1—3. Һизгијалын үрәји нәјә ҝөрә ган ағлајыр вә она һансы пејғәмбәрлик назил олур?

 ҺИЗГИЈАЛ ПЕЈҒӘМБӘР артыг алты илдир ки сүрҝүн һәјаты јашајыр *. Јәһуда падшаһлығынын аҹынаҹаглы вәзијјәтини, јүзләрлә километр аралыда јерләшән доғма вәтәнинин мискин һалыны дүшүнәндә онун үрәји ган ағлајыр. Пејғәмбәр нечә-нечә падшаһын тахта чыхдығыны, тахтдан салындығыны ҝөрүб.

² Һизгијал доғуланда садиг падшаһ Јушијјә хејли вахт иди һакимијјәтдә иди. Јәгин Һизгијал онун өлкәни ојма бүтләрдән тәмизләдији, Јәһудада пак ибадәти дирчәлтмәк үчүн ҝөрдүјү ишләр барәдә ешидәндә чох севинмишди (2 Салн. 34:1—8). Тәәссүф ки, Јушијјәнин әлдә етдији наилијјәтләрин өмрү гыса олду. Ондан сонра ҝәлән падшаһларын әксәријјәти бүтпәрәстлијә гајытдылар. Тәәҹҹүблү дејил ки, бу ҹүр мәнфур падшаһларын һакимијјәти алтында олан халг да ҝет-ҝедә руһани вә әхлаги батаглыға гәрг олду. Бәс бу о демәк иди ки, вәзијјәт дүзәлән дејил? Әсла!

³ Јеһова Аллаһ садиг пејғәмбәринә Мәсиһлә бағлы бир пејғәмбәрлик назил етди. Ҝәләҹәкдә Рәһбәр олаҹаг Мәсиһ пак  ибадәти һәмишәлик дирчәлдәҹәк вә бир Чобан кими нәвазишлә Јеһованын сүрүсүнүн гајғысына галаҹаг. Јеһова Һизгијала Мәсиһлә бағлы башга пејғәмбәрликләр дә назил етди. Бу пејғәмбәрликләри диггәтлә арашдырмаг ваҹибдир, чүнки онлар бизим әбәди ҝәләҹәјимизлә бирбаша әлагәлидир. Одур ки, ҝәлин «Һизгијал» китабында Мәсиһлә бағлы јазылмыш дөрд пејғәмбәрлији арашдыраг.

4. Һизгијал һансы пејғәмбәрлији сөјләјир вә Јеһова бу пејғәмбәрликдән әввәл нә дејир?

⁴ Ерамыздан әввәл тәхминән 612-ҹи илдә Һизгијал пејғәмбәрә «Јеһованын сөзү назил олду» вә о, бир пејғәмбәрлик сөјләди. Бу пејғәмбәрлик Мәсиһин һакимијјәтинин әзәмәтини вә онун Падшаһлығына ҝүвәнмәјин ваҹиблијини ҝөстәрир. Бу пејғәмбәрлији назил етмәздән әввәл Јеһова Һизгијала бујурду ки, халга пејғәмбәрлик мәнасы дашыјан бир тапмаҹа десин. Бу тапмаҹа Јәһуда рәһбәрләринин хәјанәтини ҝөстәрир вә Аллаһын тәјин едәҹәји салеһ Рәһбәрә нә дәрәҹәдә еһтијаҹ олдуғуну вурғулајыр (Һизг. 17:1, 2).

5. Тапмаҹанын мөвзусу нәдир?

⁵ Һизгијал 17:3—10 ајәләрини охујун. Тапмаҹанын мөвзусу будур: «Бөјүк бир гартал» сидр ағаҹынын лап јухарысындакы зоғу гопарыб «таҹирләр шәһәриндә» әкир. Сонра «о дијардакы тохумдан ҝөтүрүб» «бол сулу һөвзәнин кәнарында» мүнбит торпаглы саһәјә әкир. Тохум ҹүҹәриб гол-будаг атыр, «мејнәјә» чеврилир. Сонра «башга бир бөјүк гартал» ҝәлир. Мејнә бөјүк һәвәслә көкләрини бу гартала тәрәф узадыр ки, гартал ону башга бол сулу јердә әксин. Јеһова бу һәрәкәтинә ҝөрә мејнәни гынајыр вә билдирир ки, ону көкүндән гопараҹаглар, о, гупгуру гурујаҹаг.

