1, 2. Сән Јеһова Аллаһы нәјә ҝөрә севирсән?

АЛЛАҺЫ севирсән? Бәлкә дә, о гәдәр севирсән ки, өзүнү Она һәср етмисән. Бәлкә дә, О сәнин ән јахын Достундур. Анҹаг сән Јеһова Аллаһы севмәмишдән әввәл О сәни севиб. Мүгәддәс Китабда дејилир: «Биз севирик, чүнки әввәлҹә Аллаһ бизи севди» (1 Јәһја 4:19).

² Јеһова Аллаһ бизә мәһәббәтини чох шејдә ҝөстәриб. Һәјатдан һәзз алаг дејә бизә ҝөзәл ев — Јер күрәсини вериб, бизи лазым олан һәр немәтлә тәмин едиб (Мәтта 5:43—48; Вәһј 4:11). Аллаһ истәјир ки, бизим Онунла јахын мүнасибәтимиз олсун, буна ҝөрә дә Өзүнү бизә таныдыб. Биз Мүгәддәс Китабы охујанда Јеһоваја гулаг асырыг. Дуа едәндә исә О бизә гулаг асыр (Зәбур 65:2). Аллаһ Өз гүдрәтли мүгәддәс руһу илә бизә јол ҝөстәрир, бизи мөһкәмләндирир (Лука 11:13). Аллаһ бизи ҝүнаһдан вә өлүмдән азад етмәк үчүн һәтта әзиз Оғлуну јер үзүнә ҝөндәрди. (Јәһја 3:16; Ромалылара 5:8 ајәләрини оху.)

3. Аллаһла јахын мүнасибәти неҹә горумаг олар?

 ³ Һәм сәнин шад ҝүнүндә, һәм дә дар ҝүнүндә јанында олан јахын достуну бир анлыг јадына сал. Сөзсүз ки, достлуғунузу белә мөһкәм сахламаг асан баша ҝәлмәјиб. Бу, зәһмәт тәләб едир. Јеһова Аллаһла достлуғумуз да беләдир. Бизим Јеһовадан јахын Достумуз ола билмәз. Бу достлуг әбәди ола биләр. Буна ҝөрә дә Мүгәддәс Китаб бизи тәшвиг едир: «Аллаһын мәһәббәтиндән ајрылмајын» (Јәһуда 21). Буну неҹә едә биләрик? Мүгәддәс Китабда бу суалын ҹавабы вар: «Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил» (1 Јәһја 5:3).

4, 5. Сәнин гәлбиндә Јеһоваја севҝини ојадан нә олуб?

⁴ Сәнин гәлбиндә Аллаһа севҝини ојадан нә олуб? Үрәјиндә Јеһоваја гаршы мәһәббәтин ҹүҹәрмәјә башладығы вахтлары хатырлајырсан?

⁵ Илк дәфә өјрәнәндә ки, Јеһова сәнин јени дүнјада әбәди јашамағыны истәјир, нә һисс етдин? Бунун үчүн Јеһованын нәләр етдијини өјрәндин вә баша дүшдүн ки, Јеһова Оғлуну јер үзүнә ҝөндәрмәклә бизә неҹә бөјүк лүтф ҝөстәриб (Мәтта 20:28; Јәһја 8:29; Ромалылара 5:12, 18). Јеһованын сәни нә гәдәр севдијини өјрәндикҹә сәнин дә гәлбиндә Она гаршы мәһәббәт ојанды. (1 Јәһја 4:9, 10 ајәләрини оху.)

6. Севҝи нәдән ҝөрүнүр? Аллаһа севҝин сәни нәјә тәшвиг едиб?

 ⁶ Анҹаг Аллаһа дујдуғун о севҝи һәлә башланғыҹ иди. Мәсәлән, адам кимисә севәндә, она «сәни севирәм» демәклә кифајәтләнмир. Ону севиндирән ишләр ҝөрмәк истәјир. Јеһованы да севдијин үчүн сәндә истәк јаранды ки, Онун дедији кими јашајасан. Бу мәһәббәт бөјүдүкҹә, ола билсин, сән өзүнү Она һәср етдин, вәфтиз олундун. Бунунла сөз вердин ки, әбәдијјән Јеһоваја хидмәт едәҹәксән. (Ромалылара 14:7, 8 ајәләрини оху.) Сөзүнүн үстүндә дурмаг үчүн нә едә биләрсән?

7. Јеһованы севириксә, нә едәҹәјик? Онун әмрләриндән бәзиләри һансылардыр?

⁷ Јеһованы севдијимиз үчүн Онун әмрләринә риајәт едирик. Јеһова Мүгәддәс Китаб васитәсилә билдирир ки, биз неҹә јашамалыјыг. Мәсәлән, инсанын Јеһовадан башга кимәсә, јахуд нәјәсә ситајиш етмәси, никаһда олмадығы кәслә ҹинси мүнасибәтдә олмасы, сәрхош олмасы, оғурлуг етмәси, јалан данышмасы ҝүнаһдыр (1 Коринфлиләрә 5:11; 6:18; 10:14; Ефеслиләрә 4:28; Колослулара 3:9).

