1, 2. Неҹә олду ки, Иса Јәһудијјә чөллүјүнә ҝәлди вә орада нә баш верди? (Фәслин әввәлиндәки шәклә бахын.)

 ЕРАМЫЗЫН 29-ҹу илинин пајыз фәслидир. Өлү дәниздән шималда, Јәһудијјә чөллүјүндә мүһүм бир һадисә ваге олур. Чылпаг гајалардан, јарғанлардан ибарәт олан бу чөллүкдә бир нәфәр 40 ҝүндүр ки, оруҹ тутуб дуа едир, дәрин дүшүнҹәләрә далыр. Сөһбәт Иса Мәсиһдән ҝедир. Гырх ҝүн бундан әввәл о вәфтиз олунуб мәсһ едилмишди. Сонра мүгәддәс руһ ону бура ҝәтирмишди. Инс-ҹинс олмајан бу чөллүкдә кечирдији ҝүнләр әрзиндә, јәгин ки, Јеһова Аллаһ онунла данышыб, ону ҝәләҹәк һадисәләрә һазырламышды.

² Инди исә аҹлыг Исаны һалдан салыб. Тәбии ки, Шејтан бу фүрсәти фөвтә верә билмәзди. О, дәрһал Исаја јахынлашыр. Бундан сонра баш верәнләр мүһүм бир мәсәләни үзә чыхарыр. Бу мәсәләнин пак ибадәти севән һәр кәсә, о ҹүмләдән, сизә дә бирбаша аидијјәти вар.

3, 4. а) Шејтан илк ики сынаға һансы сөзләрлә башлајыр вә еһтимал ки, Исанын үрәјинә һансы шүбһәләри сәпмәк истәјир? б) Шејтан бу ҝүн неҹә фәнд ишләдир?

³ Мәтта 4:1—7 ајәләрини охујун. Шејтан илк ики сынаға «әҝәр сән Аллаһын оғлусанса» дејәрәк ејһамлы сөзләрлә башлајыр. Мәҝәр  Шејтан Исанын Аллаһын Оғлу олдуғуна шүбһә едир? Хејр. Һагг јолдан азмыш бу мәләјә чох јахшы мәлумдур ки, Иса Аллаһын илк Оғлудур (Кол. 1:15). Һәмчинин ола билмәз ки, Иса вәфтиз оларкән Јеһованын ҝөјдән дедији сөзләрдән Шејтанын хәбәри олмасын. Јеһова о заман демишди: «Бу, Мәним севимли Оғлумдур. Мән ондан чох разыјам» (Мәт. 3:17). Јәгин, Шејтанын мәгсәди о иди ки, Исанын үрәјиндә Атасынын етибарлы олдуғуна, онун гејдинә галдығына шүбһә јарансын. Шејтан илк сынагда «дашы чөрәјә чевир» дејәндә, маһијјәт етибары илә, демишди: «Әҝәр сән Аллаһын Оғлусанса, нәјә ҝөрә Атан сәни бу чөл-бијабанда аҹ-сусуз гојуб?» Икинҹи сынагда исә Исаја өзүнү мәбәдин ән һүндүр јериндән атмағы сөјләмәклә Шејтан, бир нөв, демишди: «Дејирсән мән Аллаһын Оғлујам, бәс инанырсан Атан сәни һифз едәҹәк?»

⁴ Шејтан бу ҝүн дә ејни фәндләрә әл атыр (2 Кор. 2:11). Иблис мәгам ҝөзләјир ки, Аллаһын мөмин бәндәләри зәифләјиб руһдан дүшсүн. Буну ҝөрән кими дәрһал һүҹума кечир. Өзү дә чох вахт буну алтдан-алтдан едир (2 Кор. 11:14). Шејтан бизә јеритмәк истәјир ки, Јеһова һеч вахт бизи севмәз вә һеч вахт биздән разы галмаз. О, һәмчинин бизи инандырмаға чалышыр ки, Јеһова етибарсыздыр вә Кәламында вердији вәдләри јеринә јетирмәјәҹәк. Бу, ағ јаландыр! (Јәһ. 8:44). Бәс биз нә едәк ки, бу јаланлара ујмајаг?

5. Иса илк ики сынаг гаршысында Шејтана неҹә ҹаваб верди?

