1—3. Мәсәлләр 13:20 ајәсинә әсасән, нәјә ҝөрә дост сечиминә ҹидди јанашмалыјыг?

ҺЕЧ фикир вермисән, көрпә ушаг валидејнләринин һәрәкәтләрини неҹә изләјир? Һәлә һеч дил ачмамыш, о ҝөрдүкләринин, ешитдикләринин һамысыны мәнимсәјир. Бөјүдүкҹә, өзү дә билмәдән, валидејнләрини тәглид едир. Тәәҹҹүблү дејил ки, чох вахт бөјүкләр дә отуруб-дурдуглары адамлар кими дүшүнүр, онлар кими давранырлар.

² Мәсәлләр 13:20 ајәсиндән јазылыб: «Һикмәтли илә отуруб-дуран һикмәтли олар». Мүгәддәс Китаб үзрә бир алимин сөзләринә әсасән, киминләсә отуруб-дурмаг дејәндә һәмин инсаны севмәк, ону өзүнә јахын билмәк нәзәрдә тутулур. Бирҝә вахт кечирдијимиз адамлар, хүсусилә дә онлары чох истәјириксә, бизә ҝүҹлү тәсир едирләр.

³ Достларымыз бизә ја јахшы, ја да пис тәсир ҝөстәрир. Мәсәлләр 13:20 ајәсинин икинҹи һиссәсиндә дејилир: «Ахмагларла ајаглашан бәдбәхт олар». Киминләсә «ајаглашмаг» ибрани дилиндә онунла «дост олмаг» мәнасыны да верир (Мәсәлләр 22:24). Аллаһы  севән достлар бизи Аллаһа садиг галмаға тәшвиг едәҹәк. Одур ки, дүзҝүн дост сечмәк чох ваҹибдир. Ҝәл ҝөрәк Јеһова Өзүнә кимләри дост сечир. Бу бизә дә дост сечиминдә көмәк едәҹәк.

4. Аллаһын досту олмаг нәјә ҝөрә бөјүк шәрәфдир? Нәјә ҝөрә Аллаһ Ибраһим пејғәмбәри «достум» адландырмышды?

⁴ Каинатын һөкмдары олан Јеһова Аллаһ бизи Өзү илә дост олмаға дәвәт едир. Бу, бөјүк шәрәфдир. Јеһова һәр адамы Өзүнә дост сечмир, Ону севән, иман едән инсанлары сечир. Мәсәлән, Ибраһим пејғәмбәри. Ибраһим пејғәмбәр Аллаһ үчүн һәр шеј етмәјә һазыр иди. О, садиг вә итаәткар олдуғуну дөнә-дөнә сүбут етмишди. Һәтта оғлу Исһагы да гурбан ҝәтирмәјә һазыр иди. О инандырды ки, Аллаһ Исһагы дирилтмәјә гадирдир (Ибраниләрә 11:17—19; Јарадылыш 22:1, 2, 9—13). Ибраһим пејғәмбәр садиг вә итаәткар инсан иди, она ҝөрә дә Јеһова ону «достум» адландырмышды (Әшија 41:8; Јагуб 2:21—23).

5. Јеһова садиг бәндәләринә неҹә јанашыр?

⁵ Јеһова достларына чох дәјәр верир. Јеһованын достлары Она садиг галмағы һәр шејдән үстүн тутурлар. (2 Ишмуил 22:26 ајәсини оху.) Онлар Аллаһы севирләр, она ҝөрә дә Она садиг галырлар вә итаәт едирләр. Мүгәддәс Китабда дејилир ки, Аллаһ салеһ адамла, јәни итаәткар бәндәси илә достлуг едир (Мәсәлләр 3:32). Јеһова достларыны «чадырына» гонаг дәвәт едир. Јәни изин верир ки, Она ибадәт етсинләр вә дуа етсинләр (Зәбур 15:1—5).

6. Иса Мәсиһи севдијимизи неҹә ҝөстәрә биләрик?

