1, 2. Нәјә ҝөрә биз һәр ил анма мәрасиминдә иштирак едирик?

 ТӘХМИНӘН 2000 ил бундан әввәл Иса Мәсиһ өз ҹаныны инсанлар уғрунда гурбан верди. Бунунла да һамы үчүн әбәди һәјата јол ачды. Өлүмүндән өнҹәки ҝеҹә Иса Мәсиһ давамчыларына бујурду ки, онун бу фәдакарлығыны хатырласынлар, чөрәк вә шәрабдан истифадә едәрәк садә бир мәрасим кечирсинләр (1 Кор. 11:23—26).

² Биз Иса Мәсиһин бу бујруғуна әмәл едирик, чүнки ону чох севирик (Јәһ. 14:15). Она миннәтдарлығымызы ифадә етмәк үчүн һәр ил анма мәрасими дөврүндә вахт ајырыб дуа едирик вә Исанын өлүмүнүн дәјәри барәдә дәриндән дүшүнүрүк. Һәмчинин тәблиғдә даһа чох иштирак едирик, мүмкүн гәдәр чох инсаны бу хүсуси мәрасимә дәвәт едирик. Өзүмүз дә истәнилән әнҝәлә рәғмән, анма мәрасиминдә иштирак етмәјә әзмлијик.

3. Бу мәгаләдә нә һагда данышаҹағыг?

³ Бу мәгаләдә биз Јеһованын халгынын Исанын өлүмүнү анмаг үчүн үч саһәдә неҹә бөјүк зәһмәт чәкдији барәдә данышаҹағыг. Бунлар 1) мәрасими Исанын гојдуғу нүмунә әсасында гејд етмәк, 2) башгаларыны бу мәрасимә дәвәт етмәк вә 3) чәтинликләрә рәғмән бу мәрасимдә иштирак етмәкдир.

4. Һәр ил анма мәрасиминдә һансы һәгигәтләр барәдә данышылыр вә нәјә ҝөрә буна ади јанашмамалыјыг? (Лука 22:19, 20).

⁴ Һәр ил анма мәрасиминдә Мүгәддәс Китаба әсасланан  нитг сөјләнилир вә бу нитгдә бир чох суаллар ҹавабландырылыр. Мәсәлән, нәјә ҝөрә бәшәријјәтин фидјәјә еһтијаҹы вар иди? Бир нәфәр бүтүн инсанларын ҝүнаһыны неҹә јуја биләр? Чөрәклә шәраб нәји тәмсил едир? Онлардан кимләр гәбул едә биләр? (Лука 22:19, 20 ајәләрини охујун.) Һәмчинин мәрасимдә јер үзүндә әбәди јашамаға үмид едәнләри гаршыда ҝөзләјән немәтләр барәдә дүшүнүрүк (Әшј. 35:5, 6; 65:17, 21—23). Биз бу һәгигәтләрә ади јанашмамалыјыг. Милјардларла инсан буну вә Исанын фидјә гурбанлығынын нә гәдәр дәјәрли олдуғуну дәрк етмир. Һәмчинин онлар анма мәрасимини Исанын тәсис етдији гајдада гејд етмирләр. Ҝәлин ҝөрәк сәбәб нәдир.

5. Әксәр һәвариләр өләндән сонра инсанлар анма мәрасимини неҹә гејд етмәјә башладылар?

⁵ Исанын һәвариләринин әксәријјәти өләндән сонра јығынҹагларда сахта мәсиһиләр пејда олду (Мәт. 13:24—27, 37—39). Онлар «шаҝирдләри ардынҹа апармаг үчүн һәгигәти тәһриф» едирдиләр (Һәв. 20:29, 30). Мүгәддәс Китабда Мәсиһин «бир чох адамын ҝүнаһыны дашымаг үчүн бир дәфә өзүнү гурбан верди»ји гејд олунса да, сахта мәсиһиләр бу тәлими тәһриф едәрәк өјрәдирдиләр ки, онун гурбанлығы дәфәләрлә ҝәтирилмәлидир (Ибр. 9:27, 28). Бу ҝүн бу јалан тәлимә чохлу сајда инсан алданыб. Онлар һәр һәфтә, бәзән исә һәр ҝүн килсәдә топлашыб, «Месса гурбаны» b адланан мәрасим кечирирләр. Христиан дининә мәнсуб башга килсәләр бу мәрасими бу дәрәҹәдә тез-тез гејд етмәсә дә, онларын да Исанын гурбанлығынын мәнасы илә бағлы ајдын биликләри јохдур. Бәзиләри дејир: «Ҝөрәсән, доғрудан да, Исанын өлүмү мәним ҝүнаһларымы јуја биләр?» Нәјә ҝөрә онларда белә суал јараныр? Бәзи инсанлар иддиа едир ки, Исанын өлүмү ҝүнаһлары јуја билмәз вә ола биләр ки, онлар бу ҹүр фикирләрин тәсири алтына дүшүр. Бәс Мәсиһин һәгиги давамчылары инсанлара бу мәрасимин һәгиги мәнасыны баша дүшмәјә неҹә көмәк едир?

