1, 2. а) Јеһова Аллаһ «Ағанын шам јемәји» мәрасиминә топлашан милјонларла инсана баханда нә ҝөрүр? (Үз габығындакы шәклә бахын.) б) Бу мәгаләдә нәји мүзакирә едәҹәјик?

СИЗҸӘ, бүтүн дүнјада милјонларла инсан «Ағанын шам јемәји» мәрасимини гејд етмәк үчүн бир араја топлашанда Јеһова Аллаһ нәјә диггәт јетирир? О, бөјүк инсан күтләсинә јох, бу ҝөрүшдә иштирак едән һәр бир кәсә ајры-ајрылыгда нәзәр салыр. Мисал үчүн, О, сәдагәтлә һәр ил бу тәдбирә ҝәлән инсанлары ҝөрүр. Бәлкә дә, онларын арасында манеәләрә бахмајараг бу ҝөрүшә ҝәләнләр вар. Бәзиләри исә диҝәр ҝөрүшләрә мүнтәзәм ҝәлмәсәләр дә, анма мәрасиминә гатылмағы ваҹиб билирләр. Јеһова һәтта бу мәрасимә илк дәфә олараг, бәлкә дә, мараг хатиринә ҝәләнләрә дә фикир верир.

² Сөзсүз ки, Јеһова анма мәрасиминә бу гәдәр инсанын ҝәлдијини ҝөрәндә севинир (Лука 22:19). Бунунла белә, Онун үчүн әсас бу мәрасимә гатыланларын сајы дејил. Онун үчүн даһа ваҹиб инсанларын һансы мәгсәдлә ҝәлмәсидир. Бу мәгаләдә ваҹиб бир суалын ҹавабыны арашдыраҹағыг: Нә үчүн тәкҹә һәр ил кечирилән анма мәрасиминә јох, Јеһованын Ону севән бәндәләри үчүн тәсис етдији һәфтәлик ҝөрүшләрә дә гатылмалыјыг?

3, 4. а) Нәјә ҝөрә јығынҹаг ҝөрүшләриндә иштирак едирик? б) Јығынҹагларда иштиракымыз бизим һаггымызда нә дејир? ҹ) 1 Коринфлиләрә 11:23—26 ајәләри анма мәрасиминә гатылмағын ваҹиблијини неҹә ҝөстәрир?

³ Јығынҹагда иштирак етмәјимизин башлыҹа сәбәби бунун ибадәтимизин бир һиссәси олмасыдыр. Һәмчинин јығынҹаглара Јеһовадан тәлим алмаг үчүн ҝедирик. Гүрурлу инсанлар дүшүнүр ки, онлара нә исә өјрәтмәјә еһтијаҹ јохдур (3 Јәһ. 9). Онлардан фәргли олараг, бизләр Јеһованын вә Онун тәшкилатынын бизи өјрәтмәсинә ҹан атырыг (Әшј. 30:20; Јәһ. 6:45).

 ⁴ Ҝөрүшләрдә иштирак етмәклә тәвазөкар олдуғумузу — өјрәнмәјә мејилли вә һазыр олдуғумузу ҝөстәририк. Анма мәрасиминдә садәҹә борҹ һиссиндән ирәли ҝәләрәк дејил, Мәсиһин «хатирәми јад етмәк үчүн буну һәмишә един» әмринә тәвазөкарлыгла табе олдуғумуз үчүн иштирак едирик. (1 Коринфлиләрә 11:23—26 ајәләрини охујун.) Бу мәрасим ҝәләҹәјә үмидимизи даһа да мөһкәмләндирир вә Јеһованын бизи нә гәдәр чох севдијини хатырладыр. Бунунла белә, Јеһова билир ки, руһланыб мөһкәмләнмәјә илдә бир дәфә јох, даһа чох еһтијаҹ дујуруг. Буна ҝөрә дә О, һәр һәфтә бизим үчүн ҝөрүшләр тәсис едиб вә бизим бу ҝөрүшләрдә иштирак етмәјимизи истәјир. Тәвазөкарлыг бизи Она итаәт етмәјә тәшвиг едир. Һәр һәфтә бу ҝөрүшләрә һазырлашмаг вә орада иштирак етмәк үчүн бир нечә саат вахт ајырырыг.

