1, 2. а) Өлән әзизимизи хүсусилә нә вахт хатырлајырыг? б) Өлүмүндән өнҹәки ҝеҹә Иса давамчыларына нәји бујурмушду?

 БИЗӘ әзиз олан инсанларын өлүмүндән узун илләр кечсә дә, биз онлары унутмуруг. Хүсусилә дә онлары өлүмләринин ил дөнүмүндә хатырлајырыг.

² Һәр ил, биз дә дахил олмагла, дүнјанын мүхтәлиф өлкәләриндә милјонларла инсан севдијимиз шәхсин, Иса Мәсиһин өлүмүнүн ил дөнүмүнү гејд етмәк үчүн бир јерә топлашыр (1 Бут. 1:8). Һәмин ҝүн бизи өлүмдән вә ҝүнаһдан гуртармаг үчүн өз ҹаныны гурбан верән бу шәхси јад едирик (Мәт. 20:28). Иса Мәсиһ өзү дә истәјирди ки, давамчылары онун өлүмүнү јад етсинләр. Елә өлүмүндән өнҹәки ҝеҹә о, хүсуси бир мәрасим тәсис етди вә белә бир әмр верди: «Хатирәми јад етмәк үчүн буну һәмишә един» (Лука 22:19).

3. Бу мәгаләдә нә өјрәнәҹәјик?

³ Иса Мәсиһин өлүмүнү анма мәрасиминдә иштирак едәнләрдән кичик бир груп ҝөјдә јашамаг үмидинә саһибдир. Анма мәрасиминә јер үзүндә јашамаг үмидинә саһиб олан милјонларла инсанлар да гатылыр. Бу мәгаләдә арашдыраҹағыг ки, нәјә ҝөрә бу ики груп инсан һәр ил анма мәрасиминдә иштирак етмәјә ҹан атыр вә бунун онлара һансы фајдасы вар. Әввәлҹә ҝәлин ҝөрәк мәсһ олунмушлар бу мәрасимдә һансы сәбәбләрә ҝөрә иштирак едир.

4. Мәсһ олунмушлар нә үчүн анма мәрасиминдәки чөрәк вә шәрабдан гәбул едир?

⁴ Һәр ил кечирилән анма мәрасиминдә мәсһ олунмушлар символлардан, чөрәк вә шәрабдан гәбул едир. Нәјә ҝөрә? Бунун ҹавабыны билмәк үчүн ҝәлин Исанын јерүзү һәјатынын сон ҝеҹәси баш верәнләрә нәзәр салаг. Иса Пасха јемәјиндән сонра «Ағанын шам јемәји» адланан мәрасим тәсис етди. О, шәрабы вә чөрәји он бир һәварисинә өтүрүб демишди ки, шәрабдан ичиб, чөрәкдән јесинләр. Иса онлара ики әһд һаггында, јени әһд вә Падшаһлыг әһди һагда данышмышды * (Лука 22:19, 20, 28—30). Бу әһдләр һәвариләрин вә мәһдуд сајда олан диҝәр инсанларын ҝөјдә падшаһ вә каһин кими хидмәт етмәсинә јол ачды (Вәһј 5:10; 14:1). Мәсһ олунмушларын јер үзүндә галан һиссәси бу ики әһдә дахил олдуглары үчүн анма мәрасиминдә чөрәк вә шәрабдан јалныз онлар гәбул едә биләр.

5. Мәсһ олунмушлар үмидләри илә бағлы нәји дәрк едирләр?

⁵ Мәсһ олунмушлар башга бир сәбәбә ҝөрә дә анма мәрасиминдә бөјүк һәвәслә иштирак едирләр. Мәрасим заманы онларын ҝөјләр үмиди һаггында дүшүнмәк имканлары олур. Јеһова онлара һејрәтамиз бир үмид вериб. Онлар ҝөјдә өлмәзлији вә чүрүмәзлији алаҹаглар. Ҝөјләрә уҹалмыш Иса Мәсиһлә вә 144 000-ин галаны илә бирликдә хидмәт едәҹәкләр. Ән әсасы исә Јеһованын һүзурунда олаҹаглар (1 Кор. 15:51—53; 1 Јәһ. 3:2). Мәсһ олунмушлар ҝөјдә бу ҹүр немәтләр алмаг үчүн дәвәт олунсалар да, дәрк едирләр ки, бунун үчүн өлүмә гәдәр садиг галмалыдырлар (2 Тим. 4:7, 8). Ҝөјләр үмидләри һаггында дүшүнмәк мәсһ олунмушлара бөјүк севинҹ бәхш едир (Тит. 2:13). Бәс «башга гојунлар» һаггында нә демәк олар? (Јәһ. 10:16). Онлар анма мәрасиминдә һансы сәбәбләрә ҝөрә иштирак едирләр?

