Лавилиләр 26:1—46
26 Өзүнүз үчүн пуч аллаһлар дүзәлтмәјин,+ ојма бүтләр,+ дик дашлар* гојмајын, өлкәниздә тәсвирли дашлар+ гојуб өнүндә сәҹдә гылмајын.+ Мән сизин Аллаһыныз Јеһовајам.
2 Шәнбә ҝүнләримә риајәт един, мүгәддәс мәканыма еһтирамла јанашын. Мән Јеһовајам.
3 Әҝәр ганунларымла отуруб-дурсаныз, әмрләримә риајәт едиб онлара ујғун јашасаныз,+
4 сизин үчүн мөвсүмүндә јағышлар јағдыраҹағам,+ торпағыныз мәһсул верәҹәк,+ ағаҹларыныз бар ҝәтирәҹәк.
5 Үзүм јығымына кими дән үјүдәҹәк, сәпин мөвсүмүнәҹән үзүм јығаҹагсыныз. Дојунҹа чөрәк јејәҹәк, өлкәниздә фираван јашајаҹагсыныз.+
6 Өлкәнизә әмин-аманлыг верәҹәјәм,+ ҝеҹәни раһат јатаҹагсыныз, сизи горхудан олмајаҹаг.+ Торпағыныздан јыртыҹы һејванлары говаҹағам, мүһарибә нәдир билмәјәҹәксиниз.
7 Дүшмәнләринизи говуб гылынҹа јем едәҹәксиниз.
8 Бешиниз јүз нәфәрин, јүзүнүз он мин нәфәрин далынҹа дүшүб онлары гылынҹдан кечирәҹәксиниз.+
9 Сизә лүтф ҝөстәрәҹәјәм, оғул-ушаг саһиби едиб чохалдаҹағам.+ Сизинлә бағладығым әһдә садиг галаҹағам.+
10 Өтән илин мәһсулуну јејиб гуртармаға маҹал тапмамыш анбарлары бошалтмалы олаҹагсыныз ки, јени мәһсулу јығмаға јер олсун.
11 Чадырымы сизин аранызда гураҹағам,+ сиздән үз дөндәрмәјәҹәјәм.
12 Мән сизинлә олаҹағам. Мән сизин Аллаһыныз,+ сиз исә Мәним халгым олаҹагсыныз.+
13 Мән сизин Аллаһыныз Јеһовајам. Сизи Мисирдән чыхартдым ки, даһа онларын көләси олмајасыныз. Бојундуруғунузу гырдым ки, дикәлиб башы уҹа ҝәзәсиниз.
14 Анҹаг Мәнә гулаг асмасаныз, әмрләримә риајәт едиб онлара ујғун јашамасаныз,+
15 ганунларымла отуруб-дурмасаныз,+ һөкмләримә хор бахыб әмрләримдән чыхсаныз, сизинлә бағладығым әһдә хәјанәт етсәниз,+
16 онда ҝөрүн сизә нејләјәҹәјәм, сизи неҹә ҹәзаландыраҹағам: ҹаныныза вәлвәлә салаҹаг, сизи вәрәмә, гыздырмаја мүбтәла едәҹәк, ҝөзләринизин нуруну алаҹаг, һәјатынызы алт-үст едәҹәјәм. Һәдәр јерә тохум сәпәҹәксиниз, она ҝөрә ки, торпағын мәһсулу дүшмәнләринизә гисмәт олаҹаг.+
17 Сизә гаршы галхаҹағам, дүшмәнләринизә мәғлуб олаҹагсыныз.+ Јағыларын ајаглары алтында галаҹагсыныз,+ гован јохкән, гачаҹагсыныз.+
18 Бу да сизә кар еләмәсә, јенә дә Мәнә гулаг асмасаныз, ҝүнаһларыныза ҝөрә сизи једдигат артыг ҹәзаландыраҹағам.
19 Сынмаз гүрурунузу чилик-чилик едәҹәјәм, сәманызы дәмирә,+ торпағынызы мисә дөндәрәҹәјәм.
20 Әлләшиб-вурушуб тагәтдән дүшәҹәксиниз, амма бош јерә, чүнки торпағыныз гысыр олаҹаг,+ ағаҹларыныз бар ҝәтирмәјәҹәк.
21 Асилијиниздән әл чәкмәјиб сөзүмә гулаг асмасаныз, ҝүнаһларыныза ҝөрә ҹәзаны једди дәфә дә артыраҹағам.
22 Вәһши һејванлары ҹаныныза салаҹағам,+ онлар сизи ушагсыз гојаҹаг,+ һејванларынызын ахырына чыхаҹаг, сајынызы азалдаҹаглар, јолларыныз бош, кимсәсиз галаҹаг.+
23 Анҹаг бунлар да сизә дәрс олмаса,+ јенә дә асилилијиниздә инад етсәниз,
24 онда Мән дә сизин зиддинизә ҝедәҹәјәм, ҝүнаһларыныза ҝөрә сизә једдигат ҹәза верәҹәјәм.
