бөјүк севинҹ ҝәтирдијини бөлүшә биләрсиниз. Ҝәнҹләрә тәҹрүбәниз вә өјрәндијиниз шејләр һагда данышсаныз, онлар буну чох гијмәтләндирәҹәк. Һәјат тәҹрүбәнизлә долу анбарыныздан һәмишә версәниз, Јеһова да сизә бол-бол бәрәкәт верәҹәк. (Лука 6:38 ајәсини охујун.)

18. Јашлылар вә ҝәнҹләр бир-биринә неҹә дајаг ола биләр?

¹⁸ Әзиз јашлы мәсиһиләр, ҹаванларла сых мүнасибәт гурмагла бир-биринизә дәстәк олаҹагсыныз (Ром. 1:12). Һәр бир инсан башгаларынын саһиб олмадығы дәјәрли нәјәсә саһибдир. Јашлыларын илләр әрзиндә газандығы һикмәти вә тәҹрүбәси вар, ҝәнҹләрин исә енержиси вә ҝүҹү вар. Ҝәнҹләр вә јашлылар әл-әлә вериб бирликдә чалышанда сәмави Атамыз Јеһоваја шәрәф ҝәтирирләр вә бүтүн јығынҹаг да бунун хејрини ҝөрүр.