1, 2. а) Бәјлә ҝәлин нәјә үмид едир? б) Бу фәсилдә һансы суаллар мүзакирә олунур?

ТОЈ ҝүнүдүр. Бәјлә ҝәлинин севинҹи јерә-ҝөјә сығмыр. Артыг онлар бирҝә өмүр сүрәҹәкләр. Онларын үрәји үмид вә арзуларла долудур. Бәјлә ҝәлин үмид едир ки, онларын никаһы узунөмүрлү вә хошбәхт олаҹаг.

² Бу, әлчатмаз арзу дејил. Дүздүр, бәзи никаһларын башланғыҹы јахшы олса да, сонрасы һеч дә јахшы олмур. Анҹаг әрлә арвад Аллаһын мәсләһәти илә јашаса, хошбәхт ола биләр. Ҝәл әввәлҹә бир нечә суалы нәзәрдән кечирәк вә ҝөрәк Мүгәддәс Китаб бу суаллара неҹә ҹаваб верир. Никаһын һансы үстүнлүкләри вар? Аилә гурмаг истәјирсәнсә, јахшы һәјат јолдашы неҹә сечмәк олар? Јахшы әр вә ја арвад неҹә олмалыдыр? Никаһын узунөмүрлү олмасына нә көмәк едә биләр? (Мәсәлләр 3:5, 6 ајәләрини оху.)

3. Хошбәхтлик аилә гурмагдан асылыдыр? Изаһ ет.

³ Бәзи инсанлар фикирләшир ки, адам аилә гурмаса хошбәхт ола билмәз. Амма бу белә дејил. Иса демишди ки, субајлыг инсан үчүн әнам ола биләр  (Мәтта 19:11, 12). Һәвари Булус да демишди ки, субај олмағын бәзи үстүнлүкләри вар (1 Коринфлиләрә 7:32—38). Аилә гуруб-гурмајаҹағына сән өзүн гәрар вермәлисән. Достларын, аиләнин, јахуд адәт-әнәнәнин тәсиринә ујуб аилә гурмаг дүзҝүн дејил.

4. Јахшы никаһын һансы үстүнлүкләри вар?

⁴ Мүгәддәс Китабда дејилир ки, никаһ да Аллаһдан әнамдыр вә онун да үстүнлүкләри вар. Јеһова илк инсан олан Адәм һаггында демишди: «Инсанын тәк олмасы јахшы дејил. Онун үчүн ону тамамлајан бир көмәкчи јарадаҹағам» (Јарадылыш 2:18). Јеһова Һәвваны Адәмин арвады олмаг үчүн јаратды. Онлар бәшәријјәтдә илк аилә олдулар. Әҝәр өвлад дүнјаја ҝәлирсә, онун бөјүмәси үчүн аиләдә сабит мүһит олмалыдыр. Амма аилә јалныз дүнјаја ушаг ҝәтирмәк мәгсәдилә гурулмамалыдыр (Зәбур 127:3; Ефеслиләрә 6:1—4).

5, 6. Никаһ нә вахт үчгат ип олур?

⁵ Падшаһ Сүлејман јазмышды: «Ики нәфәр бир нәфәрдән јахшыдыр, чүнки чәкдикләри зәһмәтин мүкафаты ҝөзәл олаҹаг. Әҝәр бири јыхылса, диҝәри јолдашыны галдыраҹаг. Амма кимсә јыхыланда галдыраны олмаса, һалы неҹә олар?.. Үчгат ип тез гырылмаз» (Ваиз 4:9—12).

⁶ Уғурлу никаһда әрлә арвад бир-биринин ән јахын досту олур. Онлар бир-биринә көмәк едир, дајаг олур вә бир-бирини горујурлар. Севҝи никаһы мөһкәм едир. Амма әрлә арвад Јеһоваја ибадәт едәндә  онларын никаһы лап мөһкәм олур. Бу никаһ үчгат ипә бәнзәјир. Бир-биринә сых һөрүлмүш үч ипдән ибарәт кәндир икиипли кәндирдән гат-гат мөһкәм олур. Јеһова да никаһын бир үзвү оланда һәмин никаһ мөһкәм олур.