⁵ Ҝәлин ҝөрәк Иса бу ики сынаг гаршысында Шејтана неҹә ҹаваб верди. Иса Атасынын севҝисинә зәррә гәдәр дә шүбһә етмирди. Онун Атасына етибары сарсылмаз иди. Иса бир ан белә тәрәддүд етмәди, Атасынын Кәламындан ситат ҝәтирәрәк Шејтанын иддиаларыны рәдд етди. Мараглыдыр ки, Иса мәһз Јеһованын ады чәкилән ајәләри ситат ҝәтирди (Ган. 6:16; 8:3). Оғул Атанын адыны чәкир. Бу, Оғулун Атасына етибар етдијини ҝөстәрән ән ҝүҹлү сүбутдур. Чүнки Јеһова ады Аллаһын бүтүн вәдләрини јеринә јетирәҹәјинә зәманәтдир *.

6, 7. Шејтанын алтдан-алтдан гурдуғу фәндләрә ујмамаг үчүн нә етмәлијик?

⁶ Шејтанын алтдан-алтдан гурдуғу фәндләрә ујмамаг бизим өз әлимиздәдир. Әҝәр Јеһованын Кәламына етибар етсәк, Онун адынын мәнасы барәдә дүшүнсәк, буна мүвәффәг олаҹағыг. Мүгәддәс Китабдан Јеһованын мөмин, әләлхүсус да пәришан бәндәләринә мәһәббәт бәсләдијини, гајғы ҝөстәрдијини охујанда буну өзүмүзә дә аид етмәлијик ки, Шејтанын јаланына алданмајаг. Ахы о, бизә јеритмәјә чалышыр ки, Јеһова бизим кими адамы һеч вахт севмәз, биздән һеч вахт разы галмаз (Зәб. 34:18; 1 Бут. 5:8). Һәмчинин Јеһованын һәмишә Өз адынын мәнасыны доғрултдуғуну јадымызда сахласаг, вәдләрини ҝерчәкләшдирән Јараданымызын етибарлы олдуғуна шүбһә етмәјәҹәјик (Мәс. 3:5, 6).

 ⁷ Бәс Шејтанын әсас мәгсәди нәдир? Әслиндә, о нәјә наил олмаг истәјир? Үчүнҹү сынаг вахты онун Исаја дедији сөзләрдән бу суалларын ҹавабы ајдын олур.

8. Үчүнҹү сынаг вахты Шејтан әсл мәгсәдини неҹә үзә чыхарды?

⁸ Мәтта 4:8—11 ајәләрини охујун. Үчүнҹү дәфә Исаны сынаға чәкәндә Шејтан ејһамлы сөзләри кәнара гојуб әсл мәгсәдини үзә чыхарды. О, еһтимал ки, ҝөрүнтүдә Исаја «дүнјанын бүтүн сәлтәнәтләрини вә онларын ҹалалыны» ҝөстәрди, ијрәнҹликләрини исә, тәбии ки, өрт-басдыр етди. Сонра деди: «Әҝәр диз чөкүб мәнә сәҹдә гылсан, бүтүн бунлары сәнә верәрәм» *. Сәҹдә! Будур Шејтанын мәгсәди. Иблис истәјирди ки, Иса Атасындан үз дөндәриб ону өзүнә аллаһ билсин. Илк бахышдан елә ҝөрүнә биләрди ки, о, Исаја раһат һәјат тәклиф едир. Санки дејирди: «Дүнја үзәриндә һакимијјәтә саһиб олаҹагсан, дүнјанын бүтүн вар-дөвләти сәнин олаҹаг, нәјә ҝөрә әзаб чәкәсән, башына тикандан чәләнҝ гојулсун, гамчыланасан, нәјә ҝөрә ишҝәнҹә дирәјиндә едам олунасан». Шејтанын бу тәклифи бош сөзләр дејилди. Иса да онун дүнја һөкумәтләри үзәриндә аға олдуғуну инкар етмәди (Јәһ. 12:31; 1 Јәһ. 5:19). Шејтан Исаја һәр шеј верәрди, тәки о, Атасына хәјанәт едиб пак ибадәтдән дөнсүн.

9. а) Аллаһын мөмин бәндәләри илә бағлы Шејтанын мәгсәди нәдир вә Шејтан онлары нә илә ширникдирмәјә чалышыр? б) Ибадәт өзүнә нәји дахил едир? («Ибадәт нәдир?» адлы чәрчивәјә бахын.)

