1. Мәсиһин миниллик һакимијјәти дөврүндә һансы севиндириҹи һадисәләр баш верәҹәк?

 МӘСИҺИН миниллик һакимијјәти дөврүндә өлүләрин дирилмәјә башлајаҹағы ҝүнү бир тәсәввүр един! Шүбһәсиз, бу, мөһтәшәм ҝүн олаҹаг! Әзизләрини итирәнләр онлары јенидән ҝөрәҹәкләри ҝүнү һәсрәтлә ҝөзләјирләр. Јеһова да о ҝүнү һәсрәтлә ҝөзләјир (Әјј. 14:15). Тәсәввүр етмәк олар, һәр кәс әзизинә говушанда јер үзүнү неҹә бөјүк севинҹ сәдалары бүрүјәҹәк. Өтән мәгаләдә өјрәндијимиз кими, «салеһләр» адлары һәјат китабына јазыланлардыр вә онлар «дирилиб һәјата говушаҹаг» (Һәв. 24:15; Јәһ. 5:29). Ола билсин, әзизләримизин әксәријјәти Армаҝеддондан сонра илк дирилән салеһләрин арасында олаҹаг *. Бундан әлавә, «гејри-салеһләр» дә дириләҹәк. Бу група Јеһова һаггында өјрәнмәк вә ја Она сәдагәтлә хидмәт етмәк үчүн јетәринҹә имканы олмајан инсанлар дахилдир. Онлар «дирилиб мүһакимә олунаҹаглар».

2, 3. а) Әшија 11:9, 10 ајәләринә әсасән, ҝәләҹәкдә һансы тәлим програмы һәјата кечириләҹәк? б) Бу мәгаләдә нә һагда данышаҹағыг?

² Јер үзүндә дириләнләрин һамысына тәлим вермәк лазым  ҝәләҹәк (Әшј. 26:9; 61:11). Буна ҝөрә дә бәшәр тарихиндә ән бөјүк тәлим програмы һәјата кечириләҹәк. (Әшија 11:9, 10 ајәләрини охујун.) Буна нә үчүн еһтијаҹ олаҹаг? Сәбәбләрдән бири одур ки, гејри-салеһләр Иса Мәсиһ, Падшаһлыг, фидјә, Јеһованын ады вә али һакимијјәти илә бағлы мүһүм мәсәлә барәдә өјрәнмәлидирләр. Елә салеһләрин өзүнә дә мүәјјән шејләри өјрәтмәк лазым ҝәләҹәк. Јеһова тарих боју Јер күрәсинә даир нијјәтини мәрһәләли шәкилдә ачыглајыб; онлар бунунла бағлы билмәдикләри сон мәлуматлары өјрәнәҹәкләр. Һәтта онларын арасында еләләри вар ки, Мүгәддәс Китабын јазылмасы баша чатмаздан хејли әввәл вәфат едибләр. Буна ҝөрә дә һәм гејри-салеһләрин, һәм дә салеһләрин өјрәнәҹәји чох шеј олаҹаг.   

³ Бу мәгаләдә нөвбәти суаллары мүзакирә едәҹәјик: «Ҝенишмигјаслы тәлим програмы неҹә һәјата кечириләҹәк? Бу тәлим програмынын инсанларын адынын һәјат китабына јазылыб-јазылмамасында һансы ролу олаҹаг?» Бу суалларын ҹавабыны билмәк бизим үчүн ваҹибдир. Ҝөрәҹәјимиз кими, «Дәнјал» вә «Вәһј» китабындакы һејрәтамиз пејғәмбәрликләрин бәзиләри бизә дирилмәдән сонра олаҹаг һадисәләри баша дүшмәјә көмәк едир. Әввәла, ҝәлин ҝөрәк Дәнјал 12:1, 2 ајәләриндә һансы мөһтәшәм һадисәләр пејғәмбәрлик олунуб.

4, 5. Дәнјал 12:1 ајәсиндә ахырзаманла бағлы нә ачыгланыр?

⁴ Дәнјал 12:1 ајәсини охујун. «Дәнјал» китабында ахырзаманда баш верәҹәк мөһтәшәм һадисәләрин ардыҹыллығы ачыгланыр. Мәсәлән, Дәнјал 12:1 ајәсиндән өјрәнирик ки, Микајыл, јәни Иса Мәсиһ Аллаһын «халгынын һимајәсиндә [дурур]». Пејғәмбәрлијин бу һиссәси 1914-ҹү илдә Иса Мәсиһ Аллаһын Падшаһлығынын Падшаһы тәјин олунанда јеринә јетмәјә башлајыб.   