7, 8. Булус аилә гурмагла бағлы һансы мәсләһәти вермишди?

⁷ Киши илә гадын никаһ бағлајандан сонра бир-биринин тәбии ҹинси истәкләрини тәмин едә биләрләр (Мәсәлләр 5:18). Лакин инсан јалныз бу истәкләри тәмин етмәк барәдә дүшүнүрсә, о заман кимлә ҝәлди аилә гураҹаг. Буна ҝөрә дә Мүгәддәс Китабда дејилир ки, ҝәнҹлијин гајнар чағы, јәни ҹинси истәкләрин чох ҝүҹлү олдуғу дөвр кечәндән сонра аилә гурмаг лазымдыр (1 Коринфлиләрә 7:36). Јахшы олар ки, инсан һәмин һиссләрин сакитләшмәсини ҝөзләсин. Онда даһа ајдын дүшүнәҹәк вә јахшы сечим едәҹәк (1 Коринфлиләрә 7:9; Јагуб 1:15).

⁸ Әҝәр сән дә аилә гурмаг барәдә дүшүнүрсәнсә, һәјата реал бах. Унутма ки, һәр аиләдә проблемләр олур. Булус демишди ки, аилә гуранлар «һәјатда јени чәтинликләрлә үзләшәҹәкләр» (1 Коринфлиләрә 7:28). Һәтта ән уғурлу никаһларда белә чәтинликләр олур. Буна ҝөрә дә аилә гурмаг истәјирсәнсә, һәјат јолдашыны дүзҝүн сечмәлисән.

9, 10. Јеһоваја ибадәт етмәјән инсанла аилә гурсаг, нә баш верәр?

⁹ Һәјат јолдашы сечәркән Мүгәддәс Китабдан бир ваҹиб принсипи јадда сахламаг лазымдыр: «Имансызларла ејни бојундуруға ҝирмәјин» (2 Коринфлиләрә  6:14). Бу нүмунә әкинчиликдән ҝөтүрүлүб. Әкинчи өлчүсү вә ҝүҹү чох фәргләнән ики һејваны бир бојундуруға салыб онлара тарланы шумлатмаз. Бу, һејванлара әзијјәт верәр. Ејни шеји инсанлара да аид етмәк олар. Јеһоваја ибадәт едән вә етмәјән ики инсан никаһ бағласа, проблемләри чох олар. Буна ҝөрә дә Мүгәддәс Китабда мәсләһәт ҝөрүлүр ки, јалныз Ағанын јолунда олан адамла аилә гураг (1 Коринфлиләрә 7:39).

¹⁰ Һәрдән бәзи мәсиһиләр дүшүнүрләр ки, тәк галмагданса, Јеһоваја ибадәт етмәјән адамла аилә гурсунлар. Амма биз Мүгәддәс Китабын мәсләһәтинә әмәл етмәсәк, бәдбәхтлик, гәм-гүссә бичәҹәјик. Јеһованын хидмәтчиси олдуғумуз үчүн Она ибадәт етмәк һәјатымызда ән ваҹиб ишдир. Һәјатын ән ваҹиб саһәсиндә јолдашынла һиссләрини бөлүшә билмәмәк, тәсәввүр едирсән, нә демәкдир? Бир чохлары Јеһованы севмәјән, Она хидмәт етмәјән инсанла аилә гурмагданса, субај галмаға үстүнлүк верирләр. (Зәбур 32:8 ајәсини оху.)

11. Һәјат јолдашыны неҹә сечмәк олар?