 ⁹ Шејтанын бу ҝүн дә истәји одур ки, биз бирбаша вә ја долајысы илә она ибадәт едәк. Шејтан «бу дөврүн аллаһы» олдуғу үчүн Бөјүк Бабилә дахил олан динләрдә иҹра едилән ибадәтин сон нөгтәси онда дајаныр (2 Кор. 4:4). Анҹаг милјардларла инсанын јалан динләрә етигад етмәси она азлыг едир, о, Јеһованын мөмин бәндәләрини дә һагг јолдан дөндәрмәк истәјир. О истәјир ки, бизи вар-дөвләтлә, вәзифә илә ширникдириб мәсиһилик јолундан, бәзән, «салеһлик уғрунда» әзаб чәкдијимиз пак јолдан узаглашдырсын (1 Бут. 3:14). Әҝәр биз Шејтана ујуб пак ибадәт јолуну тәрк етсәк, Шејтан дүнјасына гајнајыб-гарышсаг, маһијјәт етибары илә, Шејтана сәҹдә гылмыш, ону өзүмүзә аллаһ сечмиш оларыг. Бәс нә едә биләрик ки, бу, баш вермәсин?

10. Иса үчүнҹү сынаг вахты нә етди вә нәјә ҝөрә мәһз белә давранды?

¹⁰ Ҝөрәк үчүнҹү сынаг вахты Иса Шејтана неҹә ҹаваб верди. О: «Рәдд ол, Шејтан!» — дејиб дәрһал ону говду вә бунунла Јеһоваја сәдагәтинин сонсуз олдуғуну ҝөстәрди. Әввәлки ики сынагда олдуғу кими Иса «Ганунун тәкрары» китабындан Аллаһын ады чәкилән бир ајәни ситат ҝәтирди: «Јазылыб: “Аллаһын Јеһоваја сәҹдә гыл вә јалныз Она гуллуг ет”» (Мәт. 4:10; Ган. 6:13). Беләликлә, Иса Шејтанын јүксәк мәнсәб, әзабсыз, раһат һәјат тәклифинә ујмады. О билирди ки, бу ҹүр һәјат чох сүрмәјәҹәк. Бундан әлавә, баша дүшүрдү ки, јалныз Атасы ибадәтә лајигдир вә бирҹә дәфә белә, Шејтана сәҹдә гылса, онун табелијинә дүшәҹәк. Иса мәтин галды, онун аллаһы олмаг севдасына дүшән Иблисин арзусуну ҝөзүндә гојду. Шејтан рәдд едилдијини ҝөрүб «ондан әл чәкди» *.

11. Биз Шејтана вә онун сынагларына гаршы дурмаг үчүн нә етмәлијик?

¹¹ Биз дә Шејтанын вә бу шәр дүнјанын сынағындан алныачыг чыха биләрик, чүнки Иса кими, бизим дә ихтијарымыз өз әлимиздәдир. Јеһова бизә ирадә азадлығы кими гијмәтли бир немәт бәхш едиб. Буна ҝөрә дә, һеч кәс, һәтта гүдрәтли руһани варлыг олан Иблис белә, бизи пак ибадәтдән дөнмәјә мәҹбур едә билмәз. Биз Јеһоваја садиг галыб ҝүҹлү иманла Шејтана мүгавимәт ҝөстәрәндә она, санки: «Рәдд ол!» — дејирик (1 Бут. 5:9). Унутмајын, Иса гәтијјәтлә Шејтаны рәдд едәндән сонра о, чыхыб ҝетди. Мүгәддәс Китаб бизи әмин едир: «Иблисә мүгавимәт ҝөстәрин вә о, сиздән гачаҹаг» (Јаг. 4:7).

12. Шејтан пак ибадәтин дүшмәни олдуғуну Әдән бағында неҹә ҝөстәрмишди?

¹² Үчүнҹү сынаг вахты Шејтан пак ибадәтин әзәли дүшмәни олдуғуну ачыг-ајдын ҝөстәрди. Шејтанын пак ибадәтә нифрәти илк дәфә минилликләр өнҹә Әдән бағында өзүнү бүрузә вермишди. О, Һәвваны јолдан чыхармышды, Һәвва да Адәми Јеһованын әмриндән чыхмаға тәһрик етмишди. Беләликлә, онлар Шејтанын һакимијјәти вә тәсири алтына дүшмүшдүләр. (Јарадылыш 3:1—5 ајәләрини охујун; 2 Кор. 11:3; Вәһј 12:9.) Бунунла да, Шејтан онларын  аллаһы олмушду. Адәмлә Һәвва әслиндә онлары јолдан чыхаранын ким олдуғуну билмәсә дә, Шејтана ибадәт етмиш олдулар. Үстәлик, Әдән бағында үсјан галдырмагла Шејтан тәкҹә Јеһованын али һакимијјәтини, јәни һакимијјәт сүрмәк һүгугуну суал алтына алмады, һәмчинин пак ибадәтә һүҹум етди.

