1, 2. Вәфтиздән сонра нә етмәлијик? Изаһ един.

 ЕВИНИЗИ тез-тез тәмизләјирсиниз? Јәгин ки, евә илк дәфә көчәндә ораны дәриндән тәмизләмишдиниз. Бундан сонра даһа еви јығышдырмасаныз, нә баш верәр? Билдијимиз кими, ев чиркләнәр, һәр јери тоз-торпаг басар. Евинизин сәлигә-саһманлы олмасы үчүн ҝәрәк онун тәмизлијинә һәмишә фикир верәсиниз.

² Ејни шеји дүшүнҹәмиз вә хасијјәтимиз һагда да демәк олар. Шүбһәсиз, вәфтиздән габаг әлимиздән ҝәләни етмишдик ки, «ҹисми вә руһу мурдарлајан һәр шејдән өзүмүзү тәмизләјәк» (2 Кор. 7:1). Инди исә буну давам етдирмәлијик. Булусун дедији кими, даима дүшүнҹә тәрзимизи јениләшдирмәлијик (Ефес. 4:23). Чүнки бу дүнјанын тоз-торпағы, чиркабы үстүмүзә тез һопа биләр. Буна ҝөрә дә Јеһованын ҝөзүндә тәмиз олмаг үчүн дүшүнҹәмизи, хасијјәтимизи вә нәјә ҹан атдығымызы мүтәмади олараг јохламалыјыг.

3. «Дүшүнҹәни јениләшдирмәк» нә демәкдир? (Ромалылара 12:2).

³ Дүшүнҹәмизи јениләшдирмәк үчүн нә етмәлијик? (Ромалылара 12:2 ајәсини охујун.) «Дүшүнҹәни јениләшдирмәк» кими тәрҹүмә олунан јунан ифадәси һәмчинин «дүшүнҹәни бәрпа етмәк» мәнасыны да дашыјыр. Билдијимиз кими, евдә көклү тәмир-бәрпа ишләри апармагла она үздән  әл ҝәздирмәк арасында бөјүк фәрг вар. Мәсәлән, еви бир-ики әшја илә бәзәмәк ону тәмир етмәк демәк дејил. Ејнилә һәјатымызы бир-ики јахшы әмәллә бәзәмәк дүшүнҹәмизи бәрпа етмәк демәк дејил. Биз гәлбимизин дәринлијиндә неҹә инсан олдуғумуза нәзәр салмалыјыг вә лазыми дәјишикликләр етмәлијик ки, Јеһованын нормаларына максимум дәрәҹәдә ујғун олаг. Үстәлик, буну бир дәфә јох, даима етмәлијик.

4. Дүшүнҹәмизи бу дүнјанын формалашдырмамасы үчүн нә етмәлијик?

⁴ Камил оландан сонра һәр аддымымыз Јеһоваја хош ҝедәҹәк. Амма инди бунун үчүн вар ҝүҹүмүзлә чалышмалыјыг. Диггәт јетирин, Булус Ромалылара 12:2 ајәсиндә дејир ки, дүшүнҹәмизи дәјишсәк, Аллаһын ирадәсини дәрк едәҹәјик. Әл-голунузу јаныныза саллајыб дүнјанын сизи формалашдырмасына јол вермәјин. Өзүнүзү јохлајын, ҝөрүн Аллаһын дүшүнҹәсинин мәгсәдләринизә вә гәрарларыныза јөн вермәси үчүн нә едирсиниз.

5. Јеһованын ҝүнүнүн јахын олдуғу илә бағлы нә дүшүндүјүмүзү неҹә мүәјјән едә биләрик? (Шәклә бахын.)

