1, 2. Адынын ләкәләнмәси Јеһоваја неҹә тәсир едир? Нүмунә чәкин.

 БЕЛӘ бир вәзијјәти тәсәввүр един: сизә јахын олан бири барәниздә дәһшәтли шејләр данышыр. Сиз бунларын јалан олдуғуну билирсиниз. Амма бәзиләри буна инаныр, һәлә үстәлик, ҝедиб буну башгаларына да јајырлар, онлар да инаныр. Бу сизә неҹә тәсир едәрди? Әҝәр сизин үчүн инсанларын фикри вә тәмиз адынызы горумаг ваҹибдирсә, һаггынызда данышылан јаланлар ганынызы гаралдаҹаг (Мәс. 22:1).

² Бу нүмунә ҝөстәрир ки, адына гара јахылмасы Јеһоваја пис тәсир етмишди. Јеһованын руһани оғулларындан бири илк гадын олан Һәвваја Онун барәдә јалан данышмышды. Һәвва бу јалана инанды. О, әри Адәмлә бирҝә Јеһоваја үсјан етди. Бу да инсанлара ҝүнаһ вә өлүм ҝәтирди (Јар. 3:1—6; Ром. 5:12). Дүнјада ҝөрдүјүмүз бүтүн проблемләр — өлүм, мүһарибәләр вә әзаб-әзијјәт Шејтанын Әдән бағындан бәри јајдығы јаланын уҹбатындандыр. Тәбии ки, барәсиндә сөјләнилән јаланлар вә бунун ҝәтирдији нәтиҹәләр Јеһоваја ағыр ҝедир. Бунунла белә, Јеһова аҹыглы, киндар дејил. Һәр шејә рәғмән, О јенә дә «хошбәхт Аллаһ»дыр (1 Тим. 1:11).

3. Һәр биримизин һансы имканы вар?

³ Биз Шејтанын Јеһова һагда дедикләринин јалан олдуғуну сүбут едә биләрик. Бунун үчүн садә бир әмрә табе олмалыјыг: «Јеһованын адыны мәдһ един!» (Зәб. 113:1). Буну неҹә едә биләрик? Инсанлара Јеһованын ҝөрдүјү јахшы ишләр барәдә данышмагла. Сиз Јеһованын адыны уҹалтмаг истәјирсиниз? Ҝәлин Онун адыны үрәкдән мәдһ етмәјә көмәк едәҹәк үч амили арашдыраг.

 ЈЕҺОВАНЫН АДЫНЫ МӘДҺ ЕТМӘЈИМИЗ ОНА ХОШ ҜЕДИР

4. Јеһованы мәдһ етмәјимиз Она нәјә ҝөрә хош ҝедир? Нүмунә чәкин. (Һәмчинин шәклә бахын.)

⁴ Сәмави Атамызын адыны мәдһ едәндә Ону севиндиририк (Зәб. 69:30, 31). Бәс бу о демәкдир ки, Күлли-Ихтијар Јарадан гејри-камил инсанлартәк өзүнә әминлијини артырмаг, руһланмаг үчүн киминсә тәрифинә мөһтаҹдыр? Әлбәттә јох! Белә бир нүмунәјә бахаг: балаҹа бир гызҹығазы тәсәввүр един. О, гача-гача ҝәлиб атасынын бојнуна сарылыр вә дејир: «Сән дүнјанын ән јахшы атасысан!» Гызынын бу ҝөзләнилмәз һәрәкәти атаны көврәлдир, үзүндә тәбәссүм јарадыр. Бәс бу о демәкдирми ки, бу атанын өзүнәинам һисси јохдур, гызынын сөјләдији тәриф сөзләринә мөһтаҹдыр? Хејр. Садәҹә о, гызыны севир вә хошбәхтдир ки, гызы да она севҝисини вә миннәтдарлығыны билдирир. Ата севинир ки, гызында белә ҝөзәл хүсусијјәтләр вар вә о, бөјүјәндә хошбәхт олаҹаг. Ејнилә, Атамыз Јеһоваја да Ону уҹалдан сөзләримизи ешитмәк чох хош олур.

5. Јеһованын адыны мәдһ едәндә нәјин јалан олдуғуну сүбут едирик?