⁵ Дәнјал һәмчинин Исанын «халглар јаранандан бәри ҝөрүнмәмиш ағыр бир зәманә» ҝәләндә «ајаға галхаҹағыны» дејир. «Ағыр зәманә» Мәтта 24:21 ајәсиндә гејд олунан «бөјүк мүсибәт»дир. Бу зәманәнин сонунда, јәни Армаҝеддонда Иса ајаға галхаҹаг, башга сөзлә, Аллаһын халгынын мүдафиәсинә кечәҹәк. «Вәһј» китабында һәмин инсанлар бөјүк мүсибәтдән чыхан бөјүк издиһам кими тәсвир олунур (Вәһј 7:9, 14).

6. Бөјүк издиһам бөјүк мүсибәтдән хилас олунандан сонра нәләр баш верәҹәк? Изаһ един. (Һәмчинин бу сајда јерүзү һәјатына дирилмәнин мүзакирә олундуғу «Охуҹуларын суаллары» мәгаләсинә бахын.)

⁶ Дәнјал 12:2 ајәсини охујун. Бөјүк издиһам ағыр зәманәдән хилас олунандан сонра нәләр баш верәҹәк? Әввәл белә баша дүшүрдүк ки, Дәнјал 12:2 ајәсиндә Аллаһын халгынын мәҹази дирилмәсиндән, јәни руһани дирчәлишиндән данышылыр *. Амма инди баша дүшүрүк ки, бурада јени дүнјада өлүләрин дирилмәси нәзәрдә тутулур. Нәјә ҝөрә белә гәнаәтә ҝәлмәк олар? «Торпаг» сөзүнә Әјјуб 17:16 ајәсиндә дә раст ҝәлинир вә орада да «Мәзар» мәнасында ишләнир. Демәли, Дәнјал 12:2 ајәсиндә Армаҝеддондан сонра олаҹаг дирилмә нәзәрдә тутулур.

7. а) «Әбәди һәјат үчүн» дирилмә дејиләндә нә нәзәрдә тутулур? б) Нәјә ҝөрә бу, «даһа јахшы дирилмә»дир?

 ⁷ Бәс Дәнјал 12:2 ајәсиндә «әбәди һәјат үчүн» дирилмә дејиләндә нә нәзәрдә тутулур? Бу, о демәкдир ки, дириләнләр миниллик һакимијјәт дөврүндә Јеһова илә Иса Мәсиһи танымаға, јахуд танымаға давам етмәјә чалышсалар вә итаәткар олмаға ҹан атсалар, сонда әбәди һәјаты алаҹаглар (Јәһ. 17:3). Бу, кечмишдә олан дирилмәләрдән «даһа јахшы дирилмә» олаҹаг (Ибр. 11:35). Нәјә ҝөрә? Чүнки һәмин гејри-камил инсанлар јенидән өлмүшдүләр.

8. «Рүсвајчылыг вә әбәди һәгарәт үчүн» дирилмә нәдир?

⁸ Амма дириләнләр арасында Јеһованын вердији тәлими гәбул етмәјәнләр дә олаҹаг. Дәнјалын пејғәмбәрлијиндә дејилир ки, бәзиләри «рүсвајчылыг вә әбәди һәгарәт үчүн» дириләҹәкләр. Онларда үсјанкарлыг руһу олаҹаг. Буна ҝөрә дә адлары һәјат китабына дүшмәјәҹәк вә әбәди һәјаты алмајаҹаглар. Онлар әбәди һәгарәтә, јәни мәһвә дүчар олаҹаглар. Демәли, Дәнјал 12:2 ајәсиндә бүтүн дириләнләрин сон агибәтиндән данышылыр вә бу, онларын дириләндән сонра едәҹәји әмәлләрдән асылыдыр * (Вәһј 20:12). Бәзиләри әбәди һәјат алаҹаг, бәзиләри исә јох.

9, 10. Бөјүк мүсибәтдән сонра башга һансы һадисә баш верәҹәк вә «ҝөј гүббәситәк парлајаҹаг» кәсләр кимләрдир?