⁵ Јеһова истәјир ки, биз Онун ҝүнүнү бәрк-бәрк јадда сахлајаг (2 Бут. 3:12). Өзүмүзә нөвбәти суаллары вермәлијик: «Бу шәр дүнјанын сонуна аз галдығыны дәрк етдијим һәјат тәрзимдән ҝөрүнүр? Тәһсил вә ишлә бағлы сечимимлә Јеһоваја хидмәтин мәним үчүн һәр шејдән үстүн олдуғуну ҝөстәрирәм? Јеһованын гејдимә галаҹағына етибар едирәм, јохса елә һәмишә мадди шејләрә ҝөрә фикир чәкирәм?» Биз һәјатымызын һәр саһәсини Јеһованын ирадәсинә ујғунлашдыранда Јеһованын гәлби шад олур (Мәт. 6:25—27, 33; Филип. 4:12, 13).

6. Биз даима нә етмәлијик?

 ⁶ Биз дүшүнҹәмизи даима јохламалыјыг вә лазыми дәјишикликләр етмәлијик. Булус коринфлиләрә белә демишди: «Иман јолунда олуб-олмадығынызы даима јохлајын, өзүнүзү сынајын» (2 Кор. 13:5). Иман јолунда олмаг јығынҹагда вә тәблиғдә һәрдәнбир иштирак етмәк демәк дејил. Бизим фикирләримиздән, истәкләримиздән вә нијјәтләримиздән дә иман јолунда олуб-олмадығымыз ҝөрүнүр. Буна ҝөрә дә биз дүшүнҹәмизи даима јениләшдирмәлијик. Бунун үчүн Аллаһын Кәламыны охумалы, Онун дүшүнҹә тәрзинә јијәләнмәли вә һәјатымызда Онун ирадәсинә ујғун дәјишикликләр етмәлијик (1 Кор. 2:14—16).

7. Ефеслиләрә 4:31, 32 ајәләринә әсасән, биз даһа нә етмәлијик вә нәјә ҝөрә бу, бәзән чәтин ола биләр?

⁷ Ефеслиләрә 4:31, 32 ајәләрини охујун. Биз дүшүнҹәмиздә дәјишикликләр етмәклә јанашы, јени шәхсијјәтә бүрүнмәлијик (Ефес. 4:24). Бу исә зәһмәт тәләб едир. Мәсәлән, биз кин, һирс, гәзәб кими хүсусијјәтләрә үстүн ҝәлмәлијик. Бу, бәзән чәтин ола биләр. Чүнки бәзи мәнфи хүсусијјәтләр биздә дәрин көк салыб. Мүгәддәс Китабда дејилир ки, «ағлы кәсәндән инсанын үрәји пислијә мејилли олур» (Јар. 8:21). Она ҝөрә дә бәзи хүсусијјәтләримизи рам етмәк үчүн вәфтиздән сонра да даима чалышмалыјыг. Ҝәлин бир нүмунәјә бахаг.

8, 9. Стивен гардашын нүмунәсиндән ҝөрүндүјү кими, нәјә ҝөрә көһнә шәхсијјәтдән јаха гуртармаг үчүн даима чалышмалыјыг?

⁸ Стивен адлы бир гардаша һирсини ҹиловламаг чәтин иди. О дејир: «Вәфтиздән сонра да хасијјәтим үзәриндә ишләмәјә давам етмәли идим. Мәсәлән, бир дәфә хидмәтдә ев-ев тәблиғ едән заман машынымдан радио-магнитофон оғурланды. Мән һәр шеји атыб оғрунун далынҹа гачмаға башладым. Ону тутмаға аз галмыш, о, радиону јерә атыб ҝөздән итди. Баҹы-гардашлара радиому неҹә ҝери алдығымы данышанда бир ағсаггал сорушду: “Стивен, бәс оғруну тутсајдын, нә едәҹәкдин?” Бу суал мәни дүшүндүрдү. Мән һәлә там олараг сүлһпәрвәр дејилдим. Бунун үзәриндә ишләмәјә давам етмәли идим» b.

