Јениләнмиш изаһатларын мәҹмусу
Илләр әрзиндә «Ҝөзәтчи гүлләси»ндә Һизгијалын пејғәмбәрлијинин мүәјјән мәгамларына јени изаһат верилиб. Бу китабда да бир сыра јениликләр әксини тапыб. Билијинизи јохлајын, ҝөрүн јени изаһатларла бағлы нөвбәти суаллара ҹаваб верә билирсиниз.
Мәхлугларын дөрд үзү нәји тәмсил едир?
Әввәлки изаһат: Мәхлугларын, јәни кәррубларын дөрд үзүнүн һәр бири Јеһованын дөрд әсас кејфијјәтиндән бирини тәмсил едир.
Јени изаһат: Кәррубларын дөрд үзүнүн һәр бири Јеһованын дөрд әсас кејфијјәтиндән бирини билдирсә дә, бир јердә ҝөтүрдүкдә дөрд үз Јеһованын саһиб олдуғу бүтүн кејфијјәтләри еһтива едир. Һәмчинин дөрд үз бизә Јеһованын гүдрәт вә еһтишамынын әнҝинлијинин интәһасыз олдуғуну ашылајыр.
Сәбәб: Аллаһын Кәламында дөрд рәгәми чох вахт тамлығы, бүтөвлүјү билдирир. Беләликлә, дөрд үзү бирликдә ҝөтүрәндә онлар дөрд ајры хүсусијјәти тәмсил етмир, Јеһованын һејрәтамиз хисләтинин тәмәлини тәшкил едир. Һәмчинин, үзләрин һәр бири әзәмәт, ҝүҹ, гүдрәт рәмзи олан варлыгларын үзү иди. Буна бахмајараг, хилгәтин бу дөрд гүдрәтли тәмсилчиси, јәни һәр кәррубун дөрд симасы илә тәсвир олунан дөрд варлыг Јеһованын тахтындан ашағыда дурурду. Бу вурғулајыр ки, Јеһова бүтүн хилгәтин Али Һөкмдарыдыр.
Белиндә гәләм-дават олан адам кими тәмсил едир?
Әввәлки изаһат: Белиндә гәләм-дават олан адам јер үзүндә јашајан мәсһ олунмуш мәсиһиләри тәмсил едир. Онлар тәблиғ едәрәк вә шаҝирд һазырлајараг бөјүк издиһама дахил олан адамларын алнына мәҹази мәнада ишарә гојурлар (Вәһј 7:9).
Јени изаһат: Белиндә гәләм-дават олан адам Иса Мәсиһи тәмсил едир. О, «бөјүк мүсибәт» вахты бөјүк издиһама гојун һөкмү чыхаранда онларын алнына ишарә гојаҹаг (Мәт. 24:21).
Сәбәб: Јеһова мүһакимә етмәк сәлаһијјәтини Оғлуна һәвалә едиб (Јәһ. 5:22, 23). Мәтта 25:31—33 ајәләринә әсасән, кимин «гојун», кимин «кечи» олдуғуна даир сон һөкмү Иса Мәсиһ чыхараҹаг.
Фаһишә баҹылар Өһла вә Өһлүба католик вә протестант динләринә парчаланмыш Христиан дүнјасынын тимсалыдыр?
Әввәлки изаһат: Бөјүк баҹы Өһла (Исраилин пајтахты Сәмәријјә) католик динини тәмсил едир. Кичик баҹы Өһлүба (Јәһуданын пајтахты Јерусәлим) протестант дининин тимсалыдыр.
Јени изаһат: Бу фаһишә баҹылар Христиан дүнјасына аид һеч бир дини тәмсил етмир. Бу образлар әсасында мәлум олур ки, бир вахтлар Јеһоваја садиг олан инсанлар сонрадан Она хәјанәт едәндә Јеһова һансы һиссләри кечирир. Бүтүн јалан динләр Јеһовада бу ҹүр һиссләри доғурур.
