1, 2. а) Исанын һәјаты вә хидмәти һагда дүшүнәндә үрәјиниздә һансы һиссләр јараныр? б) Бу мәгалә бизә һансы саһәдә көмәк едәҹәк?

 БИЗӘ әзиз олан инсан вәфат едәндә ондан өтрү бурнумузун уҹу ҝөјнәјир. Јарамыз тәзә оланда ағрыдан башга һеч нә һисс етмирик. Һәлә бир фикирләшәндә ки, о, өлмәмишдән габаг ағрылар чәкиб, үрәјимиз лап сызылдајыр. Амма заман өтдүкҹә биз онунла бағлы хош анлары хатырламаға башлајырыг, онун бизә өјрәтдикләрини, дедији сөзләри, бизи неҹә ҝүлдүрдүјүнү јадымыза салырыг вә беләҹә, үрәјимиздә мүәјјән дәрәҹәдә севинҹ дујмаға башлајырыг.

² Ејнилә биз Мүгәддәс Китабдан Исанын чәкдији әзаблар вә өлүмү барәдә охујанда үрәјимиз парчаланыр. Анма мәрасими дөврүндә Исанын фидјәсинин дәјәри һагда дүшүнмәк үчүн даһа чох вахт ајырырыг (1 Кор. 11:24, 25). Бунунла јанашы, Иса Мәсиһин јер үзүндә оларкән дедији сөзләр, ҝөрдүјү ишләр һагда дүшүнәндә үрәјимиз севинҹлә долур. Онун инди етдији вә ҝәләҹәкдә ҝөрәҹәји ишләр һагда фикирләшәндә гәлбимиз ҹуша ҝәлир! Бүтүн бунлар вә Исанын мәһәббәти бизи тәшвиг едир ки, миннәтдарлығымызы әмәлдә ҝөстәрәк. Бу мәгалә бизә бу саһәдә көмәк едәҹәк.

3. Нә үчүн фидјә әнамына ҝөрә миннәтдарыг?

³ Исанын һәјаты вә өлүмү һагда дүшүнәндә гәлбимиз шүкранла долур. О, јер үзүндә оланда инсанлара Аллаһын Падшаһлығынын ҝәтирәҹәји немәтләр һагда данышмышды.  Бүтүн бу һәгигәтләр бизим үчүн чох гијмәтлидир. Биз фидјәјә ҝөрә миннәтдарыг, чүнки о, Јеһоваја вә Исаја јахынлашмаг үчүн гаршымызда гапы ачыр. Һәмчинин Исаја иман едәнләрин әбәди јашамаг вә өлән әзизләрини јенидән ҝөрмәк имканы вар (Јәһ. 5:28, 29; Ром. 6:23). Бүтүн бу немәтләри биз өзүмүз газанмамышыг; Јеһованын вә Исанын бизим үчүн етдикләринин әвәзини һеч өдәјә дә билмәрик (Ром. 5:8, 20, 21). Амма онлара нә гәдәр миннәтдар олдуғумузу әмәлләримизлә ҝөстәрә биләрик.

4. Мәрјәм Исаја миннәтдар олдуғуну неҹә ҝөстәрди? (Шәклә бахын.)