5. Нәјә ҝөрә тәвазөкар инсанлар Јеһованын дәвәтинә һај верир?

⁵ Јеһова инсанлары Ондан тәлим алмаға дәвәт едир вә һәр ил чохлу сајда тәвазөкар инсан бу дәвәти гәбул едир (Әшј. 50:4). Адәтән, онлар әввәлҹә анма мәрасиминдә иштирак едир, сонрадан исә диҝәр ҝөрүшләрә дә гатылмаға башлајырлар (Зәк. 8:20—23). Бизим үчүн јени ҝәләнләрлә бирҝә Јеһовадан — Имдадымыз вә Хиласкарымыздан тәлим вә рәһбәрлик алмаг олдугҹа хошдур (Зәб. 40:17). Доғрудан да, Јеһова Аллаһ вә севимли Оғлу Иса Мәсиһдән тәлим алмаг дәвәтини гәбул етмәкдән даһа хош, даһа ваҹиб нә ола биләр?! (Мәт. 17:5; 18:20; 28:20).

6. Тәвазөкарлыг хүсусијјәти бир нәфәрә анма мәрасиминә ҝәлмәјә неҹә көмәк етмишди?

⁶ Биз һәр ил Мәсиһин өлүмүнү анма мәрасиминә мүмкүн гәдәр чох инсаны дәвәт етмәјә чалышырыг. Чох сајда тәвазөкар инсан дәвәтимизи гәбул етмәјин фајдасыны ҝөрүб. Ҝәлин бир нечә ил бундан әввәл баш вермиш бир һадисәјә нәзәр салаг. Гардашымыз бир кишијә анма мәрасиминә дәвәтнамә верир, киши исә иштирак едә билмәјәҹәјини дејир. Лакин мәрасимин кечирилдији ҝүн гардашымыз һәмин кишинин ибадәт евинә ҝәлдијини ҝөрәндә ҝөзләринә инана билмир. Баҹы-гардашларын меһрибан мүнасибәти бу кишијә о гәдәр хош тәсир едир ки, о, һәр һәфтә кечирилән ҝөрүшләрә ҝәлмәјә башлајыр. Белә ки, о, ил әрзиндә кечирилән ҝөрүшләрдән ҹәми үчүндә иштирак етмир. Она бүтүн ҝөрүшләрә гатылмаға нә көмәк етмишди? Кифајәт гәдәр һәлим олмасы сајәсиндә о, дүшүнҹәсини дәјишмәјә һазыр иди. Һәмин кишини дәвәт едән гардаш онун һагда дејир: «О, чох тәвазөкар инсандыр». Шүбһәсиз, Јеһова бу кишини Өзүнә ибадәт етмәк үчүн ҹәлб едиб вә һал-һазырда о, вәфтиз олунмуш гардашдыр (2 Ишм. 22:28; Јәһ. 6:44).

7. Јығынҹагларда өјрәндикләримиз вә Мүгәддәс Китабдан охудугларымыз тәвазөкар олмағымыза неҹә көмәк едир?