¹¹ Бу о демәк дејил ки, Јеһоваја хидмәт едән һәр кәс јахшы әр вә ја арвад олаҹаг. Аилә гурмаг истәјирсәнсә, елә адам тап ки, үрәкдән хошуна ҝәлсин вә онунла јола ҝедә биләсән. Һәјатда сәнинлә ејни мәгсәдләри олан, хидмәти һәр шејдән үстүн тутан адам тапана кими ҝөзлә. Нәшрләрдә садиг нөкәрин никаһла бағлы вердији мәсләһәтләри охујуб, јахшы-јахшы дүшүн. (Зәбур 119:105 ајәсини оху.)

12. Мүгәддәс Китабдан валидејнләрин мәсләһәти илә гурулан никаһ барәдә нә өјрәнә биләрик?

 ¹² Бәзи јерләрдә һәјат јолдашыны валидејнләр сечир. Белә дүшүнүрләр ки, өвлад үчүн кимин јахшы әр вә ја арвад олаҹағыны валидејнләр даһа јахшы билир. Бу адәт Мүгәддәс Китабын јазылдығы дөврдә дә вар иди. Ола билсин, сәнин дә аилән бу адәтлә ҝетмәк истәјир. О заман валидејнләрин Мүгәддәс Китабдан өјрәнә биләр ки, ҝәләҹәк һәјат јолдашында һансы кејфијјәтләрә фикир версинләр. Мәсәлән, Ибраһим оғлу Исһагы евләндирмәк истәјәндә, пула, јахуд ад-сана фикир вермәмишди. Әсас о иди ки, гыз Јеһованы севсин (Јарадылыш 24:3, 67; 25-ҹи әлавәјә бах).

13—15. а) Киши јахшы һәјат јолдашы олмаға неҹә һазырлаша биләр? б) Гадын јахшы һәјат јолдашы олмаға неҹә һазырлаша биләр?

¹³ Әҝәр аилә гурмаг истәјирсәнсә, һазыр олуб-олмадығыны јохла. Бәлкә дә, һазыр олдуғуну дүшүнүрсән, амма ҝәл ҝөрәк аилә гурмаға һазыр олмаг әслиндә нә демәкдир. Ола билсин, бу суалын ҹавабы сәни тәәҹҹүбләндирәҹәк.

¹⁴ Мүгәддәс Китабда дејилир ки, әр вә арвад аиләдә мүхтәлиф роллары иҹра едир. Демәли, аилә гурмаға һазыр олмаг үчүн кишидән вә гадындан фәргли шејләр тәләб олунур. Әҝәр киши евләнмәк барәдә фикирләширсә, өзүндән сорушмалыдыр ки, аилә башчысы олмаға һазырдыр, ја јох. Јеһова ҝөзләјир ки, әр арвадына, ушагларына мадди вә емосионал ҹәһәтдән дајаг олаҹаг. Ән әсасы, әр аиләсинин Аллаһа ибадәт етмәсинә рәһбәрлик етмәлидир. Мүгәддәс Китабда дејилир ки, аиләсинин гејдинә галмајан адам имансыздан да бетәрдир (1 Тимутијә 5:8). Әҝәр сән дә евләнмәк истәјирсәнсә, фикирләш ҝөр нөвбәти принсипи неҹә тәтбиг едә биләрсән: «Чөл ишләрини саһмана сал, тарлада һәр ишини ҝөр гуртар, сонра евини тик». Башга сөзлә, евләнмәмишдән габаг әмин ол ки, Јеһованын тәләб етдији кими әр ола биләҹәксән (Мәсәлләр 24:27).

¹⁵ Аилә гурмаг истәјән гыз да ҝөтүр-гој етмәлидир ки, һәјат јолдашы вә ана олмаг мәсулијјәтини дашымаға һазырдыр, ја јох. Мүгәддәс Китабда јахшы арвадын әринин вә өвладларынын неҹә гејдинә галдығы тәсвир олунур (Мәсәлләр 31:10—31). Бу ҝүн бир чох  кишиләр вә гадынлар тәкҹә ону фикирләширләр ки, һәјат јолдашлары онлар үчүн нә етмәлидир. Амма Јеһова истәјир ки, биз һәјат јолдашымыз үчүн нә едә биләҹәјимизи дүшүнәк.