⁴ Ҝәлин Мәҹдәлли Мәрјәм адлы бир јәһуди гадындан данышаг. О, чох аҹынаҹаглы вәзијјәтдә иди, дүз једди ҹин она әзаб верирди. Бәлкә дә, бу дәрддән нә вахтса гуртулаҹағына һеч үмиди дә јох иди. Амма Иса ондакы ҹинләри говур. Ҝөрүн инди о неҹә хошбәхт иди! Мәрјәм Исаја о гәдәр миннәтдар иди ки, онун давамчысы олду, үстәлик, хидмәтдә она дәстәк олмаг үчүн вахтыны, ҝүҹүнү вә вәсаитини әсирҝәмәди (Лука 8:1—3). Мәрјәмин һеч хәбәри јох иди ки, Исанын верәҹәји ән бөјүк бәхшиш һәлә габагдадыр: Иса она иман едәнләрин мәһв олмамасы, онларын әбәди һәјатынын олмасы үчүн өз ҹаныны фәда едәҹәк (Јәһ. 3:16). Мәрјәм һәлә буну билмәјә-билмәјә Исаја миннәтдарлыгдан ирәли ҝәләрәк садиг галды. Иса ишҝәнҹә дирәјиндә оланда Мәрјәм орада иди, һәм она, һәм дә орада оланлара дајаг олду (Јәһ. 19:25). Исанын өлүмүндән сонра Мәрјәм вә башга ики гадын сәрдабәјә әтирли отлар ҝәтириб, Исанын бәдәнини дәфнә һазырладылар (Марк 16:1, 2). Јеһова Мәрјәмин сәдагәтинин әвәзиндә ону мүкафатландырды. Иса дириләндән сонра Мәрјәм ону ҝөрдү вә онунла данышды. Бу, бөјүк шәрәф иди, һеч әксәр шаҝирдләрә бу нәсиб олмамышды! (Јәһ. 20:11—18).

5. Јеһоваја вә Исаја миннәтдар олдуғумузу неҹә ҝөстәрә биләрик?

 ⁵ Бәс биз Јеһоваја вә Исаја миннәтдар олдуғумузу неҹә ҝөстәрә биләрик? Вахтымызы, ҝүҹүмүзү вә мадди вәсаитләримизи Падшаһлығын ишинә сәрф етмәклә. Мәсәлән, Јеһоваја ибадәт үчүн истифадә олунан биналарын тәмириндә вә тикинтисиндә иштирак едә биләрик.

6. Нәјә ҝөрә дејә биләрик ки, фидјә шәхсән һәр биримиз үчүн өдәнилиб?

⁶ Јеһованын вә Исанын бизә бәсләдији мәһәббәт үрәјимиздә онлара севҝи ојадыр (1 Јәһ. 4:10, 19). Исанын шәхсән бизим үчүн һәјатыны фәда етдији һагда дүшүнәндә мәһәббәтимиз даһа да артыр. Буну дәрк едән һәвари Булус Галатијалылара мәктубунда миннәтдарлығыны белә ифадә етмишди: «Инди мән бу бәдәндә јашадығым һәјаты мәни севән вә ҹаныны уғрумда фәда едән Аллаһын Оғлуна иманла јашајырам» (Гал. 2:20). Фидјәнин өдәнилмәси сајәсиндә Јеһова сизи Өзүнә ҹәлб едиб вә Онун досту олмаға изин вериб (Јәһ. 6:44). Мәҝәр Јеһованын сиздә јахшы бир шеј ҝөрдүјүнү, досту олмағыныз үчүн чох баһа бир дәјәр өдәдијини билмәк үрәјинизи риггәтә ҝәтирмир? Мәҝәр Јеһоваја вә Исаја мәһәббәтинизи даһа да ҝүҹләндирмир? Јахшы олар ки, өзүмүздән сорушаг: «Бу мәһәббәт мәнә нә етмәјә тәкан верир?»

7. Шәкилдән ҝөрүндүјү кими, Јеһоваја вә Исаја севҝимизи неҹә ҝөстәрә биләрик? (2 Коринфлиләрә 5:14, 15; 6:1, 2).

⁷ Аллаһа вә Исаја мәһәббәт бизи тәшвиг едир ки, инсанлары севәк. (2 Коринфлиләрә 5:14, 15; 6:1, 2 ајәләрини охујун.) Бәс инсанлара севҝимизи неҹә ҝөстәрә биләрик? Бунун бир јолу тәблиғ ишиндә ҹанла-башла иштирак етмәкдир. Биз растлашдығымыз бүтүн  инсанлара тәблиғ едирик. Онлара миллијјәтинә, мадди вәзијјәтинә, јахуд савадына ҝөрә фәрг гојмуруг. Бунунла биз Јеһованын ирадәсинә ујғун давранырыг, чүнки «О истәјир ки, һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тим. 2:4).