8, 9. Мүәјјән вәзијјәтә даир конкрет ганун олмајанда Јеһованын фикрини неҹә билмәк олар? Мисал чәк.

⁸ Јеһованын үрәјини севиндирмәк үчүн Онун әмрләринә риајәт етмәк һәлә ишин јарысыдыр. Јеһова бизә һәјатын һәр саһәсини әһатә едән ганунлар сијаһысы вермәјиб. Буна ҝөрә дә бәзән елә ола биләр ки, нә етмәли олдуғумуза даир Мүгәддәс Китабда конкрет ганун тапмајаг. Бәс онда дүзҝүн гәрарлары неҹә верә биләрик? (Ефеслиләрә 5:17). Мүгәддәс Китабда принсипләр вар. Принсипләр Јеһованын бахышыны  изаһ едән әсас һәгигәтләрдир. Мүгәддәс Китабы охудугҹа биз Јеһованы даһа јахындан таныјырыг. Онун дүшүнҹә тәрзини, нәји севдијини, нәјә нифрәт етдијини өјрәнирик. (Зәбур 97:10 ајәсини оху; Мәсәлләр 6:16—19; 1-ҹи әлавәјә бах.)

⁹ Мәсәлән, телевизорда, Интернетдә нәјә бахаҹағымызы неҹә мүәјјән едирик? Јеһова бизә конкрет олараг демир нә етмәлијик. Лакин дүзҝүн гәрар вермәк үчүн О бизә принсипләр верир. Әјләнҹәләрин әксәријјәти зоракылыгла, секс сәһнәләри илә долудур. Мүгәддәс Китабда Јеһова билдирир ки, зоракылығы севәнләрә нифрәт едир вә әхлагсызлары мүһакимә едәҹәк (Зәбур 11:5; Ибраниләрә 13:4). Бу принсипләр бизә дүзҝүн гәрар вермәјә неҹә көмәк едир? Нәјинсә Јеһованын ҝөзүндә әхлагсызлыг олдуғуну биләндә ондан ҝен ҝәзмәлијик.

10, 11. Нәјә ҝөрә биз Јеһоваја итаәт едирик?

¹⁰ Јеһова Аллаһа нәјә ҝөрә итаәт едирик? Садәҹә она ҝөрә јох ки, ҹәзаланмајаг, јахуд јанлыш гәрарын аҹы нәтиҹәләрини бичмәјәк (Галатијалылара 6:7). Биз Јеһованы севдијимиз үчүн Она итаәт едирик. Ушаг атасыны севиндирмәк истәдији кими, биз дә сәмави Атамызын гәлбини шад етмәк истәјирик. Јеһованын биздән разы галдығыны билмәкдән ҝөзәл нә ола биләр?! (Зәбур 5:12; Мәсәлләр 12:2; 2-ҹи әлавәјә бах).

¹¹ Биз Аллаһа тәкҹә асан оланда, јахуд башга сечим олмајанда итаәт етмирик. Һәмчинин демирик ки, Онун бу ганунуна әмәл едәҹәјик, о биринә  јох! (Ганунун тәкрары 12:32). Биз «әмрләрин мәнә әзиздир, онлары севирәм» дејән мәзмурчу кими, һәр саһәдә Јеһова Аллаһа итаәт едирик (Зәбур 119:47; Ромалылара 6:17). Биз Нуһ пејғәмбәр кими олмаг истәјирик. О, Јеһова Аллаһы севдијини әмәлдә ҝөстәрмишди; Аллаһын әмр етдији һәр шеји јеринә јетирмишди. Мүгәддәс Китабда дејилир ки, Нуһ «она неҹә дејилмишдисә, елә дә етди» (Јарадылыш 6:22). Истәјәрдин, Јеһова сәнин һаггында да бу сөзләри десин?

12. Биз Јеһованы неҹә севиндирә биләрик?

¹² Биз итаәт едәндә Јеһованын гәлби севинир (Мәсәлләр 11:20; 27:11). Бир дүшүн: бизим итаәткарлығымыз каинатын Јараданына бөјүк севинҹ бәхш едир! Аллаһ бизи итаәт етмәјә мәҹбур етмир. О бизә ирадә азадлығы вериб. Бу о демәкдир ки, дүзҝүн, јахуд јанлыш аддым атмаг гәрарыны вермәкдә сәрбәстик. Јеһова истәјир ки, Она олан севҝимиз бизи дүзҝүн гәрарлар вермәјә тәшвиг етсин. Белә етсәк, һәјатда хошбәхт олаҹағыг (Ганунун тәкрары 30:15, 16, 19, 20; 3-ҹү әлавәјә бах).

13, 14. Һарадан билирик ки, Аллаһын әмрләринә табе олмаг чәтин дејил? Нүмунә чәкин.

