1, 2. Һансы һалда фаһишәлик инсанда хүсусилә икраһ һисси јарадыр?

 КИМИНСӘ фаһишәлик етдијини ҝөрмәк чох кәдәрли һалдыр. Адам фикирләшир ки, ҝөрәсән, ону бу јола дүшмәјә нә вадар едиб? Бәлкә, аиләдәки зоракылыг, тәҹавүз ону ҝәнҹ јашларындан бу ҹүр һәјата сүрүкләјиб. Бәлкә дә, еһтијаҹ уҹбатындан өзүнү сатмаға мәҹбур олуб. Ола билсин, залым һәјат јолдашынын әлиндән гачыб. Бу дүнјада белә кәдәрли һадисәләри тез-тез ешидирик. Буна ҝөрә дә тәәҹҹүблү дејил ки, Иса Мәсиһ бәзи фаһишәләрә мәрһәмәт ҝөстәрмишди. О демишди ки, төвбә едиб јолундан дөнәнләр ҝөзәл һәјата үмид едә биләр (Мәт. 21:28—32; Лука 7:36—50).

² Амма елә гадын да вар ки, һеч бир сәбәб олмадан, өз хошу илә бу јолу сечир. Онун ҝөзүндә фаһишәлик позғунлуг дејил, әксинә, фәхрдир, нүфуз газанмаг имканыдыр, үстәлик, јахшы ҝәлир мәнбәјидир. Ән бетәри исә, јахшы, садиг әри олан гадынын бу јола дүшмәсидир. Белә гадын вә тутдуғу јол инсанда чох бөјүк икраһ һисси јарадыр. Мәһз буна ҝөрә Јеһова  Аллаһ јалан динин Онда јаратдығы һиссләри ифадә етмәк үчүн фаһишә образындан истифадә етмишди.

3. Бу фәсилдә «Һизгијал» китабындакы һансы парчалары нәзәрдән кечирәҹәјик?

³ «Һизгијал» китабындакы ики парчада Јәһуда вә Исраил халгынын дәһшәтли хәјанәтини тәсвир етмәк үчүн фаһишә образындан истифадә олунур (Һизг. 16 вә 23 фәс.). Бу парчалара нәзәр салмаздан әввәл ҝәлин башга бир символик фаһишә һаггында данышаг. Онун фаһишәлији Һизгијалын дөврүндән, һәтта Исраил халгынын мөвҹудлуғундан да әввәл башламышды вә индијә кими давам едир. Бу фаһишәнин кимлији Мүгәддәс Китабын ән ахырынҹы бөлмәси олан «Вәһј»дә ачыгланыр.

4, 5. «Бөјүк Бабил» нәји тәмсил едир вә буну һарадан билирик? (Фәслин әввәлиндәки шәклә бахын.)

⁴ Ерамызын биринҹи әсринин сонунда Исанын һәвари Јәһјаја вердији вәһјдә бир образ хүсусилә габарыр. Бу образ «бөјүк фаһишә» вә ја «фаһишәләрин... анасы Бөјүк Бабил» адланыр (Вәһј 17:1, 5). Әсрләр әрзиндә дин хадимләри вә Мүгәддәс Китаб үзрә мүтәхәссисләр бу образы сирли бир мәфһума чевирмишдиләр. Кимиси онун Бабили, кимиси Рома империјасыны, кимиси дә Рома католик килсәсини тәмсил етдијини дејирди. Амма онилликләрдир ки, Јеһованын Шаһидләри бу «бөјүк фаһишә»нин әслиндә нәји тәмсил етдијини баша дүшүбләр. Бөјүк Бабил дүнјадакы бүтүн јалан динләрин ҹәмини тәмсил едир. Нәјә әсасән бу гәнаәтә ҝәлмишик?