6. Нәјә ҝөрә «башга гојунлар» һәр ил анма мәрасиминдә иштирак едир?

⁶ «Башга гојунлар» анма мәрасиминдә символлардан истифадә етмирләр, онлар мүшаһидәчи гисминдә мәрасимә гатылырлар. 1938-ҹи илдә јер үзүндә јашамаг үмидинә саһиб оланлар илк дәфә анма мәрасиминә хүсуси олараг дәвәт олунмушдулар. «Ҝөзәтчи гүлләси» журналынын 1938-ҹи ил 1 март сајында дејилир: «“Башга гојунларын” бу мәрасимдә иштирак етмәси тамамилә дүзҝүндүр вә мүнасибдир... Бу онлар үчүн дә севиндириҹи ҝүн олмалыдыр вә еләдир ки вар». Тоја ҝәлән гонаглар мәрасими севинҹлә изләдији кими, анма мәрасиминдә иштирак едән башга гојунлар да мәрасими севинҹлә изләјирләр.

7. Нәјә ҝөрә «башга гојунлар» үчүн анма мәрасиминдә сөјләнилән нитг өнәм дашыјыр?

⁷ Јерүзү үмидинә саһиб оланлар да анма мәрасиминдә иштирак едән заман үмидләри һаггында дүшүнүрләр. Анма мәрасиминдә сөјләнилән нитг онлар үчүн чох өнәмлидир. Чүнки нитгдә әсас етибары илә Мәсиһин вә 144 000 һәмварисинин садиг инсанлар үчүн едәҹәји ишләрдән данышылыр. Иса Мәсиһин миниллик һакимијјәти заманы мәсһ олунмушлар јер үзүнүн ҹәннәтә чеврилмәсинә вә бәшәријјәтин камиллијә јетишмәсинә көмәк едәҹәк. Ҝөрүн инди анма  мәрасиминдә мүшаһидәчи гисминдә иштирак едән милјонларла инсан Мүгәддәс Китабын ҝәләҹәклә бағлы пејғәмбәрликләринин, мәсәлән, Әшија 35:5, 6; 65:21—23 вә Вәһј 21:3, 4 ајәләриндә јазылан пејғәмбәрликләрин јеринә јетдији дөврү тәсәввүрләриндә ҹанландыранда неҹә севинир. Өзләрини әзизләри илә бирликдә јени дүнјада ҹанландыранда онларын ҝәләҹәјә үмидләри ҝүҹләнир вә Јеһоваја даима хидмәт етмәк гәтијјәтләри артыр (Мәт. 24:13; Гал. 6:9).

8. Јерүзү Ҹәннәтдә јашамаға үмид едәнләр башга һансы сәбәбә ҝөрә анма мәрасиминдә иштирак едирләр?

⁸ Ҝәлин јерүзү Ҹәннәтдә јашамаға үмид едәнләрин анма мәрасиминдә иштирак етмәсинин диҝәр сәбәбинә нәзәр салаг. Онлар мәсһ олунмушлары севдикләрини вә онлара дајаг олдугларыны ҝөстәрмәк истәјирләр. Аллаһын Кәламында пејғәмбәрлик олунмушду ки, мәсһ олунмушларла јерүзү үмидинә саһиб оланлар арасында сых бир бағлылыг олаҹаг. Ҝәлин бир нечә нүмунәни нәзәрдән кечирәк.

9. Зәкәријјә 8:23 ајәсиндәки пејғәмбәрликдә «башга гојунларын» мәсһ олунмушлара мүнасибәти һагда нә дејилир?

⁹ Зәкәријјә 8:23 ајәсини охујун. Бу пејғәмбәрлик башга гојунларын мәсһ олунмуш баҹы-гардашларына олан һиссләрини ҝөзәл тәсвир едир. Бурада «бир јәһуди» вә «сәнинлә» сөзләри ејни груп инсана — мәсһ олунмушларын јер үзүндә галан һиссәсинә аиддир (Ром. 2:28, 29). «Бүтүн халглардан олан, мүхтәлиф дилләрдә данышан он адам» исә башга гојунлары тәмсил едир. Онларын јәһудинин әтәјиндән јапышмасы о демәкдир ки, онлар сәдагәтлә пак ибадәтдә мәсһ олунмушлара гошулурлар. Демәли, башга гојунлар анма мәрасиминдә иштирак етмәклә мәсһ олунмушлара сых бағлы олдугларыны ҝөстәрирләр.

10. Һизгијал 37:15—19, 24, 25 ајәләриндәки пејғәмбәрлији Јеһова неҹә јеринә јетирди?

