1. Аллаһын бүтүн хидмәтчиләри нә етмәк истәјир вә нә үчүн? (Үз габығындакы шәклә бахын.)

ИСА МӘСИҺ давамчыларына бујурмушду: «Ҝедин вә бүтүн халгларын ичиндә шаҝирд һазырлајын» (Мәт. 28:19). Аллаһын бүтүн садиг бәндәләри онлара һәвалә олунмуш хидмәти там јеринә јетирмәјин јолларыны билмәк истәјир (2 Тим. 4:5). Ахы бу тапшырыг һәјатда һәр шејдән мүһүм, һәр шејдән дәјәрли вә һәр шејдән тәҹилидир. Бунунла белә, бәзән хидмәтә истәдијимиз гәдәр вахт ајыра билмирик.

2. Нәләр хидмәтимизи јеринә јетирмәји чәтинләшдирир?

² Вахтымызы вә ҝүҹүмүзү әлимиздән алан башга ваҹиб ишләримиз дә вар. Өзүмүзүн вә аиләмизин зәрури тәләбатларыны тәмин етмәк үчүн, ола билсин, саатларла ишләјирик. Бәлкә дә, башга аилә мәсулијјәтләримиз вар, јахуд хәстәлик, депрессија, гоҹалығын өзү илә ҝәтирдији чәтинликләрлә мүбаризә апарырыг. Бүтүн бу кими чәтинликләрлә чарпышаркән хидмәтимизи там шәкилдә јеринә јетирмәк үчүн нә едә биләрик?

3. Иса Мәсиһин Мәтта 13:23 ајәсиндә јазылмыш сөзләриндән һансы нәтиҹәјә ҝәлирик?

³ Әҝәр Јеһоваја даһа чох хидмәт етмәјә шәраитимиз јол вермирсә, руһдан дүшмәмәлијик. Иса Мәсиһ билирди ки, Падшаһлыг ишинә һамы ејни дәрәҹәдә төһфә верә билмәјәҹәк. (Мәтта 13:23 ајәсини охујун.) Јеһоваја хидмәтдә ҹани-дилдән етдијимиз һәр бир шеј Онун үчүн чох дәјәрлидир (Ибр. 6:10—12). Ола биләр ки, шәраитимизин даһа чох хидмәт етмәјә имкан вердијини дүшүнәк. Бу мәгаләдә хидмәтимизи һәјатда һәр шејдән үстүн тутмағын, садә һәјат сүрмәјин, тәблиғ вә тәлим баҹарығымызы јахшылашдырмағын јолларыны өјрәнәҹәјик. Ҝәлин әввәлҹә хидмәти там јеринә  јетирмәјин нә демәк олдуғуну арашдыраг.

4. Хидмәти там јеринә јетирмәк нә демәкдир?

⁴ Садә сөзлә десәк, хидмәти там јеринә јетирмәк үчүн тәлим вә тәблиғ ишиндә мүмкүн гәдәр чох иштирак етмәлијик. Амма бура тәкҹә хидмәтә сәрф етдијимиз вахт аид дејил. Јеһоваја өнәмли олан буну нә үчүн етмәјимиздир. Јеһованы вә инсанлары севдијимиз үчүн хидмәтимизи * ҹанла-башла иҹра едирик (Марк 12:30, 31; Кол. 3:23). Ҹанла-башла хидмәт етмәк ҝүҹүмүзү әлимиздән ҝәлән гәдәр Аллаһа хидмәтә сәрф етмәк демәкдир. Тәблиғ ишинә шәрәфли бир иш кими јанашан мәсиһи мүждәни даһа чох инсана чатдырмаға чалышыр.

5, 6. Вахты мәһдуд оланлар хидмәти һәр шејдән үстүн тута биләрләрми? Изаһ един.

⁵ Ҝитарада ифа етмәји севән бир ҝәнҹи тәсәввүр един. О, һәр имкан јарананда ҝитара чалмағы севир. Нәһајәт, бу ҝәнҹ бир кафедә һәфтәсонлары ҝитарада ифа етмәк тәклифи алыр. Амма онун бу ишдән газандығы пул хәрҹләрини өдәмир. Буна ҝөрә дә базар ертәсиндән ҹүмә ҝүнүнә гәдәр дүканда кассир ишләјир. Бахмајараг ки, вахтынын чоху дүканда кечир, онун үрәји мусигидәдир. Бу ҝәнҹ ҝитарада даһа јахшы чалмағы өјрәнмәк вә мусигичи олмаг арзусундадыр. О, јаранан һәр фүрсәтдә, һәтта бир аз вахты оланда да, ҝитара чалыр.