⁵ Бу фаһишә «дүнјанын падшаһлары» илә, јәни сијаси гүввәләрлә зина етмәкдә иттиһам олунур. Демәли, о, сијаси гүввә ола билмәз. Бундан башга «Вәһј» китабындан ҝөрүнүр ки, «дүнјанын таҹирләри», јәни коммерсија системи Бөјүк Бабилин өлүмүнә ҝөрә кәдәрләнир. Демәли, Бөјүк Бабил коммерсија системини дә тәмсил едә билмәз. Бәс јахшы онда о, нәји тәмсил едир? О, ҹиндарлыгда, бүтпәрәстликдә вә халглары јолдан чыхармагда ҝүнаһландырылыр. Мәҝәр бу ҝүнаһлар дүнјадакы јалан динләрдә ачыг-ајдын мүшаһидә олунмур? Һәмчинин диггәт јетирин ки, вәһјдә бу фаһишә дүнјанын сијаси гүввәләринин «белиндә отуруб», башга сөзлә онлар үзәриндә мүәјјән нүфуза саһибдир. О һәмчинин Јеһова Аллаһын садиг хидмәтчиләрини тәгиб едир (Вәһј 17:2, 3; 18:11, 23, 24). Мәҝәр јалан дин индијә кими мәһз бу әмәлләри төрәтмир?

6. Бөјүк Бабил һансы мәнада «фаһишәләрин анасы»дыр?

⁶ Бәс нәјә ҝөрә Бөјүк Бабил һәм «бөјүк фаһишә», һәм дә «фаһишәләрин анасы» адланыр? Јалан дин сонсуз сајда ҹәрәјанлара, тәригәтләрә парчаланыб. Гәдим Бабилдә дилләр гарышандан бәри јалан дини еһкамлар бүтүн дүнјаја јајылыб вә беләликлә, сонсуз сајда динләр әмәлә ҝәлиб. Буна ҝөрә дә бу фаһишәнин  ады јалан динләрин бешији олан Бабил шәһәринин адындан ҝөтүрүлүб вә она «Бөјүк Бабил» ады верилиб (Јар. 11:1—9). Беләликлә, бүтүн јалан динләри бир динин, јәни бөјүк фаһишәнин «гызлары» адландырмаг олар. Шејтан бу динләрдән истифадә едәрәк инсанлары ҹиндарлыг, бүтпәрәстлик вә Аллаһа күфр едән диҝәр инанҹ вә ајинләрин тәләсинә салыр. Бу сәбәбдән Аллаһ халгына бүтүн дүнјаны бүрүјән бу позғун тәшкилат барәдә хәбәрдарлыг едәрәк дејир: «Еј халгым, ондан чыхын ки, онун ҝүнаһларына шәрик олмајасыныз». (Вәһј 18:4, 5 ајәләрини охујун.)

7. Бөјүк Бабилдән чыхмаг чағырышына нәјә ҝөрә ҹидди јанашмалыјыг?

⁷ Бәс сиз бу хәбәрдарлыға диггәт јетирирсиниз? Унутмајын, инсанын үрәјинә Аллаһа еһтијаҹ һиссини гојан Јеһова Өзүдүр (Мәт. 5:3). Инсан јалныз Јеһоваја пак шәкилдә ибадәт едәрсә, бу еһтијаҹ доғру-дүзҝүн өдәнмиш олар. Јеһованын хидмәтчиләри руһани хәјанәтдән узаг дурмаг әзминдәдир. Лакин Шејтан башга мәгсәд ҝүдүр. Онун арзусу Аллаһын халгыны руһани хәјанәтә сүрүкләмәкдир. Бир чох һалларда о, бу арзусуну ҝерчәкләшдирә билиб. Һизгијалын дөврүндә артыг Аллаһын халгынын бир хәјанәткар кими бөјүк тарихчәси вар иди. Бу тарихи арашдырмаг јахшы оларды, чүнки бундан Јеһованын ганунлары, әдаләти вә мәрһәмәти барәдә чох шеј өјрәнә биләрик.

8—10. Пак ибадәтин һансы шәрти јалан динә гарышмағын Јеһовада ојатдығы һиссләри баша дүшмәјә көмәк едир? Нүмунә чәкин.

⁸ «Һизгијал» китабында Јеһова фаһишә образындан Өз һиссләрини ифадә етмәк үчүн истифадә етмишди. О, мүгәддәс руһу илә Һизгијала јаздырдығы ики парчада халгын өз сәдагәтсизлији вә әхлагсызлығы илә Она јашатдығы хәјанәт аҹысыны, гәлб ағрысыны тәсвир етмишди. Бәс нәјә ҝөрә Јеһова мәһз фаһишә образындан истифадә етмишди?