13. Һакимијјәт мәсәләси пак ибадәтлә неҹә бағлыдыр?

¹³ Һакимијјәт мәсәләси пак ибадәтлә зәнҹирвари бағлыдыр. Ибадәтә тәкҹә јерин-ҝөјүн Һөкмдары, «һәр шејин јараданы» Јеһова Аллаһ лајигдир (Вәһј 4:11). Јеһова камил инсанлары, Адәмлә Һәвваны јарадыб Әдән бағында мәскун едәндә нијјәт етмишди ки, јер үзү әввәл-ахыр камил инсанларла долсун вә онлар көнүл хошлуғу илә Она ибадәт етсинләр. Бир сөзлә, пак гәлбләрдән ҝәлән пак ибадәт бүтүн дүнјаны бүрүсүн (Јар. 1:28). Шејтан јалныз Күлли-Ихтијар Јеһоваја мәхсус олан шејә, јәни ибадәтә ҝөз дикдији үчүн Јеһованын һакимијјәтини суал алтына алды (Јаг. 1:14, 15).

14. Шејтанын пак ибадәтә һүҹуму нә дәрәҹәдә уғурлу олду?

 ¹⁴ Шејтанын пак ибадәтә һүҹуму нә дәрәҹәдә уғурлу олду? О, Адәмлә Һәвваны Аллаһдан узаглашдырмаға мүвәффәг олду. О вахтдан бәри Шејтан һәгиги ибадәтлә мүбаризә апарыр, мүмкүн гәдәр чох инсаны Јеһова Аллаһдан узаглашдырмаға чалышыр. Шејтан мәсиһиликдән өнҹә јашамыш мөмин бәндәләри Јеһованын јолундан дөндәрмәк үчүн әлиндән ҝәләни едирди. Ерамызын биринҹи әсриндә о, мәсиһи јығынҹағында дөнүклүјүн баш галдырмасына баис олду. Нәтиҹәдә, мәсиһи јығынҹағы һагг јолдан азды вә пак ибадәтә, санки, сон гојулду (Мәт. 13:24—30, 36—43; Һәв. 20:29, 30). Икинҹи әсрдән башлајараг Јеһоваја ибадәт едәнләр бүтүн сахта динләрин мәҹмусу олан Бөјүк Бабилин әсарәтинә дүшдүләр вә узун мүддәт бу руһани әсарәтдә галдылар. Лакин Шејтан Аллаһын пак ибадәтлә бағлы нијјәтини позмаға мүвәффәг ола билмәди. Аллаһа Өз нијјәтини јеринә јетирмәјә һеч ким вә һеч нә мане ола билмәз (Әшј. 46:10; 55:8—11). Бу, билаваситә  Онун ады илә бағлыдыр вә О, һәмишә Өз адыны доғрулдур. Јеһова дедијини едән Аллаһдыр!

15. Јеһова Әдән бағында үсјанкарлара гаршы һансы өлчүнү ҝөтүрдү вә нијјәтинин һәјата кечмәси үчүн нә тәдбир ҝөрдү?

¹⁵ Јеһова Әдән бағында дәрһал үсјанкарлара гаршы өлчү ҝөтүрдү вә Өз нијјәтинин һәјата кечмәси үчүн тәдбир ҝөрдү. (Јарадылыш 3:14—19 ајәләрини охујун.) Адәмлә Һәвва һәлә бағда икән Јеһова бу үч үсјанкара һөкм кәсди. Әввәлҹә биринҹи ҝүнаһ едән Шејтана, сонра икинҹи олараг ҝүнаһ јолуна гәдәм гојан Һәвваја, ән ахырда исә Адәмә һөкм кәсди. Үсјанын ҝөзәҝөрүнмәз сәбәбкары олан Шејтана үнванладығы сөзләрдә Јеһова «өвладын» пејда олаҹағыны вә бу «өвладын» үсјанын аҹы нәтиҹәләрини арадан галдыраҹағыны сөјләди. Вәд олунмуш «өвлад» Јеһованын пак ибадәтлә бағлы нијјәтинин һәјата кечмәсиндә һәлледиҹи рол ојнајаҹаг.

16. Әдән бағындакы үсјандан сонра Јеһова нијјәтини јеринә јетирмәк үчүн нә етди?