⁶ Ејнилә, ола билсин, сиз дә тәблиғ ишинә истәдијиниз гәдәр вахт ајыра билмирсиниз. Бунунла белә, тәблиғ етмәји чох севирсиниз. Чалышырсыныз ки, хош хәбәрин инсанларын үрәјинә тәсир етмәси үчүн даһа јахшы тәблиғ етмәји өјрәнәсиниз. Үзәриниздә чохлу мәсулијјәт олса да, тәблиғ ишини һәјатынызда һәр шејдән үстүн тутмағын јолларыны ахтарырсыныз.

7, 8. Хидмәтә Иса Мәсиһ кими јанашмағы неҹә өјрәнә биләрик?

⁷ Иса Мәсиһин хидмәтә мүнасибәти бизим үчүн ҝөзәл нүмунәдир. Аллаһын Падшаһлығы һагда данышмаг онун үчүн һәјатда һәр шејдән өнәмли иди (Јәһ. 4:34, 35). О, даһа чох инсана тәблиғ етмәк үчүн јүзләрлә километр јол гәт едирди. Һәр фүрсәти дәјәрләндириб инсанлара истәр евләриндә, истәрсә дә иҹтимаи јерләрдә тәблиғ едирди. Иса Мәсиһин бүтүн һәјаты тәблиғ хидмәтинә јөнәлмишди.

⁸ Биз дә Иса Мәсиһдән өрнәк алараг истәнилән јердә вә истәнилән вахт хош хәбәри бөлүшмәк үчүн шәраит јарада биләрик. Мүждәчилик ишиндә иштирак етмәк үчүн шәхси раһатлығымыздан кечмәјә һазырыг (Марк 6:31—34; 1 Бут. 2:21). Јығынҹағын бәзи үзвләри өнҹүл, көмәкчи өнҹүл вә ја хүсуси өнҹүл кими хидмәт едир. Диҝәрләри башга дил өјрәнир вә ја тәблиғчиләрә тәләбат олан әразијә көчүб. Бунунла белә, бу ишин әксәр һиссәсини әлләриндән ҝәлән гәдәр тәблиғ едән сырави тәблиғчиләр һәјата кечирир. Һәр бир һалда, Јеһова ҝүҹүмүздән артығыны тәләб етмир. О, «хошбәхт Аллаһын... шанлы мүждәси»ни бәјан едән бизләрин бу мүгәддәс хидмәтдән севинҹ дујмасыны истәјир (1 Тим. 1:11; Ган. 30:11).

9. а) Өзүнү доландырмаг үчүн ишләмәли олмасына бахмајараг, һәвари Булусун тәблиғ ишини биринҹи јерә гојдуғу нәдән ҝөрүнүр? б) Һәвариләрин ишләри 28:16, 30, 31 ајәләринә әсасән, һәвари Булус хидмәтә неҹә јанашырды?

⁹ Хидмәти һәјатында һәр шејдән үстүн тутмагда Һәвари Булус бизә өрнәкдир. Булус икинҹи тәблиғ сәјаһәти заманы Коринфдә оланда мадди дуруму зәифләдијинә ҝөрә вахтынын бир гисмини чадыр тикмәјә сәрф едирди. Лакин чадыр тикмәк онун үчүн һәјатда ән ваҹиб иш дејилди. О, бу ишлә коринфлиләрә хош хәбәри «тәмәннасыз» мүждәләјә билмәк үчүн мәшғул олурду (2 Кор. 11:7). Булус вахтынын мүәјјән һиссәсини ишә сәрф етмәли олса да, диггәтини әсасән хидмәтә ҹәмләјир вә һәр шәнбә тәблиғ едирди. Вәзијјәти бир аз јахшылашандан сонра исә о, тәблиғ ишинә даһа чох вахт ајыра билди. «Булус бүтүн вахтыны Аллаһын сөзүнү јајмаға һәср етди. О, јәһудиләрә Иса һаггында шәһадәт верир, онун Мәсиһ олдуғуну сүбут едирди» (Һәв. 18:3—5; 2 Кор. 11:9). Сонралар Ромада ики ил ев дустағы олан заман исә Булус ону зијарәт едәнләрә шаһидлик верир вә мәктублар јазырды. (Һәвариләрин ишләри 28:16, 30, 31 ајәләрини охујун.) Булус нәјинсә ону хидмәтдән јајындырмасына имкан вермирди. О демишди: «Белә бир хидмәтимиз вар. Буна ҝөрә дә биз руһдан дүшмүрүк» (2 Кор. 4:1). Ејнилә биз дә вахтымызын мүәјјән һиссәсини ишә сәрф етсәк дә, һәвари Булус кими Падшаһлыг ишини һәјатда һәр шејдән үстүн тута биләрик.

