1. Биз Јеһова илә неҹә вахт кечирә биләрик?

 БИЗ чох истәдијимиз инсанларла вахт кечирмәји хошлајырыг. Бир-бирини севән әр-арвад үчүн ахшамлар баш-баша вахт кечирмәјин јерини һеч нә вермәз. Ҝәнҹләрә достлары илә вахт кечирмәк хошдур. Һамымыз диндашларымызла бирҝә кечирдијимиз вахтдан ләззәт алырыг. Амма ән әсасы, биз Јеһова илә вахт кечирмәји севирик. Биз дуа етмәклә, Мүгәддәс Китабы охумагла, Јеһованын нијјәти вә ҝөзәл хүсусијјәтләри һаггында дүшүнмәклә Онунла вахт кечиририк. Јеһова илә кечирдијимиз вахт бизим үчүн гызылдан гијмәтлидир! (Зәб. 139:17).

2. Јеһова илә вахт кечирмәјә бизә нә мане ола биләр?

² Јеһова илә вахт кечирмәк бизә хош олса да, бәзән буна вахт тапмаг асан олмур. Чүнки чох мәшғулуг, иш, аилә мәсулијјәтләри вә диҝәр ваҹиб шејләр чох вахтымызы алдығы үчүн дуа етмәјә, Аллаһын Кәламыны мүталиә етмәјә вә үзәриндә дүшүнмәјә вахтымызын олмадығыны фикирләширик.

3. Вахтымызы башга нә оғурлаја биләр?

³ Вахтымызы әлимиздән алан ҝизли бир шеј дә вар. Әҝәр еһтијатлы олмасаг, өз-өзлүјүндә пис олмајан шејләр Јеһоваја јахынлашмаг үчүн ајырмалы олдуғумуз вахты оғурлаја биләр. Мәсәлән, ҝөтүрәк әјләнҹә мәсәләсини. Дүздүр, истираһәт етмәк лазымдыр, амма һәтта фајдалы әјләнҹәјә башымыз о гәдәр гарыша биләр ки, руһани ишләрә чох аз вахтымыз  галар. Әјләнҹәјә гәдәриндә вахт ајырмалыјыг (Мәс. 25:27; 1 Тим. 4:8).

4. Инди нә һагда данышаҹағыг?

⁴ Бу мәгаләдә һәјатда дүзҝүн шејләрә үстүнлүк вермәјимизин ваҹиблијини өјрәнәҹәјик. Һәмчинин арашдыраҹағыг ки, Јеһова илә кечирдијимиз вахтын бәһрәли олмасы үчүн нә едә биләрик вә вахтымызы бу ҹүр һикмәтлә истифадә етмәјин бизә һансы фајдасы олаҹаг.

5. Ефеслиләрә 5:15—17 ајәләриндәки мәсләһәт ҝәнҹләрә ән ҝөзәл һәјат јолуну сечмәјә неҹә көмәк едә биләр?

⁵ Ән ҝөзәл һәјат јолуну сечин. Адәтән ҝәнҹләр ҝәләҹәк һәјатларыны ән јахшы шәкилдә гурмаг истәјирләр. Бир тәрәфдән мүәллимләри вә иманда олмајан аилә үзвләри тәзјиг ҝөстәрә биләр ки, ҝәләҹәкдә јахшы јердә ишләмәк үчүн али тәһсил алсынлар. Амма бу ҹүр тәһсил инсанын чох вахтыны алыр. Диҝәр тәрәфдән дә валидејнләри, јығынҹагдакы достлары онлары тәшвиг едир ки, һәјатларыны Јеһоваја хидмәтә һәср етсинләр. Јеһованы севән ҝәнҹләрә дүзҝүн гәрар вермәјә нә көмәк едә биләр? Јахшы олар ки, онлар Ефеслиләрә 5:15—17 ајәләрини охујуб үзәриндә дүшүнсүнләр. (Ајәләри охујун.) Ҝәнҹләр бу ајәләри охујуб өзләринә нөвбәти суаллары верә биләр: «“Јеһованын ирадәси” нәдир? Һансы гәрары версәм, Ону разы саларам? Вахтымы даһа сәмәрәли истифадә етмәк үчүн һансы һәјат јолуну сечмәлијәм?» Унутмајын ки, биз «пис вахтда» јашајырыг вә Шејтанын идарә етдији бу дүнја тезликлә мәһв олаҹаг. Она ҝөрә һәјатымызы елә шејә һәср етмәлијик ки, Јеһованын ҝөзүндә рәғбәт газанаг.