 ⁶ Иса Мәсиһ демишди: «Мәни севән мәним сөзүмә әмәл едәҹәк вә Атам ону севәҹәк» (Јәһја 14:23). Јеһованын досту олмаг үчүн биз һәм дә Исаны севмәлијик вә онун өјрәтдикләринә әмәл етмәлијик. Мәсәлән, Иса Мәсиһин мүждәни тәблиғ етмәк вә шаҝирд һазырламаг тапшырығыны јеринә јетирмәлијик (Мәтта 28:19, 20; Јәһја 14:15, 21). Биз Исаны севдијимиз үчүн онун изи илә ҝедирик (1 Бутрус 2:21). Јеһова ҝөрәндә ки, биз һәм сөздә, һәм дә әмәлдә Исадан нүмунә ҝөтүрүрүк чох севинир.

7. Нәјә ҝөрә биз Јеһованын достларыны өзүмүзә дост сечмәлијик?

⁷ Јеһованын достлары Она иман едир, итаәт едир вә садиг галыр, һәм дә Иса Мәсиһи севир. Бәс биз дә бу ҹүр достлар сечирик? Әҝәр сәнин достларын Исадан нүмунә ҝөтүрүрсә, инсанлара Аллаһын Падшаһлығы һаггында өјрәдирсә, онлар сәнә јахшы инсан олмаға вә Јеһоваја садиг галмаға көмәк едәҹәкләр.

8. Рутла Наимәнин достлуғунда нә хошуна ҝәлир?

⁸ Мүгәддәс Китабда чох адамларын достлуғундан јазылыб. Онлардан бири дә Рутла гајынанасы Наимәнин достлуғудур. Бу гадынлар ајры-ајры өлкәләрдән вә халглардан идиләр. Үстәлик, Наимә Рутдан јашҹа чох бөјүк иди. Амма онлар јахын дост олмушдулар. Чүнки икиси дә Јеһованы севирди. Наимә Муабдан Исраилә гајытмаг истәјәндә Рут ону тәк гојмады. О, Наимәјә деди: «Халгын халгым  олаҹаг, сәнин Аллаһын мәним Аллаһым олаҹаг» (Рут 1:14, 16). Рут Наимәјә гаршы чох хејирхаһ иди. Онлар Исраилдә јашајанда Рут ишләјиб, өзүнү вә достуну доландырырды. Наимә дә Руту чох истәјирди. Рута ағыллы мәсләһәт верди. Рут да она гулаг асды. Бунун сајәсиндә, онларын һәр икисинә бөјүк немәтләр нәсиб олду (Рут 3:6).

9. Давудла Јонатанын достлуғунда сәнә хош тәсир бағышлајан нә олду?

⁹ Давудла Јонатан да ҝөзәл достлуг нүмунәсидир. Онларын һәр икиси Јеһоваја садиг иди. Јонатан Давуддан тәхминән 30 јаш бөјүк иди. Јонатан Исраилин нөвбәти падшаһы олмалы иди (1 Ишмуил 17:33; 31:2; 2 Ишмуил 5:4). Амма биләндә ки, Јеһова Давуду падшаһ сечиб, о, нә пахыллыг етди, нә дә Давудла рәгабәтә ҝиришди. Јонатан әлиндән ҝәлдији гәдәр Давуда дајаг олду. Мәсәлән, Давуд тәһлүкәдә оланда онун «Јеһоваја инамыны мөһкәмләндирди». Јонатан һәтта Давуда ҝөрә һәјатыны да тәһлүкәјә атды (1 Ишмуил 23:16, 17). Давуд да садиг дост иди. О сөз верди ки, Јонатанын аиләсинин гајғысына галаҹаг. Давуд Јонатан өләндән сонра да сөзүнүн үстүндә дурду (1 Ишмуил 18:1; 20:15—17, 30—34; 2 Ишмуил 9:1—7).

10. Үч ибранинин нүмунәсиндән достлугла бағлы нә өјрәнирсән?