Сәбәб: Өһла вә Өһлүбанын Христиан дүнјасынын тимсалы олдуғуна Мүгәддәс Китаб һеч бир әсас вермир. Исраил вә Јәһуда бир заманлар мәҹази мәнада Јеһованын вәфалы арвады иди. Христиан дүнјасынын исә һеч вахт Јеһова илә белә мүнасибәти олмајыб. Бундан башга «Һизгијал» китабынын 16 вә 23-ҹү фәсилләриндә Аллаһын хәјанәткар халгынын фаһишәјә бәнзәдилмәсиндә бәрпа вә дирчәлишлә бағлы үмид дә верилир. Бөјүк Бабилин бир һиссәси олан Христиан дүнјасынын исә белә бир үмиди јохдур.
Хәјанәткар Јерусәлим Христиан дүнјасынын тимсалыдыр?
Әввәлки изаһат: Хәјанәткар Јерусәлим Христиан дүнјасынын тимсалыдыр. Одур ки, Јерусәлимин мәһви Христиан дүнјасынын мәһвини тәмсил едир.
Јени изаһат: Хәјанәткар Јерусәлимдәки вәзијјәт, о ҹүмләдән бүтпәрәстлик вә позғунлуг Христиан дүнјасында баш верәнләри хатырлатса да, биз артыг Јерусәлимин Христиан дүнјасынын тимсалы олдуғуну дүшүнмүрүк.
Сәбәб: Мүгәддәс Китаб Јерусәлимә Христиан дүнјасынын тимсалы кими бахмаға һеч бир әсас вермир. Гәдим Јерусәлимдән фәргли олараг, Христиан дүнјасы һеч вахт Аллаһа пак шәкилдә ибадәт етмәјиб. Јерусәлим бир мүддәт Јеһова тәрәфиндән әфв олунмушду, амма Христиан дүнјасы һеч вахт әфв олунмајаҹаг.
Гуру сүмүкләрлә бағлы ҝөрүнтү неҹә јеринә јетди?
Әввәлки изаһат: Тәгибләрлә үзләшән мәсһ олунмуш мәсиһиләр 1918-ҹи илдә өлүмә бәнзәр һал јашады, онларын фәалијјәтинә, демәк олар ки, сон гојулду. Бунунла да онлар Бөјүк Бабилин әсарәтинә дүшдүләр. Гыса сүрән бу әсарәт 1919-ҹу илдә баша чатды. Һәмин ил Јеһова онлары Падшаһлығын тәблиғчиләри кими дирчәлтди.
Јени изаһат: Өлүмә бәнзәр руһани әсарәт чох узун сүрүб вә 1918-ҹи илдән хејли әввәл башлајыб. Бу әсарәт ерамызын II әсриндә башлајыб 1919-ҹу илдә битиб. Бу дөвр Исанын «буғда вә алаг оту» мәсәлиндә буғданын бөјүдүјү дөврлә үст-үстә дүшүр.
Сәбәб: Гәдим Исраилин әсарәти чох узун сүрмүшдү. Е. ә. 740-ҹы илдә башлајыб е. ә. 537-ҹи илдә битмишди. Һизгијалын пејғәмбәрлијиндә сүмүкләр гупгуру иди. Бу онларын узун илләрин өлүсү олдуғуну ҝөстәрирди. Үстәлик, ҝөрүнтүдә сүмүкләр јаваш-јаваш ҹанланыр, бу исә заман тәләб едән просесдир.
Ики чубуғун бирләшмәси һансы мәнаны дашыјыр?
Әввәлки изаһат: Биринҹи Дүнја мүһарибәси заманы гыса мүддәт давам едән парчаланма дөврүндән сонра 1919-ҹу илдә садиг мәсһ олунмушлар араларындакы бирлији бәрпа етдиләр.