6. Мәрјәм һансы гәрары верди вә нәјә ҝөрә бу, һикмәтли гәрар иди?

⁶ Ваҹиб шејләри ајырд един. Бәзән јанлыш олмајан ики шеј арасында дүзҝүн сечим етмәк вахтдан һикмәтлә истифадә етдијимизи ҝөстәрәҹәк. Буну Исанын Марта вә Мәрјәмҝилдә гонаг олан заман баш верән һадисәдән ҝөрмәк олар. Шүбһәсиз ки, Марта Исанын онларда гонаг олмасына ҝөрә чох севинирди. О, Иса үчүн ҝөзәл сүфрә ачмышды. Мәрјәм исә һәмин вахт Исанын дүз јанында отуруб, онун өјрәтдикләринә гулаг асырды. Мартанын нијјәти јахшы иди. Амма Мәрјәм «өзүнә јахшы пај» сечмишди (Лука 10:38—42). Бәлкә дә, бир мүддәт сонра һәмин ҝүн нә једији Мәрјәмин һеч јадында да дејилди, амма Исанын өјрәтдикләрини о, һеч вахт унутмады. Мәрјәм үчүн Иса илә кечирдији вахт неҹә гијмәтли идисә, бизим үчүн дә Јеһова илә кечирдијимиз вахт гијмәтлидир. Бәс нә едә биләрик ки, һәмин вахтдан ән бәһрәли шәкилдә истифадә едәк?

7. Нәјә ҝөрә дуа етмәк, Аллаһын Кәламыны охумаг вә үзәриндә дүшүнмәк ваҹибдир?

⁷ Унутмајын ки, дуа етмәк, Аллаһын Кәламыны мүталиә етмәк вә үзәриндә дүшүнмәк ибадәтимизә дахилдир. Биз дуа едәндә бизи чох севән сәмави Атамызла үнсијјәт едирик (Зәб. 5:7). Мүгәддәс Китабы мүталиә едәндә һикмәтин мәнбәји олан «Аллаһын елминә» јетиширик (Мәс. 2:1—5). Охудугларымызын үзәриндә дүшүнәндә исә диггәтимиз Јеһованын ҝөзәл хүсусијјәтләринә ҹәмләнир. Онун бизимлә вә бәшәријјәтлә бағлы мөһтәшәм нијјәтини хатырлајырыг. Сизҹә, вахтымызы бундан дәјәрли нәјә сәрф едә биләрик ки?!  Бу вахтдан там бәһрәләнмәк үчүн ҝәлин ҝөрәк нә етмәлијик.

8. Иса Мәсиһ чөллүкдә оларкән вахтындан неҹә истифадә етмишди вә биз ондан нә өјрәнирик?

⁸ Мүмкүндүрсә, сакит бир мәкан сечин. Ҝәлин Исанын нүмунәсинә нәзәр салаг. Јер үзүндәки хидмәтинә башламаздан габаг Иса 40 ҝүн чөллүкдә галды (Лука 4:1, 2). Белә бир сакит мәканда дуа етмәк, Атасынын онунла бағлы нијјәти һаггында дүшүнмәк имканы олду. Әлбәттә ки, бу, Исаны гаршыда ону ҝөзләјән сынаглара һазырлады. Исадан неҹә өрнәк ҝөтүрә биләрик? Бөјүк аиләниз варса, евдә сакит бир мәкан тапмаг мүшкүл ола биләр вә белә һалда һараса ҝетмәк олар. Ҹули адлы бир баҹы Јеһоваја дуа етмәк истәјәндә белә едир. О, јолдашы илә бирликдә Франсада кичик бир мәнзилдә јашајыр. Онун тәкликдә, фикри јајынмадан Јеһова илә вахт кечирмәси чәтиндир. Ҹули дејир: «Буна ҝөрә мән һәр ҝүн парка ҝедирәм. Орада тәк олмаг, бүтүн диггәтими ҹәмләјиб Јеһова илә үрәкдән сөһбәт етмәк имканым олур».