8. Баҹы-гардашлары севдијимизи неҹә ҝөстәрә биләрик?

⁸ Аллаһа вә Мәсиһә севҝимизи һәмчинин баҹы-гардашлары севмәклә ҝөстәририк (1 Јәһ. 4:21). Биз онларла марагланырыг, сынаглар заманы онлара дајаг олуруг. Доғмаларыны итирәндә онлара тәсәлли веририк, хәстә оланда зијарәт едирик, руһдан дүшәндә үрәк-дирәк веририк (2 Кор. 1:3—7; 1 Салон. 5:11, 14). Онлардан өтрү дуа едирик, чүнки билирик ки, «салеһин һәрарәтли дуасынын бөјүк тәсири вар» (Јаг. 5:16).

9. Баҹы-гардашларымызы севдијимизи башга неҹә ҝөстәрә биләрик?

⁹ Бәс баҹы-гардашлара севҝимизи башга неҹә ҝөстәрә биләрик? Арамыздакы сүлһү горумаг үчүн әлимиздән ҝәләни етмәклә. Биз Јеһовадан өрнәк ҝөтүрәрәк бағышламағы баҹармалыјыг. Әҝәр Јеһова бизим ҝүнаһларымыздан өтрү Оғлуну әсирҝәмәјибсә, мәҝәр биз дә бизә гаршы сәһв едән диндашларымызы бағышламалы дејилик? Биз Исанын мәсәлиндәки јарамаз нөкәрә бәнзәмәк истәмирик. Ағасы онун күлли мигдарда борҹуну силдији һалда, о она даһа аз борҹу олан нөкәр јолдашыны бағышламады (Мәт. 18:23—35). Әҝәр јығынҹагда киминләсә аранызда анлашылмазлыг варса, анма мәрасиминдән өнҹә араныздакы мүнасибәтләри дүзәлтмәк үчүн илк аддымы ата биләрсиниз? (Мәт. 5:23, 24). Бунунла ҝөстәрәҹәксиниз ки, Јеһованы вә Исаны дәрин мәһәббәтлә севирсиниз.

10, 11. Ағсаггаллар Јеһоваја вә Исаја севҝиләрини неҹә ҝөстәрә биләрләр? (1 Бутрус 5:1, 2).

¹⁰ Ағсаггаллар Јеһоваја вә Исаја мәһәббәтләрини неҹә ҝөстәрә биләрләр? Исанын гузуларынын гејдинә галмагла. (1 Бутрус 5:1, 2 ајәләрини охујун.) Иса Мәсиһ һәвари Бутрусла сөһбәтиндә буну ајдын ҝөстәрмишди. Бутрус Исаны үч дәфә дандығы үчүн, бәлкә дә, һәјатда ән чох истәдији шеј она мәһәббәтини сүбут етмәк иди. Дириләндән сонра Иса Бутрусдан сорушмушду: «Јәһја оғлу Шимон, мәни чох истәјирсән?» Јәгин ки, Бутрус Исаја мәһәббәтини сүбут етмәк үчүн һәр шеј етмәјә һазыр иди. Иса Бутруса деди: «Гузуларымы бәслә» (Јәһ. 21:15—17). Бутрус да өмрүнүн галаныны Исанын гузуларынын гејдинә галмаға һәср етди вә бунунла она олан мәһәббәтини сүбут етди.

¹¹ Әзиз ағсаггаллар, Исанын Бутруса дедији сөзләрин сизин үчүн дә әһәмијјәт дашыдығыны Анма мәрасими дөврүндә неҹә ҝөстәрә биләрсиниз? Мүнтәзәм олараг баҹы-гардашлара вахт ајырыб онлары руһландырмагла вә гејри-фәалларын Јеһоваја ҝери дөнмәси үчүн хүсусилә ҹан јандырмагла Јеһоваја вә Исаја севҝинизи ҝөстәрә биләрсиниз (Һизг. 34:11, 12). Һәмчинин анма мәрасиминә ҝәлән јениләрә вә Мүгәддәс Китабы өјрәнән инсанлара диггәт ҝөстәрин. Биз истәјирик ки, онларда хош тәәссүрат ојадаг, чүнки нә билмәк олар, бәлкә, онлар ҝәләҹәкдә Исанын шаҝирди олдулар.