⁹ Бу суала ҹаваб тапмаг үчүн әввәлҹә пак ибадәтин ваҹиб шәртләриндән бирини јадымыза салмалыјыг. Бу барәдә бу нәшрин 5-ҹи фәслиндә мәлумат верилиб. Јеһова Төвратда исраиллиләрә бујурмушду: «Мәндән башга аллаһыныз олмамалыдыр... Мән, Аллаһыныз Јеһова там сәдагәт тәләб едән Аллаһам» (Чых. 20:3, 5). Сонра ејни фикри бу ҹүр вурғуламышды: «Башга аллаһлара сәҹдә етмәјин, чүнки Мән Јеһова там сәдагәт тәләб едән Аллаһам. Бәли, Мән там сәдагәт тәләб едирәм» (Чых. 34:14). Сөзү бундан ајдын даһа неҹә демәк олар? Нә гәдәр ки, инсан Јеһоваја там сәдагәтлә ибадәт етмир, онун ибадәти гәбул олунмајаҹаг.

¹⁰ Мисал үчүн әр-арвад мүнасибәтини ҝөтүрәк. Һәм әрин, һәм дә арвадын гаршы тәрәфдән там сәдагәт тәләб етмәјә ихтијары  вар. Әҝәр тәрәфләрдән бириндә башгасына гаршы романтик һиссләр, јахуд еһтирас ојанарса, диҝәр тәрәф һаглы олараг гысганар вә буну өзүнә гаршы хәјанәт кими гәбул едәр. (Ибраниләрә 13:4 ајәсини охујун.) Ибадәтә ҝәлдикдә дә вәзијјәт ејнидир. Бүтүнлүклә Јеһоваја һәср олунмуш халг јалан аллаһлара үз тутанда Јеһова буну өзүнә гаршы хәјанәт кими гәбул едир. О кечирдији һиссләри «Һизгијал» китабынын 16-ҹы фәслиндә чох тәсирли шәкилдә ифадә едиб.

11. Јеһова Јерусәлим вә онун мәншәји барәдә һансы һекајәни данышыр?

¹¹ Он алтынҹы фәсилдә Јеһованын «Һизгијал» китабындакы ән узун нитги, бүтүн Төвратда исә ән узун пејғәмбәрликләриндән бири гәләмә алыныб. Јеһова диггәти Јерусәлим шәһәринә јөнәлдир. Бурада Јерусәлим хәјанәткар Јәһуданы тәмсил едир. Јеһова онун мәншәјиндән вә хәјанәтиндән бәһс едән кәдәрли вә сарсыдыҹы һекајә данышыр. Башланғыҹда Јерусәлим атылмыш, јујулуб-тәмизләнмәмиш, бахымсыз галмыш көрпә кими иди. Онун валидејнләри өлкәдәки бүтпәрәст кәнаниләр иди. Доғрудан да, Давуд фәтһ едәнә гәдәр Јерусәлим узун мүддәт Кәнандакы халглардан олан јәбусиләрин әлиндә олуб. Јеһованын бу көрпәјә јазығы ҝәлди, ону јујуб-тәмизләди, гајғысына галды. Бөјүјәндән сонра о, мәҹази мәнада Јеһованын арвады олду. Әслиндә, Јерусәлимдә мәскунлашан исраиллиләр Јеһова илә чохдан әһддә идиләр, онлар бу әһдә Мусанын ҝүнләриндә көнүллү сурәтдә дахил олмушдулар (Чых. 24:7, 8). Варлы, нүфузлу бир киши истәкли арвадыны зинәт әшјалары илә севиндирдији кими, Јерусәлим өлкәнин мәркәзи оландан сонра Јеһова да ону мүбарәк гылды, зәнҝинләшдириб ҝөзәлләшдирди (Һизг. 16:1—14).

12. Хәјанәт Јерусәлимин тарихинә неҹә јазылмышды?

¹² Ҝөрүн сонра нә баш верди. Јеһова дејир: «Сән ҝөзәллијинә архаланмаға башладын. Шөһрәтин сәни фаһишәлијә сүрүкләди. Һәр јолдан кечәнлә зина едиб ҝөзәллијини она вердин» (Һизг. 16:15). Сүлејманын дөврүндә Јеһова халгынын башындан о гәдәр рузи-бәрәкәт, вар-дөвләт төкмүшдү ки, Јерусәлим о дөврүн ән мөһтәшәм шәһәринә чеврилмишди (1 Пад. 10:23, 27). Амма шәһәрдә јаваш-јаваш хәјанәткарлыг көк атмаға башлады. Сүлејман јаделли арвадларыны разы салмаг хатиринә Јерусәлими бүтләрә ибадәтлә ләкәләди (1 Пад. 11:1—8). Хәләфләриндән бәзиләри Сүлејмандан да бетәр олду. Онлар бүтүн өлкәни јалан ибадәтлә ләкәләдиләр. Бу ҹүр фаһишәлик, хәјанәт Јеһовада һансы һиссләри јаратды? Буну Јеһованын нөвбәти сөзләриндән ҝөрмәк олар: «Белә бир шеј индијәдәк олмајыб, олмајаҹаг да» (Һизг. 16:16). Онун јолуну азмыш халгы ҝүнаһ ҝирдабында ҝетдикҹә даһа чох батды!