9. Иса мәшғул олмасына бахмајараг, Јеһова илә мүнасибәтинә дәјәр вердијини неҹә ҝөстәрмишди?

⁹ Јер үзүндә хидмәти заманы Иса чох иш ҝөрүрдү. Дијар-дијар ҝәзиб мүждәни бәјан едирди. Онун архасынҹа бөјүк издиһам ҝәлирди. Онлар истәјирди ки, Иса онлара вахт ајырсын. Бир дәфә ону ҝөрмәк үчүн «бүтүн шәһәр гапынын ағзына топлашмышды». Һәтта бу һалда белә Иса Јеһоваја дуа етмәк үчүн вахт ајырмышды. Атасы илә тәк галмаг үчүн алагаранлыгдан дуруб, «кимсәсиз бир јерә» ҝетмишди (Марк 1:32—35).

10, 11. Мәтта 26:40, 41 ајәләринә әсасән, Иса Ҝетсемани бағында шаҝирдләринә һансы мәсләһәти верди, бәс онлар нә етдиләр?

¹⁰ Јер үзүндәки һәјатынын сонунҹу ҝеҹәси, артыг хидмәти сона чатанда Иса јенә дә дуа етмәк үчүн сакит бир јерә чәкилмишди. Бу дәфә о, Ҝетсемани бағына ҝетмишди (Мәт. 26:36). Һәмин вахт Иса шаҝирдләринә дуа илә бағлы чох әһәмијјәтли мәсләһәтләр вермишди.

¹¹ Ҝәлин баш верәнләрә нәзәр салаг. Онлар Ҝетсемани бағына ҝәлиб чатанда, бәлкә дә, ҝеҹә јарысыны кечмишди. Иса шаҝирдләринә «ојаг галын» деди, өзү исә дуа етмәјә ҝетди (Мәт. 26:37—39). Амма о, дуа едән вахт шаҝирдләри јатдылар. Иса ҝәлиб онларын јатдығыны ҝөрәндә онлара јенә деди: «Сајыг олун вә даима дуа един». (Мәтта 26:40, 41 ајәләрини охујун.) Иса баша дүшүрдү ки, онлар стрес ичиндәдирләр вә чох јорулублар. Иса  онлара анлајыш ҝөстәриб деди ки, «руһ шөвглү, ҹисим исә зәифдир». Буна бахмајараг, Иса бундан сонра даһа ики дәфә дуа едиб гајыданда ҝөрдү ки, шаҝирдләри дуа етмәк әвәзинә, јенә јатыблар (Мәт. 26:42—45).

12. Әҝәр бәзән дуа етмәјә тагәтинизин олмадығыны һисс едирсинизсә, нә едә биләрсиниз?

¹² Дуа етмәк үчүн дүзҝүн вахт сечин. Бәзән о гәдәр јорғун, стресли олуруг ки, дуа едә билмирик. Әҝәр сизинлә дә белә олубса, билин ки, бу ҹүр һиссләр кечирән тәк сиз дејилсиниз. Белә олдугда нә едә биләрсиниз? Јеһоваја ҝүнүн сонунда дуа етмәјә вәрдиш едән бир чох инсанлар фикир верибләр ки, ахшам бир аз тез, һәлә чох јорулмамыш дуа етмәк даһа јахшыдыр. Диҝәрләри исә ҝөрмүшләр ки, дуа заманы дуруш тәрзи дә диггәти ҹәмләмәкдә бөјүк рол ојнајыр. Бәс әҝәр о гәдәр фикирлисиниз, мәјуслуға гапылмысыныз ки, дуа етмәјә ҝүҹүнүз јохдур, онда неҹә? Һансы һиссләри кечирдијинизи Јеһоваја дејин. Әмин олун ки, рәһмли Атаныз сизи баша дүшүр (Зәб. 139:4).

