Јеһова пис инсанлара Ҹәннәти корламаға иҹазә вермәјәҹәк. Орада анҹаг Аллаһын достлары јашајаҹаг. Бәс пис адамлар неҹә олаҹаг? Бу суала ҹаваб тапмаг үчүн Нуһун тарихчәсинә бахаг. Нуһ бир нечә мин ил бундан әввәл јашамышды. О, јахшы инсан иди вә вар ҝүҹү илә Аллаһын дедикләрини јеринә јетирмәјә чалышырды. Амма јер үзүндәки о бири адамлар пис ишләр ҝөрүрдүләр. Онда Јеһова Нуһа деди ки, пис адамлары мәһв етмәк үчүн јерә дашгын ҝөндәрәҹәк. Дашгын ҝәләндә Нуһ өзү вә аиләси мәһв олмасын дејә, Аллаһ она бир ҝәми тикмәји тапшырды (Јарадылыш 6:9—18).

Нуһ вә аиләси ҝәмини тикдиләр. Нуһ инсанлары Дашгындан хәбәрдар едирди, амма һеч ким она гулаг асмырды. Инсанлар пис ишләрдән әл чәкмирдиләр. Ҝәми һазыр оланда Нуһ һејванлары онун ичинә топлады, сонра аиләсилә бирликдә ҝәмијә ҝирди. Бир аздан Јеһова ҝүҹлү туфан ҝөндәрди. 40 ҝүн, 40 ҝеҹә јағыш јағды. ­Бүтүн јер үзү сујун алтында галды (Јарадылыш 7:7—12).

 Пис адамлар мәһв олдулар, Нуһ исә аиләси илә хилас олду. Јеһова онлары Дашгында горујуб сахлады вә писликдән тәмизләнмиш јер үзүнә чыхартды (Јарадылыш 7:22, 23). Мүгәддәс Китаб билдирир ки, дүзҝүн јашамаг истәмәјәнләр кечмишдә олдуғу кими мәһв едиләҹәкләр вә бу тезликлә баш верәҹәк. Амма Јеһова јахшы инсанлары мәһв етмәјәҹәк. Онлар Ҹәннәтә чеврилмиш јер үзүндә әбәди јашајаҹаглар (2 Бутрус 2:5, 6, 9).

Бу ҝүн бир чох инсан пис ишләр ҝөрүр. Дүнја әзаб-әзијјәтлә долуб. Јеһова инсанлары хәбәрдар етмәк үчүн дөнә-дөнә Өз Шаһидләрини ҝөндәрир, лакин әксәр адамлар Јеһованын сөзүнә гулаг асмыр вә јолларындан дөнмәк истәмирләр. Онлар Аллаһын нормаларыны — нәјин јахшы, нәјин пис олдуғуну гәбул етмирләр. Бу инсанларын агибәти неҹә олаҹаг? Онлар нә вахтса дәјишәҹәкләр? Бир чохлары һеч вахт дәјишмәјәҹәк. Пис адамларын мәһв едиләҹәји вә бир даһа әсла јашамајаҹаглары вахт јахынлашыр (Зәбур 92:7).

Јер мәһв едилмәјәҹәк, Ҹәннәтә дөндәриләҹәк. Аллаһла дост оланлар Ҹәннәтә чеврилмиш јер үзүндә әбәди јашајаҹаглар (Зәбур 37:29).