13. Јерусәлим сакинләри һансы мәнфур әмәлләри төрәдирди?

 ¹³ Тәсәввүр един, Јеһова халгынын мәнфурлуғуну нөвбәти сөзләрлә ифша едәндә неҹә гәлб ағрысы, ејни заманда неҹә икраһ дујмушду: «Мәним үчүн дүнјаја ҝәтирдијин оғуллары, гызлары һәмин бүтләрә гурбан ҝәтирдин. Сәнин фаһишәлијин әндазәсини ашды. Сән Мәним оғулларымы өлдүрдүн, онлары одда јандырыб гурбан ҝәтирдин» (Һизг. 16:20, 21). Јерусәлим сакинләринин бу түкүрпәрдиҹи әмәлләри Шејтанын нә дәрәҹәдә залым олдуғуну ҝөстәрир. Шејтан Јеһованын халгыны бу ҹүр мәнфур әмәлләрә сүрүкләмәкдән зөвг алыр. Амма Јеһова һәр шеји ҝөрүр. О һәтта ән гаты вәһшилијин белә вурдуғу зәрәри арадан галдырмаға гадирдир, үстәлик, әдаләти дә мүтләг бәргәрар едәҹәк! (Әјјуб 34:24 ајәсини охујун.)

14. Јерусәлимин баҹылары ким иди вә бу баҹыларын арасында ән бетәри һансы иди?

¹⁴ Лакин мәнфурлуғу Јерусәлимин һеч веҹинә дә дејилди. О, фаһишәлијиндән әл чәкмирди. Јеһова онун башга фаһишәләрдән абырсыз олдуғуну дејир, чүнки о өзү һагг өдәјир ки, онунла јахынлыг етсинләр (Һизг. 16:34). Аллаһ дејир ки, Јерусәлим «анасынын», јәни бир заманлар өлкәјә саһиб олан бүтпәрәст халгларын тајыдыр (Һизг. 16:44, 45). Аилә мисалыны давам етдирәрәк Јеһова Сәмәријјәни Јерусәлимин бөјүк баҹысы адландырыр. Сәмәријјә Јерусәлимдән әввәл хәјанәт јолуна гәдәм гојмушду. Аллаһ, һәмчинин Јерусәлимин икинҹи баҹысындан, Сәдумдан сөз ачыр. Амма Јеһова Сәдумун адыны зәрб-мәсәл кими чәкир, чүнки бу шәһәр өз гүруруна вә позғунлуғуна ҝөрә артыг чохдан иди ки, мәһв едилмишди. Јеһованын сөзүнүн мәғзи о иди ки, Јерусәлим мәнфур әмәлләрилә һәр ики баҹысыны, Сәмәријјәни, һәтта Сәдуму да өтүб кечмишди (Һизг. 16:46—50). Аллаһын халгы сајсыз-һесабсыз хәбәрдарлыглары гулагардына вурур, асилијиндән әл чәкмирди.

15. Јеһованын Јерусәлимә һөкм кәсмәкдә мәгсәди нә иди?

