ИКИ ЈҮЗ ил әввәл гәзетдә јазылан һәр шејә инанмаг дүзҝүн дејилди. XXI әсрдә јашајан бизләр дә Интернетдә охудуғумуз һәр шејә инанмамалыјыг. Бу ҝүн мүасир технолоҝијанын сајәсиндә күлли мигдарда информасија әлдә етмәк мүмкүндүр. Бәзи мәлуматлар доғру, фајдалы вә зәрәрсиз олдуғу һалда, диҝәрләри јалан, фајдасыз вә тәһлүкәлидир. Одур ки, нә охудуғумуза фикир вермәлијик. Хүсусән дә Интернетдән тәзәликҹә истифадә едән кәсләр елә фикирләшә биләрләр ки, нә гәдәр гәрибә, инанылмаз ҝөрүнсә дә, Интернетдән охудуглары, јахуд достларынын електрон мәктубла ҝөндәрдији һәр шеј һәгигәтдир. Амма Мүгәддәс Китабда дејилир: «Садәлөвһ һәр сөзә инанар, узагҝөрән һәр аддымыны өлчүб-бичәр» (Мәс. 14:15).

Бәс биз неҹә узагҝөрән олуб компүтер екранында пејда олан кәләкләри, дилдән-дилә ҝәзән әһвалатлары, фырылдаглары вә башга јанлыш мәлуматлары мүәјјән едә биләрик? Әввәла, өзүнүздән сорушун: «Бу мәлумат рәсми, етибарлы вебсајтдандыр, јохса һансыса бир блогдан вә ја намәлум мәнбәдән гајнагланыр? Етибарлы вебсајтлар бу мәлуматын јалан олдуғуну демир ки?» * Бу суаллардан сонра исә ағлынызы ишләдин (Ибр. 5:14). Әҝәр хәбәр инандырыҹы сәсләнмирсә, чох еһтимал ки, бу, һәгигәт дејил. Бундан башга мәлумат башгаларыны ҝөздән салырса, онда фикирләшин, бу мәлуматын јајылмасындан ким хејир ҝүдүр. Бәлкә, бунун архасында ҝизли нијјәт дурур?

Бәзи адамлар диггәт мәркәзиндә олмағы севирләр. Буна ҝөрә дә истәјирләр ки, сон хәбәрләри һамы онлардан ешитсин вә мәлуматын дәгиглијини јохламадан, ахырыны фикирләшмәдән һамыја ҝөндәрирләр (2 Ишм. 13:28—33). Лакин әҝәр узагҝөрәниксә, нәзәрә алаҹағыг ки, бу, башгаларына зәрәр вура биләр, мәсәлән, киминсә, јахуд һансыса тәшкилатын адына ләкә ҝәтирә биләр.

Мәлуматын дәгиглијини јохламаг вахт апарыр. Буна ҝөрә дә бәзиләри фикирләшир ки, ҝөндәрдикләри  адамларын өзләри мәлуматын дәгиглијини јохлајар. Амма һәмин адамларын да вахты гијмәтлидир ахы (Ефес. 5:15, 16). Буна ҝөрә дә дәгиг билмәдијимиз мәлуматы ҝөндәрмәк әвәзинә јахшы оларды ки, бу шүары рәһбәр тутаг: «Шүбһә едирсәнсә, сил ҝетсин!»

Өзүнүздән сорушун: «Мәндә алдығым електрон мәктублары башгаларына ҝөндәрмәк адәт һалыны алыб? Һеч елә олубму ки, ҝөндәрдијим мәлуматын јанлыш, јахуд да ағ јалан олдуғу үзә чыхдығына ҝөрә сонрадан үзр истәјим? Кимсә мәндән хаһиш едибми ки, һәр мәктубу она ҝөндәрмәјим?» Унутмајын ки, мәктуб ҝөндәрдијиниз адамлар да Интернетә дахил олурлар. Онлар истәдикләри мәлуматы сизин көмәјиниз олмадан да ахтарыб тапа биләрләр. Һәр дәфә мәзәли әһвалатлар, видео клипләр вә ја слајд шоулар ҝөндәриб онлары бездирмәк лазым дејил. Мүгәддәс Китаба әсасланан чыхышларын аудио јазысыны вә ја мәзмунуну јазыб башгаларына ҝөндәрмәк јахшы олмазды *. Бир шеји дә унутмајын: инсан өзү мүталиә едәндә, Мүгәддәс Китаб ајәләрини арашдыранда, јахуд јығынҹаглар үчүн шәрһ һазырлајанда даһа чох фајда әлдә едир, нәинки бу мәлуматы она башгасы ҝөндәрәндә.