⁹ Стивенин нүмунәси ҝөстәрир ки, биз пис хасијјәтимизи артыг тәрҝитдијимизи дүшүнсәк дә, һансыса вәзијјәтдә о, гәфил өзүнү бүрузә верә биләр. Әҝәр белә бир шеј сизинлә дә баш версә, руһдан дүшмәјин вә пис мәсиһи олдуғунузу дүшүнмәјин. Һәтта һәвари Булус өзү һагда белә демишди: «Дүзҝүн иш ҝөрмәк истәјәндә пислик артыг јанымда һазыр дурур» (Ром. 7:21—23). Бүтүн гејри-камил мәсиһиләрин мәнфи хүсусијјәтләрини евә һәр дәфә долан тоз-торпаға, чиркә бәнзәтмәк олар. Биз даима тәмизлик ишләри апармалыјыг. Буну неҹә едә биләрик?

10. Мәнфи хүсусијјәтләрдән неҹә јаха гуртара биләрик? (1 Јәһја 5:14, 15).

¹⁰ Мүбаризә апардығыныз хүсусијјәт барәдә Јеһоваја дуа един вә әмин олун ки, О сизин дуанызы ешидәҹәк вә сизә көмәк едәҹәк. (1 Јәһја 5:14, 15 ајәләрини охујун.) Дүздүр, Јеһова һәмин хүсусијјәтинизи мөҹүзәви шәкилдә јох етмәјәҹәк. Амма сизә ҝүҹ верә биләр ки, о хүсусијјәтә јенилмәјәсиниз (1 Бут. 5:10). Сиз исә өһдәнизә дүшәни един, дуаныза ујғун давранын: көһнә  шәхсијјәтинизи бәсләјән шејләрдән узаг олун. Мәсәлән, еһтијатлы олун ки, мүбаризә апардығыныз хүсусијјәти аловландыран кинолара, телевизија програмларына бахмајасыныз вә ја о сәпкидә китаблар охумајасыныз. Һәмчинин налајиг фикирләри ағлыныза јахын бурахмајын (Филип. 4:8; Кол. 3:2).

11. Јени шәхсијјәтә бүрүнмәк үчүн нә етмәлијик?

¹¹ Көһнә шәхсијјәтдән азад оландан сонра јени шәхсијјәтә бүрүнмәк лазымдыр. Буну неҹә едә биләрсиниз? Јеһованын хүсусијјәтләри һагда өјрәндикҹә Она бәнзәмәји гаршыныза мәгсәд гојун (Ефес. 5:1, 2). Мәсәлән, Мүгәддәс Китабдан Јеһованын бағышлајан олдуғуну ҝөстәрән һадисәни охујанда өзүнүздән сорушун: «Мән башгаларыны бағышлајырам?» Јахуд Јеһованын корлуг чәкәнләрә шәфгәт ҝөстәрмәси һагда охујанда өзүнүздән сорушун: «Бәс мән мадди сыхынтысы олан диндашларым үчүн нараһатам? Онлар үчүн нә едирәм?» Јени шәхсијјәтә бүрүнәрәк дүшүнҹәнизи даима јениләшдирин вә бу заман өзүнүзә гаршы сәбирли олун.

12. Стивен гардашын нүмунәси Мүгәддәс Китабын инсанлары дәјишмәјә гадир олдуғуну неҹә ҝөстәрир?

¹² Бајаг һаггында данышдығымыз Стивен гардаш тәдриҹән јени шәхсијјәтә бүрүнә билди. О дејир: «Вәфтиздән сонра дәфәләрлә мәни өзүндән чыхараҹаг вәзијјәтләрлә үзләшмишәм. Белә һалларда мәни гызышдырмаг истәјән адамлардан узаглашмағы вә ја ҝәрҝинлији диҝәр јолларла азалтмағы өјрәндим. Чохлары, о ҹүмләдән арвадым бу ҹүр вәзијјәтләри јолуна гоја билдијимә ҝөрә мәни тәрифләјир. Өзүм дә өзүмә тәәҹҹүб едирәм. Хасијјәтимдәки бу дәјишикликләрә өз ҝүҹүм сајәсиндә наил олмамышам. Онлар бир даһа сүбут едир ки, Мүгәддәс Китаб инсанлары дәјишмәјә гадирдир».