10, 11. Сәһһәтинизлә бағлы проблемләрә рәғмән, хидмәтинизи там јеринә јетирмәк үчүн нә едә биләрсиниз?

¹⁰ Гоҹалыг вә ја хәстәлик уҹбатындан ев-ев тәблиғдә чох иштирак едә билмирсинизсә, хидмәтин диҝәр нөвләриндә иштирак едә биләрсиниз. Биринҹи әсрдә јашамыш мәсиһиләр ҝетдикләри һәр јердә тәблиғ едирдиләр. Онлар јаранан һәр фүрсәтдә, мәсәлән, гејри-формал шәкилдә, һәмчинин иҹтимаи јерләрдә вә ев-ев тәблиғдә гаршыларына чыхан инсанлара һәгигәт барәдә шаһидлик верирдиләр (Һәв. 17:17; 20:20). Әҝәр чох ҝәзә билмирсинизсә, ҝедиш-ҝәлишин сых олдуғу јерләрдә әјләшиб јолдан кечәнләрә тәблиғ едә биләрсиниз. Һәмчинин гејри-формал шаһидлик вермәк, мәктуб јазмаг, телефон васитәсилә тәблиғ етмәк олар. Ҹидди мәһдудијјәтләр уҹбатындан ев-ев тәблиғдә чох иштирак едә билмәјән баҹы-гардашлар  тәблиғин бу кими нөвләриндә иштирак етмәклә бөјүк севинҹ вә мәмнунлуг дујурлар.

¹¹ Сәһһәтиниздәки мәһдудијјәтләрә бахмајараг, хидмәтинизи там јеринә јетирә биләрсиниз. Һәвари Булусун нүмунәсинә јенидән гајыдаг. О демишди: «Мәнә гүввәт верәнин сајәсиндә һәр шејә ҝүҹүм чатыр» (Филип. 4:13). Биринҹи тәблиғ сәјаһәти заманы хәстәләнәндә онун бу ҹүр гүввәтә еһтијаҹы вар иди. Булус галатијалылара демишди: «Илк дәфә мүждәни сизә чатдырмаг имканыны хәстә оланда тапмышдым» (Гал. 4:13). Ејнилә, сәһһәтиниздәки чәтинликләр хош хәбәри һәкимләрә, тибб баҹыларына вә диҝәр тибб ишчиләринә чатдырмаға имкан јарада биләр. Онларын бир чоху тәблиғчиләр ев-ев тәблиғ едән заман ишдә олур.

12. Иса Мәсиһ ҝөзүмүзү тох сахламағы мәсләһәт ҝөрәркән нәји нәзәрдә тутурду?

¹² Иса Мәсиһ демишди: «Бәдәнин чырағы ҝөздүр. Әҝәр ҝөзүн тохдурса [јахуд «ҝөзүн бир шејә ҹәмләнибсә», һаш.], бүтүн бәдәнин нур ичиндә олаҹаг» (Мәт. 6:22). Бу сөзләрин мәнасы нәдир? Иса Мәсиһ ону нәзәрдә тутурду ки, биз садә һәјат сүрмәлијик, башга сөзлә, ҝөзүмүзү бир мәгсәдә ҹәмләмәли вә ондан јајындырмамалыјыг. Мәсиһ бу саһәдә ҝөзәл нүмунә гојмушду: о, бүтүн һәјатыны хидмәтә һәср етмишди вә шаҝирдләрини дә диггәтләрини Јеһоваја вә Онун Падшаһлығына ҹәмләмәјә сәсләјирди. Ејнилә, биз дә диггәтимизи тәблиғ хидмәтинә ҹәмләмәклә вә «Падшаһлығы вә Аллаһын тәләб етдији салеһлији һәр шејдән үстүн» тутмагла  Иса Мәсиһин нүмунәсини изләјирик (Мәт. 6:33).

13. Диггәтимизи хидмәтә ҹәмләмәк үчүн нә едә биләрик?

¹³ Диггәтимизи хидмәтә ҹәмләмәјин бир јолу һәјатымызы садәләшдирмәкдир. Беләҹә, инсанлара Јеһованы танымаға, Она јахынлашмаға көмәк емәк үчүн даһа чох вахтымыз олаҹаг *. Мәсәлән, һәфтә әрзиндә тәблиғдә даһа чох иштирак етмәк үчүн иш саатымызда дәјишиклик етмәк мүмкүндүр? Јахуд чох вахт алан истираһәт вә әјләнҹә нөвләриндә даһа аз иштирак едә биләрик?