16, 17. Әҝәр аилә гурмаг истәјирсәнсә, нә барәдә дүшүнмәлисән?

¹⁶ Аилә гурмаздан әввәл Јеһованын әр вә арвад барәдә нә дедијини дүшүн. Аилә башчысы олмаг о демәк дејил ки, киши физики вә ја емосионал ҹәһәтдән зоракылыг едә биләр. Јахшы аилә башчысы Иса Мәсиһдән нүмунә ҝөтүрүр. Иса Мәсиһ һәмишә башгаларына гаршы хејирхаһ вә меһрибан иди (Ефеслиләрә 5:23). Гадын да, өз нөвбәсиндә, әринин гәрарларыны дәстәкләјиб она дајаг олмағын нә демәк олдуғуну дүшүнмәлидир (Ромалылара 7:2). О өзүндән сорушмалыдыр ки, гејри-камил инсана табе ола биләҹәк. Әҝәр билмәјәҹәксә, онда, ола билсин, һәләлик субај галмаг гәрарына ҝәлсин.

¹⁷ Әр дә, арвад да өзүндән чох һәјат јолдашынын хошбәхтлијини дүшүнмәлидир. (Филиппилиләрә 2:4 ајәсини оху.) Булус јазмышды: «Һәр кәс арвадыны өзүнү севдији кими севсин, арвад да әринә дәрин һөрмәт бәсләсин» (Ефеслиләрә 5:21—33). Һәм кишинин, һәм дә гадынын севҝијә вә һөрмәтә еһтијаҹы вар. Амма аиләнин хошбәхт олмасы үчүн киши даһа чох арвадынын она һөрмәт етдијини, арвад да әринин ону севдијини һисс етмәлидир.

18. Ҝөрүшән вахт нә үчүн еһтијатлы олмаг лазымдыр?

¹⁸ Оғланла гыз ҝөрүшәркән бир-бириләрини јахшы танымаға башлајырлар. Бу чох ҝөзәл дөврдүр. Амма  онлар бу мүддәт әрзиндә ҝөзүачыг вә дүрүст олмалыдырлар ки, бирҝә өмүр сүрмәк истәјиб-истәмәдикләринә гәрар верә билсинләр. Ҝөрүшән вахт оғланла гыз бир-бирилә үнсијјәт етмәји өјрәнир вә бир-биринин хасијјәтинә бәләд олур. Мүнасибәтләри јахынлашдыгҹа, тәбии олараг, физики јахынлыг истәји јараныр. Амма әхлагсызлыға јол вермәмәк үчүн нә гәдәр ки евләнмәјибләр, онлар һиссләрини неҹә ифадә етдикләринә нәзарәт етмәлидирләр. Әсл мәһәббәт онлара көмәк едәҹәк ки, һиссләрини идарә етсинләр вә бир-бирилә, еләҹә дә, Јеһова илә мүнасибәтләринә зәрәр јетирәҹәк  һеч бир һәрәкәтә јол вермәсинләр (1 Салоникилиләрә 4:6).

19, 20. Мәсиһиләр никаһа неҹә јанашырлар?

¹⁹ Бир чох романларын вә филмләрин сону тәмтәраглы тојла битир. Һәјатда исә тој садәҹә башланғыҹдыр. Јеһованын нијјәти одур ки, никаһ өмүрлүк иттифаг олсун (Јарадылыш 2:24).

²⁰ Бу ҝүн чохлары никаһа мүвәггәти гурулуш кими бахыр. Онлар асанлыгла евләнир, елә евләндикләри кими дә бошанырлар. Бәзиләри дүшүнүр ки, проблем јарананда һәјат јолдашындан ајрылмаг, никаһа сон гојмаг лазымдыр. Амма бир-биринә һөрүлмүш үч ипдән ибарәт кәндири јадына сал. Бу ҹүр кәндир һәтта бөјүк тәзјиг алтында да гырылмаз. Биз көмәји Јеһовадан истәјәндә никаһымыз узунөмүрлү олаҹаг. Иса демишди: «Аллаһын бир бојундуругда бирләшдирдијини гој һеч кәс ајырмасын» (Мәтта 19:6).