¹⁵ Бәс Јеһова нә едәҹәк? О, Јерусәлимә дејир: «Һәзз вердијин ојнашларыны... бир јерә јығаҹағам... Сәни онларын әлинә верәҹәјәм». Халгын кечмишдәки бүтпәрәст мүттәфигләри ону мәһв едәҹәк, ҝөзәллијини вә вар-дөвләтини талајаҹаглар. Јеһова дејир: «Сәни дашгалаг едәҹәк, гылынҹла доғрајаҹаглар». Бу һөкмү кәсмәкдә Јеһованын мәгсәди нә иди? Мәгсәд халгын көкүнү кәсмәк дејилди. Јеһова дејир: «Мән сәнин фаһишәлијинә сон гојаҹағам». Сонра әлавә едир: «Сәндән аҹығымы чыхаҹағам, гәзәбим јатаҹаг, сакитләшәҹәјәм, даһа Өзүмү тәһгир олунмуш һисс етмәјәҹәјәм». Бу нәшрин 9-ҹу фәслиндә дејилдији кими, Јеһованын мәгсәди сүрҝүндән сонра халгыны дирчәлтмәк иди. Бунун сәбәбини О, белә изаһ едир: «Мән ҝәнҹлијиндә сәнинлә бағладығым әһди јада салаҹағам» (Һизг. 16:37—42, 60). Халгындан фәргли олараг, Јеһова сон  дәрәҹә сәдагәтли олдуғуну ҝөстәрәҹәкди! (Вәһј 15:4 ајәсини охујун.)

16, 17. а) Нәјә ҝөрә даһа Өһла илә Өһлүбанын Христиан дүнјасынын тимсалы олдуғуну демирик? («Фаһишә баҹылар» адлы чәрчивәјә бахын.) б) «Һизгијал» китабынын 16 вә 23-ҹү фәсилләриндән нә өјрәнирик?

¹⁶ Јеһованын «Һизгијал» китабынын 16-ҹы фәслиндә јазылмыш узун вә тәсирли нитгиндән Онун али ганунлары, әдаләти вә мәрһәмәти барәдә чох шеј өјрәнирик. «Һизгијал» китабынын 23-ҹү фәсли барәдә дә ејни шеји демәк олар. Халгын фаһишәлијини ифша едәрәк Јеһованын дедији сөзләрә һәгиги мәсиһиләр ҹидди јанашыр. Биз Јәһуда вә Јерусәлимин сәһвини тәкрарлајараг Јеһованын гәлбинә дәјмәк истәмәрик. Буна ҝөрә дә бүтпәрәстлијин бүтүн нөвләриндән икраһ едиб узаг дурмалыјыг. Бура бүтпәрәстлијин бир нөвү олан тамаһкарлыг вә малпәрәстлик дә дахилдир (Мәт. 6:24; Кол. 3:5). Биз Јеһоваја һәмишә миннәтдар олмалыјыг, чүнки О лүтф едәрәк ахырзаманда пак ибадәти дирчәлдиб, үстәлик, онун ләкәләнмәсинә бир даһа изин вермәјәҹәк. О, руһани Исраиллә «һәмишәлик әһд» бағлајыб. Бу әһд һеч вахт хәјанәт вә фаһишәликлә позулмајаҹаг (Һизг. 16:60). Одур ки, биз Јеһованын пак халгынын үзвү олмаг шәрәфини гијмәтләндирмәлијик.

¹⁷ Бәс Јеһованын бу фаһишәләрә гаршы сөјләдији сөзләрдән «бөјүк фаһишә» олан Бөјүк Бабил барәдә нә өјрәнирик? Инди исә ҝәлин бу һагда данышаг.

18, 19. «Һизгијал» вә «Вәһј» китабында тәсвир олунан фаһишәләр арасында һансы охшарлыглар вар?

¹⁸ Јеһова дәјишмир (Јаг. 1:17). Онун бөјүк фаһишә олан јалан динә мүнасибәти бүтүн тарих бојунҹа ејни олараг галыб. Буна ҝөрә дә Онун «Һизгијал» китабында ады чәкилән фаһишәләрә кәсдији һөкмлә «Вәһј» китабында тәсвир олунан бөјүк фаһишәнин агибәти арасында бир сыра охшарлыглар вар.

¹⁹ Мәсәлән, Һизгијалын пејғәмбәрликләриндә ады чәкилән фаһишәләрин ҹәзасыны билаваситә Јеһова Өзү вермәди. Аллаһын хәјанәткар халгы һансы халгларла руһани әхлагсызлыг етмишдисә, мәһз һәмин халглар ону ҹәзаландырмышды. Бөјүк Бабил дә «дүнјанын падшаһлары» илә зина етмәкдә иттиһам олунур. Бәс онун ҹәзасыны ким верәҹәк? «Вәһј»дә охујуруг ки, бу сијаси гүввәләр «фаһишәјә нифрәт едәҹәк, ону тар-мар едиб чылпаг гојаҹаг, әтини јејәҹәк вә сонра ону јандырыб күлә чевирәҹәк». Нәјә ҝөрә бу дөвләтләр белә гәрара ҝәләҹәкләр? Чүнки бу фикри онларын үрәјинә Аллаһ гојаҹаг (Вәһј 17:1—3, 15—17).