⁷ Јығынҹагларда өјрәндикләримиз вә Мүгәддәс Китабдан охудугларымыз тәвазөкар олмағымыза көмәк едир. Анма мәрасиминдән өнҹәки һәфтәләр әрзиндә кечирилән ҝөрүшләримиздә диггәт чох вахт Иса Мәсиһин нүмунәсинә вә өз һәјатыны гурбан вермәклә ҝөстәрдији тәвазөкарлыға јөнәлдилир. Һәмчинин мәрасимдән өнҹәки ҝүнләр Мүгәддәс Китабдан Иса Мәсиһин өлүмү вә дирилмәси илә бағлы ајәләри охумаға тәшвиг олунуруг. Ибадәт ҝөрүшләриндә өјрәндикләримиз вә Мүгәддәс Китабдан охудугларымыз сајәсиндә Иса Мәсиһин бизим үчүн вердији гурбанлыға миннәтдарлығымыз даһа да артыр. Бу бизи Иса кими һәлим олмаға вә һәтта чәтин оланда белә, Јеһова Аллаһын истәјини јеринә јетирмәјә тәшвиг едир (Лука 22:41, 42).

8. Иса Мәсиһ неҹә ҹәсарәт ҝөстәрмишди?

⁸ Биз һәмчинин Иса Мәсиһин ҹәсарәтиндән өрнәк алмаға чалышырыг. Өлүмүндән бир нечә ҝүн өнҹә онун ҝөстәрдији ҹәсарәт һагда дүшүнүн. Иса тезликлә дүшмәнләринин ону алчалдаҹағыны, ишҝәнҹә вериб едам едәҹәјини јахшы билирди (Мәт. 20:17—19). Бунунла белә, о, өлүмүн ҝөзүнә дик бахды. Вахт јетишәндә Ҝетсемани бағында онунла бирҝә олан садиг һәвариләринә дејир: «Дурун ҝедәк. Хаин јахынлашыр» (Мәт. 26:36, 46). Бир дәстә силаһланмыш инсан Исаны тутмаға ҝәләндә о, габаға чыхыб өзүнү таныдыр вә әсҝәрләрә һәвариләри бурахмаларыны сөјләјир (Јәһ. 18:3—8). Иса неҹә дә бөјүк ҹәсарәт ҝөстәрмишди! Бу ҝүн мәсһ олунмуш мәсиһиләр вә башга гојунлар ҹәсарәтли давранмагла Иса Мәсиһә бәнзәмәјә ҹан атырлар. Неҹә?

9. а) Нәјә ҝөрә мүнтәзәм олараг јығынҹаглара гатылмаг үчүн ҹәсарәт ҝөстәрмәк лазым ҝәлә биләр? б) Бизим нүмунәмиз етигадларына ҝөрә һәбсдә олан баҹы-гардашлара неҹә тәсир едир?

⁹ Үзләшдијимиз чәтинликләрә бахмајараг, јығынҹагларда мүнтәзәм иштирак етмәк үчүн ҹәсарәт ҝөстәрмәк лазым ола биләр. Баҹы-гардашларымызын бәзиләри кәдәрә, руһ дүшкүнлүјүнә вә ја сәһһәтләриндәки проблемләрә рәғмән, јығынҹаглара ҝәлир. Диҝәрләри аилә үзвләри вә ја һөкумәт тәрәфиндән сәрт тәгибләрә бахмајараг, ҹәсарәт ҝөстәриб ҝөрүшләрә гатылырлар. Бизим нүмунәви давранышымызын етигадларына ҝөрә һәбсдә олан баҹы-гардашлары неҹә руһландырдығыны бир тәсәввүр един (Ибр. 13:3). Сынаглара рәғмән Јеһоваја хидмәт етмәјә давам етдијимизи ешидәндә онларын иманларыны, ҹәсарәтләрини, сәдагәтләрини горумаг әзми даһа да мөһкәмләнир. Белә бир шеј һәвари Булусун да башына ҝәлмишди. О, Ромада һәбсдә олан вахт баҹы-гардашларын сәдагәтлә Аллаһа хидмәт етдијини ешидәндә чох севинмишди (Филип. 1:3—5, 12—14). Һәбсдән азад едиләндән гыса мүддәт сонра Булус ибраниләрә мәктуб јазмышды. Мәктубунда бу садиг мәсиһиләри «даим гардашлыг мәһәббәти» ҝөстәрмәјә вә һеч вахт јығынҹаглардан галмамаға тәшвиг етмишди (Ибр. 10:24, 25; 13:1).