⁵ Биз Јеһованын адыны уҹалданда Шејтанын башга бир иддиасынын да јалан олдуғуну сүбут едирик. О иддиа едир ки, һеч бир инсан ахыра гәдәр Аллаһын адыны мүдафиә етмәјәҹәк, сынагла үзләшәндә сәдагәтсизлик едәҹәк. Шејтанын дедијинә ҝөрә, өз хејри наминә һәр кәс Аллаһдан үз дөндәрәр (Әјј. 1:9—11; 2:4). Амма Әјјуб пејғәмбәр Аллаһа сәдагәтини горујараг Шејтанын јаланчы олдуғуну ҝөстәрмишди. Онун кими сиз дә Јеһоваја садиг галаҹагсыныз? Һәр биримиз Јеһоваја сәдагәтлә гуллуг едәрәк Онун адыны мүдафиә едә вә гәлбини севиндирә биләрик (Мәс. 27:11). Бу, доғрудан да бөјүк шәрәфдир!

6. Давуд падшаһа вә лавилиләрә неҹә бәнзәјә биләрик? (Нәһәмја 9:5).

⁶ Јеһованы севән инсанлар бүтүн гәлбләри илә Онун адыны уҹалтмаг истәјирләр. Давуд падшаһ јазмышды: «Јеһоваја алгыш ет, еј варлығым, еј вүҹудум, Онун мүгәддәс адына алгыш ет!» (Зәб. 103:1). Давуд билирди ки, Јеһованын адына алгыш едәндә елә Онун өзүнә алгыш едир. Јеһованын ады ҝәләндә тәсәввүрүмүздә Онун неҹә варлыг олдуғу, Онун хүсусијјәтләри, ҝөрдүјү мөһтәшәм ишләр ҹанланыр. Давуд Јеһованын адыны мүгәддәс тутмаг вә Ону уҹалтмаг истәјирди. О буну бүтүн вүҹуду илә, бүтүн варлығы илә етмәјә чалышырды. Ејнилә лавилиләр дә Јеһованын адыны уҹалдырдылар, бу саһәдә өндә ҝедирдиләр. Онлар тәвазөкарлыгла  гәбул едирдиләр ки, дејәҹәкләри һеч бир сөз Аллаһын мүгәддәс адыны мәдһ етмәјә јетмәз. (Нәһәмја 9:5 ајәсини охујун.) Шүбһәсиз, бу ҹүр тәвазөкар, үрәкдән ҝәлән тәриф сөзләрини ешидәндә Јеһованын гәлби севинҹлә долурду.

7. Тәблиғдә вә ҝүндәлик һәјатымызда Јеһованын адыны неҹә уҹалда биләрик?

⁷ Бизим дә сөзләримиздән Јеһоваја миннәтдарлығымыз вә мәһәббәтимиз ҝөрүнәндә О севинир. Тәблиғдә оларкән әсас мәгсәдимиз инсанлары Јеһоваја јахынлашдырмаг, еләҹә дә онлара бизим кими Аллаһы севмәјә көмәк етмәк олмалыдыр (Јаг. 4:8). Инсанлара Мүгәддәс Китабдан Јеһова барәдә, Онун мәһәббәти, әдаләти, һикмәти, гүдрәти вә диҝәр ҝөзәл хүсусијјәтләри һагда јазыланлары ҝөстәрәндә севинҹ дујуруг. Һәмчинин Јеһованын нүмунәсини изләмәјә чалышмагла да Ону мәдһ едирик вә гәлбини севиндиририк (Ефес. 5:1). Белә едәндә бу шәр дүнјада башгаларындан сечилирик. Ола билсин, инсанлар бизим фәргли олдуғумузу ҝөрүб бунун сәбәбини өјрәнмәк истәсин (Мәт. 5:14—16). Ҝүндәлик һәјатда бу ҹүр инсанларла сөһбәт едән заман онлара белә давранмағымызын сәбәбини ачыглаја биләрик. Нәтиҹәдә, сәмими-гәлбли инсанлар Аллаһа јахынлаша биләр. Јеһованы бу јолларла мәдһ едәндә Онун гәлбини фәрәһләндиририк (1 Тим. 2:3, 4).

