1, 2. Јеһова Аллаһ аиләни неҹә ҝөрмәк истәјир?

ИЛК аиләнин тәмәлини Јеһова Аллаһ гојуб. Мүгәддәс Китабда јазылыб ки, Аллаһ илк гадыны јарадыб Адәмин јанына ҝәтирди. Адәм о гәдәр хошбәхт иди ки, һиссләрини бу сөзләрлә ифадә етди: «Нәһајәт, сүмүјү сүмүјүмдән, бәдәни бәдәнимдән олан бири» (Јарадылыш 2:22, 23). Бурадан ҝөрүрүк ки, Јеһова Аллаһ аиләләри хошбәхт ҝөрмәк истәјир.

² Тәәссүф ки, чохумуз һеч дә хошбәхт аиләдә бөјүмәмишик. Амма Мүгәддәс Китабдакы принсипләр аиләнин һәр бир үзвүнә хошбәхтлијә наил олмаға вә аиләдә меһрибан аб-һава јаратмаға көмәк едә биләр (Лука 11:28).

3, 4. а) Әр арвады илә неҹә рәфтар етмәлидир? б) Аиләдә бир-бирини бағышламаг нәјә ҝөрә ваҹибдир?

³ Мүгәддәс Китабда дејилир ки, әрләр арвадларыны севмәли вә онлара һөрмәт етмәлидирләр. Зәһмәт олмаса, Ефеслиләрә 5:25—29 ајәләрини охујун. Әр һәмишә арвады илә мәһәббәтлә давранмалыдыр. О, арвадыны горумалы, гејдинә галмалы вә она јара вуран һеч нә етмәмәлидир.

⁴ Бәс арвады сәһв едәндә әр неҹә давранмалыдыр? Аллаһ әрләрә бујурур: «Арвадларынызы һәмишә севин вә онларла сәрт давранмајын» (Колослулара 3:19). Әрләр, унутмајын ки, сиз дә чох сәһвләрә јол верирсиниз. Амма  Аллаһын сизин сәһвләринизи бағышламасыны истәјирсинизсә, сиз дә арвадларынызы бағышламалысыныз (Мәтта 6:12, 14, 15). Аиләсинин хошбәхт олмағыны истәјән әр вә арвад бир-бирини бағышламалыдыр.

5. Нәјә ҝөрә әр арвадынын ләјагәтинә һөрмәтлә јанашмалыдыр?

⁵ Јеһова Аллаһ әрләрә арвадларынын ләјагәтинә һөрмәтлә јанашмағы бујурур. Әр арвадынын тәләбатларыны нәзәрә алмалыдыр. Бу чох ҹидди мәсәләдир. Аллаһ арвады илә пис рәфтар едән кишинин дуаларыны ешитмир (1 Бутрус 3:7). Инсаны Аллаһын ҝөзүндә уҹалдан онун киши вә ја гадын олмасы дејил, Јараданына олан мәһәббәтидир.

6. Әрлә арвадын «бир бәдән» олмасы нә демәкдир?

⁶ Иса Мәсиһ демишдир ки, әрлә арвад «ики јох, бир бәдәндир» (Мәтта 19:6). Онлар бир-бириләринә сәдагәтли олмалы вә һеч вахт хәјанәтә јол вермәмәлидирләр (Мәсәлләр 5:15—21; Ибраниләрә 13:4). Әрлә арвад ҹинси мүнасибәтләрдә бир-бирини нәзәрә алмалыдыр, анҹаг өзләрини дүшүнмәмәлидирләр (1 Коринфлиләрә 7:3—5). Әр Мүгәддәс Китабда јазылан нөвбәти принсипи һеч вахт јаддан чыхартмамалыдыр: «Елә бир адам јохдур ки, өз бәдәнинә нифрәт етсин, әксинә, инсан өз бәдәнинин гејдинә галыр, ону әзизләјир». Бу о демәкдир ки, әр арвадыны севмәли вә ону әзиз тутмалыдыр. Һәр бир гадынын ән үмдә арзусу одур ки, әри ону севсин вә онунла меһрибан даврансын (Ефеслиләрә 5:29).

7. Нәјә ҝөрә аиләдә башчы олмалыдыр?

