Бир нечә јенијетмә оғлан мәктәб ҝәзинтиси заманы диҝәр бир оғлана ҹинси тәҹавүз етмәкдә иттиһам олунмушду. Шаҝирдләрин һамысы Канаданын габагҹыл өзәл мәктәбиндә тәһсил алырды. Бу һадисә барәдә «Оттава Ситизен» гәзетиндә Леонард Стерн јазмышды: «Зәканын, тәһсилин вә иҹтимаи тәбәгәнин өзү илә ҝәтирдији имтијазлар ҝәнҹләри пис һәрәкәтләрдән сахламыр».

Стерн һәмчинин јазмышды: «Јәгин дүшүнәҹәксиниз ки, валидејнин ән үмдә мәгсәди өвладына мәнәви дәјәрләр ашыламаг олмалыдыр. Һәгигәтдә исә бир чох валидејнләр, әсасән, өвладларынын елми вә мадди тәрәггиси үчүн чалышырлар».

Дүздүр, елмли олмаг ваҹибдир. Буна бахмајараг, ән јахшы дүнјәви тәһсил белә, инсана јанлыш арзулары вә пис мејилләри боғмаға көмәк едә билмир. Белә исә бу саһәдә көмәк едән, јәни инсана мәнәви дәјәрләр ашылајан тәһсили һарадан алмаг олар?

Мүгәддәс Китаб ҝүзҝү кимидир. Биз ора баханда өз мәһдудијјәтләримизи вә зәифликләримизи даһа ајдын ҝөрүрүк (Јагуб 1:23—25). Анҹаг Мүгәддәс Китаб садәҹә бунун үчүн дејил. О, бизә һәјатымызда лазыми дәјишикликләр етмәјә, һәгиги сүлһ вә әмин-аманлыг јаратмаг үчүн лазым олан кејфијјәтләрә јијәләнмәјә көмәк едир. Бу кејфијјәтләрдән бәзиләри јахшылыг, хејирхаһлыг, тәмкин вә мәһәббәтдир. Мәһәббәт һаггында һәтта дејилир ки, о, инсанлар арасында бирлик јарадыр (Колослулара 3:14). Нәјә ҝөрә мәһәббәт белә хүсуси кејфијјәтдир? Ҝөрүн Мүгәддәс Китабда мәһәббәт барәдә нә јазылыб.

• «Мәһәббәт сәбирли вә хејирхаһдыр. Мәһәббәт пахыл дејил, ловғаланмыр, гүррәләнмир, налајиг давранмыр, өз хејрини ҝүдмүр, тез өзүндән чыхмыр, она едилән пислијин һесабыны тутмур. Һагсызлыға [пислијә] севинмир, әксинә, һәгигәтә шадланыр. Һәр шејә гатлашыр,.. һәр шејә дөзүр. Мәһәббәт һеч вахт түкәнмир» (1 Коринфлиләрә 13:4—8).

• «Севән адам башгасына пислик етмәз» (Ромалылара 13:10).

• «Һәр шејдән зијадә бир-биринизи һәрарәтлә севин, чүнки мәһәббәт чохлу ҝүнаһын үстүнү өртүр» (1 Бутрус 4:8).

Сизи севән инсанларын әһатәсиндә оланда өзүнүзү неҹә һисс едирсиниз? Јәгин архајын, раһат, горхусуз олурсунуз. Бәли, сиз билирсиниз ки, онлар сизин јахшылығынызы истәјирләр, һеч вахт биләрәкдән сизә хәтәр јетирмәк истәмәзләр.

 Мәһәббәт һәмчинин инсанлары башгалары уғрунда фәдакарлыг ҝөстәрмәјә, һәтта һәјат тәрзини дәјишмәјә көмәк едир. Мәсәлән, Ҹорҹ адлы бир киши (ад шәртидир) баба оланда нәвәси илә чох вахт кечиртмәк истәјирди, анҹаг бир проблем вар иди. Ҹорҹ јаман чох сигарет чәкирди. Күрәкәни исә Ҹорҹун ушағын јанында сигарет чәкмәсини истәмирди. 50 ил сигарет чәкән Ҹорҹ нәвәсинин хәтринә сигарети атды. Бәли, мәһәббәт бөјүк гүввәјә маликдир.

Инсан севмәји өјрәнмәлидир. Ушаға севмәји өјрәтмәкдә валидејнләрин ролу әвәзсиздир. Онлар өвладларыны једиздирир, горујур, хәстәләнәндә, ағрыјанда онлара бахыр. Јахшы валидејн ушағы илә үнсијјәт едир, ону өјрәдир, она тәрбијә верир, јахшыны-писи баша салыр. Бундан әлавә, јахшы валидејн ушағына ҝөзәл нүмунә гојур.

Тәәссүфләр олсун ки, бәзи валидејнләр өз мәсулијјәтләрини јеринә јетирмирләр. Бәс бу о демәкдирми ки, онларын өвладлары һеч вахт јахшы инсан ола билмәзләр? Хејр, бу, һеч дә белә дејил. Бир чох инсан, һәтта јахшы аиләдә бөјүмәјәнләр белә һәјатларында дәјишиклик етмиш, гајғыкеш, етибарлы инсан олмушлар. Нөвбәти мәгаләдә ҝөрәҹәјимиз кими, инсанларын ҝөзүндә дүзәлмәз ҝөрүнән адамлар белә дәјишә билмишләр.