ЈЕҺОВАНЫН АДЫНЫ МӘДҺ ЕТМӘЈИМИЗ ИСАЈА ХОШ ҜЕДИР

8. Јеһованын адыны мәдһ етмәкдә нәјә ҝөрә Иса ән ҝөзәл нүмунәдир?

⁸ Ҝөјдә вә јердә олан бүтүн шүурлу варлыгларын ичиндә Исадан јахшы Јеһованы таныјан јохдур (Мәт. 11:27). Иса Атасыны севир вә Онун адыны уҹалтмағы өһдәсинә ҝөтүрүб (Јәһ. 14:31). Өлүмүндән өнҹәки ҝеҹә Атасына етдији дуада јер үзүндә ҝөрдүјү ән ваҹиб иш барәдә белә демишди: «Сәнин адыны онлара ачдым» (Јәһ. 17:26). Һансы мәнада?

9. Атасыны даһа јахындан танымағымыз үчүн Иса һансы мәсәли чәкмишди?

⁹ Иса инсанлара садәҹә олараг Аллаһын адынын Јеһова олдуғуну демирди. Јәһудиләр Аллаһын адыны онсуз да билирди. Иса онлара Аллаһы таныдырды (Јәһ. 1:17, 18). Мәсәлән, Төвратда ачыгланыр ки, Јеһова рәһмли вә мәрһәмәтли Аллаһдыр (Чых. 34:5—7). Амма Иса Јеһованын белә бир Аллаһ олдуғуну даһа ајдын ҝөстәрмәк үчүн итмиш оғул вә ата илә бағлы мәсәл чәкмишди. Биз атанын төвбә едән оғлуну «һәлә узагда икән» ҝөрдүјүнү, габағына гачыб онун бојнуна сарылдығыны, ону үрәкдән бағышладығыны охујанда Јеһованын нә гәдәр рәһмли вә мәрһәмәтли олдуғуну даһа јахшы баша дүшүрүк (Лука 15:11—32). Иса Аллаһын әслиндә неҹә варлыг олдуғуну баша дүшмәјә көмәк едирди.

10. а) Һарадан билирик ки, Иса Атасынын адыны чәкирди вә башгаларынын да буну етмәсини истәјирди? (Марк 5:19). б) Иса бизим нә етмәјимизи истәјир? (Һәмчинин шәклә бахын.)

¹⁰ Иса башгаларынын да Аллаһын адыны чәкмәсини истәјирди? Әлбәттә. Бәзи дин хадимләри Аллаһын мүгәддәс адыны дилә ҝәтирмәји һөрмәтсизлик һесаб едирдиләр. Амма Иса Мүгәддәс Китаба әсасланмајан бу ҹүр дүшүнҹәни рәдд едирди, нәјинсә она Атасынын адыны уҹалтмаға мане олмасына јол вермирди. Исанын ҝерасалыларын торпағында ҹинә тутулмуш бир адамы сағалтдығы һадисәни јадымыза салаг. Ҹамаат чох горхмушду вә Исаја јалвармышды ки, онларын әразисиндән чыхыб ҝетсин. О да ҝетмишди (Марк 5:16, 17). Амма Иса Аллаһын  адынын орада да танынмасыны истәјирди. Буна ҝөрә дә кишијә тапшырды ки, ҝедиб инсанлара сағалдығыны данышсын. Амма Иса она «ҝет мәним нә етдикләрими даныш» демәди, «Јеһованын сәнин үчүн етдији һәр шеји... даныш» деди. (Марк 5:19 ајәсини охујун.) a Иса бу ҝүн биздән дә ејни шеји ҝөзләјир. О, бүтүн дүнјада Атасынын адыны бәјан етмәјимизи истәјир! (Мәт. 24:14; 28:19, 20). Буну етмәјимиз Падшаһымыз Исаја хош ҝедир.

11. Иса давамчыларына нә һагда дуа етмәји өјрәтмишди вә Һизгијал 36:23 ајәсинә әсасән бу нәјә ҝөрә ваҹибдир?