¹⁰ Сәдраһ, Мисаһ вә Абиднағу ибрани идиләр. Онлары ушаг вахты Бабилә әсир апармышдылар. Аиләләриндән узагда онлар бир-бириләринә көмәк едирдиләр ки, Јеһоваја садиг галсынлар. Бу ҝәнҹләр бөјүјәндә  дә иман сынағы илә үзләширдиләр. Бир дәфә Навуходоносор падшаһ онлара әмр етмишди ки, гызыл һејкәлә сәҹдә гылсынлар. Сәдраһ, Мисаһ вә Абиднағу бу әмрә бојун әјмәјиб падшаһа дедиләр: «Биз нә сәнин аллаһларына ибадәт едәҹәјик, нә дә гојдуғун гызыл һејкәлә сәҹдә гылаҹағыг». Бу үч дост иман сынағы илә үзләшәндә Аллаһа садиг галды (Дәнјал 1:1—17; 3:12, 16—28).

11. Булусла Тимути неҹә достлашмышдылар?

¹¹ Һәвари Булус ҝәнҹ Тимути илә таныш оланда ҝөрмүшдү ки, Тимути Јеһованы севир вә јығынҹағын рифаһыны дүшүнүр. Она ҝөрә дә о, Тимутијә тәлим верирди ки, мүхтәлиф јерләрдә олан баҹы-гардашлара көмәк етсин (Һәвариләрин ишләри 16:1—8; 17:10—14). Тимути чох чалышган иди. Булус онун һаггында белә демишди: «О, атасы илә бәрабәр нөкәрчилик едән ушаг кими, мүждәнин вүсәт алмасында мәнимлә бирликдә ҹанла-башла хидмәт едиб». Булус билирди ки, Тимути ҹан-дилдән баҹы-гардашларын гејдинә галыр. Булусла Тимути чијин-чијинә Јеһоваја хидмәт етдикҹә мөһкәм дост олдулар (Филиппилиләрә 2:20—22; 1 Коринфлиләрә 4:17).

12, 13. а) Нәјә ҝөрә јығынҹагда да дост сечәркән диггәтли олмалыјыг? б) Нәјә ҝөрә һәвари Булус 1 Коринфлиләрә 15:33 ајәсиндәки хәбәрдарлығы јазмышды?

¹² Јығынҹагда баҹы-гардашлардан чох шеј өјрәнирик. Бир-биримизә көмәк едирик ки, Јеһоваја садиг галаг. (Ромалылара 1:11, 12 ајәләрини оху.) Амма  јығынҹагда да дост сечәндә диггәтли олмалыјыг. Бизим мүхтәлиф халглардан, мәдәнијјәтләрдән олан баҹы-гардашларымыз вар. Јығынҹагда бәзиләри тәзәдир, бәзиләри исә узун илләрдир Јеһоваја хидмәт едир. Мејвәнин јетишмәсинә вахт лазым олдуғу кими, инсанын Јеһова илә мүнасибәтләринин дә мөһкәмләнмәсинә вахт лазымдыр. Буна ҝөрә дә биз бир-биримизә сәбирлә, мәһәббәтлә јанашмалыјыг вә һәмишә достлары ағылла сечмәлијик (Ромалылара 14:1; 15:1; Ибраниләрә 5:12—6:3).

 ¹³ Һәрдән јығынҹагда ҹидди вәзијјәт јараныр. Бу заман хүсусилә еһтијатлы олмалыјыг. Ола биләр ки, һансыса баҹы вә ја гардаш Мүгәддәс Китаба зидд ҝедән ишләр ҝөрсүн. Јахуд кимсә дејинҝәнлик едә биләр. Бу исә јығынҹаг үчүн тәһлүкәлидир. Белә һаллар бизи тәәҹҹүбләндирмир. Чүнки биринҹи әсрдә дә јығынҹагда проблемләр олурду. Һәвари Булус о дөврдә јашајан мәсиһиләрә хәбәрдарлыг етмишди: «Алданмајын! Пис достлар јахшы әхлагы позур» (1 Коринфлиләрә 15:12, 33). Булус һәмчинин Тимутини хәбәрдар етмишди ки, өзүнә дост сечәркән диггәтли олсун. Бу бизә дә аиддир. (2 Тимутијә 2:20—22 ајәләрини оху.)