¹³ Бәлкә дә, бизә елә ҝәлир ки, Јеһованын әмрләринә итаәт етмәк чох чәтиндир, јахуд онлар сәрбәстлијимизи әлимиздән алыр. Анҹаг Мүгәддәс Китабда ајдын шәкилдә дејилир: «Онун әмрләри... ағыр дејил» (1 Јәһја 5:3). «Ағыр» кими тәрҹүмә олунан јунан сөзү диҝәр ајәләрдә сәрт гајдалара, јахуд инсанлара ағалыг едән, зәрәр јетирмәк истәјән адамлара аид ишләнир  (Мәтта 23:4; Һәвариләрин ишләри 20:29, 30). Јеһованын әмрләри ағыр дејил, јәни онлара әмәл етмәк чәтин дејил. Јеһова нәсә бујурурса, бизи нәзәрә алыб бујурур.

¹⁴ Туталым, достунуза тәзә евә көчмәјә көмәк едирсиниз. О, әшјалары гутулара јығыб. Гутуларын бәзиси јүнҝүлдүр, дашымаг асандыр. Бәзиләри исә ағырдыр, ҝәрәк ики адам галдырсын. Достунуз сиздән ағыр гутуну тәкбашына дашымағы хаһиш едәр? Әлбәттә ки, јох! Ахы о сизин зәдә алмағынызы истәмәз. Јеһова да бир Дост кими, бизә ағыр шеј етмәји бујурмаз (Ганунун тәкрары 30:11—14). Јеһова бизи баша дүшүр. О, «неҹә јарандығымызы јахшы билир, торпаг олдуғумузу унутмур» (Зәбур 103:14).

15. Нәјә ҝөрә әмин ола биләрик ки, Јеһованын әмрләри бизим хејримизәдир?

¹⁵ Муса Исраил халгына демишди ки, Јеһованын әмрләри онларын һәмишә хејир тапмасы үчүндүр вә бу әмрләрә итаәт етсәләр, сағ-саламат олаҹаглар (Ганунун тәкрары 5:28—33; 6:24). Бу ҝүн дә беләдир. Јеһованын вердији һәр бир әмрә әмәл етсәк, хошбәхт олаҹағыг. (Әшија 48:17 ајәсини оху.) Атамыз Јеһова билир, нә бизим хејримизәдир (Ромалылара 11:33). Мүгәддәс Китабда јазылыб: «Аллаһ мәһәббәтдир»  (1 Јәһја 4:8). Бу о демәкдир ки, Јеһова нә дејирсә вә нә едирсә, һамысыны мәһәббәтдән ирәли ҝәләрәк едир.

16. Гејри-камил олсаг да, шәр дүнјада јашасаг да, нәјә ҝөрә Аллаһа итаәт етмәк мүмкүндүр?

¹⁶ Бизим үчүн Аллаһа итаәт етмәк һәмишә асан олмур. Биз Шејтанын идарә етдији дүнјада јашајырыг. О чалышыр ки, инсанлары тәсири алтына салыб пис јола чәксин (1 Јәһја 5:19). Биз һәмчинин өз гејри-камил һиссләримизлә вә дүшүнҹәләримизлә мүбаризә апармалыјыг. Чүнки бунлар бизи Аллаһын итаәтиндән чыхмаға сөвг едир (Ромалылара 7:21—25). Амма Јеһоваја мәһәббәт бизә дүзҝүн давранмаг үчүн ҝүҹ верир. Јеһова Она итаәт етмәк үчүн ҝөстәрдијимиз ҹәһдләри ҝөрүр, она ҝөрә дә бизә көмәк едир, гүдрәтли мүгәддәс руһуну верир (1 Ишмуил 15:22, 23; Һәвариләрин ишләри 5:32). Мүгәддәс руһун көмәји илә өзүмүздә ҝөзәл кејфијјәтләр јетишдиририк. Бу кејфијјәтләрин сајәсиндә Аллаһа итаәт етмәк бизә асан олур (Галатијалылара 5:22, 23).

17, 18. а) Бу китабда нә өјрәнәҹәјик? б) Нөвбәти фәсилдә сөһбәт нәдән ҝедәҹәк?

¹⁷ Бу китабдан өјрәнәҹәјик ки, биз Јеһованын дедији кими неҹә јашаја биләрик. Һәмчинин Онун принсипләринә, әхлаг нормаларына әмәл етмәји өјрәнәҹәјик. Унутма ки, Јеһова һеч вахт бизи итаәт етмәјә мәҹбур етмир. Итаәт етмәк бизим сечимимиздир; белә едәндә һәјатымыз јахшылашаҹаг, ҝәләҹәјимиз ҝөзәл олаҹаг. Ән әсасы, итаәткарлығымызла Аллаһа ҝөстәрәҹәјик ки, Ону үрәкдән севирик. (4-ҹү әлавәјә бах.)

¹⁸ Јахшы илә писи ајырд етмәк үчүн Јеһова бизә виҹдан вериб. Виҹданымызы тәрбијә етсәк, о бизә Аллаһын әмрләринә риајәт етмәјә көмәк едәҹәк. Бәс виҹдан нәдир? Ону неҹә тәрбијә едә биләрик? Бу барәдә нөвбәти фәсилдә өјрәнәҹәјик.