20. Бабилә кәсилмиш һөкмүн дәјишмәјәҹәјини нә ҝөстәрир?

²⁰ Јеһова бүтүн јалан динләрә, о ҹүмләдән чохсајлы христиан динләринә гаршы чыхардығы һөкмү дүнја халгларынын әли илә иҹра едәҹәк. Бу һөкм дәјишмәјәҹәк. Динләр әфв олунмајаҹаг,  онлара јолларыны дүзәлтмәјә һеч бир шанс верилмәјәҹәк. «Вәһј» китабында дејилир ки, Бабил «даһа һеч вахт тапылмајаҹаг» (Вәһј 18:21). Аллаһын мәләкләри онун мәһвинә севинәрәк дејәҹәкләр: «Јаһа алгыш един! Шәһәрин түстүсү әбәдијјәт боју ҝөјә галхаҹаг!» (Вәһј 19:3). Бу һөкм әбәдилик галаҹаг. Јеһова бир даһа јол вермәјәҹәк ки, һансыса јалан дин пејда олуб пак ибадәти ләкәләсин. Одлу-аловлу һөкмлә мәһвә мәһкум олунмуш Бабилин түстүсү әбәдилик ҝөјә бүләнд олаҹаг.

21. Јалан динин мәһви илә һансы дөвр башлајаҹаг вә бу дөвр һансы һадисә илә тамамланаҹаг?

²¹ Бу дүнјадакы дөвләтләр Бөјүк Бабилә гаршы галхмагла Јеһова Аллаһын она чыхардығы һөкмү иҹра едәҹәкләр. Бу, Јеһованын нијјәтинин јеринә јетмәсиндә бөјүк бир ирәлиләјиш олаҹаг. Бу һадисә илә бөјүк мүсибәт, ҝөрүнмәмиш чахнашма дөврү башлајаҹаг (Мәт. 24:21). Мүсибәтин зирвә нөгтәси Армаҝеддон олаҹаг, јәни Јеһова бу шәр дүнја илә мүһарибә  едәҹәк (Вәһј 16:14, 16). Бу нәшрин нөвбәти фәслиндә ҝөстәрилир ки, бөјүк мүсибәт вахты һадисәләрин неҹә ҹәрәјан едәҹәји барәдә «Һизгијал» китабындан чох шеј өјрәнмәк олар. Бәс «Һизгијал» китабынын 16 вә 23-ҹү фәсилләриндән өзүмүзә һансы ибрәт дәрсини ҝөтүрдүк?

22, 23. «Һизгијал» вә «Вәһј» китабында тәсвир олунан фаһишәләр һаггындакы мәлумата әсасән ибадәтимизә неҹә јанашмалыјыг?

²² Шејтанын арзусу Аллаһа пак шәкилдә ибадәт едән инсанлары јолдан чыхармагдыр. Елә бир шеј јохдур ки, бизи пак ибадәтдән сапдырмаг гәдәр, «Һизгијал» китабында тәсвир олунан фаһишәләр кими, хәјанәт јолуна сүрүкләмәк гәдәр она һәзз версин. Биз јадда сахламалыјыг ки, Јеһова Она шәрик гошулмасыны, хәјанәти гәтијјән ҝөтүрмүр (Сај. 25:11). Сон дәрәҹә диггәтли олмалыјыг ки, јалан диндән узаг дураг вә Аллаһын ҝөзүндә мурдар олан шејләрә тохунмајаг (Әшј. 52:11). Елә буна ҝөрә дә бу парчаланмыш дүнјада баш верән сијаси мүнагишәләрдә вә иғтишашларда битәрәф галырыг (Јәһ. 15:19). Бизим нәзәримиздә милләтчилик Шејтанын јаратдығы јалан динин диҝәр бир формасыдыр. Буна ҝөрә дә бу динлә һеч бир әлагәмиз олмамалыдыр.

²³ Ән әсасы ҝәлин һәмишә јадда сахлајаг ки, Јеһоваја Онун тәмиз, пак руһани мәбәдиндә ибадәт етмәк бөјүк шәрәфдир. Ҝәлин һәмишә бу мүбарәк гурулушу әзиз тутаг вә јалан динә, онун фаһишәлијинә һеч вахт гошулмајаг!