12. Нәјә ҝөрә Исанын өлүмүндән өнҹә дедији сөзләр бизә ҹәсарәт верир? (Јәһја 16:32, 33).

¹² Өлүмүндән өнҹәки ҝеҹә Иса давамчыларына белә сөзләр демишди: «Дүнјада  чох әзијјәтлә үзләшәҹәксиниз, анҹаг ҹәсарәтли олун! Мән дүнјаја галиб ҝәлдим». (Јәһја 16:32, 33 ајәләрини охујун.) Дүшмәнләрин ҝөзүнә дик бахмаға вә өлүмәдәк садиг галмаға Исаја нә көмәк етди? Јеһоваја бел бағламасы. Иса билирди ки, давамчылары да ејни сынагларла үзләшәҹәк, она ҝөрә дә Јеһовадан хаһиш етмишди ки, ҝөзү онларын үстүндә олсун (Јәһ. 17:11). Буну билмәк инсана ҹәсарәт верир, чүнки Јеһова истәнилән дүшмәнимиздән гат-гат ҝүҹлүдүр (1 Јәһ. 4:4). Һеч нә Онун нәзәриндән јајынмыр. Әминик ки, Јеһоваја ҝүвәнсәк, горхуларымызы јенәҹәјик вә ҹәсарәтли олаҹағыг.

13. Ариматајлы Јусиф һансы ҹәсарәтли аддымы атды?

¹³ Ҝәлин ариматајлы Јусифин нүмунәсинә бахаг. О, јәһуди ҹәмијјәтиндә сајылыб-сечилән адам иди. Синедрионун, јәһудиләрин али мәһкәмәсинин үзвү иди. Амма ону һеч дә ҹәсарәтли инсан адландырмаг олмазды. Јәһја јазмышды ки, Јусиф «Исанын шаҝирди» иди, лакин «јәһудиләрин горхусундан» буну ҝизли сахлајырды (Јәһ. 19:38). Ариматајлы Јусиф үчүн Падшаһлыг мүждәси мараглы иди, амма о, Исаја иман ҝәтирдијини башгаларына демирди. Ҝөрүнүр, о, ҹәмијјәтдәки нүфузлу мөвгејини итирмәкдән горхурду. Сәбәб һәр нә олса да, Мүгәддәс Китабда дејилир ки, Иса Мәсиһ өләндән сонра Јусиф «ҹәсарәтини топлајыб Пилатын јанына ҝетди вә ондан Исанын ҹәсәдини истәди» (Марк 15:42, 43). Онун Исанын шаҝирди олдуғу артыг һеч кимә ҝизли дејилди.

14. Инсан горхусунун өһдәсиндән неҹә ҝәлә биләрсиниз?

¹⁴ Ариматајлы Јусиф кими, сиздә дә инсан горхусу вар? Олур ки, мәктәбдә вә ја ишдә бәзән Јеһованын Шаһиди олдуғунузу демәјә утанырсыныз? Бәлкә дә, башгаларынын фикринә ҝөрә нараһат олуб, тәблиғчи олмағы вә ја вәфтиз олунмағы тәхирә салырсыныз. Гојмајын бу фикирләр сизә дүзҝүн аддым атмаға мане олсун. Јеһоваја үрәкдән дуа един. Хаһиш един ки, Онун ирадәсини јеринә јетирмәк үчүн сизә ҹәсарәт версин. Јеһованын дуаларыныза ҹаваб вердијини ҝөрдүкҹә даһа да мөһкәм вә ҹәсарәтли олаҹагсыныз (Әшј. 41:10, 13).