10, 11. а) Анма мәрасиминә кимләри дәвәт етмәлијик? б) Ефеслиләрә 1:7 ајәсинә әсасән, буну нә үчүн едирик?

¹⁰ Гоһумларымызы, иш јолдашларымызы вә гоншуларымызы анма мәрасиминә дәвәт етмәклә ҹәсарәт ҝөстәрмиш олуруг. Биз онлары нә үчүн дәвәт едирик? Чүнки үрәјимиздә Јеһоваја вә Иса Мәсиһә бизим үчүн етдикләринә ҝөрә елә бөјүк миннәтдарлыг вар ки, онлары бу мәрасимә дәвәт етмәјә билмәрик. Истәјирик ки, онлар да Јеһованын фидјә васитәсилә ҝөстәрдији лүтфдән бәһрәләнсинләр. (Ефеслиләрә 1:7 ајәсини охујун; Вәһј 22:17.)

¹¹ Ҹәсарәт ҝөстәриб бирҝә топлашмагла башга бир ҝөзәл хүсусијјәти тәзаһүр етдирмиш олуруг. Јеһова Аллаһ вә Иса Мәсиһ бу хүсусијјәти бир чох саһәләрдә мөһтәшәм тәрздә тәзаһүр етдирир.

12. а) Ибадәт ҝөрүшләримиз Јеһова Аллаһа вә Иса Мәсиһә мәһәббәтимизи неҹә мөһкәмләндирир? б) 2 Коринфлиләрә 5:14, 15 ајәләри Иса Мәсиһдән һансы саһәдә өрнәк алмаға тәшвиг едир?

¹² Јеһова Аллаһа вә Иса Мәсиһә мәһәббәт  бизи јығынҹаглара гатылмаға тәшвиг едир. Орада өјрәндикләримиз исә Јеһова вә Онун Оғлуна мәһәббәтимизи даһа да мөһкәмләндирир. Јығынҹаг ҝөрүшләриндә онларын бизим үчүн етдикләри даима вурғуланыр (Ром. 5:8). Хүсусилә дә анма мәрасиминдә онларын бизә вә һәтта фидјәнин дәјәрини анламајан кәсләрә неҹә бөјүк мәһәббәт ҝөстәрдијини ешидирик. Үрәјимиздә ашыб-дашан миннәтдарлыг һиссиндән ирәли ҝәләрәк һәр ҝүнүмүзү Мәсиһдән өрнәк алараг јашамаға чалышырыг. (2 Коринфлиләрә 5:14, 15 ајәләрини охујун.) Бундан әлавә, үрәјимиз бизи фидјәјә ҝөрә Јеһованы мәдһ етмәјә тәшвиг едир. Ону мәдһ етмәјин бир үсулу исә ибадәт ҝөрүшләриндә сәмими шәрһләр вермәкдир.

13. Јеһова Аллаһа вә Иса Мәсиһә дәрин мәһәббәт бәсләдијимизи неҹә ҝөстәрә биләрик? Изаһ един.

¹³ Јеһова Аллаһа вә Иса Мәсиһә нә гәдәр дәрин мәһәббәт дујдуғумузу онлар үчүн мүәјјән гурбанлар вермәјә һазыр олмагла ҝөстәрә биләрик. Ибадәт ҝөрүшләриндә иштирак етмәк үчүн чох вахт мүхтәлиф гурбанлар вермәли олуруг. Бир чох јығынҹагларда ибадәт ҝөрүшләринин бири иш ҝүнүн сонуна, чохларынын јорғун олдуғу вахта, диҝәр ҝөрүш исә һәфтәсонуна, инсанларын истираһәт етдији вахта тәсадүф едир. Јеһова јорғун олмағымыза рәғмән, бу ҝөрүшләрдә иштирак етдијимизә фикир верир? Әлбәттә! Јығынҹаглара ҝәлмәкдән өтәри нә гәдәр ҹан гојдуғумузу ҝөрәндә Она бәсләдијимиз мәһәббәт Јеһова үчүн даһа да дәјәрли олур (Марк 12:41—44).