⁷ Һәр бир аиләни идарә едән бир башчы олмалыдыр ки, аилә меһрибан олсун. 1 Коринфлиләрә 11:3 ајәсиндә јазылыб: «Һәр кишинин башы Мәсиһ, гадынын башы киши, Мәсиһин башы исә Аллаһдыр».

8. Гадынын әринә дәрин һөрмәт бәсләдији нәдән ҝөрүнмәлидир?

 ⁸ Елә әр јохдур ки, сәһв етмәсин. Амма гадын әринин гәрарлары илә разылашанда вә она дәстәк оланда бу, бүтүн аиләјә фајда ҝәтирир (1 Бутрус 3:1—6). Мүгәддәс Китабда јазылыб: «Арвад... әринә дәрин һөрмәт бәсләсин» (Ефеслиләрә 5:33). Бәс әҝәр әр арвадынын дининә шәрик дејилсә, онда неҹә? Гадын јенә дә әринә дәрин һөрмәтлә јанашмалыдыр. Мүгәддәс Китабда дејилир: «Еј гадынлар, әрләринизә табе олун ки, Аллаһын сөзүнә итаәт етмәјән әрләриниз сизин исмәтли јашајышынызы вә дәрин һөрмәтинизи ҝөрүб, давранышынызла сөзсүз фәтһ едилсинләр» (1 Бутрус 3:1, 2). Гадынын нүмунәви давранышы әринин онун дининә мүнасибәтини дәјишдирә, һөрмәт газандыра биләр.

9. а) Гадын әринин гәрары илә разы олмајанда неҹә давранмалыдыр? б) Титуса 2:4, 5 ајәләриндә гадынлар үчүн һансы мәсләһәт вар?

⁹ Бәс гадын әринин гәрары илә разы олмајанда неҹә давранмалыдыр? О, өз фикрини һөрмәтҹил шәкилдә чатдырмалыдыр. Мәсәлән, бир дәфә Ибраһим пејғәмбәрин арвады Сара бир мәсәлә илә бағлы әринә фикрини сөјләмишди.  Амма арвадынын фикри онун хошуна ҝәлмәмишди. Онда Аллаһ пејғәмбәрә демишди: «Она гулаг ас» (Јарадылыш 21:9—12). Чәтин ки, мәсиһи әрин гәрары Мүгәддәс Китаба зидд ҝетсин, одур ки гадын әринин гәрарыны дәстәкләмәлидир (Һәвариләрин ишләри 5:29; Ефеслиләрә 5:24). Гадын аилә үзвләринин гејдинә галмалыдыр. (Титуса 2:4, 5 ајәләрини охујун.) Әри вә ушаглары гадынын онларын јолунда нә гәдәр әзијјәт чәкдијини ҝөрәндә онларын она севҝиси вә һөрмәти бирә-беш артаҹаг (Мәсәлләр 31:10, 28).

10. Мүгәддәс Китабда ајры јашамаг вә бошанмаг барәдә нә дејилир?

¹⁰ Һәрдән әрлә арвад ајры јашамаг, ја да бошанмаг гәрарына ҝәлир. Амма Мүгәддәс Китабда дејилир ки, «арвад әриндән ајрылмасын», «әр дә арвадыны атмасын» (1 Коринфлиләрә 7:10, 11). Хүсуси һалларда әрлә арвад ајры јашаја биләр, амма јенә дә бу чох ҹидди гәрардыр. Бәс бошанмаға даир Аллаһын Кәламында нә дејилир? Мүгәддәс Китабда бошанмаға јалныз бир шәртлә иҹазә верилир, әҝәр әр, јахуд арвад хәјанәтә јол верибсә (Мәтта 19:9).

11. Ушагларын ән чох нәјә еһтијаҹы вар?

¹¹ Валидејнләр ушаглары илә мүмкүн гәдәр чох вахт кечирмәлидирләр. Ушагларын валидејнләринә еһтијаҹы вар. Амма онларын ән чох руһани тәрбијәјә, Аллаһ һаггында билијә еһтијаҹы вар вә бу мәсулијјәт валидејнин өһдәсинә дүшүр (Ганунун тәкрары 6:4—9).

12. Валидејнләр ушагларыны неҹә горуја биләрләр?