¹⁰ Һизгијал 37:15—19, 24, 25 ајәләрини охујун. Пејғәмбәрлијин иҹрасы белә олду: Јеһова мәсһ олунмушларла башга гојунлары бирләшдирди, араларында сарсылмаз бирлик јаратды. Пејғәмбәрликдә ики чубуг һаггында данышылыр. Ҝөјләр үмидинә саһиб оланлар «Јәһуда үчүн» олан чубуг кимидирләр, чүнки Исраил падшаһлары бу гәбиләдән сечилирди. Јер үзүндә јашамаға үмид едәнләр исә «Әфраимин чубуғу» кимидирләр *. Јеһова бу ики групу бирләшдириб ки, онлар «бир чубуг» олсунлар. Бу о демәкдир ки, онлар бир падшаһын, Иса Мәсиһин идарәчилији алтында вәһдәт ичиндә хидмәт едирләр. Һәр ил мәсһ олунмушларла башга гојунлар анма мәрасиминә ики груп шәклиндә јох, «бир чобанын» нәзарәти алтында «бир сүрү» шәклиндә гатылырлар (Јәһ. 10:16).

11. Мәтта 25:31—36, 40 ајәләриндә кимләрдән сөһбәт ҝедир вә онлар Мәсиһин гардашларына әсас етибарилә неҹә дајаг олурлар?

¹¹ Мәтта 25:31—36, 40 ајәләрини охујун. Бу мәсәлдәки «гојунлар» јер үзүндә јашамаг үмиди олан вә ахырзаманда јашајан салеһ инсанлары тәмсил едир, јәни «башга гојунлары». Онлар Мәсиһин гардашларынын јер үзүндә галан һиссәсинә сәдагәтлә дајаг олурлар. Неҹә? Әсас етибарилә онлара үзәрләринә дүшән бөјүк мәсулијјәти — бүтүн дүнјада тәблиғ вә шаҝирд һазырламаг ишини иҹра етмәјә көмәк едирләр (Мәтта 24:14; 28:19, 20).

12, 13. «Башга гојунлар» Мәсиһин гардашларына даһа һансы јолларла дәстәк олур?

¹² Һәр ил анма мәрасиминдән өнҹәки  һәфтәләр әрзиндә «башга гојунлар» бүтүн дүнјада кечирилән кампанијада иштирак едәрәк мараглананлары мәрасимә дәвәт едирләр. Бунунла да Мәсиһин гардашларына дәстәк олдугларыны ҝөстәрирләр. (« Анма мәрасиминә һазырлашырсыныз?» адлы чәрчивәјә бахын.) Һәмчинин онлар лазыми тәдбирләр ҝөрүрләр ки, һәтта әксәр јығынҹагларда символлардан гәбул едән олмаса да, бүтүн јығынҹаглар анма мәрасимини гејд едә билсин. Мәсиһин гардашларына бу јолларла дәстәк олмаг онлара бөјүк севинҹ ҝәтирир. Онлар билир ки, Исанын мәсһ олунмуш гардашлары үчүн етдикләринә Иса елә јанашыр ки, санки онун үчүн едибләр (Мәтта 25:37—40).

¹³ Үмидимиздән асылы олмајараг, башга һансы сәбәбләрә ҝөрә һамымыз анма мәрасиминдә иштирак едирик?

14. Јеһова вә Иса Мәсиһ бизә олан дәрин мәһәббәтләрини неҹә тәзаһүр етдирибләр?

¹⁴ Јеһоваја вә Иса Мәсиһә бизә ҝөстәрдикләри мәһәббәтә ҝөрә миннәтдарыг. Јеһова бизи севдијини мүхтәлиф үсулларла ҝөстәриб, амма биздән өтрү әзиз Оғлунун әзаб чәкиб өлмәсинә изин вермәси мәһәббәтинин ән бөјүк изһарыдыр (Јәһ. 3:16). Билирик ки, Иса Мәсиһ дә бизим уғрумузда ҹанла-башла өлүмә ҝетмәклә бизә олан дәрин мәһәббәтини ҝөстәриб (Јәһ. 15:13). Биз Јеһованын вә Исанын бизә олан мәһәббәтинин әвәзини һеч вахт верә билмәрик. Амма һәјат тәрзимизлә онлара миннәтдар олдуғумузу ҝөстәрә биләрик (Кол. 3:15). Онларын мәһәббәтини хатырламаг вә онлара өз севҝимизи ҝөстәрмәк үчүн һәр ил анма мәрасиминдә иштирак едирик.

15. Нәјә ҝөрә һәм мәсһ олунмушлар, һәм дә «башга гојунлар» фидјәјә чох дәјәр верир?

