Бирләшмиш Милләтләр Тәшкилаты «глобал вәтәндашлыг» консепсијасыны ирәли сүрүр. Гаршыја гојулан мәгсәдләрә инсанлары бејнәлхалг әмәкдашлыға, инсан һүгугларына һөрмәт етмәјә вә планетимизи мүһафизә етмәјә тәшвиг етмәк дахилдир. Буна сәбәб Маһир Насирин «ЈУЕН Кроникл» («UN Chronicle») журналында гејд етдији кими, «иглим дәјишиклијинин, мүтәшәккил ҹинајәтин, артан бәрабәрсизлијин, һәллини тапмамыш мүнагишәләрин, әһалинин күтләви сурәтдә гачгын дүшмәсинин, глобал терроризимин, инфексион хәстәликләрин вә диҝәр тәһлүкәләрин... сәрһәд танымамасыдыр».

Бир башгалары исә үмумдүнја һөкумәт мәфһумуну ирәли сүрүр. Бу адамларын ичиндә италјан философу, шаир вә дөвләт хадими Дантенин (1265—1321) вә физикачы Алберт Ејнштејнин (1879—1955) адыны чәкмәк олар. Дантенин фикринҹә, сијаси ҹәһәтдән парчаланмыш дүнјада сүлһдән сөз ҝедә билмәз. О, Иса Мәсиһин сөзләрини ситат ҝәтирәрәк дејирди: «Дахилдән парчаланмыш һәр бир падшаһлыг дағылаҹаг» (Лука 11:17).

Ики атом бомбасы атылан Икинҹи Дүнја мүһарибәсиндән чох кечмәмиш Алберт Ејнштејн Бирләшмиш Милләтләр Тәшкилатынын Баш Ассамблејасына ачыг мәктуб јазмышды. О дејирди: «Бирләшмиш Милләтләр Тәшкилаты сүрәтлә һәрәкәтә кечиб бејнәлхалг тәһлүкәсизлик үчүн лазыми шәраити јаратмалыдыр. Бунун үчүн исә үмумдүнја һөкумәтин гурулмасына зәмин јарадылмалыдыр».

Бәс неҹә әмин ола биләрик ки, белә бир гүдрәтли һөкумәт олса, ону тәшкил едән сијасәтчиләр һеч вахт корланмајаҹаглар, онларын арасында сәриштәсизи олмајаҹаг вә әһалијә зүлм етмәјәҹәкләр? Јахуд онлар диҝәр сијасәтчиләр кими пислијә мејилли олмајаҹаглар. Бу суаллар Британија тарихчиси Лорд Актонун сөзләрини инсанын јадына салыр: «Һакимијјәт инсаны позур, мүтләг һакимијјәт исә инсаны мүтләг позур».

Бунунла белә, әҝәр бәшәр аиләсиндә сүлһ вә һармонијанын һөкм сүрмәсини истәјириксә, биз инсанлар бирләшмәлијик. Бу мәгсәдә неҹә наил олмаг олар? Үмумијјәтлә, бу, реал мәгсәддир? Мүгәддәс Китаб бу суала «бәли» ҹавабыны верир. Бу мәгсәдә наил олмаг мүмкүндүр вә бу, мүтләг олаҹаг. Анҹаг позулмаға мејилли сијасәтчиләрдән тәшкил олунмуш бир үмумдүнја һөкумәтин васитәсилә илә јох, Аллаһын гурдуғу бир һөкумәтин васитәсилә. Ән әсасы, бу һөкумәт Аллаһын Өз јаратдыглары үзәриндә һөкмранлыг етмәк һүгугуну ифадә едәҹәк. Мүгәддәс Китабда бу һөкумәт «Аллаһын Падшаһлығы» адланыр (Лука 4:43).

Иса Мәсиһ дуада: «Гој Падшаһлығын ҝәлсин. Гој Сәнин ирадән... јердә дә јеринә јетсин», — дејәндә Аллаһын Падшаһлығыны нәзәрдә тутурду (Мәтта 6:9, 10). Бәли, Аллаһын Падшаһлығынын сајәсиндә јер үзүндә һакимијјәтә сусајан худбин инсанларын јох, Аллаһын ирадәси јеринә јетәҹәк.

Аллаһын Падшаһлығы һәмчинин сәмави Падшаһлыг адланыр (Мәтта 5:3). Чүнки бу Падшаһлыг јер үзүнү идарә етсә дә, јердә јох, ҝөјдә јерләшәҹәк. Билирсиниз, бу нә демәкдир? Бу о демәкдир ки, сөзү ҝедән үмумдүнја һөкумәтин мадди дәстәјә еһтијаҹы олмајаҹаг. Бу исә тәсәввүр едирсиниз, вәтәндашларын ҝүзәраныны неҹә јахшылашдыраҹаг?!

Падшаһлыг сөзүндән ҝөрүндүјү кими, Аллаһын Падшаһлығы бир һөкумәтдир. Бу һөкумәтин Падшаһы олан Иса Мәсиһә һакимијјәти Аллаһ вериб. Иса Мәсиһ барәдә Мүгәддәс Китабда дејилир:

• «Һакимијјәт онун чијниндә олаҹаг... Һакимијјәти уҹгарларадәк јајылаҹаг, сүлһүн сону олмајаҹаг» (Әшија 9:6, 7).

•   «Она һакимијјәт, шәрәф вә падшаһлыг верилди ки, үммәтләр, халглар вә бүтүн дилләрә мәнсуб оланлар она гуллуг етсин. Онун һакимијјәти... әбәди һакимијјәтдир» (Дәнјал 7:14).

• «Дүнја үзәриндә падшаһлыг инди Рәббимизә вә Онун Мәсиһинә мәхсусдур» (Вәһј 11:15).

Иса Мәсиһин дуасына мүвафиг олараг, Аллаһын Падшаһлығы јер үзүндә Аллаһын ирадәсини бүтүнлүклә һәјата кечирәҹәк. Бу Падшаһлығын һакимијјәти алтында һамы планетин гејдинә галмағы өјрәнәҹәк, Јер күрәси јенидән «сағлам» олаҹаг вә бурада һәјат гајнајаҹаг.

Ән әсасы, Аллаһын Падшаһлығы өз вәтәндашларына елм верәҹәк. Һамы ејни ганунлары өјрәнәҹәк. Парчаланма олмајаҹаг. Әшија 11:9 ајәсиндә дејилир ки, инсанлардан «хәтәр ҝәлмәјәҹәк, һеч нәји тәләф етмәјәҹәкләр. Чүнки сулар дәнизи долдурдуғу кими, дүнја башдан-баша Јеһова барәдә биликлә долаҹаг».

Бирләшмиш Милләтләр Тәшкилатынын һәјата кечирмәк истәдији, амма едә билмәдији арзу ҝерчәкләшәҹәк — јер үзүнүн бүтүн сакинләри, сөзүн әсл мәнасында, сүлһ вә бирлик ичиндә јашајаҹаглар. Зәбур 37:11 ајәсиндә дејилир: «Әмин-аманлығын боллуғундан һәзз алаҹаглар». Заман кечдикҹә «ҹинајәт», «јохсуллуг», «чиркләнмә», «мүһарибә» кими сөзләр лүғәтдән силинәҹәк. Бәс бу нә заман баш верәҹәк? Аллаһын Падшаһлығы бүтүн дүнјаны нә заман идарә едәҹәк? Аллаһын Падшаһлығы идарәчилији неҹә әлә алаҹаг? Аллаһын Падшаһлығынын вәтәндашы олмаг үчүн нә етмәлисиниз? Ҝәлин бу суалларын ҹавабына бахаг.