13. Електрон ҹиһазлар Јеһова илә кечирдијимиз вахта неҹә мане ола биләр?

¹³ Мүталиә заманы чалышын, фикриниз јајынмасын. Дуа Јеһова илә мүнасибәтимизи мөһкәмләндирмәк үчүн јеҝанә васитә дејил. Биз һәмчинин мүталиә едәрәк, ибадәт ҝөрүшләриндә иштирак едәрәк Јеһоваја јахынлаша биләрик. Мүталиәјә ајырдығыныз вә јығынҹагда олдуғунуз вахтдан там бәһрәләнмәк үчүн нә едә биләрсиниз? Нөвбәти суал үзәриндә дүшүнүн: «Мүталиә заманы фикрими ҹәмләмәјә адәтән нә мане олур?» Ола биләрми ки, бу, телефонунуза вә ја диҝәр електрон ҹиһазыныза ҝәлән зәнҝләр, месажлар олсун? Бу ҝүн милјардларла инсанлар електрон ҹиһазлардан истифадә едир. Бир мүтәхәссис дејир: «Телефонунузун елә јанынызда олмасы фикринизи јајындырмаға бәсдир. Бу заман инсанын фикри ҝөрдүјү ишдә јох, башга јердә олур». Адәтән топлантыларда бизә хатырладырлар ки, електрон ҹиһазларымызы елә режимә гојаг ки, башгаларына мане олмасын. Ејни шеји өзүмүз тәк оланда да едә биләрик. Јеһова илә вахт  кечирәркән електрон ҹиһазларымызы елә режимә гоја биләрик ки, бизә мане олмасын.

14. Филиппилиләрә 4:6, 7 ајәләринә әсасән, Јеһова диггәтимизи ҹәмләмәјә неҹә көмәк едә биләр?

¹⁴ Фикринизи ҹәмләјә биләсиниз дејә Јеһовадан көмәк истәјин. Мүталиә вә јығынҹаг вахты ҝөрүрсүнүзсә ки, фикриниз башга јердәдир, Јеһоваја дуа един. Нәјинсә фикрини чәкирсинизсә, бүтүн нараһатчылыгларынызы бир кәнара гојуб, диггәтинизи руһани шејләрә ҹәмләмәк асан олмаја биләр. Амма буну етмәк олдугҹа ваҹибдир. Дуа един ки, Аллаһын сүлһү тәкҹә үрәјинизи јох, һәм дә фикирләринизи горусун. (Филиппилиләрә 4:6, 7 ајәләрини охујун.)

15. Јеһова илә вахт кечирмәјин фајдаларындан бири һансыдыр?

¹⁵ Јеһова һагда дүшүнмәк, Онунла данышмаг вә Ону динләмәк үчүн вахт ајырсаг, бунун бизә бөјүк фајдасы олаҹаг. Әввәла, биз даһа јахшы гәрарлар верәҹәјик. Мүгәддәс Китабда дејилир ки, «һикмәтли илә отуруб-дуран һикмәтли олар» (Мәс. 13:20). Она ҝөрә дә биз һикмәтин мәнбәји олан Јеһова илә вахт кечирәндә һикмәтә јијәләнирик. Беләҹә, даһа јахшы билирик, һансы гәрарымыз Ону кәдәрләндирәр, јахуд гәлбини шад едәр.

16. Јеһова илә вахт кечирмәк мүәллимлик габилијјәтимизи неҹә артырыр?

¹⁶ Икинҹиси, даһа јахшы мүәллим олаҹағыг. Кимәсә дәрс кечәндә әсас мәгсәдләримиздән бири о олур ки, һәмин адама Јеһоваја јахынлашмаға көмәк едәк. Јеһова һаггында нә гәдәр чох өјрәнириксә, нә гәдәр чох дуа едириксә, Она мәһәббәтимиз бир о гәдәр дә ҝүҹләнир. Бунун сајәсиндә шаҝирдимизә Јеһованы севдирмәји даһа јахшы баҹарырыг. Иса Мәсиһ мәһз бу ҹүр мүәллим иди. Атасы һагда данышанда елә үрәкдән данышырды ки, давамчылары Јеһованы севмәјә билмәзди (Јәһ. 17:25, 26).