6. Тапмаҹанын мәнасы нәдир?

⁶ Бәс бу тапмаҹанын мәнасы нәдир? (Һизгијал 17:11—15 ајәләрини охујун.) Е. ә. 617-ҹи илдә Бабил падшаһы Навуходоносор, јәни биринҹи бөјүк гартал Јерусәлими мүһасирәјә алды. О, Јәһуда падшаһы Јәһјакини, ағаҹын «лап јухарысындакы зоғу» тахтындан «гопарыб» Бабилә, таҹирләр шәһәринә апарды. Навуходоносор Јерусәлимдәки тахта Сидгијјәни, «о дијардакы тохумдан» бирини гојду. Навуходоносор Јәһуданын јени падшаһыны Аллаһа анд вердирди ки, онун табелијиндән чыхмајаҹаг (2 Салн. 36:13). Лакин Сидгијјә анда хор бахды. О, Бабилә үсјан едиб Мисир падшаһы фирондан, икинҹи бөјүк гарталдан һәрби көмәк истәди. Анҹаг бунун һеч бир хејри олмады. Јеһова андына нахәләф чыхан Сидгијјәни хәјанәтинә ҝөрә мүһакимә етди (Һизг. 17:16—21). Сидгијјә тахтдан салынды вә Бабилдә зинданда өлдү (Әрм. 52:6—11).

7. Тапмаҹадан өзүмүзә һансы дәрси ҝөтүрүрүк?

⁷ Бу тапмаҹадан өзүмүзә һансы дәрси ҝөтүрүрүк? Әввәла, Аллаһа пак шәкилдә ибадәт едән бизләр сөзүмүзүн ағасы  олмалыјыг. Иса Мәсиһ демишди ки, «гој “бәли”низ бәли олсун, “хејр” сөзүнүз хејр олсун» (Мәт. 5:37). Әҝәр вәзијјәт тәләб едәрсә, мәсәлән, мәһкәмәдә шаһидлик едәркән Аллаһын гаршысында һәгигәти сөјләјәҹәјимизә анд ичмәли олсаг, андымыза ҹидди јанашмалыјыг. Икинҹиси, кимә ҝүвәндијимизә фикир вермәлијик. Мүгәддәс Китаб бизә хәбәрдарлыг едир: «Әсилзадәләрә, гуртулуш верә билмәјән бәшәр оғлуна ҝүвәнмәјин» (Зәб. 146:3).

8—10. Јеһова сечәҹәји Падшаһы неҹә тәсвир етди вә бу пејғәмбәрлик неҹә јеринә јетир? (Һәмчинин «Һөкмдар Мәсиһлә бағлы пејғәмбәрлик.  Мөһтәшәм сидр ағаҹы» адлы чәрчивәјә бахын.)

⁸ Лакин бир рәһбәр вар ки, она там ҝүвәнә, там етибар едә биләрик. Зоғла бағлы тапмаҹаны дејәндән сонра Јеһова ејни поетик образлардан истифадә едәрәк ҝәләҹәкдә сечәҹәји Рәһбәри тәсвир етди.

⁹ Пејғәмбәрлијин мөвзусу. (Һизгијал 17:22—24 ајәләрини охујун.) Бу дәфә бөјүк гарталлар јох, Јеһова Өзү һәрәкәтә кечәҹәк. О, «һүндүр сидр ағаҹынын тәпәсиндән» «зәриф зоғ» гыраҹаг вә ҝәтириб «һүндүр, әзәмәтли дағда» әкәҹәк. Бу «зоғ» гол-будаг атыб «мөһтәшәм сидр ағаҹына чевриләҹәк». «Бүтүн гушлар она сығынаҹаг». «Онда бүтүн мешә ағаҹлары биләҹәк ки», бу ағаҹы белә мөһтәшәм едән Јеһовадыр.