¹² Шејтан дүнјасы позула-позула ҝедир. Тәәссүфләр олсун ки, ҹәмијјәтдә ушаглара зәрәр јетирмәк истәјән, мәсәлән, онлара ҹинси тәҹавүз едән инсанларын сајы аз  дејил. Бәзи валидејнләр ушаглары илә бу мөвзуда данышмаға чәкинирләр. Амма өвладларыны горумаг үчүн онлар ушагларына бу инсанлар барәдә мәлумат вермәлидирләр, өзләрини бу инсанлардан горумағы өјрәтмәлидирләр. Ушағыны горумаг һәр бир валидејнин борҹудур * (1 Бутрус 5:8).

13. Ушағы неҹә тәрбијә етмәк лазымдыр?

¹³ Валидејн ушағына әдәб-әркан гајдалары ашыламалыдыр. Бәс о буну неҹә етмәлидир? Дүздүр, ушағы даима  тәрбијә етмәк лазымдыр, амма буну гәддарҹасына вә кобуд шәкилдә етмәк олмаз (Әрәмја 30:11). Буна ҝөрә дә ушағы һирсли вахтынызда данламајын. Әлбәттә, сиз истәмәзсиниз ки, «гылынҹ зәрбәсинә бәнзәр» сөзләр дејиб өвладларынызы јаралајасыныз (Мәсәлләр 12:18). Онлардан нә исә тәләб едәндә сәбәбини баша салын (Ефеслиләрә 6:4; Ибраниләрә 12:9—11; 29-ҹу әлавәјә бахын).

14, 15. Нәјә ҝөрә ушаглар валидејнләринә табе олмалыдырлар?

¹⁴ Иса Мәсиһ һәмишә, чәтин оланда белә, Атасына табе олурду (Лука 22:42; Јәһја 8:28, 29). Јеһова ушаглардан валидејнләринин сөзүнә бахмағы тәләб едир (Ефеслиләрә 6:1—3).

¹⁵ Ушаглар јадда сахламалыдырлар ки, чәтин олса белә, валидејнләринин сөзүнә бахсалар, Јеһова Аллаһ вә валидејнләри онлардан разы галаҹаг * (Мәсәлләр 1:8; 6:20; 23:22—25).

16. а) Шејтан ушаглары неҹә јолдан чыхара биләр? б) Јеһова Аллаһы севән инсанларла достлуг етмәк нәјә ҝөрә ваҹибдир?

¹⁶ Иблис ушаглары јолдан чыхармаг үчүн онларын јашыдларындан вә достларындан истифадә едә биләр. О билир ки, онларын тәсири чох ҝүҹлү олур. Мәсәлән, Јагуб пејғәмбәрин Динә адында гызы вар иди. О, Јеһованы севмәјән инсанларла достлуг едирди. Бу, достлуг онун вә аиләсинин башына чох бәлалар ҝәтирди (Јарадылыш 34:1, 2). Әҝәр достларыныз Јеһованы севмирсә, онлар сизи Јеһованын нифрәт етдији әмәлләрә тәһрик едә биләр. Бу да сизә, аиләнизә вә Аллаһа ағры-аҹы јашадаҹаг (Мәсәлләр  17:21, 25). Буна ҝөрә дә Јеһова Аллаһы севән инсанларла достлуг етмәк ваҹибдир (1 Коринфлиләрә 15:33).

17. Аиләнин һәр бир үзвү һансы мәсулијјәти дашыјыр?

¹⁷ Аиләнин һәр бир үзвү Аллаһын бујруғуна әмәл етсә, бир чох проблемләрин гаршысыны алмаг олар. Әр арвады илә мәһәббәтлә давранмалыдыр. Гадын әринә һөрмәт етмәли, она табе олмалыдыр вә Мәсәлләр 31:10—31 ајәләриндә тәсвир олунан гадындан нүмунә ҝөтүрмәлидир. Валидејнләр ушагларына Аллаһ севҝиси ашыламалыдыр (Мәсәлләр 22:6). Ата «аиләсини јахшы идарә етмәли»дир (1 Тимутијә 3:4, 5; 5:8). Ушаглар валидејнләринин сөзүндән чыхмамалыдыр (Колослулара 3:20). Унутмајын ки, һамы сәһв едә биләр, буна ҝөрә дә бир-биринизә ҝүзәштә ҝедин, бир-бириниздән үзр истәјин. Беләликлә, ҝөрдүјүмүз кими, Јеһова Аллаһ Мүгәддәс Китаб васитәсилә аиләнин һәр бир үзвүнә мәсләһәт верир.