¹⁶ Әдәндәки үсјандан сонра да Јеһова нијјәтинин јеринә јетмәси үчүн чалышды. О, гејри-камил инсанларын дүзҝүн шәкилдә ибадәт етмәси үчүн тәдбир ҝөрдү (Ибр. 11:4—12:1). Бу барәдә нөвбәти фәсилдә данышаҹағыг. Јеһова һәмчинин Мүгәддәс Китабы гәләмә алан пејғәмбәрләрә, мәсәлән, Әшијаја, Әрәмјаја, Һизгијала пак ибадәтин дирчәлмәси илә бағлы мөһтәшәм пејғәмбәрликләри јаздырды. Бу дирчәлиш Мүгәддәс Китабда гәләмә алынан мүһүм мөвзулардан биридир. Бу пејғәмбәрликләрин һамысыны вәд олунмуш «өвлад» чин едәҹәкди. Һәмин «өвлад» биринҹи нөвбәдә Иса Мәсиһ олду (Гал. 3:16). Үчүнҹү сынаг вахты Шејтана вердији ҹавабдан ајдын олур ки, Иса Мәсиһ пак ибадәтин мүһафизидир. Бәли, Јеһова дирчәлишлә  бағлы пејғәмбәрликләри јеринә јетирмәк үчүн мәһз Иса Мәсиһи сечиб (2 Кор. 1:20; Вәһј 19:10). О, Аллаһын халгыны руһани әсарәтдән хилас едәҹәк вә пак ибадәти бәрпа едәҹәкди.

17. Пак ибадәтин дирчәлиши илә бағлы пејғәмбәрликләр нәјә ҝөрә үрәјимизи исиндирир?

¹⁷ Мүгәддәс Китабда пак ибадәтлә бағлы пејғәмбәрликләри арашдырмаг инсанын иманыны мөһкәмләндирир. Бу пејғәмбәрликләр бизим үрәјимизи исиндирир, чүнки биз јердә вә ҝөјдә олан варлыгларын Күлли-Ихтијар Јеһоваја вәһдәт ичиндә, пак шәкилдә ибадәт едәҹәји вахты сәбирсизликлә ҝөзләјирик. Һәмчинин бу пејғәмбәрликләр үмидимизи мөһкәмләндирир. Чүнки онларда гәлбимизи ҹуша ҝәтирән вәдләр јер алыр. Һансымыз Јеһованын вәдләринин ҝерчәкләшәҹәји дөвраны сәбирсизликлә ҝөзләмирик? Вәфат етмиш доғмаларымызын дирилмәсини, јер үзүнүн ҹәннәтә чеврилмәсини, там сағлам шәкилдә әбәди јашамағы һансымыз арзуламырыг? (Әшј. 33:24; 35:5, 6; Вәһј 20:12, 13; 21:3, 4).

18. Бу нәшрдә һансы мөвзу арашдырылыр?

¹⁸ Бу нәшрдә «Һизгијал» китабындакы мөһтәшәм пејғәмбәрликләр арашдырылыр. Бу пејғәмбәрликләрин чоху пак ибадәтин дирчәлиши һаггындадыр. Һәмчинин «Һизгијал» китабындакы пејғәмбәрликләрин диҝәр пејғәмбәрликләрлә неҹә әлагәли олдуғу, Мәсиһ васитәсилә неҹә јеринә јетәҹәји вә бизә һансы аидијјәти олдуғу нәзәрдән кечирилир. («“Һизгијал” китабынын иҹмалы» адлы чәрчивәјә бахын.)

19. Сиз нә етмәк әзминдәсиниз вә нә үчүн?

¹⁹ Ерамызын 29-ҹу илиндә Јәһудијјә чөллүјүндә Шејтан Исаны пак ибадәтдән дөндәрмәјә мүвәффәг олмады. Бу ҝүн Шејтан вар-ҝүҹү илә бизи дә һагг јолдан сапдырмаға чалышыр (Вәһј 12:12, 17). Гој бу нәшр бизи Иблислә мүбаризәдә даһа да әзмли етсин. Гој сөзләримиз вә һәрәкәтләримиз ҝөстәрсин ки, «Аллаһын Јеһоваја сәҹдә гыл» сөзләри үрәјимизә һәкк олунуб. Белә олдугда биз Јеһованын мөһтәшәм нијјәтинин һәјата кечәҹәји ҝүнү өз ҝөзләримизлә ҝөрәҹәјик. О ҝүнү ки, ҝөјдә вә јердә олан һәр кәс вәһдәт ичиндә, пак гәлбдән, пак шәкилдә Јеһоваја ибадәт едәҹәк. Бәли, Јеһова Аллаһ мәһз белә ибадәтә лајигдир!