¹⁰ Пејғәмбәрлијин јеринә јетмәси. Јеһова Аллаһ Оғлу Иса Мәсиһи Давуд сүлаләсиндән, һүндүр сидр ағаҹындан гырыб сәмави Сион дағында, «һүндүр, әзәмәтли дағда» «әкди» (Зәб. 2:6; Әрм. 23:5; Вәһј 14:1). Беләликлә, Јеһова дүшмәнләринин ҝөзүндә ән ашағы инсан олан Оғлуна атасы Давудун тахтыны верәрәк ону уҹалтды (Дән. 4:17; Лука 1:32, 33). Мөһтәшәм сидр ағаҹы кими, Падшаһ Иса Мәсиһ дә бүтүн Јер күрәси үзәриндә уҹалаҹаг вә бүтүн тәбәәләри үчүн бәрәкәт чешмәси олаҹаг. Бәли, бу Рәһбәрә там етибар едә биләрик. Исанын һакимијјәтинин көлҝәсиндә бүтүн дүнјадакы итаәткар инсанлар «әмин-аманлыгда јашајаҹаг, фәлакәт горхусу билмәјәҹәк» (Мәс. 1:33).

11. «Мөһтәшәм сидр ағаҹына» чеврилән «зәриф зоғ» һаггындакы пејғәмбәрлик һансы суала ҹаваб верир?

¹¹ Пејғәмбәрликдән нә өјрәнирик? «Мөһтәшәм сидр ағаҹына» чеврилән «зәриф зоғ» һаггындакы пејғәмбәрлик мүһүм бир суала ҹаваб верир: Биз үмидимизи кимә бағламалыјыг? Инсанларын гурдуғу һөкумәтләрә, онларын һәрби гүввәсинә ҝүвәнмәк ағылсызлыгдыр. Әсл әмин-аманлығы тапмаг үчүн пәнаһымыз, ҝүвәнҹ јеримиз Аллаһын сечдији Падшаһ Иса Мәсиһ олмалыдыр. Онун мәһарәтлә идарә етдији сәмави һөкумәт бәшәријјәтин јеҝанә үмид јеридир (Вәһј 11:15).

12. Јеһова Давудла бағладығы әһди позмадығыны неҹә ҝөстәрди?

¹² Ики гартал барәдә тапмаҹанын изаһындан Һизгијал баша дүшдү ки, Давудун сүлаләсиндән олан хәјанәткар Сидгијјә  тахтдан салынаҹаг вә Бабилә әсир апарылаҹаг. Јәгин пејғәмбәри бу суал нараһат едирди: «Бәс Аллаһын Давудла бағладығы әһд неҹә олаҹаг? Ахы бу әһдә әсасән, Давуд сүлаләсиндән олан падшаһ әбәдијјән һакимијјәт сүрмәли иди?» (2 Ишм. 7:12, 16). Анҹаг Һизгијалын нараһатчылығы узун сүрмәди, тезликлә о, суалына ҹаваб тапды. Е. ә. тәхминән 611-ҹи илдә, сүрҝүнүн једдинҹи илиндә, Сидгијјә һәлә Јәһудада һакимијјәтдә икән Һизгијала «Јеһованын сөзү назил олду» (Һизг. 20:2). Јеһованын бујруғу илә о, ҝәләҹәк Падшаһла бағлы даһа бир пејғәмбәрлик сөјләди. Бу пејғәмбәрликдән ајдын олду ки, Аллаһ Давудла бағладығы әһди позмајыб, әксинә, ҝәләҹәк Рәһбәр Давудун вариси олараг һакимијјәтин гануни саһиби олаҹаг.

13, 14. Һизгијал 21:25—27 ајәләриндәки пејғәмбәрлијин мөвзусу нәдир вә бу пејғәмбәрлик неҹә јеринә јетди?

¹³ Пејғәмбәрлијин мөвзусу. (Һизгијал 21:25—27 ајәләрини охујун.) Јеһова Һизгијал васитәсилә Исраилин мәнфур рәһбәринә мүраҹиәт едир. Онун ҹәза вахты артыг јетишиб. Јеһова бу мәнфур рәһбәрә сөјләјир ки, һакимијјәт рәмзи олан чалмасы, таҹы ондан алынаҹаг. Алчагда олан һакимијјәтләр јүксәләҹәк,  јүксәкдә оланлар алчалаҹаг. Јүксәлән һакимијјәтләр идарә етмәјә давам едәҹәк, амма «гануни саһиби ҝәләнәдәк». О ҝәләндә Јеһова Падшаһлығы она верәҹәк.