14. Дост сечимимиз Јеһова илә мүнасибәтимизә неҹә тәсир едир?

¹⁴ Биз Јеһова илә мүнасибәтимизи горумалыјыг. Бу бизим саһиб олдуғумуз ән дәјәрли немәтдир. Она ҝөрә дә иманымызы зәифләдән вә бу мүнасибәтә хәләл ҝәтирән инсанларла дост олмамалыјыг. Сүнҝәри чиркли суја атсаг, о, ҹанына тәмиз су чәкмәјәҹәк. Биз дә дүшүнмәмәлијик ки, сәһв һәрәкәт едән инсанларла достлуг етсәк дә, дүзҝүн давранмаг бизә асан олаҹаг. Биз достларымызы диггәтлә сечмәлијик (1 Коринфлиләрә 5:6; 2 Салоникилиләрә 3:6, 7, 14).

15. Јығынҹагда јахшы достлар газанмаг үчүн нә едә биләрсән?

¹⁵ Јығынҹагда Јеһованы үрәкдән севән инсанлар чохдур. Онлар сәнин јахын достун ола биләр (Зәбур 133:1). Тәкҹә өз јашыдларындан вә ја өз милләтиндән олан инсанларын арасында дост ахтарма. Унутма ки, Јонатан Давуддан хејли бөјүк иди. Рут исә Наимәдән чох кичик иди. Мүгәддәс Китабда  дејилир ки, «үрәјинизи ҝениш ачын» (2 Коринфлиләрә 6:13; 1 Бутрус 2:17 ајәсини оху). Биз бу мәсләһәтә әмәл етмәк истәјирик. Јеһоваја нә гәдәр чох бәнзәмәјә чалышсан, сәнинлә дост олмаг истәјән адамлар да бир о гәдәр чох олаҹаг.

16, 17. Јығынҹагда кимсә хәтримизә дәјәрсә, һансы фикирдән узаг олмалыјыг?

¹⁶ Бир аиләнин ичиндә һамы ејни хасијјәтдә олмур, ејни ҹүр фикирләшмир. Јығынҹагда да беләдир. Бу ҹүр мүхтәлифлик һәјатымыза рәнҝ гатыр вә биз бир-биримиздән чох шеј өјрәнирик. Бәзән исә бу мүхтәлифлик сәбәбиндән баҹы-гардашларла арамызда анлашылмазлыг јараныр вә кимсә бизи гыҹыгландырыр. Һәрдән кимсә хәтримизә дәјир, кимдәнсә инҹијирик (Мәсәлләр 12:18). Бәс бу ҹүр проблемләрә ҝөрә руһдан дүшүб, јығынҹагдан узаглашмаг дүзҝүндүр?

¹⁷ Хејр. Киминсә һәрәкәтинә ҝөрә мәјус олсаг белә, јығынҹагдан үз дөндәрмәмәлијик. Ахы хәтримизә дәјән Јеһова дејил! Јеһова бизә һәјат вериб, бизи һәр шејлә тәмин едиб. О, севҝимизә вә сәдагәтимизә лајигдир (Вәһј 4:11). Јығынҹаг Јеһовадан бир һәдијјәдир вә бизә иманымызы мөһкәм сахламаға көмәк едир (Ибраниләрә 13:17). Кимсә хәтримизә дәјиб дејә бу һәдијјәдән имтина етмәмәлијик. (Зәбур 119:165 ајәсини оху.)

18. а) Баҹы-гардашларла мүнасибәтимизи јахшы сахламаға нә көмәк едир? б) Нәјә ҝөрә башгаларыны бағышламалыјыг?