13. Нәфсә үстүн ҝәлмәјә бизә нә көмәк едә биләр? (Галатијалылара 5:16).

¹³ Галатијалылара 5:16 ајәсини охујун. Нәфсә гаршы мүбаризәдә галиб ҝәлмәк үчүн Јеһова бизә бол-бол мүгәддәс руһундан верир. Кәламы охујанда мүгәддәс руһун бизә тәсир етмәсинә имкан јарадырыг. Һәмчинин биз ибадәт ҝөрүшләриндә дә мүгәддәс руһ алырыг. Бу ҝөрүшләрдә биз баҹы-гардашларла үнсијјәт едирик. Бизим кими, онлар да дүзҝүн давранмаг үчүн вар ҝүҹләри илә чалышырлар. Бу, инсаны үрәкләндирир (Ибр. 10:24, 25; 13:7). Бундан әлавә, Јеһоваја дуа едиб јалваранда ки, зәифликләримизлә мүбаризә апармаға көмәк етсин, О, мүтләг мүгәддәс руһу илә бизә ҝүҹ верәҹәк. Ола билсин, бүтүн бу шејләри етмәклә јанлыш арзуларымыз јоха чыхмасын, амма әсас одур ки, биз онлара ујмајаҹағыг. Галатијалылара 5:16 ајәсиндә дејилир ки, руһун ҝөстәрдији јолла ҝетсәк, әсла ҹисмани истәкләри иҹра етмәјәҹәјик.

14. Нәјә ҝөрә Јеһоваја мәгбул давранмаг әзмимизи ҝүҹләндирмәк үчүн даима чалышмалыјыг?

¹⁴ Руһани ишләрлә мәшғул олмаға башлајандан сонра ваҹибдир ки, буну дајандырмајаг вә даима өзүмүздә Аллаһа мәгбул хүсусијјәтләр јетишдирәк. Чүнки бизим дүшмәнләримиздән бири һеч вахт јатмыр. Бу, нәфсимиздир. Ола биләр ки, һәтта вәфтиздән сонра да инсанын гумара, спиртли ичкидән суи-истифадәјә, порнографијаја вә узаг дурмалы олдуғу диҝәр шејләрә марағы олсун (Ефес. 5:3, 4). Бир ҝәнҹ гардаш етираф едир: «Ән бөјүк чәтинликләримдән бири өз ҹинсимдән олан инсанлара  гаршы мејлимлә мүбаризә апармаг иди. Мәнә елә ҝәлирди ки, бу мүвәггәтидир, кечиб ҝедәҹәк. Лакин бу һиссләр һәлә дә мәни раһат бурахмыр». Нәфсинизә ҝүҹ ҝәлмәк сизә чәтиндирсә, нә едә биләрсиниз?

15. Нәфсани истәкләрлә һамынын мүбаризә апардығыны билмәк инсаны нәјә ҝөрә үрәкләндирир? (Шәклә бахын.)