¹⁴ Пејғәмбәрлијин јеринә јетмәси. Е. ә. 607-ҹи илдә бабиллиләр Јерусәлими дармадағын етдиләр, Сидгијјә падшаһы тахтдан салыб әсир апардылар. Бунунла да «јүксәкдә» олан, јәни идарәчилик мәркәзи Јерусәлимдә олан Јәһуда падшаһлығы алчалдылды. Артыг Јерусәлимдә Давуд сүлаләсиндән олан падшаһ идарә етмирди. Беләҹә, алчагда оланлар, јәни јаделли һөкмдарлар јүксәлди. Артыг јер үзүндә һакимијјәт онларын әлинә кечди, лакин бу, мүәјјән мүддәт давам етди. «Халглара верилән вахт» 1914-ҹү илдә, Јеһова Падшаһлығы Иса Мәсиһә верәндә сона јетди (Лука 21:24). Давуд падшаһын нәслиндән олдуғу үчүн Исанын Аллаһын гурдуғу Падшаһлыға гануни ихтијары чатырды * (Јар. 49:10). Беләликлә, Јеһова Давуда вердији вәди јеринә јетирди, Иса Мәсиһи Давудун даими вариси едиб она әбәди Падшаһлыг верди (Лука 1:32, 33).

15. Нәјә ҝөрә Падшаһ Мәсиһә там етибар едә биләрик?

 ¹⁵ Пејғәмбәрликдән нә өјрәнирик? Биз бу Падшаһа, Иса Мәсиһә там етибар едә биләрик. Чүнки бу дүнјада инсанларын сечдији, јахуд зор ҝүҹүнә һакимијјәти әлә кечирән һөкмдарлардан фәргли олараг, Исаны Јеһова Аллаһ сечиб вә она гануни ихтијары чатан падшаһлығы вериб (Дән. 7:13, 14). Сөзсүз ки, Јеһованын тәјин етдији Падшаһ там етибара лајигдир!

16. Јеһова отлағынын сүрүсүнә неҹә јанашыр вә Һизгијалын дөврүндәки Исраил чобанларынын халгла рәфтары Јеһоваја неҹә тәсир едирди?

¹⁶ Јеһова отлағынын сүрүсүнүн, јер үзүндәки хидмәтчиләринин рифаһыны дүшүнүр (Зәб. 100:3). О, Өз сүрүсүнү чобанлара, јәни сәлаһијјәт вердији инсанлара тапшыранда диггәтлә ҝөз гојур ки, ҝөрсүн онлар бу сүрү илә неҹә рәфтар едирләр. Һизгијалын дөврүндә Исраил рәһбәрләри халга гәддарлыгла, залымлыгла ағалыг едирдиләр. Халг бундан әзаб чәкирди. Беләҹә, чохлары пак ибадәтдән үз дөндәрирди. Тәсәввүр един, бу чобанларын халгла рәфтары Јеһоваја неҹә тәсир едирди (Һизг. 34:1—6).

17. Јеһова сүрүсүнү неҹә хилас етди?

¹⁷ Бәс Јеһова вәзијјәти белә гојаҹагды? О, Исраилин амансыз рәһбәрләринә деди: «Онларла һагг-һесаб чәкәҹәјәм». Сонра вәд етди: «Гојунларымы онларын дишиндән гуртараҹағам» (Һизг. 34:10). Јеһова һәмишә дедијини едир (Јуш. 21:45). Е. ә. 607-ҹи илдә О, бабиллиләрин васитәсилә һәмин худбин чобанлары һакимијјәт башындан гопарараг гојунларыны хилас етди. 70 илдән сонра исә сүрүсүнү Бабил әсарәтиндән хилас етди вә вәтәнләринә гајтарды ки, орада пак ибадәти дирчәлтсинләр. Лакин Јеһованын сүрүсү һәлә дә аҹиз вәзијјәтдә иди. Чүнки онларын үзәриндә һәлә узун илләр дүнјәви һөкумәтләр ағалыг едәҹәкди. «Халглара верилән вахт»ын битмәсинә әсрләр галмышды (Лука 21:24).

18, 19. Һизгијал е. ә. 606-ҹы илдә һансы пејғәмбәрлији сөјләмишди? (Фәслин әввәлиндәки шәклә бахын.)