15. Исаны дириләндән сонра ҝөрмәләри шаҝирдләри нәјә тәшвиг етди? (Лука 24:52, 53).

¹⁵ Иса Мәсиһ өләндә шаҝирдләр дәрин кәдәр ичиндә идиләр. Онларын һалыны тәсәввүр етмәк олар. Әзиз достларынын өлүмү илә санки үмидләри дә өлмүшдү (Лука 24:17—21). Амма Иса дириләндән сонра  онлара ҝөрүндү, Мүгәддәс Китабдакы пејғәмбәрлијин онун үзәриндә неҹә јеринә јетдијини ачыглады. Һәмчинин онлара ваҹиб бир иш һәвалә етди (Лука 24:26, 27, 45—48). Иса 40 ҝүндән сонра ҝөјә галханда артыг шаҝирдләрин үрәјиндә кәдәр јох, севинҹ вар иди, чүнки билирдиләр ки, Ағалары сағдыр вә онлара јени тәјинатларыны иҹра етмәјә көмәк едәҹәк. Үрәкләриндәки севинҹ онлары дурмадан Јеһованы мәдһ етмәјә тәшвиг едирди. (Лука 24:52, 53 ајәләрини охујун; Һәв. 5:42.)

16. Исанын шаҝирдләриндән неҹә өрнәк ҝөтүрә биләрик?

¹⁶ Исанын шаҝирдләриндән неҹә өрнәк ҝөтүрә биләрик? Биз тәкҹә анма мәрасими дөврүндә јох, бүтүн ил боју Јеһоваја хидмәтдән севинҹ дујмалыјыг. Бунун үчүн Падшаһлығы һәјатымызда һәр шејдән үстүн тутмаг лазымдыр. Мәсәлән, бәзиләри иш ҹәдвәлиндә мүәјјән дәјишикликләр едибләр ки, мүнтәзәм олараг тәблиғдә, јығынҹагда вә аиләви ибадәтдә иштирак етсинләр. Бир башгалары исә һәтта кимләринсә зәрури һесаб етдији мадди шејләрдән ваз кечибләр. Чүнки јығынҹаға даһа чох фајда ҝәтирмәк, јахуд тәблиғчиләрә тәләбат олан әразиләрдә хидмәт етмәк истәјирләр. Дүздүр, Јеһоваја хидмәтдә әзмли олмаг дөзүм тәләб едир. Амма Јеһова вәд едир ки, биз Падшаһлығы һәр шејдән үстүн тутсаг, бизә бол бәрәкәт верәҹәк (Мәс. 10:22; Мәт. 6:32, 33).

17. Анма мәрасими дөврүндә нә етмәјә әзмлисиниз? (Шәклә бахын.)

¹⁷ Апрелин 4-ү чәршәнбә ахшамы анма мәрасими кечирәҹәјимиз ҝүнү сәбирсизликлә ҝөзләјирик. Амма Исанын һәјаты вә өлүмү, еләҹә дә онун вә Јеһованын бизә олан мәһәббәти үзәриндә дүшүнмәк үчүн о вахта гәдәр ҝөзләмәк лазым дејил. Бу һагда дүшүнмәк үчүн анма мәрасиминдән әввәл дә, сонра да вахт ајырмалыјыг. Мәсәлән, «Јени Дүнја Тәрҹүмәси»нин Б12 әлавәсиндә «Исанын јер үзүндә сон һәфтәси» адлы схем вар. Орадакы һадисәләр барәдә охујун вә үзәриндә дәрин дүшүнүн. Бу заман сизин миннәтдарлығынызы, мәһәббәтинизи, ҹәсарәтинизи вә севинҹинизи артыраҹаг ајәләрә хүсусилә диггәт јетирин. Сонра исә миннәтдарлығынызы әмәлдә ҝөстәрмәјин јолларыны фикирләшин. Анма мәрасими дөврүндә Иса Мәсиһин хатиринә етдијимиз һәр бир шеј онун үчүн гијмәтлидир (Вәһј 2:19).