¹⁵ Әҝәр һүҹум чәкмәјә ҝирәвә ахтаран һијләҝәр дүшмәнинизлә, јәни нәфсинизлә мүбаризә апармаг сизин үчүн чәтиндирсә, унутмајын ки, сиз тәк дејилсиниз. Мүгәддәс Китабда јазылыб: «Үзләшдијиниз сынагларда гејри-ади бир шеј јохдур, һамы белә сынагларла үзләшир» (1 Кор. 10:13а). Бу сөзләр гәдим Коринф шәһәриндә јашајан мәсиһи гадынлара вә кишиләрә үнванланмышды. Онлардан бәзиләри кечмишдә зинакар, һомосексуал вә ички дүшкүнү олмушдулар (1 Кор. 6:9—11). Неҹә дүшүнүрсүнүз, вәфтиздән сонра онларын нәфсани истәкләри јоха чыхды? Хејр. Онларын һамысы мәсһ олунмуш мәсиһи олсалар да, һәлә гејри-камил идиләр вә буна ҝөрә дә вахташыры нәфсләри илә мүбаризә апармалы олурдулар. Буну билмәк инсаны үрәкләндирир. Чүнки билирсиниз ки, сизинки кими ејни нәфсани истәкләрлә мүбаризәдә галиб ҝәләнләр олуб. Демәли, сиз дә иманда ҝүҹлү гала биләрсиниз, ахы «дүнјадакы бүтүн гардашларыныз да ејни әзаблара гатлашырлар» (1 Бут. 5:9).

16. Һансы тәләдән өзүмүзү ҝөзләмәлијик вә нәјә ҝөрә?

¹⁶ Фикирләшмәјин ки, һеч ким сизин нәләр јашадығынызы баша дүшә билмәз. Бу ҹүр дүшүнҹә сизин үчүн тәлә ола биләр. Чүнки бу заман вәзијјәтинизин үмидсиз олдуғуну вә нәфси истәјинизин гаршысында аҹиз олдуғунузу дүшүнәрсиниз. Мүгәддәс Китабда исә бунун әкси дејилир. Орада јазылыб: «Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара  мәруз галасыныз. Сынаг вахты дөзә биләсиниз дејә, сизә чыхыш јолу да ҝөстәрәҹәк» (1 Кор. 10:13б). Одур ки, нәфсани истәјиниз нә гәдәр ҝүҹлү олса да, сиз она галиб ҝәлә биләрсиниз. Јеһова сизә көмәк едәҹәк.

17. Нәфсани истәкләрин јаранмасы гачынылмаз олса да, нә сизин ихтијарыныздадыр?

¹⁷ Бир шеји јадда сахлајын: нәфсани истәкләрин јаранмасы гачынылмаздыр. Амма бу заман Фитфирин арвадындан гачан Јусиф кими, дәрһал бу фикирләри бејниниздән говун (Јар. 39:12). Нәфсинизин једәјиндә ҝетмәмәк сизин ихтијарыныздадыр.

18, 19. Һансы суаллар бизә дүшүнҹәмизи јениләшдирмәјә көмәк едәҹәк?

¹⁸ Дүшүнҹәни јениләшдирмәк давамлы просесдир, биз һәмишә чалышмалыјыг ки, фикирләримиз вә әмәлләримиз Јеһоваја мәгбул олсун. Буна наил олмаг үчүн өзүмүзү мүнтәзәм олараг јохламалыјыг. Нөвбәти суаллар бизә бу саһәдә көмәк едәҹәк: «Әмәлләримдән ахырзаманда јашадығымы баша дүшдүјүм ҝөрүнүр? Јени шәхсијјәтә бүрүнмәк мәсәләсиндә мәндә ирәлиләјиш вар? Нәфсимә ујмајым дејә Јеһованын руһунун һәјатымы јөнләндирмәси үчүн нә едирәм?»

¹⁹ Өзүнүзү тәһлил едәндә өзүнүздән мүкәммәллик ҝөзләмәјин, әлдә етдијиниз наилијјәтләрә ҝөрә севинин. Әҝәр ҝөрсәниз ки, һәлә һансыса саһәдә инкишаф етмәлисиниз, руһдан дүшмәјин, Филиппилиләрә 3:16 ајәсиндәки нәсиһәтә әмәл един. Орада јазылыб: «Һансы сәвијјәјә чатмышыгса чатаг, ҝәлин бундан сонра да ејни ҹүр ирәлиләјәк». Белә етсәниз, әмин олун ки, дүшүнҹәнизи јениләшдирмәк үчүн чәкдијиниз зәһмәтә Јеһова бәрәкәт верәҹәк.