Јени изаһат: Пејғәмбәрликдә вурғуланыр ки, Јеһова хидмәтчиләрини бирләшдирәҹәк. 1919-ҹу илдән сонра мәсһ олунмушлара јер үзүндә јашамаға үмид едән инсанлар да гошулмаға башлады. Һәр ики груп Јеһоваја бирликдә бир халг кими ибадәт едир.
Сәбәб: Пејғәмбәрликдә бир чубуғун әввәлҹә ики јерә бөлүнүб сонрадан бирләшәрәк бир чубуг олдуғу тәсвир олунмур. Беләликлә, пејғәмбәрликдә бир групун әввәлҹә бөлүнәҹәји, сонра бирләшәҹәји јох, әксинә, ики ајры груп инсанын бирләшәҹәји тәсвир олунур.
«Мәҹуҹ өлкәсиндән олан Јәҹуҹ» кимдир?
Әввәлки изаһат: «Мәҹуҹ өлкәсиндән олан Јәҹуҹ» ҝөјдән говуландан сонра Шејтана верилән аддыр.
Јени изаһат: «Мәҹуҹ өлкәсиндән олан Јәҹуҹ» Аллаһа пак шәкилдә ибадәт едән инсанлара бөјүк мүсибәт вахты һүҹум едәҹәк халглар бирлијини тәмсил едир.
Сәбәб: Јәҹуҹ һаггында јазыланлар, јәни онун јыртыҹы гушлара јем едиләҹәји вә јердә она дәфн јеринин вериләҹәји ҝөстәрир ки, Јәҹуҹ руһани варлыг дејил. Үстәлик, «Дәнјал» вә «Вәһј» китабларында да халгларын Аллаһын халгына һүҹум едәҹәјиндән данышылыр. Јәҹуҹун һүҹуму бу һүҹумлара бәнзәјир (Дән. 11:40, 44, 45; Вәһј 17:14; 19:19).
Һизгијал һәвари Булусун тәсвир етдији руһани мәбәди ҝөрмүшдү?
Әввәлки изаһат: Һизгијал ҝөрүнтүдә һәвари Булусун тәсвир етдији руһани мәбәди ҝөрмүшдү.
Јени изаһат: Һизгијалын ҝөрдүјү мәбәд б. е. 29-ҹу илиндә мејдана чыхан руһани мәбәд дејилди. Онун ҝөрдүјү ҝөрүнтүдә сүрҝүндән сонра пак ибадәтин тамамилә Төвратда дејилдији кими иҹра олундуғу тәсвир олунурду. Булусун тәсвир етдији руһани мәбәддә диггәт Исанын б. е. 29-ҹу илиндән 33-ҹү илинә гәдәр бөјүк Баш каһин гисминдә ҝөрдүјү ишләрә ҹәмләнмишди. Һизгијалын мәбәдлә бағлы ҝөрдүјү ҝөрүнтүдә баш каһиндән сөз ачылмыр. Бурада диггәт 1919-ҹу илдә башлајан руһани дирчәлишә ҹәмләнир. Буна ҝөрә дә Һизгијалын ҝөрдүјү мәбәдин һәр хырда ҹәһәтиндә вә өлчүләриндә рәмзи мәна ахтармырыг. Әксинә, бу ҝөрүнтүнүн бизә Јеһованын пак ибадәтлә бағлы гојдуғу ганунлар һагда нә демәк истәдији барәдә дүшүнмәлијик.
Сәбәб: Һизгијалын ҝөрдүјү мәбәд мүһүм саһәләрдә руһани мәбәддән фәргләнир. Мәсәлән, Һизгијалын ҝөрдүјү мәбәддә чохлу һејван гурбанлары ҝәтирилмәли иди. Руһани мәбәддә исә бирдәфәлик бир гурбан ҝәтирилиб (Ибр. 9:11, 12). Мәсиһ јер үзүнә ҝәлмәздән әсрләр әввәл Јеһова руһани мәбәдлә бағлы бу ҹүр дәрин һәгигәтләри ачмазды, чүнки һәлә бунун вахты дејилди.
