Јеһованы севән әзиз диндашларымыз,

1971-ҹи илдә «Аллаһын ады» адлы вилајәт топлантысында тәгдим олунан јени нәшрләр иштиракчылары вәҹдә ҝәтирмишди. Бу нәшрләр баҹы-гардашларын хәјал етдијиндән гат-гат үстүн иди. Нәшрләрдән бири һагда бир гардаш белә демишди: «Ҝәләҹәкдә бизи ҝөзләјән һадисәләр һәлә һеч бир нәшрдә бу ҹүр валеһедиҹи шәкилдә ишыгландырылмајыб». Јәгин сизә мараглыдыр ки, о, һансы нәшри нәзәрдә тутурду. Бу, «“Халглар биләҹәкләр ки, Мән Јеһовајам”. Неҹә?» адлы китаб иди. Бәс нәјә ҝөрә китаб бу ҹүр әкс-сәда доғурмушду? Чүнки орада «Һизгијал» китабындакы пејғәмбәрликләрин јениләнмиш изаһаты јер алырды. Бу пејғәмбәрликләр исә бүтүн бәшәријјәтин ҝәләҹәји илә бағлыдыр.

«Биләҹәкләр ки, Јеһовајам» китабынын дәрҹ олундуғу вахт Аллаһын халгынын сајы тәхминән 1,5 милјон иди. Бу ҝүн исә бу сај 8 милјону ашыб (Әшј. 60:22). Јеһованын халгы 900-дән чох дилдә данышан инсанлардан ибарәтдир (Зәк. 8:23). Чохларынын Һизгијала назил олан пејғәмбәрликләри тәфәррүаты илә изаһ едән бир нәшри арашдырмаг имканы һеч вахт олмајыб.

Бундан башга 1971-ҹи илдән бу јана руһани ишыг даһа ҝур парладыгҹа Мүгәддәс Китабдакы бир чох һәгигәтләри даһа дәриндән баша дүшмүшүк (Мәс. 4:18). 1985-ҹи илдә биз ајдын шәкилдә анламаға башладыг ки, «башга гојунлар»ын Јеһованын досту гисминдә салеһ сајылмасы нә демәкдир (Јәһ. 10:16; Ром. 5:18; Јаг. 2:23). 1995-ҹи илдә исә илк дәфә олараг баша дүшдүк ки, кимин «гојун», кимин «кечи» олдуғуна даир сон һөкм «бөјүк мүсибәт»дә чыхарылаҹаг (Мәт. 24:21; 25:31, 32). Бу јениликләр «Һизгијал» китабында јазыланлара бахышымыза да тәсир етди.

Сон илләр ишыг ҝурлашмаға давам едир. Мәсәлән, ҝөтүрәк Исанын мәсәлләрини. Бу мәсәлләрин чохуну инди даһа ајдын дәрк едирик. Онлардан бәзиләри сүрәтлә јахынлашан «бөјүк мүсибәт» вахты баш верәҹәк һадисәләрә ишарә едир. Ејнилә, «Һизгијал» китабындакы бәзи пејғәмбәрликләри дә инди даһа јахшы баша дүшүрүк. Мәсәлән, «Мәҹуҹ өлкәсиндән олан Јәҹуҹ»ла (38 вә 39-ҹу фәсил), белиндә гәләм-дават олан адамын ҝөрдүјү ишлә (9-ҹу фәсил), гуру сүмүкләрлә долу дүзәнликлә вә ики чубуғун бирләшмәси илә (37-ҹи фәсил) бағлы пејғәмбәрликләр буна нүмунәдир. Бүтүн бунларын изаһы илләр әввәл «Биләҹәкләр ки, Јеһовајам» китабында јазыланлардан хејли фәргләнир.

Баҹы-гардашларда суал јаранырды ки, Һизгијалын пејғәмбәрликләринә јени изаһат верән китаб нә вахт чыхаҹаг. «Пак ибадәт дирчәлир!» китабы мәһз онларын ҝөзләдији китабдыр. 22 фәсилдән ибарәт бу китабы охудугҹа, орадакы ҝөзәл шәкилләрә бахыб дүшүндүкҹә ҝөрәҹәксиниз ки, китабын һазырланмасы үчүн нә гәдәр арашдырма апарылыб. Јеһованын «Һизгијал» китабыны нә сәбәбә јаздырдығыны баша дүшмәк үчүн чохлу дуа етмишик. Нөвбәти суаллар үзәриндә дүшүнүб-дашынмышыг: «Һизгијал» китабында Һизгијалын дөврүндә јашајанлар үчүн вә бизим үчүн һансы хәбәр вар? Һансы пејғәмбәрликләр ҝәләҹәкдә олаҹаг һадисәләрә аиддир? Һизгијалын пејғәмбәрликләриндәки образлар нәләринсә  тимсалыдырмы? Бу суалларын ҹавабы сајәсиндә Мүгәддәс Китабын севә-севә охудуғунуз бу бөлмәсини ајдын баша дүшәҹәксиниз.

«Һизгијал» китабыны әввәлдән ахыра кими охујанда инсан Јеһованын тәшкилатынын сәмави һиссәсинә валеһ олур. Һәмчинин һәм руһани варлыгларын, һәм дә јердәки бәндәләрин ибадәтинин мәгбул олмасы үчүн Јеһованын гојдуғу али ганунлар барәдә охујанда һејран галырыг. «Пак ибадәт» китабыны мүталиә едәндә Јеһованын Өз халгы үчүн индијә кими етдији вә јахын ҝәләҹәкдә едәҹәји ишләрә ҝөрә гәлбиниз шүкранла долаҹаг. Ҝөрәҹәксиниз ки, бу китабда ики мөвзу дөнә-дөнә вурғуланыр. Биринҹиси, Јеһованы разы салмаг үчүн биз Онун Каинатын Һөкмдары олдуғуну гәбул етмәли вә Она табе олмалыјыг. Икинҹиси, Јеһоваја Онун истәдији кими ибадәт етмәлијик, һәјатымызы Онун али ганунларына ујғун гурмалыјыг.

Арзу едирик ки, бу китаб сизин Јеһоваја дүзҝүн ибадәт етмәк, Онун бөјүк вә мүгәддәс адыны шәрәфләндирмәк гәтијјәтинизи артырсын. Һәмчинин гој бу китаб сизи тәшвиг етсин ки, бүтүн халгларын Јеһованы танымаға мәҹбур олдуғу вахты сәбирлә ҝөзләјәсиниз (Һизг. 36:23; 38:23).

Гој меһрибан Атамыз Јеһова Һизгијал пејғәмбәрә назил етдији китабы баша дүшмәк үчүн сизин зеһнинизи ачыг етсин.