6. Мүгәддәс Китаб Тәдгигатчылары артыг 1872-ҹи илә кими нәји баша дүшмүшдүләр?

⁶ 19-ҹу әсрин сонларына јахын Чарлз Тејз Расселин рәһбәрлији алтында бир нечә нәфәр Мүгәддәс Китабы дәриндән тәдгиг етмәјә башлады. Онлар Исанын гурбанлығынын мәнасыны вә анма мәрасиминин неҹә кечирилмәли олдуғуну билмәк истәјирдиләр. Артыг 1872-ҹи илә кими онлар Мүгәддәс Китаб әсасында баша дүшмүшдүләр ки, Иса Мәсиһ, доғрудан да, бүтүн бәшәријјәт уғрунда өз ҹаныны фидјә вериб. Амма ашкарладыглары бу һәгигәти өзләриндә сахламадылар; китаблар, гәзетләр вә журналлар васитәсилә башгаларына да чатдырдылар. Һәмчинин чох кечмәмиш биринҹи әсрдәки мәсиһиләрин нүмунәсини изләјәрәк анма мәрасимини илдә ҹәми бир дәфә гејд етмәјә башладылар.

7. Илк мәсиһиләрин апардығы тәдгигатын һансы хејрини ҝөрүрүк?

⁷ Бу ҝүн биз һәмин мәсиһиләрин узун илләр әввәл апардығы тәдгигатдан бәһрәләнирик. Јеһова ҝөзләримизи ачыб: биз Мәсиһин гурбанлығыны вә онун һансы немәтләри ҝәтирәҹәјини дәрк едирик (1 Јәһ. 2:1, 2). Һәмчинин Мүгәддәс Китабда ики нөв үмиддән данышылдығыны өјрәнмишик: Аллаһын бәјәндији инсанларын бәзиләри ҝөјдә өлүмсүз һәјат алаҹаг, милјонларла инсан  исә јер үзүндә әбәди јашајаҹаг. Јеһованын бизи нә гәдәр севдији, Мәсиһин фидјә гурбанлығынын шәхсән бизә ҝәтирдији фајда һагда дүшүнәндә Јеһоваја даһа да јахынлашырыг (1 Бут. 3:18; 1 Јәһ. 4:9). Кечмишдәки садиг мәсиһиләр кими, биз дә инсанлары дәвәт едирик ки, бизимлә бирликдә анма мәрасимини Исанын гојдуғу гајдаја ујғун гејд етсинләр.

8. Јеһованын халгы инсанлары анма мәрасиминә дәвәт етмәк үчүн нәләр едиб? (Шәклә бахын.)

⁸ Јеһованын халгы узун илләрдир ки, һәр ил инсанлары анма мәрасиминә дәвәт едир. Һәлә 1881-ҹи илдә Бирләшмиш Штатлардакы баҹы-гардашлар бу хүсуси мәрасими бирликдә кечирмәк үчүн Пенсилванијанын Аллеһан шәһәриндә јерләшән бир евә дәвәт олунмушду. Даһа сонра һәр јығынҹаг өзү анма мәрасими кечирди. 1940-ҹы илин март ајында тәблиғчиләр тәшвиг олунду ки, әразиләриндә мараг ҝөстәрән һәр бир кәси анма мәрасиминә дәвәт етсинләр. 1960-ҹы илдә исә Бејтел илк дәфә јығынҹаглары чап олунмуш дәвәтнамәләрлә тәмин етди. О вахтдан бәри милјардларла анма мәрасими дәвәтнамәси пајланылыб. Ҝөрәсән, нәјә ҝөрә биз инсанлары бу мәрасимә дәвәт етмәк үчүн бу гәдәр ҝүҹ вә вахт сәрф едирик?

9, 10. Анма мәрасиминә кимләри дәвәт едирик? (Јәһја 3:16).