¹⁸ Е. ә. 606-ҹы ил иди. Јерусәлимин дармадағын едилмәсиндән тәхминән бир ил кечмишди. Исраиллиләрин Бабил әсарәтиндән гуртулмасына исә һәлә онилликләр галмышды. Јеһова Һизгијала бир пејғәмбәрлик назил етди. Бу пејғәмбәрлик Јеһованын Өз сүрүсүнүн әбәди рифаһыны нә гәдәр дәриндән дүшүндүјүнү әкс етдирирди. Пејғәмбәрликдә Аллаһын сечдији Рәһбәрин Онун сүрүсүнү неҹә отараҹағы тәсвир олунуб.

¹⁹ Пејғәмбәрлијин мөвзусу. (Һизгијал 34:22—24 ајәләрини охујун.) Аллаһ «гулум Давуд» адландырдығы бир нәфәри чобан гојаҹаг. «Бир нәфәр» вә «гулум» сөзләринин тәкдә ишләнмәсиндән ҝөрүнүр ки, бу Рәһбәр Давудун нәслиндән олан падшаһлар сүлаләсини бәрпа етмәк үчүн ҝәлмәјәҹәк. О, өзү Давудун јеҝанә даими вариси олаҹаг. О, Аллаһын сүрүсүнү једиздирәҹәк вә «онларын арасында башчы олаҹаг». Јеһова сүрүсү илә «сүлһ әһди» бағлајаҹаг. Онларын башындан јағыштәк бол бәрәкәт төкәҹәк.  Онлар әмин-аманлыгда јашајаҹаг, фираван һәјат сүрәҹәк, барлы-бәһәрли олаҹаглар. Тәкҹә инсанла инсан арасында дејил, инсанларла һејванлар арасында да сүлһ һөкм сүрәҹәк! (Һизг. 34:25—28).

20, 21. а) Аллаһ «гулум Давуд» дејәндә кими нәзәрдә тутурду вә бу пејғәмбәрлик неҹә јеринә јетир? б) Һизгијалын «сүлһ әһди» сөзләри ҝәләҹәкдә неҹә јеринә јетәҹәк?

²⁰ Пејғәмбәрлијин јеринә јетмәси. Јеһова бу Рәһбәри «гулум Давуд» адландырмагла Давудун нәслиндән ҝәлән вә һакимијјәтин гануни саһиби олан Исаја ишарә едирди (Зәб. 89:35, 36). Иса јер үзүндә оланда һәјатыны гојунлары уғрунда фәда едәрәк јахшы чобан олдуғуну ҝөстәрди (Јәһ. 10:14, 15). Амма инди о, ҝөјдә јашајыр (Ибр. 13:20). 1914-ҹү илдә Аллаһ Исаны падшаһ тахтына чыхарды вә она Өзүнүн јер үзүндәки сүрүсүнү отармаг вә бәсләмәк мәсулијјәтини һәвалә етди. Үстүндән чох кечмәмиш, 1919-ҹу илдә бу падшаһ евдәки гуллугчулары — Аллаһын һәм јердә, һәм дә ҝөјдә јашамаға үмид едән садиг хидмәтчиләрини гида илә тәмин етмәк үчүн «садиг вә ағыллы нөкәр» тәјин етди (Мәт. 24:45—47). О вахтдан етибарән садиг нөкәр Мәсиһин рәһбәрлији алтында Аллаһын сүрүсүнү бол руһани гида илә тәмин едир. Бу гида онлара һазырда бәргәрар олан руһани ҹәннәтдә сүлһ вә әмин-аманлыг јаратмаға көмәк едир.

²¹ Бәс Һизгијалын сөјләдији «сүлһ әһди», јағыштәк бол бәрәкәт сөзләри ҝәләҹәкдә неҹә јеринә јетәҹәк? Јени дүнјада јер үзүндә Јеһоваја пак шәкилдә ибадәт едәнләр «сүлһ әһди»нин һасил етдији немәтләри тамлығы илә дадаҹаглар. Јер үзүндәки ҹәннәтдә мүһарибә, ҹинајәт, аҹлыг, хәстәлик, вәһши һејванлар садиг инсанлар үчүн даһа тәһлүкә јаратмајаҹаг (Әшј. 11:6—9; 35:5, 6; 65:21—23). Ҹәннәтдә Аллаһын садиг бәндәләри әбәдијјән «әмин-аманлыгда јашајаҹаглар, онлары горхудуб-һүркүдән олмајаҹаг». Бу чох мөһтәшәм үмиддир! (Һизг. 34:28).