14. Хидмәтә даһа чох вахт ајырмаг үчүн бир әр-арвад һансы дәјишиклији едиб?

¹⁴ Елиас адлы ағсаггалла һәјат јолдашы белә бир дәјишиклик едиб. О дејир: «Бирдән-бирә өнҹүл ола билмәсәк дә, һараданса башламалыјдыг. Одур ки, тәблиғә даһа чох вахт ајырмаг үчүн кичик дәјишикликләр етмәјә башладыг. Мисал үчүн, хәрҹләримизи азалтдыг, чох вахт ајырдығымыз истираһәт вә әјләнҹәләрә даһа аз вахт ајырмаға башладыг, еләҹә дә даһа сәрбәст графиклә ишләјә билмәк үчүн мүдирләримизлә данышдыг. Бунун сајәсиндә ахшамлар тәблиғ етмәк, даһа чох Мүгәддәс Китаб дәрси кечмәк, һәтта ајда ики дәфә һәфтәарасы тәблиғә ҝетмәк имканымыз јаранды. Бундан бөјүк севинҹ олар?!»

15, 16. 1 Тимутијә 4:13, 15 ајәләринә әсасән, бир тәблиғчи кими неҹә пүхтәләшә биләрик? (Һәмчинин « Хидмәтими там јеринә јетирмәјә көмәк едән мәгсәдләр» адлы чәрчивәјә бахын.)

¹⁵ Хидмәтимизи там јеринә јетирмәјин  диҝәр јолу тәблиғ баҹарығымызы јахшылашдырмагдыр. Елә пешә ишчиләри вар ки, онлар билик вә баҹарыгларыны артырмаг үчүн даима тәлим алмалыдырлар. Аллаһын Падшаһлығынын тәблиғчиләри һагда да ејни шеји демәк олар. Биз дә даима хидмәтдә даһа сәриштәли олмағын јолларыны өјрәнмәлијик (Мәс. 1:5; 1 Тимутијә 4:13, 15 ајәләрини охујун).

¹⁶ Бәс хидмәтдә пүхтәләшмәк үчүн даһа нәләр едә биләрик? «Мәсиһи һәјаты вә ибадәти» ҝөрүшү заманы алдығымыз тәлимә ҹидди јанашмалыјыг. Бу ҝөрүшдән алдығымыз дәјәрли тәлим тәблиғ хидмәтиндә даима пүхтәләшмәјә көмәк едир. Мисал үчүн, ҝөрүшүн сәдри тапшырыгла чыхыш едән шаҝирдләрә мәсләһәт верәндә биз дә хидмәтимизи јахшылашдырмаг үчүн бу мәсләһәтләрдән јарарлана биләрик. Нөвбәти дәфә тәблиғ едәркән бу мәсләһәтләри тәтбиг едә биләрик. Тәблиғ групумузун нәзарәтчисиндән көмәк истәмәк, һәмчинин онунла вә ја башга бир тәҹрүбәли тәблиғчи илә, өнҹүллә, рајон нәзарәтчиси илә әмәкдашлыг етмәк олар. Тәлим вәсаитләримизин һәр бириндән даһа мәһарәтлә истифадә етмәји өјрәндикҹә тәблиғ вә тәлим ишиндән даһа чох севинҹ әлдә едәҹәјик.

17. Хидмәти там јеринә јетирмәк һансы бәһрәләри ҝәтирир?

¹⁷ Јеһова бизә Онун әмәкдашы олмаг имканы вериб. Бу, неҹә дә бөјүк шәрәфдир! (1 Кор. 3:9). «Даһа ваҹиб шејләри» ајырд етмәклә вә диггәти хидмәтә ҹәмләмәклә «Јеһоваја севинҹлә» ибадәт едә биләрсиниз (Филип. 1:10; Зәб. 100:2). Аллаһын хидмәтчиси олараг әмин ола биләрсиниз ки, О, үзләшдијиниз чәтинликләрә вә мәһдудијјәтләринизә бахмајараг, хидмәтинизи там јеринә јетирмәјиниз үчүн сизә лазыми ҝүҹү верәҹәк (2 Кор. 4:1, 7; 6:4). Шәраитинизин аз вә ја чох хидмәт етмәјә имкан вермәсиндән асылы олмајараг сиз ҹанла-башла хидмәт етдијиниз үчүн севинә биләрсиниз (Гал. 6:4). Хидмәтинизи там јеринә јетирәндә Јеһоваја вә инсанлара севҝинизи ҝөстәрирсиниз. Бу јолла сиз һәм өзүнүзү, һәм дә сизә гулаг асанлары хилас етмиш олаҹагсыныз (1 Тим. 4:16).