¹¹ Иса билирди ки, Јеһованын нијјәти Өз адыны бүтүн бөһтанлардан тәмизләмәкдир. Она ҝөрә давамчыларына бу ҹүр дуа етмәји өјрәтмишди: «Ҝөјләрдә олан Атамыз, гој адын мүгәддәс тутулсун» (Мәт. 6:9). Иса баша дүшүрдү ки, бәшәријјәтдә бундан мүһүм мәсәлә јохдур. (Һизгијал 36:23 ајәсини охујун.) Каинатда Аллаһын адыны мүгәддәс тутмаг үчүн Иса гәдәр ҹан гојан икинҹи варлыг олмајыб. Бунунла белә, билирсиниз, Иса һәбс олунанда дүшмәнләри ону нәдә иттиһам етдиләр? Аллаһын адына күфр етмәкдә! Атасынын мүгәддәс адыны тәһгир етмәк, Она гара јахмаг Иса үчүн ән ијрәнҹ ҝүнаһ иди. Белә бир ҝүнаһы ишләмәкдә иттиһам олунмасы Иса үчүн чох ағыр иди. Бәлкә дә өлүмүндән бир нечә саат әввәл Исанын «шиддәтли изтираб» чәкмәсинин әсас сәбәби елә бу иди (Лука 22:41—44).

12. Иса Атасынын адыны ән мүкәммәл шәкилдә неҹә уҹалтмышды?

¹² Иса Мәсиһ Аллаһын адыны уҹалтмагдан өтрү һәр ҹүр ишҝәнҹәјә, тәһгирә, бөһтана дөзмүшдү. О билирди ки, һәр аддымында Атасына итаәт едиб, буна ҝөрә дә һеч нәдән утанмамалыдыр (Ибр. 12:2). Һәмчинин һәјатынын бу гаранлыг дөнәминдә бирбаша Шејтанын һүҹумуна мәруз галдығынын да фәргиндә иди (Лука 22:2—4; 23:33, 34). Шејтан Исанын сәдагәтини сындыра биләҹәјинә әмин иди, амма онун үмидләри пуч олду! Иса бирдәфәлик сүбут етди ки, Шејтан мәнфур јаланчыдыр вә Јеһованын Она ән ағыр сынаглар гаршысында белә сәдагәтини горујан садиг хидмәтчиләри вар!

13. Падшаһымыз Исанын разылығыны неҹә газана биләрсиниз?

 ¹³ Падшаһымызын разылығыны газанмаг истәјирсиниз? Еләдирсә, даима Јеһованын адыны мәдһ един. Инсанлара Онун неҹә ҝөзәл Аллаһ олдуғу барәдә данышын. Белә етмәклә Исанын нүмунәсини изләмиш олурсунуз (1 Бут. 2:21). Сиз дә онун кими Јеһованын гәлбини севиндирирсиниз вә дүшмәни олан Шејтанын арсыз јаланчы олдуғуну сүбут едирсиниз!

ЈЕҺОВАНЫН АДЫНЫ МӘДҺ ЕТМӘЈИМИЗ ИНСАНЛАРА ХИЛАС ҜӘТИРИР

14, 15. Инсанлара Јеһова һагда өјрәдәндә һансы ҝөзәл шејләрә шаһид олуруг?

¹⁴ Јеһованын адыны уҹалданда инсанлара хилас олмаға көмәк едирик. Һансы мәнада? Билдијимиз кими, Шејтан «имансызларын зеһнини кор едиб» (2 Кор. 4:4). Буна ҝөрә дә инсанлар Шејтанын бу ҹүр јаланларына инаныр: Аллаһ јохдур, Аллаһ биздән узагдыр, инсанлар Онун веҹинә дејил, Аллаһ гәддардыр вә пис инсанлара әбәдијјән ишҝәнҹә верир. Бу јаланларын бир мәгсәди вар: Шејтан Јеһованын адыны ләкәләјәрәк инсанлары Ондан узаглашдырмаг истәјир. Амма биз тәблиғ едәндә Шејтанын бу нијјәтини алт-үст едирик. Чүнки инсанлара Јеһованын әслиндә неҹә ҝөзәл Аллаһ олдуғуну данышырыг, Онун мүгәддәс адыны уҹалдырыг. Бәс бунун нәтиҹәси нә олур?