22. Иса сүрүјә неҹә јанашыр вә ағсаггаллар ондан неҹә нүмунә ҝөтүрә биләр?

²² Пејғәмбәрликдән нә өјрәнирик? Иса да Атасы кими сүрүнүн гејдинә галыр. О нәзарәт едир ки, Атасынын сүрүсүнүн руһани гидасы бол олсун вә руһани ҹәннәтдә сүлһ вә әмин-аманлыг һөкм сүрсүн. Бу ҹүр Рәһбәрин гајғысы алтында јашамаг неҹә дә хошдур! Ағсаггаллар да Иса кими сүрүнүн гејдинә галмалыдыр. Онлар көнүл хошлуғу илә, ҹанла-башла сүрүнү отармалы вә диндашларына јахшы нүмунә гојмалыдырлар (1 Бут. 5:2, 3). Ағсаггал Јеһованын сүрүсүндәки һеч бир гузу илә пис рәфтар етмәмәлидир. Һизгијалын дөврүндә Јеһованын амансыз чобанлара нә дедијини унутмајын: «Онларла һагг-һесаб чәкәҹәјәм» (Һизг. 34:10). Сүрүнүн саһиби олан Баш Чобан, еләҹә дә Онун Оғлу ағсаггалларын гојунларла неҹә рәфтар етдијинә диггәтлә фикир верир.

23. Јеһова Исраил халгыны бирләшдирмәклә бағлы һансы вәди верди вә буну неҹә јеринә јетирди?

²³ Јеһова истәјир ки, садиг бәндәләри Она вәһдәт ичиндә ибадәт етсинләр. Дирчәлиш барәдә пејғәмбәрликдә Аллаһ вәд етмишди ки, халгыны — һәм икигәбиләли Јәһуда падшаһлығынын, һәм дә онгәбиләли Исраил падшаһлығынын тәбәәләрини топлајаҹаг, онлары «ваһид халг» едәҹәк, санки ики чубуғу бирләшдириб әлиндә бир чубуг едәҹәк (Һизг. 37:15—23). Јеһова е. ә. 537-ҹи илдә Вәд едилмиш дијарда јенидән ваһид Исраил халгыны јарадараг бу пејғәмбәрлији јеринә јетирди *. Амма бу, ҝәләҹәкдә баш верәҹәк һадисәнин кичик бир нүмунәси иди. Исраили бирләшдирәҹәјини вәд едәндән сонра Јеһова Һизгијала диҝәр бир пејғәмбәрлик назил етди: ҝәләҹәк Рәһбәр бүтүн јер үзүндәки һәгиги ибадәтчиләри әбәдилик бирләшдирәҹәк.

24. Јеһова вәд етдији Рәһбәри неҹә тәсвир едир вә онун һакимијјәти неҹә олаҹаг?

²⁴ Пејғәмбәрлијин мөвзусу. (Һизгијал 37:24—28 ајәләрини охујун.) Јеһова јенә дә сечәҹәји Рәһбәр һаггында «гулум Давуд», «бир чобан», «башчы» кими данышыр. Амма бу дәфә Јеһова ону һәм дә «һөкмдар» адландырыр (Һизг. 37:22). Бу Һөкмдарын һакимијјәти һагда нә демәк олар? Онун һакимијјәти әбәди галаҹаг. «Һәмишәлик», «әбәди» сөзләриндән ҝөрүнүр ки, бу Һөкмдарын һакимијјәтинин ҝәтирдији немәтләрин  сону олмајаҹаг *. Онун һакимијјәти алтында бирлик һөкм сүрәҹәк. Бир Һөкмдарын һакимијјәти алтында садиг тәбәәләр ејни һөкмләрә риајәт едәҹәкләр вә мәмләкәтдә бирлик ичиндә јашајаҹаглар. Онун һакимијјәти тәбәәләрини Јеһова Аллаһа јахынлашдыраҹаг. Јеһова бу Һөкмдарын тәбәәләри илә «сүлһ әһди» бағлајаҹаг. Јеһова онларын Аллаһы олаҹаг, онлар да Онун халгы олаҹаглар. Онун мәбәди һәмишәлик онларын арасында јерләшәҹәк.

25. Аллаһын сечәҹәји Падшаһ һаггындакы пејғәмбәрлик неҹә јеринә јетди?