⁹ Дәнјал 12:3 ајәсини охујун. Гаршыда бизи ҝөзләјән ағыр зәманәдән сонра башга нә баш верәҹәк? Дәнјал 12:2 ајәси илә јанашы, 3-ҹү ајәдә дә бөјүк мүсибәтдән сонра баш верәҹәк һадисәдән бәһс олунур.

¹⁰ «Ҝөј гүббәситәк… парлајаҹаг» кәсләр кимләрдир? Исанын Мәтта 13:43 ајәсиндәки сөзләри онларын кимлијини мүәјјән етмәјә бизә көмәк едир: «Салеһләр исә о вахт Аталарынын Падшаһлығында ҝүнәш кими парлајаҹаглар». Контекстдән ҝөрүндүјү кими, Иса бурада «Падшаһлығын оғуллары»ндан, јәни сәмави Падшаһлыгда онунла бирҝә хидмәт едәҹәк мәсһ олунмуш гардашларындан данышыр (Мәт. 13:38). Демәли, Дәнјал 12:3 ајәсиндә мәсһ олунмушлардан вә онларын Мәсиһин миниллик һакимијјәти дөврүндә ҝөрәҹәји ишләрдән данышылыр.

11, 12. Мин ил әрзиндә 144 000 мәсһ олунмуш һансы иши иҹра едәҹәк?

¹¹ Мәсһ олунмушлар «чохларыны салеһлијә» неҹә чатдыраҹаг? Онлар мин ил әрзиндә Иса илә сых әмәкдашлыг едәрәк тәлим програмынын иҹра олунмасында иштирак едәҹәкләр. 144 000 мәсһ олунмуш тәкҹә падшаһ кими јох, каһин кими дә хидмәт едәҹәк (Вәһј 1:6; 5:10; 20:6). Беләҹә, онлар «халгларын шәфа тапмасы»на вә бәшәријјәтин тәдриҹән әввәлки камиллијә гајытмасына көмәк едәҹәкләр (Вәһј 22:1, 2; Һизг. 47:12). Әлбәттә ки, бу, мәсһ олунмушлара һәдсиз севинҹ ҝәтирәҹәк.

¹² Бәс салеһлијә чатдырылаҹаг «чохлары» кимләрдир? Бура һәм дириләнләр, һәм дә Армаҝеддондан сағ чыханлар вә јени дүнјада доғулаҹаг ушаглар дахилдир. Артыг мин илин сонунда јер үзүндә јашајан бүтүн инсанлар камил олаҹаг. Бәс онларын  ады нә вахт һәјат китабына карандашла јох, мүрәккәблә јазылаҹаг?

13, 14. Јер үзүндә бүтүн камил инсанлар әбәди һәјаты алмамышдан әввәл нә етмәлидирләр?

¹³ Унутмајын, камил олмаг о демәк дејил ки, биз автоматик олараг әбәди һәјаты алаҹағыг. Ҝөтүрәк Адәмлә Һәвваны. Онлар да камил идиләр, амма әбәди һәјаты алмалары үчүн әввәлҹә Јеһоваја итаәткар олдугларыны ҝөстәрмәли идиләр. Тәәссүф ки, онлар итаәтсизлик етдиләр (Ром. 5:12).

¹⁴ Мин илин сонунда јер үзүндә вәзијјәт неҹә олаҹаг? Артыг һамы камил олаҹаг. Бәс бу камил инсанлар әбәдијјән Јеһованын һакимијјәтинә табе олаҹаг? Јохса бәзиләри Адәмлә Һәвва кими олаҹаг, камил олсалар да, Јеһоваја садиг галмајаҹаглар? Бу суаллар өз ҹавабыны тапмалыдыр. Амма неҹә?

15, 16. а) Нә вахт бүтүн бәшәријјәтин Јеһоваја сәдагәтини ҝөстәрмәк фүрсәти олаҹаг? б) Бу сынағын јекун нәтиҹәси нә олаҹаг?

¹⁵ Шејтан 1000 иллик буховланаҹаг. Бу вахт әрзиндә о, һеч кими алдада билмәјәҹәк. Лакин 1000 илин сонунда о, азадлыға бурахылаҹаг вә камил инсанлары јолдан чыхармаға чалышаҹаг. Бу сынаг вахты јер үзүндә јашајан бүтүн камил инсанларын Аллаһын ады вә  һакимијјәти илә бағлы мүһүм мәсәләдә мөвгеләрини ҝөстәрмәк имканы олаҹаг (Вәһј 20:7—10). Бу заман онларын неҹә давранаҹағындан адларынын һәјат китабына әбәдилик һәкк олунуб-олунмајаҹағы асылы олаҹаг.   