¹⁵ Аллаһын Кәламындакы һәгигәтләрин мисилсиз ҝүҹү вар. Инсанлара Јеһова барәдә ҝерчәклији өјрәдәндә мөһтәшәм бир шејин шаһиди олуруг: онларын Шејтанын јаланларындан тутулмуш ҝөзләри јаваш-јаваш ачылыр. Бизим кими онлар да ҝөјдәки Атамызын ҝөзәл хүсусијјәтләрини ҝөрмәјә башлајырлар. Јеһованын сонсуз гүдрәти онлары һејрәтә ҝәтирир (Әшј. 40:26). Онун әдаләтли олдуғуна әмин олурлар (Ган. 32:4). Һикмәтинин бөјүк олдуғуну анлајырлар (Әшј. 55:9; Ром. 11:33). Һәмчинин Јеһованын мәһәббәт олдуғуну билиб тәскинлик тапырлар (1 Јәһ. 4:8). Инсанлар Јеһоваја јахынлашдыгҹа Онун өвлады кими әбәди јашамаг үмидләри даһа ҝерчәк олур. Доғрудан да онлара Аталарына јахынлашмаға көмәк етмәк бизим үчүн бөјүк шәрәфдир! Бу заман  Јеһова да бизә «әмәкдашлары» кими бахыр (1 Кор. 3:5, 9).

16. Јеһованын адыны билмәк бәзиләринә һансы тәсири бағышлајыб? Нүмунәләр чәкин.

¹⁶ Чох вахт инсанлара тәблиғ едәндә онлара әввәл-әввәл садәҹә олараг Аллаһын адынын Јеһова олдуғуну дејирик. Елә буну билмәјин өзү чохларынын һәјатыны дәјишиб. Мәсәлән, Алијә b адлы бир гадын ушаглыгдан гејри-христиан бир диндә олуб. Амма о өзүнү нә олдуғу динә, нә дә Аллаһа јахын һисс етмирди. Јеһованын Шаһидләри илә Мүгәддәс Китабы өјрәнәндән сонра исә һәр шеј дәјишди. О, Аллаһы Досту кими ҝөрмәјә башлады. Алијә өјрәнәндә ки, Аллаһын ады Мүгәддәс Китабын чох јериндән чыхарылыб вә «Рәбб» кими сифәтләрлә әвәз олунуб мәәттәл галмышды. Јеһованын адыны өјрәнмәк онун һәјатында дөнүш нөгтәси олду. Алијә дејир: «Мәним ән јахын Достумун ады вар имиш. Артыг үрәјимдә бөјүк бир раһатлыг дујурам. Хошбәхт инсанам ки, Аллаһын адыны билирәм!» Инди исә Стив адлы мусигичи бир кишинин һадисәсинә бахаг. О, гаты јәһуди олараг бөјүдүлмүшдү. Бунунла белә, чохлу сахтакарлыг ҝөрдүјү үчүн һеч бир дини тәшкилата мәнсуб олмаг истәмирди. Амма анасы вәфат едәндән сонра һәјатынын кәдәрли дөнәминдә Јеһованын Шаһидләринин кечирдији бир дәрсдә отуруб гулаг асмаға разылашыр. Аллаһын адыны билмәк Стивә дәрин тәсир бағышлајыр. О дејир: «Аллаһын адынын олдуғуну һеч билмирдим. Илк дәфә иди ки, Аллаһ мәним үчүн реал олду! Она ҝерчәк бир Варлыг кими бахдым. Онда билдим ки, Дост тапмышам».

17. Јеһованын адыны даима мәдһ етмәјә нәјә ҝөрә гәти гәрарлысыныз? (Һәмчинин шәклә бахын.)

¹⁷ Тәблиғ вә тәлим ишиндә инсанлара Јеһованын мүгәддәс адыны ачырсыныз? Онлара Аллаһын әслиндә неҹә бир варлыг олдуғуну изаһ едирсиниз? Сиз белә едәндә Јеһованын адыны мәдһ едирсиниз, инсанлара бу ады дашыјан Варлығы танымаға көмәк едәрәк Јеһованын адыны уҹалтмаға давам един. Бунунла сиз инсанларын һәјатыны хилас едәҹәксиниз. Падшаһымыз Мәсиһ Исанын нүмунәсини изләјәҹәксиниз. Ән әсасы исә мәһәббәтли Атамыз Јеһованы разы салаҹагсыныз. Одур ки, әбәдијјән Аллаһын адына алгыш един! (Зәб. 145:2).