⁹ Чүнки биз истәјирик ки, анма мәрасиминә илк дәфә ҝәлән инсанлар Јеһованын вә Исанын бәшәријјәт уғрунда нәләр етдијини өјрәнсинләр. (Јәһја 3:16 ајәсини охујун.) Үмид едирик ки, ҝөрдүкләри вә  ешитдикләри онлары даһа чох билик газанмаға вә Јеһованын хидмәтчиси олмаға тәшвиг едәҹәк. Бу мәрасим башгаларына да фајда ҝәтирир.

¹⁰ Биз бу мәрасимә бир заманлар Јеһоваја хидмәт етмиш инсанлары да дәвәт едирик. Бу јолла Јеһованын онлары һәлә дә севдијини хатырладырыг. Чохлары бу дәвәти гәбул едир. Онлары мәрасимдә ҝөрәндә чох севинирик. Анма мәрасиминә ҝәләндә онлар Јеһоваја хидмәтдә кечән ҝөзәл ҝүнләри хатырлајырлар. Онлардан бири дә Моника c баҹыдыр. COVID-19 пандемијасы вахты о, хидмәтини бәрпа етди. 2021-ҹи илдә анма мәрасиминдә иштирак едәндән сонра белә сөзләр демишди: «Бу анма мәрасими мәним үчүн чох хүсуси иди. Чүнки 20 илдән сонра илк дәфә иди ки, инсанлара шаһидлик вериб онлары анма мәрасиминә дәвәт едирдим. Буну ҹан-дилдән етдим, чүнки Јеһованын вә Исанын мәндән өтрү етдикләринә ҝөрә чох миннәтдарам» (Зәб. 103:1—4). Инсанларын дәвәтимизи гәбул едиб-етмәмәсиндән асылы олмајараг, биз һәр кәси бу мәрасимә дәвәт едирик. Чүнки билирик ки, Јеһова зәһмәтимизи гијмәтләндирир.

11. Анма мәрасиминә инсанлары дәвәт етмәк үчүн чәкдијимиз зәһмәтә Јеһова неҹә бәрәкәт верир? (Һәггај 2:7).

¹¹ Јеһова анма мәрасиминә инсанлары дәвәт етмәк үчүн чәкдијимиз зәһмәтә бол-бол бәрәкәт верир. COVID-19 пандемијасына ҝөрә олан мәһдудијјәтләрә бахмајараг, 2021-ҹи илдә анма мәрасиминдә иштирак едәнләрин сајы ән јүксәк һәддә чатмышды: 21 367 603 нәфәр. Бу исә Јеһованын Шаһидләринин сајындан 2,5 дәфә чохдур! Әлбәттә, Јеһова үчүн өнәмли олан рәгәмләр дејил. Иштирак едән һәр кәс ајры-ајрылыгда Јеһова үчүн дәјәрлидир (Лука 15:7; 1 Тим. 2:3, 4). Әмин ола биләрик ки, дәвәт ишимиз васитәсилә Јеһова сәмими-гәлбли инсанлары тапмаға көмәк едир. (Һәггај 2:7 ајәсини охујун.)

12. Һансы сәбәбләрә ҝөрә бәзән анма мәрасиминдә иштирак етмәк чәтин олур? (Шәклә бахын.)

¹² Иса Мәсиһ пејғәмбәрлик етмишди ки, ахырзаманда мүхтәлиф чәтинликләримиз олаҹаг: аилә үзвләримиз бизә гаршы чыхаҹаг, дөвләт тәгиб едәҹәк, мүһарибәләр, хәстәликләр вә саирә проблемләр олаҹаг (Мәт. 10:36; Марк 13:9; Лука 21:10, 11). Бәзән бу сәбәбләрә ҝөрә анма мәрасимини кечирмәк чәтин олур. Бәс баҹы-гардашлар бу манеәләри неҹә ашырлар вә Јеһова онлара неҹә дајаг олур?

13. Артјом гардашын анма мәрасимини кечирмәк үчүн ҹәсарәтли һәрәкәтинә Јеһова неҹә бәрәкәт верди?