21. Әрлә арвада бир-бирини севмәјә нә көмәк едәҹәк?

²¹ Һәр биримизин ҝүҹлү вә зәиф ҹәһәтләри вар. Башгасынын, хүсусилә дә һәјат јолдашынын зәифликләринә диггәти ҹәмләмәк чох асандыр. Амма белә етсәк, хошбәхт олмајаҹағыг. Диггәти һәјат јолдашымызын јахшы ҹәһәтләринә ҹәмләсәк, аиләмиз хошбәхт олаҹаг. Гејри-камил инсана бу ҹүр јанашмаг мүмкүндүр? Бәли. Јеһова билир ки, биз камилликдән нә гәдәр узағыг, амма О, диггәтини бизим мүсбәт кејфијјәтләримизә ҹәмләјир. Тәсәввүр ет, белә олмасајды,  бизим һалымыз неҹә оларды! Мәзмурчу демишди: «Еј Јаһ, анҹаг сәһвләримизи ҝөрсәјдин, ким дајана биләрди, еј Јеһова?» (Зәбур 130:3). Әрләр вә арвадлар Јеһовадан нүмунә ҝөтүрүб һәјат јолдашларынын јахшы кејфијјәтләринә фикир вермәли вә бир-бирини дәрһал бағышламалыдыр. (Колослулара 3:13 ајәсини оху.)

22, 23. Ибраһим вә Сара әр-арвадлар үчүн неҹә нүмунә гојублар?

 ²² Илләр өтдүкҹә никаһ даһа да мөһкәмләнә биләр. Ибраһимлә Саранын никаһы узунөмүрлү вә хошбәхт олмушду. Јеһова Ибраһимә Ур шәһәриндән чыхмағы бујуранда Саранын, еһтимал ки, алтмышдан чох јашы вар иди. Тәсәввүр ет, онун үчүн раһат евини гојуб чадырларда јашамаг неҹә чәтин иди. Амма Сара әринә јахшы дост, јахшы һәмдәм иди. Она үрәкдән һөрмәт едирди. Одур ки, әринин гәрарларыны дәстәкләјир вә онларын һәјата кечмәсинә көмәк едирди (Јарадылыш 18:12; 1 Бутрус 3:6).

²³ Никаһын уғурлу олмасы о демәк дејил ки, әрлә арвад һәмишә һәр шејдә разылашаҹаглар. Бир дәфә Ибраһим Сара илә разылашмамышды, амма Јеһова Ибраһимә демишди: «Она гулаг ас». Ибраһим белә дә етмишди вә нәтиҹәси јахшы олмушду (Јарадылыш 21:9—13). Әҝәр бәзән һәјат јолдашынла фикирләрин үст-үстә дүшмүрсә, мәјус олма. Әсас одур ки, фикирләриниз үст-үстә дүшмәјәндә белә, бир-биринизлә мәһәббәтлә вә һөрмәтлә рәфтар едәсиниз.

24. Никаһын Јеһоваја неҹә шәрәф ҝәтирә биләр?

²⁴ Мәсиһи јығынҹағында минләрлә хошбәхт әр-арвад вар. Әҝәр аилә гурмаг истәјирсәнсә, унутма ки, һәјат јолдашы сечмәк ән ваҹиб гәрарлардан биридир. Бу сәнин бүтүн һәјатына тәсир едәҹәк. Она ҝөрә дә Јеһовадан рәһбәрлик истә. Белә етсән, һәјат јолдашыны ағылла сечә биләҹәксән, никаһа јахшы һазырлашаҹагсан вә Јеһоваја шәрәф ҝәтирән мөһкәм аилә гура биләҹәксән.