¹⁶ Мүәјјән сајда инсан Адәмлә Һәвва кими, Јеһованын һакимијјәтинә табе олмајаҹаг. Бәс онларын агибәти неҹә олаҹаг? Вәһј 20:15 ајәсиндә дејилир: «Ады һәјат китабында тапылмајан һәр кәс одлу ҝөлә атылды». Бәли, бу үсјанкарлар әбәдилик мәһв олунаҹаг. Амма камил инсанларын бөјүк әксәријјәти сон сынагдан башыуҹа чыхаҹаг. Онларын ады һәјат китабына әбәдилик һәкк олунаҹаг.

17. Мәләк бизим дөврүмүзлә бағлы Дәнјал пејғәмбәрә нә демишди? (Дәнјал 12:4, 8—10).

¹⁷ Ҝәләҹәкдә баш верәҹәк һадисәләри фикирләшәндә инсаны хош бир һәјәҹан бүрүјүр! Мәләк Дәнјал пејғәмбәрә һәмчинин «ахырзаманда», јәни бизим дөврүмүздә баш верәҹәк һадисәләрлә бағлы да хәбәр вермишди. (Дәнјал 12:4, 8—10 ајәләрини охујун; 2 Тим. 3:1—5.) Мәләк Дәнјал пејғәмбәрә демишди: «Һәгиги елм чохалаҹаг».  Бу, о демәк иди ки, Аллаһын халгы Дәнјалын пејғәмбәрлик сөзләрини даһа ајдын баша дүшәҹәк. О һәмчинин демишди: «Пис адамлар пислик едәҹәк. Писләрин һеч бири бу сөзләри анламајаҹаг».

18. Шәр инсанлары тезликлә һансы агибәт ҝөзләјир?

¹⁸ Бу ҝүн бизә елә ҝәлә биләр ки, шәр иш ҝөрәнләр ҹәзасыз галырлар (Мәл. 3:14, 15). Тезликлә бир Һаким кими, Иса Мәсиһ кечијәбәнзәр инсанлары салеһләрдән ајыраҹаг (Мәт. 25:31—33). Бу шәр инсанлар нә бөјүк мүсибәтдән кечәҹәкләр, нә дә јени дүнјада дириләҹәкләр. Онларын ады Мәлаки 3:16 ајәсиндә гејд олунан «хатирә китабы»нда олмајаҹаг.

19. Инди нә етмәјин вахтыдыр вә нәјә ҝөрә? (Мәлаки 3:16—18).

¹⁹ Инди шәр инсанларын арасында олмадығымызы сүбут етмәјин вахтыдыр. (Мәлаки 3:16—18 ајәләрини охујун.) Бу ҝүн Јеһова «мәхсуси мүлкү» кими јанашдығы, јәни дәјәрли һесаб етдији инсанлары топлајыр. Әлбәттә ки, биз дә онларын арасында олмаг истәјирик.

20. Јеһова Дәнјала сонда һансы вәди вермишди? Бу вәдин јеринә јетмәсини нәјә ҝөрә һәсрәтлә ҝөзләјирсиниз?

²⁰ Һәгигәтән дә, биз чох мараглы бир дөврдә јашајырыг. Амма бизи гаршыда даһа мөһтәшәм һадисәләр ҝөзләјир. Тезликлә биз бүтүн писликләрин мәһвинин шаһиди олаҹағыг. Бундан сонра исә Јеһованын Дәнјала вердији сөзүн јеринә јетдијини ҝөрәҹәјик: «Дөврүн тамамында исә сәнә дүшән пајы алмаг үчүн галхаҹагсан» (Дән. 12:13). Бәс сиз һәм Дәнјал пејғәмбәрин, һәм дә әзизләринизин «галхаҹағы» ҝүнү һәсрәтлә ҝөзләјирсиниз? Онда Јеһоваја садиг галмаг үчүн вар ҝүҹүнүзлә чалышын вә әмин олун ки, белә етсәниз, адыныз Јеһованын һәјат китабындан силинмәјәҹәк.