¹³ Һәбс. Етигадына ҝөрә һәбсдә олан баҹы-гардашлар анма мәрасимини гејд етмәк үчүн әлләриндән ҝәләни едирләр. Мәсәлән, Артјом гардаш бу саһәдә ҝөзәл нүмунәдир. 2020-ҹи илдә анма мәрасими заманы о, һәбсдә иди. Ону 17 квадрат метрлик бир камераја салмышдылар вә ондан башга орада 4 дустаг да вар иди. Һәбсдә олмасына бахмајараг, Артјом гардаш символлар үчүн бәзи шејләр әлдә едә билди. Лакин онун дустаг јолдашлары чох сөјүшкән идиләр вә сигарет чәкирдиләр. Буна ҝөрә дә о онлардан хаһиш етди ки, ҹәми бир саат нә сигарет чәксинләр, нә дә сөјүш сөјсүнләр. Хошбәхтликдән онлар разылашды. Артјом гардаш онлара анма мәрасими барәдә данышмағы тәклиф  етди. Лакин онлар бу һагда һеч нә ешитмәк истәмәдикләрини дедиләр. Амма Артјомун анма мәрасимини гејд етдијини ҝөрәндә вә данышдыгларыны ешидәндә бу барәдә она чохлу суаллар вердиләр.

14. COVID-19 пандемијасына бахмајараг, инсанларын анма мәрасимини кечирмәси үчүн һансы тәдбирләр ҝөрүлмүшдү?

¹⁴ COVID-19 пандемијасы. Бу пандемија башлајанда Јеһованын Шаһидләри артыг анма мәрасимини кечирмәк үчүн ҹанлы шәкилдә јығыша билмәдиләр. Амма бу, онлара анма мәрасимини кечирмәјә мане олмады d. Интернет бағлантысы олан јығынҹаглар бу мәрасими видеоконфранс васитәсилә кечиртдиләр. Бәс Интернети олмајан милјонларла инсан нә етди? Бәзи өлкәләрдә филиаллар тәдбир ҝөрдү ки, нитг телевизија вә ја радио васитәсилә јајымлансын. Бундан әлавә, нитг 500-дән чох дилдә јазыја алынды. Гардашлар бу јазылары кимә лазым иди чатдырдылар. Беләҹә, һәтта уҹгар әразидә јашајанлар да анма мәрасимини кечирә билди.

15. Мүгәддәс Китабы өјрәнән Сју адлы гадындан һансы нүмунәни ҝөтүрдүнүз?

 ¹⁵ Аилә тәрәфиндән тәгибләр. Бәзиләринә исә аилә үзвләринин тәгибләринә ҝөрә анма мәрасиминдә иштирак етмәк мүшкүл олур. Белә инсанлардан бири Мүгәддәс Китабы өјрәнән Сју адлы бир гадындыр. 2021-ҹи илдә анма мәрасиминдән бир ҝүн әввәл Сју она дәрс кечән баҹыја демишди ки, аиләдәки тәгибләрә ҝөрә мәрасимдә иштирак едә билмәјәҹәк. Баҹы да она Лука 22:44 ајәсини охумушду вә изаһ етмишди ки, чәтинликләрлә үзләшәндә биз Иса Мәсиһдән нүмунә ҝөтүрәрәк Јеһоваја дуа етмәлијик вә һәр шеји Онун өһдәсинә бурахмалыјыг. Сәһәриси ҝүн Сју символлары һазырлады вә jw.org сајтында сәһәр ибадәтинин хүсуси бурахылышына бахды. Һәмин ҝүн ахшам исә өз отағында тәклијә чәкилиб телефон васитәсилә анма мәрасиминә гулаг асды. Сонра Сју она дәрс кечән баҹыја белә сөзләр јазмышды: «О ҝүн мәни елә руһландырдын ки, анма мәрасиминдә иштирак етмәк үчүн әлимдән ҝәләни етдим вә доғрудан да, Јеһова галан һәр шеји јолуна гојду. Үрәјимдәки севинҹи, миннәтдарлығы ифадә етмәјә сөз тапмырам». Мәҝәр Јеһова сизә дә бу кими манеәләри ашмаға көмәк етмәз?

16. Нәјә ҝөрә әминик ки, анма мәрасиминдә иштирак етмәк үчүн атдығымыз аддымлары Јеһова аванд едәҹәк? (Ромалылара 8:31, 32).

¹⁶ Иса Мәсиһин өлүмүнү анмаг үчүн чәкдијимиз бүтүн зәһмәти Јеһова чох гијмәтләндирир. Әмин ола биләрик ки, Јеһоваја миннәтдарлығымызы ҝөстәрмәк үчүн атдығымыз аддымлары Јеһова аванд едәҹәк. (Ромалылара 8:31, 32 ајәләрини охујун.) Одур ки, ҝәлин бу ил анма мәрасиминдә иштирак етмәк үчүн әлимиздән ҝәләни едәк. Һәмчинин мәрасимдән әввәлки вә сонракы һәфтәләр әрзиндә Јеһоваја хидмәтдә даһа чох иш ҝөрәк.