25 Әһди поздуғунуза ҝөрә үстүнүзә гылынҹ чәкиб сиздән интигам алаҹағам.+ Гачыб шәһәрләриниздә ҝизләнсәниз, ичинизә азар салаҹағам.+ Беләҹә, дүшмәнләринизин әлинә кечәҹәксиниз.+
26 Сизин чөрәк еһтијатынызы мәһв едәҹәјәм.+ О заман он гадын бир тәндирдә чөрәк биширәҹәк, чөрәји чәки илә бөлүшдүрәҹәк.+ Гарныдолусу чөрәк јемәјә һәсрәт галаҹагсыныз.+
27 Бүтүн бунлара бахмајараг, јенә дә Мәнә гулаг асмасаныз вә асилијиниздә инад етсәниз,
28 онда Мән даһа да шиддәтлә зиддинизә ҝедәҹәјәм,+ ҝүнаһларыныза ҝөрә сизә једдигат ҹәза верәҹәјәм.
29 Мәҹбур галыб оғулларынызы, гызларынызы јејәҹәксиниз.+
30 Сәҹдәҝаһларынызы* јерлә јексан едәҹәјәм,+ бухурданларынызы гыраҹағам, мејитинизи ијрәнҹ бүтләринизин* мејитинин үстүнә сәрәҹәјәм.+ Ијрәндијимдән сизин һеч тәрәфинизә дә бахмајаҹағам.+
31 Шәһәрләринизи гылынҹ ағзына верәҹәјәм,+ мүгәддәс јерләринизи виран гојаҹағам, гурбанларынызын әтрини гохламајаҹағам.
32 Өлкәни харабазара чевирәҹәјәм,+ ҝәлиб орада мәскунлашан дүшмәнләриниз белә, буну ҝөрәндә мат галаҹаг.+
33 Сизи пәрән-пәрән едиб халгларын арасына сәпәләјәҹәјәм,+ гылынҹымы сијириб изинизә дүшәҹәјәм.+ Өлкәниз бош галаҹаг,+ шәһәрләриниздә даш-даш үстә галмајаҹаг.
34 Сиз дүшмән торпағында икән торпаг динҹәлмәдији шәнбәләрин әвәзини чыхаҹаг. Бүтүн бу виранәлик вахты торпаг дојунҹа динҹәләҹәк.+
35 Орада јашадығыныз вахт шәнбә илләриндә ҝөрмәдији динҹлији торпаг виранәлик дөврүндә ҝөрәҹәк.
36 Сағ галанлара ҝәлинҹә исә,+ онлары дүшмән өлкәсиндә сәксәкә ичиндә јашадаҹағам. Јел әсиб јарпаг хышылдајанда белә, гачмаға үз гојаҹаглар. Тәгиб едән олмаја-олмаја, гылынҹдан гачырмыш кими гачаҹаглар.+
37 Гылынҹдан гачан адамлар кими, бир-бириләринин ајаглары алтында галаҹаглар, һалбуки онларын далынҹа дүшән олмајаҹаг. Дүшмәнләринизә гаршы баш галдыра билмәјәҹәксиниз.+
38 Јад халгларын арасында мәһв олуб ҝедәҹәксиниз.+ Дүшмән торпағы сизин ахырыныза чыхаҹаг.
39 Сағ галанларыныз ҝүнаһларыныза ҝөрә дүшмән торпағында чүрүјәҹәк.+ Бәли, аталарынын ҝүнаһына ҝөрә чүрүјүб ҝедәҹәк.+
40 Онда өзләринин ҝүнаһларыны, аталарынын ҝүнаһыны вә хәјанәткарлығыны етираф едәҹәкләр.+ Бојунларына алаҹаглар ки, Мәнә аси чыхыб хәјанәткарлыг етмишләр,+
41 Мән дә мәҹбур олуб онларын зиддинә ҝетмишәм,+ онлары дүшмән торпағына сүрҝүн етмишәм.+
Бәлкә, онда сүннәтсиз* үрәкләри јумшалар+ вә ҝүнаһларыны јујарлар.
42 О заман Мән Јагубла, Исһагла вә Ибраһимлә бағладығым әһди хатырлајаҹаг,+ торпағы јада салаҹағам.
43 Онларсыз галдығы вахт әрзиндә торпаг кимсәсиз, бош олаҹаг, динҹәлмәдији шәнбәләрин әвәзини чыхаҹаг.+ Онлар исә ҝүнаһларынын әвәзини өдәјәҹәкләр, чүнки һөкмләрими саја салмајыб әмрләримә хор бахмышдылар.+
44 Лакин бүтүн бунлара бахмајараг, дүшмән өлкәсиндә олдуглары мүддәтдә белә, Мән онлары тамамилә рәдд етмәјәҹәјәм,+ нифрәтим о дәрәҹәјә чатмајаҹаг ки, онларын көкүнү кәсим. Белә етсәм, онларла бағладығым әһдә хәјанәт етмиш оларам.+ Чүнки Мән онларын Аллаһы Јеһовајам.
45 Онларын хатиринә әҹдадлары илә бағладығым әһди хатырлајаҹағам.+ Мән Аллаһлары олмаг үчүн онлары башга халгларын ҝөзү өнүндә Мисирдән чыхармышдым.+ Мән Јеһовајам”».
46 Јеһованын Сина дағында Өзү илә Исраил халгы арасында Муса васитәсилә тәсис етдији гајдалар, ганун вә һөкмләр бунлар иди.+
Һашијәләр
^ Бу дашлар бүтпәрәстликдә ситајиш мәгсәдилә истифадә олунурду.
^ Һәрфән: јүксәкликләринизи.
^ Ибрани мәтниндә ишләнән ифадә «нәҹис» сөзү илә ејни көкдәндир вә икраһ ифадә едир.
^ Јахуд инадкар.