²⁵ Пејғәмбәрлијин јеринә јетмәси. 1919-ҹу илдә садиг мәсһ олунмуш мәсиһиләр бир чобанын, Падшаһ Иса Мәсиһин һакимијјәти алтында бирләшдиләр. Сонра «һәр халга, һәр тајфаја, һәр үммәтә вә һәр дилә мәнсуб адамлардан ибарәт» бөјүк издиһам мәсһ олунмуш диндашлары илә бирләшди (Вәһј 7:9). Онлар бир чобанын рәһбәрлији алтында «бир сүрү» олдулар (Јәһ. 10:16). Онларын һамысы, һәм ҝөјдә, һәм дә јердә јашамаға үмид едәнләр Јеһованын һөкмләринә итаәт едирләр. Бунун сајәсиндә онлар үмумдүнја гардашлыгда ҹәм олуб руһани ҹәннәтдә јашајырлар. Јеһова онлара сүлһ бәхш едир. Онун пак ибадәти тәмсил едән мәбәди онларын арасындадыр. Јеһова онларын Аллаһыдыр. Онлар да Јеһоваја ибадәт етмәкдән гурур дујурлар.  Бу ибадәтин әбәди сүрәҹәјини дүшүнәндә исә севинҹдән үрәкләри ҹуша ҝәлир!

26. Руһани ҹәннәтдәки бирлијә неҹә төһфә верә биләрик?

²⁶ Пејғәмбәрликдән нә өјрәнирик? Јеһоваја пак шәкилдә ибадәт едән ваһид үмумдүнја гардашлығын үзвү олмаг бизим үчүн бөјүк шәрәфдир. Бу һәм дә бөјүк мәсулијјәтдир. Биз бу бирлијә өз төһфәмизи вермәлијик. Етигадда вә әмәлдә бирлији горумаг үчүн һәр биримиз өз тәрәфимиздән өһдәмизә дүшәни етмәлијик (1 Кор. 1:10). Бунун үчүн исә ејни руһани гиданы иштаһла гәбул етмәли, Мүгәддәс Китабда бујрулан ејни әхлаг гајдаларына риајәт етмәли, ејни ишдә, Падшаһлығын тәблиғи вә шаҝирд һазырламаг ишиндә иштирак етмәлијик. Лакин бирлијин әсл сәбәби мәһәббәтдир. Мәһәббәти үрәјимиздә јетишдирәндә вә әмәлдә ҝөстәрәндә, мәсәлән, шәфгәтли, мәрһәмәтли оланда, башгаларыны бағышлајанда бирлијә төһфә вермиш олуруг. Мүгәддәс Китабда дејилир ки, «мәһәббәт инсанлар арасында камил бирлик јарадыр» (Кол. 3:12—14; 1 Кор. 13:4—7).

27. а) «Һизгијал» китабында Һөкмдар Мәсиһлә бағлы јазылмыш пејғәмбәрликләр сиздә һансы һиссләри доғурур? б) Нөвбәти фәсилдә һансы мөвзу ачыгланыр?

²⁷ Нә јахшы ки, Јеһова сечдији Падшаһ барәдә Һизгијала пејғәмбәрликләр назил етмишди! Бу пејғәмбәрликләри охујанда, онлар барәдә дүшүнәндә әмин олуруг ки, әзиз Һөкмдарымыз Иса Мәсиһ там етибара лајигдир, онун һакимијјәт сүрмәјә гануни ихтијары вар, о, нәвазишлә бизим гејдимизә галыр вә бизи бирләшдирән бағлар онун сајәсиндә һеч вахт гырылмајаҹаг. Һөкмдар Мәсиһин тәбәәси олмаг бөјүк шәрәфдир! Унутмајаг ки, бу пејғәмбәрликләр «Һизгијал» китабынын әһатә етдији дирчәлиш мөвзусунун ајрылмаз һиссәсидир. Јеһова халгыны мәһз Иса Мәсиһин васитәсилә бир јерә јығыр вә онларын васитәсилә пак ибадәти дирчәлдир (Һизг. 20:41). Пак ибадәтин неҹә дирчәлдији вә бунун «Һизгијал» китабында неҹә әкс олундуғу барәдә нөвбәти фәсилләрдән охуја биләрсиниз.