«Јарадылыш» Мүгәддәс Јазыларын илк китабыдыр вә бурада Каинатын башланғыҹындан бәһс олунур. Орада дејилир: «Башланғыҹда Аллаһ ҝөјләри вә јери јаратды» (Јарадылыш 1:1). Биткиләри вә һејванлары јарадандан сонра Улу Танры илк инсанлар олан Адәмлә Һәвваны јаратды. Һејванлардан тамамилә фәргли олараг, онлар һәм Аллаһын хүсусијјәтләрини әкс етдирә билирдиләр, һәм дә ирадә азадлыглары вар иди. Беләҹә, онлар етдији һәр бир һәрәкәтин мәсулијјәтини дашыјырдылар. Аллаһ истәјирди ки, бүтүн инсанлар әмин-аманлыг ичиндә әбәдијјән јашасын. Әҝәр онлар Јараданын әмрләринә риајәт етсәјдиләр, онда бәшәријјәтлә бағлы Аллаһын нијјәтинин һәјата кечмәсиндә онларын да пајы олаҹагды.

Лакин Аллаһын мәләкләриндән бири өз егоист мәгсәдләрини һәјата кечирмәк үчүн инсанлардан истифадә етди. О, «Дүшмән» мәнасыны верән Шејтан адыны алды. Шејтан илан васитәсилә Һәвваны алдадараг деди ки, Аллаһын рәһбәрлији олмадан даһа јахшы јашаја биләр. Адәм вә Һәвва онун сөзләринә ујараг Јараданлары илә мүнасибәтләрини корладылар. Јанлыш сечимләри уҹбатындан илк валидејнләримиз әбәди һәјаты итирдиләр вә бүтүн инсанлара ҝүнаһы, гејри-камиллији вә һеч ҹүр ҹанымызы гуртара билмәдијимиз өлүмү өтүрдүләр.

Амма Күлли-Ихтијар Аллаһ дәрһал һәрәкәтә кечди. О, Адәмин нәслинә әбәди һәјаты газанмасы үчүн бир шанс верди. Аллаһ Шејтанын, Адәм вә Һәвванын төрәтдији бүтүн зүлм вә ситәмләри арадан галдыраҹаг бир «өвлад»ын олаҹағыны габагҹадан билдирмишди (Јарадылыш 3:15). Бу «өвлад»ын ким олаҹағыны заман ҝөстәрәҹәкди.

«Өвлад» ҝәләнә гәдәр Шејтан дурмадан Аллаһын бу хош нијјәтинә мане олмаға чалышырды. Ҝүнаһ вә пислик ишыг сүрәти илә дүнјаја јајылды. Худавәнд Рәбб дашгын васитәсилә бүтүн писләри мәһв етмәк гәрарына ҝәлди. Аллаһ салеһ бәндәси Нуһа өзүнүн вә аиләсинин, һәмчинин һејванларын хилас олмасы үчүн гуту формасында бөјүк ҝәми тикмәји бујурду.

Дашгындан дүз бир ил сонра Нуһ пејғәмбәр вә аиләси ҝәмидән писликдән тәмизләнмиш јер үзүнә чыхдылар. Анҹаг «өвлад» һәлә дә ҝәлмәмишди.

Јарадылыш 1-дән 11-дәк фәсилләринә, Јәһуда 6, 14, 15 вә Вәһј 12:9 ајәләринә әсасланыб.