Бәс әҝәр Интернетдә Јеһованын тәшкилаты һаггында бөһтана раст ҝәлсәниз, онда неҹә? Бу кими јаланлары дәрһал рәдд етмәк лазымдыр. Бәзиләри бу мәлуматлары башгаларына сөјләјиб онларын фикрини өјрәнмәк истәјир. Лакин белә едәндә зәрәрли мәлумат әслиндә даһа да јајылыр. Әҝәр Интернетдә ҝөрдүјүнүз һансыса мәлумат сизи нараһат едирсә, онда Јеһовадан һикмәт диләјин вә јеткин гардашларла сөһбәт един (Јаг. 1:5, 6; Јһд. 22, 23). Иса Мәсиһ дә јалан иттиһамларын һәдәфи олмушду. О, шаҝирдләрини хәбәрдар етмишди ки, дүшмәнләр онлары тәгиб едәҹәк вә онларын һаггында һәр ҹүр јалан вә пис сөз данышаҹаглар (Мәт. 5:11; 11:19; Јәһ. 10:19—21). Биз дүшүнҹәли вә бәсирәтли олуб јалан данышанлары вә һәјатыны јалан үзәриндә гуранлары танымалыјыг (Мәс. 2:10—16).

Биз диндашларымыз барәдә мәлуматы, јахуд ешитдијимиз һансыса һадисәни данышмаздан әввәл фикирләшмәлијик. Һәтта мәлумат доғру олса да, бу о  демәк дејил ки, ону мүтләг јајмаг лазымдыр. Бәзән һәгиги мәлуматы данышмаг һеч дә дүзҝүн һәрәкәт олмур вә белә етмәклә мәһәббәт ҝөстәрмиш олмуруг (Мәт. 7:12). Мәсәлән, һәтта һәгигәти сөјләсәк белә, гејбәт етмәк мәһәббәтдән хәбәр вермир, нә дә һеч кими руһландырмыр (2 Салон. 3:11; 1 Тим. 5:13). Бәзән ешитдијимиз хәбәр мәхфи олур. Белә олан һалда биз башгаларынын һагларына һөрмәт етмәлијик. Јәни һәр кәсин ихтијары вар ки, өзү гәрар версин: нәји нә вахт вә неҹә башгаларына билдирәҹәк. Вахтындан әввәл мәлуматы јајмагла биз башгаларына пислик етмиш оларыг.

Бу ҝүн доғру, јанлыш, фајдалы, фајдасыз, зәрәрсиз, тәһлүкәли олмасындан асылы олмајараг, истәнилән хәбәр сүрәтлә јајылыр. Һәтта бир нәфәрә дә електрон мәктуб вә ја мәлумат ҝөндәрән адам баша дүшмәлидир ки, мәлумат бир ан ичиндә бүтүн дүнјаја јајыла биләр. Буна ҝөрә дә ҝәлин һәр алдығымыз мәлуматы дәрһал, уҹдантутма һамыја ҝөндәрмәјәк. Дүздүр, мәһәббәт һәр шејә инаныр, шүбһәләрә гапылмыр, амма бу, о демәк дејил ки, биз садәлөвһ олмалы, ешитдијимиз сенсасијалы хәбәрләрә кор-коранә инанмалыјыг. Ән ваҹиби исә биз Јеһованын тәшкилаты барәдә дејилән мәкрли јаланлары, «јаланын атасы» олан Шејтан Иблисин хидмәтчиләри арасында диндашларымыз һагда ҝәзән сөз-сөһбәтләри рәдд едирик (Јәһ. 8:44; 1 Кор. 13:7). Бәсирәт вә дүшүнҹә бизә узагҝөрән олмаға көмәк едәҹәк вә биз һәр ҝүн алдығымыз чохлу сајда мәлуматы башгаларына данышмаздан әввәл јахшы-јахшы фикирләшәҹәјик. Мүгәддәс Китабда дејилдији кими, «ҹаһил ахмаглығы ирс алар, узагҝөрәнин исә башына елмдән таҹ гојулар» (Мәс. 14:18).