14. Иса Мәсиһ фәдакар мәһәббәт ҝөстәрмәклә бағлы һансы нүмунәни гојуб?

¹⁴ Иса Мәсиһ фәдакар мәһәббәт бәсләмәклә бағлы бизә нүмунә гојуб. О, илк нөвбәдә буну шаҝирдләри уғрунда өлмәјә һазыр олмагла ҝөстәрди. Үстәлик, Мәсиһ һәр ҝүнүнү онларын марағыны өзүнүнкүндән үстүн тутараг јашамаға һазыр иди. Мисал үчүн, Иса јорғун олса да, емосионал ҝәрҝинлик кечирсә дә, давамчыларына вахт ајырырды (Лука 22:39—46). О, диггәтини инсанлардан нә ала биләҹәјинә јох, онлара нә верә биләҹәјинә ҹәмләјирди (Мәт. 20:28). Бизим дә Јеһоваја вә баҹы-гардашлара мәһәббәтимиз белә ҝүҹлү олса, анма мәрасиминдә, еләҹә дә диҝәр ибадәт ҝөрүшләриндә иштирак етмәк үчүн әлимиздән ҝәләни едәҹәјик.

15. Кимләрә көмәк етмәјә хүсусилә ҹан атырыг?

¹⁵ Бу дүнјада јалныз бир әсл мәсиһи  гардашлығы вар. Бу гардашлығын үзвләри олан бизләр башгаларынын да бизә гошулмасына көмәк етмәк үчүн баҹардығымыз гәдәр чох вахт сәрф едирик. Бунунла белә, гејри-фәал олан «иман гардашларымыза» көмәк етмәјә хүсусилә ҹан атырыг (Гал. 6:10). Бу баҹы-гардашлары ҝөрүшләрә, әләлхүсус анма мәрасиминә ҝәлмәјә тәшвиг етмәклә онлара мәһәббәтимизи сүбут едирик. Јеһова вә Иса Мәсиһ кими, биз дә гејри-фәал диндашымызын мәһәббәтли Атамыз вә Чобанымыз Јеһоваја ҝери дөндүјүнү ҝөрәндә һәдсиз дәрәҹәдә севинирик (Мәт. 18:14).

16. а) Бир-биримизи неҹә руһландыра биләрик вә јығынҹагларын бизә һансы фајдасы олаҹаг? б) Нәјә ҝөрә Иса Мәсиһин Јәһја 3:16 ајәсиндә јазылмыш сөзләрини хатырламағын инди әсл вахтыдыр?

¹⁶ Нөвбәти һәфтәләрдә 19 апрел 2019-ҹу ил тарихиндә кечириләҹәк анма мәрасиминә баҹардығыныз гәдәр чох инсаны дәвәт един. (« Онлары дәвәт едәҹәксиниз?» адлы чәрчивәјә бахын.) Јеһованын тәсис етдији ҝөрүшләрдә мүнтәзәм олараг иштирак едәрәк бир-биринизи руһландырын. Бу дүнјанын сону јахынлашыр, одур ки, тәвазөкар, ҹәсарәтли вә мәһәббәтли олмаг үчүн ибадәт ҝөрүшләриндә иштирак етмәјә даһа чох еһтијаҹымыз вар (1 Салон. 5:8—11). Ҝәлин Јеһова Аллаһын вә Иса Мәсиһин бизә дујдуғу дәрин мәһәббәтә сәмими-гәлбдән гаршылыг верәк! (Јәһја 3:16 ајәсини охујун.)