17. Дуа вә мүталиә иманымызы неҹә мөһкәмләндирир?

¹⁷ Үчүнҹүсү, иманымыз мөһкәмләнәҹәк. Биз дуа едиб Јеһовадан рәһбәрлик, тәсәлли, көмәк истәјәндә вә һәр дәфә Онун дуамыза ҹаваб вердијини ҝөрәндә иманымыз мөһкәмләнир (1 Јәһ. 5:15). Бәс иманымызы башга нә мөһкәмләндирир? Фәрди мүталиә. Ахы «иман инсанда сөзү ешидәндән сонра јараныр» (Ром. 10:17). Амма садәҹә билик алмаг иманымызы мөһкәмләндирмәк үчүн кифајәт дејил. Бәс башга нә лазымдыр?

18. Нәјә ҝөрә охудугларымызын үзәриндә дүшүнмәлијик? Нүмунә чәкин.

¹⁸ Биз өјрәндикләримизин үзәриндә дәриндән  дүшүнмәлијик. Ҝәлин 77-ҹи мәзмурун јазарынын нүмунәсинә нәзәр салаг. Она елә ҝәлирди ки, һәм о, һәм дә Исраил халгы Јеһованын рәғбәтини итириб. О, буна ҝөрә чох нараһат иди. Һәтта ҝеҹәләр дә бу фикирләр она аман вермирди (2—8 ајәләр). Бәс о нә етди? Јеһоваја белә деди: «Әмәлләрин барәдә дүшүнҹәләрә даларам, бүтүн ишләрини дәрин-дәрин дүшүнәрәм» (12-ҹи ајә). Тәбии ки, о, Јеһованын кечмишдә Өз халгы үчүн нәләр етдијини јахшы билирди, амма јенә дә фикир чәкирди, дүшүнүрдү: «Бәлкә, Аллаһ лүтфүнү унудуб? Јахуд гәзәби рәһминин габағыны кәсиб?» (9-ҹу ајә). О, Јеһованын ишләрини, кечмишдә халгына неҹә рәһм ҝөстәрдијини хатырлады (11-ҹи ајә). Бунун нәтиҹәси нә олду? Мәзмурчу Јеһованын Өз халгыны атмајаҹағына әмин олду (15-ҹи ајә). Ејнилә биз дә Јеһованын бу вахта гәдәр халгы үчүн вә шәхсән бизим үчүн етдикләринин үзәриндә дүшүнәндә иманымыз даһа да ҝүҹләнир.

19. Јеһова илә вахт кечирмәјин башга һансы мүкафаты вар?

¹⁹ Дөрдүнҹүсү вә ән өнәмлиси, Јеһоваја мәһәббәтимиз ҝүҹләнәҹәк. Јеһоваја итаәт етмәјә, Онун рәғбәтини газанмаг үчүн гурбанлар вермәјә вә сынаглара дөзмәјә инсаны бүтүн хүсусијјәтләрдән чох мәһәббәт тәшвиг едир (Мәт. 22:37—39; 1 Кор. 13:4, 7; 1 Јәһ. 5:3). Јеһова илә мөһкәм достлугдан дәјәрли һеч нә ола билмәз! (Зәб. 63:1—8).

20. Јеһова илә тәкликдә вахт кечирмәк үчүн нә кими планларыныз вар?

²⁰ Унутмајын ки, дуа етмәк, Аллаһын Кәламыны мүталиә етмәк вә үзәриндә дүшүнмәк ибадәтимизә дахилдир. Иса Мәсиһ кими сиз дә Јеһова илә тәк галыб вахт кечирмәк үчүн сакит бир јер тапын. Фикринизи јајындыран шејләрдән узаг олун. Руһани ишләрлә мәшғул олан заман диггәтинизи ҹәмләјә биләсиниз дејә Јеһоваја дуа едиб көмәк диләјин. Әҝәр инди вахтыныздан ағылла истифадә етсәниз, Јеһова сизә јерүзү Ҹәннәтдә әбәди һәјат мүкафатыны верәҹәк (Марк 4:24).