¹⁸ Биз баҹы-гардашларымызы севирик. Буна ҝөрә дә  онларла јахшы мүнасибәтдә олмаг истәјирик. Јеһова һеч бир инсандан камиллик ҝөзләмир, биз дә ҝөзләмәмәлијик (Мәсәлләр 17:9; 1 Бутрус 4:8). Һамымыз сәһв едирик, амма мәһәббәт көмәк едир ки, бир-биримизи үрәкдән бағышлајаг (Колослулара 3:13). Мәһәббәт гојмајаҹаг ки, кичик анлашылмазлығы бөјүк проблемә чевирәк. Дүздүр, кимсә хәтримизә дәјәндә бу барәдә дүшүнмәмәк чәтиндир. Әсәбиләшмәк, һәмин адама кин сахламаг исә чох асандыр. Амма белә оланда севинҹимиз итәҹәк, кинли адам олаҹағыг. Хәтримизә дәјән адамы бағышлајанда исә үрәјимиз раһат олаҹаг, јығынҹагда бирлик олаҹаг, ән әсасы исә Јеһова илә мүнасибәтләримиз јахшы олаҹаг (Мәтта 6:14, 15; Лука 17:3, 4; Ромалылара 14:19).

19. Јығынҹагда киминләсә үнсијјәтә нә заман сон гојмаг лазым ҝәлир?

¹⁹ Меһрибан аиләдә һәр кәс өз өһдәсинә дүшәни едир ки, һамы хошбәхт олсун. Амма тәсәввүр ет ки, бир нәфәр дикбашлыг едир. Аиләдә һамы дөнә-дөнә она көмәк етмәјә чалышыр. О исә инадындан дөнмүр. О ја өзү евдән чыхыб ҝедир, ја да аиләнин бөјүјү ондан евдән чыхмағы тәләб едир. Јығынҹагда да буна бәнзәр шеј ола биләр. Бәзән кимсә Јеһоваја ағыр ҝедән әмәлиндән дөнмүр, бу исә јығынҹаға зәрәр јетирә биләр. Бу шәхс ҝөстәрилән көмәји рәдд едир вә әмәлләри илә ҝөстәрир ки, јығынҹағын үзвү олмаг истәмир. Белә адам ја өзү  јығынҹагдан чыхыб ҝедир, ја да јығынҹагдан кәнар едилир. Мүгәддәс Китабда дејилир ки, белә адамла отуруб-дурмамалыјыг. (1 Коринфлиләрә 5:11—13 ајәләрини оху; 2 Јәһја 9—11.) Һәмин адам достумуз, јахуд да аилә үзвүмүз оларса, буна риајәт етмәк чәтин ола биләр. Анҹаг белә вәзијјәтдә Јеһоваја сәдагәтимиз инсана сәдагәтимиздән үстүн олмалыдыр. (8-ҹи әлавәјә бах.)

20, 21. а) Нәјә ҝөрә ҝүнаһкарын јығынҹагдан кәнар едилмәси мәһәббәтдән ирәли ҝәлән тәләбдир? б) Дост сечиминдә диггәтли олмаг нәјә ҝөрә ваҹибдир?

²⁰ Јеһова ҝүнаһкарын јығынҹагдан кәнар едилмәсини мәһәббәтдән ирәли ҝәләрәк тәләб едир. Бу, јығынҹағы Јеһованын ганунларына мәһәл гојмајан адамлардан горујур (1 Коринфлиләрә 5:7; Ибраниләрә 12:15, 16). Һәмчинин бизә имкан верир ки, Јеһованын мүгәддәс адына, Онун али ганунларына вә Јеһованын Өзүнә мәһәббәтимизи сүбут едәк (1 Бутрус 1:15, 16). Бу тәләб даһа јығынҹағын үзвү олмајан кәсин өзүнүн дә хејринәдир. Бу ҹидди ҹәза она әмәлинин ҝүнаһ олдуғуну баша дүшмәјә вә әмәлиндән дөнмәјә көмәк едә биләр. Вахтилә јығынҹагдан кәнар едиләнләрин чоху сонрадан Јеһоваја ҝери дөнмүшләр, јығынҹаг да онлары меһрибанлыгла гәбул етмишдир (Ибраниләрә 12:11).

²¹ Достларымыз бизә ја јахшы, ја да пис тәсир ҝөстәрир. Буна ҝөрә дост сечәркән јүз өлчүб, бир бичмәлијик. Әҝәр биз Јеһованын севдији инсанлары севсәк, онлар бизә Јеһоваја әбәдијјән садиг галмаға көмәк едәҹәкләр.