¹⁵ Фидјәјә ҝөрә миннәтдарыг (Мәт. 20:28). Мәсһ олунмушлар фидјәни чох гијмәтләндирирләр, чүнки бунун сајәсиндә онларын мөһтәшәм үмидләри вар. Мәсиһин гурбанлығына иман етдикләри үчүн Јеһова онлары салеһ сајыр вә өвладлыға ҝөтүрүр (Ром. 5:1; 8:15—17, 23). Башга гојунлар да фидјәјә ҝөрә миннәтдарды. Фидјәјә иман сајәсиндә Аллаһын ҝөзүндә тәмиз сајылырлар, онлара мүгәддәс хидмәти иҹра етмәк шәрәфи нәсиб олуб вә «бөјүк мүсибәтдән» хилас олмаг үмидләри вар (Вәһј 7:13—15). Мәсһ олунмушларын вә башга гојунларын фидјәјә миннәтдарлыгларыны ҝөстәрмәјин бир үсулу һәр ил анма мәрасиминдә иштирак етмәкдир.

16. Даһа һансы сәбәбә ҝөрә анма мәрасиминдә иштирак едирик?

¹⁶ Бизим анма мәрасиминдә иштирак етмәјимизин диҝәр сәбәби Исанын әмринә итаәт етмәк истәмәјимиздир. Иса анма мәрасимини тәсис етдији ҝеҹә белә демишди: «Хатирәми јад етмәк үчүн буну һәмишә един» (1 Кор. 11:23, 24). Һансы үмидә саһиб олмағымыздан асылы олмајараг, һәр биримиз шәхсән бу әмрә әмәл етмәк истәјирик.

17. Анма мәрасими Јеһоваја јахынлашмағымыза неҹә көмәк едир?

¹⁷ Јеһоваја јахынлашырыг (Јаг. 4:8). Өјрәндијимиз кими, анма мәрасими заманы бизим имканымыз олур ки, Јеһованын бизә вердији ҝерчәк үмид һаггында вә Онун түкәнмәз мәһәббәти барәдә дүшүнәк (Әрм. 29:11; 1 Јәһ. 4:8—10). Бу да, өз нөвбәсиндә, бизим Јеһоваја мәһәббәтимизи артырыр вә арамыздакы бағлары ҝүҹләндирир (Ром. 8:38, 39).

18. Исанын нүмунәси бизи нәјә тәшвиг едир?

 ¹⁸ Исадан нүмунә ҝөтүрмәјә тәшвиг олунуруг (1 Бут. 2:21). Анма мәрасими әрәфәсиндә биз Мүгәддәс Китабдан Исанын јерүзү һәјатынын сон һәфтәси, өлүмү вә дирилмәси һаггында охујуруг. Анма мәрасими ҝүнү исә сөјләнилән нитг Исанын бизә мәһәббәтини хатырладыр (Ефес. 5:2; 1 Јәһ. 3:16). Беләҹә, Исанын сүрдүјү фәдакар һәјат һаггында охујуб, үзәриндә дүшүнәндә бизим дә үрәјимиздә «онун ҝетдији јолла» ҝетмәк истәји ојаныр (1 Јәһ. 2:6).

19. Биз Јеһованын мәһәббәтиндән ајрылмамаг үчүн нә етмәлијик?

¹⁹ Јеһованын мәһәббәтиндән ајрылмамаг үчүн даһа гәтијјәтли олуруг (Јһд. 20, 21). Биз Јеһованын әмринә риајәт етмәк, адыны уҹалтмаг, гәлбини шад етмәк үчүн әлимиздән ҝәләни етмәклә Онун мәһәббәтиндә гала биләрик (Мәс. 27:11; Мәт. 6:9; 1 Јәһ. 5:3). Анма мәрасимини гејд етмәк бизим һәр ҝүн Јеһоваја сәдагәтлә өмүр сүрмәк гәтијјәтимизи артырыр. Бунунла санки белә дејирик: «Сәнин мәһәббәтиндән һеч вахт ајрылмаг истәмирәм!»

20. Анма мәрасиминдә иштирак етмәк үчүн һансы әсаслы сәбәбләримиз вар?

²⁰ Ҝөјдә вә ја јер үзүндә јашамаг үмидимиздән асылы олмајараг, һәр биримизин анма мәрасиминдә иштирак етмәк үчүн әсаслы сәбәбләри вар. Һәр ил бу ҝүнү гејд етмәк үчүн топлашмагла бизә әзиз олан инсанын, Иса Мәсиһин өлүмүнү анырыг. Ән әсасы исә биз мәһәббәтин ән бөјүк тәҹәссүмүнү, Јеһованын Иса Мәсиһи бизим үчүн гурбан вермәклә ҝөстәрдији мәһәббәти хатырлајырыг. Анма мәрасими 2022-ҹи ил 15 апрел ҹүмә ҝүнү кечириләҹәк. Биз Јеһованы вә Онун Оғлуну севирик. Одур ки, Исанын өлүмүнүн ил дөнүмүнү гејд етмәк бизим үчүн һәр шејдән өнәмли олмалыдыр.