ЈУИЛ 3:18. Пејғәмбәрликдә ҝөстәрилир ки, Јеһованын мәбәдиндән чешмә чыхыр. О, гуру Акасија вадисини суварыр. Һәм Јуил, һәм дә Һизгијал чајын гураг јери ҹанландырдығыны дејир. Һәр ики һалда чај Јеһованын евиндән, јәни мәбәддән чыхыр.

ЗӘКӘРИЈЈӘ 14:8. Зәкәријјә пејғәмбәр ҝөрмүшдү ки, Јерусәлим шәһәриндән дирилик сулары ахыр. Сујун јарысы шәрг дәнизинә, јәни Өлү дәнизә, јарысы исә гәрб дәнизинә, јәни Аралыг дәнизинә төкүлүр. Јерусәлим бөјүк Падшаһын, Јеһова Аллаһын шәһәридир (Мәт. 5:35). Буна ҝөрә дә Зәкәријјәнин һәмин шәһәр барәдә данышмасы бизә ҝәләҹәкдә Јеһованын бүтүн дүнја үзәриндә һөкмранлыг едәҹәјини хатырладыр. Биз әввәлләр белә баша дүшүрдүк ки, бу пејғәмбәрликдәки сулар Јеһованын ики груп садиг инсана, бөјүк мүсибәтдән сағ чыхыб Ҹәннәтдә јашајан инсанлара вә сонрадан дирилән инсанлара верәҹәји немәтләри тәмсил едир.

ВӘҺЈ 22:1, 2. Һәвари Јәһја Һизгијалын ҝөрдүјү чаја бәнзәр чај ҝөрмүшдү. Анҹаг бу чај мәбәддән јох, Јеһованын тахтындан чыхырды. Демәли, бу ҝөрүнтү Зәкәријјәнин ҝөрдүјү ҝөрүнтү кими, мин ил әрзиндә Аллаһын һакимијјәтинин верәҹәји немәтләри вурғулајыр.

Сөзсүз ки, Јеһованын һакимијјәтинин бәхш етдији немәтләр вә Һизгијалын ҝөрүнтүдә ҝөрдүјү чајла тәмсил олунан немәтләр арасындакы фәрг чох ҹүзидир. Бу немәтләрин һамысынын мәнбәји Јеһовадыр вә онлар бүтүн садиг инсанлара вериләҹәк.

ЗӘБУР 46:4. Тәкҹә бу ајә һәр ики ҹәһәти — ибадәти вә һакимијјәти еһтива едир. Бу ајәдә чај Аллаһын шәһәринә, јәни Аллаһын Падшаһлығы вә һакимијјәтинә, һәмчинин Һагг-Тааланын мөһтәшәм, Мүгәддәс чадырына, јәни пак ибадәтә севинҹ ҝәтирир.

Үмумиликдә ҝөтүрәндә бу парчалар бизи әмин едир ки, Јеһова садиг инсанлара ики јолла немәт верәҹәк. Биз әввәла, әбәди олараг Онун һакимијјәтиндән, икинҹиси исә пак ибадәт үчүн тәсис етдији гурулушдан фајдаланаҹағыг. Буна ҝөрә дә ҝәлин Јеһова Аллаһдан вә Онун Оғлундан дирилик сујуну — әбәди јашамаг үчүн тәшкил олунан немәтләри алмаға давам едәк (Әрм. 2:13; Јәһ. 4:10).