Рут 2:1—23
2 Наимәнин Буәз+ адында чох варлы-һаллы бир гоһуму вар иди. О, Наимәнин әри Әлимәликин гоһуму иди.
2 Бир ҝүн муаби Рут Наимәјә деди: «Иҹазә вер, зәмијә ҝедим. Кимин ҝөзүндә лүтф тапарамса, онун ардынҹа ҝедиб башаг јығарам».+ Наимә деди: «Ҝет, гызым».
3 Рут ҝетди вә бир зәмијә ҝириб бичинчиләрин ардынҹа башаг јығмаға башлады. О, тәсадүфән ҝәлиб Әлимәликин+ гоһуму Буәзин+ зәмисинә чыхмышды.
4 Бу арада Буәз Бејтләһмдән ҝәлди. О, бичинчиләрә деди: «Јеһова голунуза гүввәт версин*!» Онлар ҹаваб вердиләр: «Јеһова сәндән разы олсун!»
5 Сонра Буәз бичинчиләрин үстүндә дуран ҹавандан сорушду: «Бу гыз кимләрдәндир?»
6 О ҹаваб верди: «Бу, Муаб торпағындан Наимә илә бураја ҝәлмиш Муаб гызыдыр.+
7 О башаг етмәк,+ бичинчиләрдән дүшмүш сүнбүлләрдән јығмаг* үчүн иҹазә истәди. Сәһәр ҝәләндән ајаг үстәдир, елә инди динҹини алмаг үчүн чардағын алтына кечиб отуруб».
8 Буәз Рута деди: «Гызым, гулаг ас ҝөр нә дејирәм. Башаг јығмаг үчүн о бири зәмиләрә ҝетмә, бурада гал. Гарабашларыма да јахын оларсан.+
9 Бах ҝөр онлар һансы зәмини бичирләр, сән дә далларынҹа ҝет. Ҹаванлара тапшырмышам сәнә дәјмәсинләр. Сусајанда сәһәнҝләрин јанына ҝедиб ҹаванларын чәкдији судан ичәрсән».
10 Рут диз үстә дүшүб јерә гәдәр тәзим етди вә деди: «Мән нә етдим ки, сәнин ҝөзүндә лүтф тапдым, мәним гејдимә галырсан? Мән ки бир јаделлијәм+».
11 Буәз она ҹаваб верди: «Әрин өләндән сонра гајынанан үчүн етдијин һәр шејдән, ата-ананы вә доғма јурдуну гојуб танымадығын бир халгын јанына ҝәлмәјиндән хәбәрим вар.+
12 Гој Јеһова сәнә бунун әвәзини версин!+ Ганадлары алтына сығындығын+ Исраилин Аллаһы Јеһовадан бол-бол мүкафат аласан!»
13 Рут деди: «Гој лүтфүн мәндән әскик олмасын, ағам. Мән сәнин гарабашын да дејиләм, амма сән бу гарабашына тәсәлли, үрәк-дирәк вердин».
14 Наһар вахты ҝәләндә Буәз Руту чағырды: «Јахын ҝәл, бир аз чөрәк је, тикәни сиркәјә батыр». Рут бичинчиләрин јанында әјләшди. Буәз она говурға узатды. Рут јејиб дојду, јемәјиндән артыг да галды.
15 Сонра о башаг јығмаг+ үчүн ајаға галхды. Буәз ҹаванлара тапшырды: «Гој ҝедиб бичилмиш сүнбүлләрин* арасындан да башаг јығсын. Она дәјмәјин.+
16 Һәм дә дәрзләрин арасындан бир аз сүнбүл чәкиб гојун ки, о јығсын. Она һеч нә демәјин».
17 Рут ахшама гәдәр башаг јығды.+ Сонра јығдығы башағы дөјдү вә ондан бир ефаја* јахын арпа чыхды.
18 О, арпаны ҝөтүрүб шәһәрә гајытды вә гајынанасына ҝөстәрди. Һәмчинин јејиб дојдугдан сонра наһардан галан јемәји+ чыхарыб гајынанасына верди.
19 Гајынанасы ондан сорушду: «Бу ҝүн һарада ишләмисән, һарада башаг јығмысан? Гој сәнә јахшылыг едән адам хејир-бәрәкәт тапсын!»+ Рут кимин зәмисиндә ишләдијини гајынанасына сөјләди: «Бу ҝүн Буәз адлы бир кишинин зәмисиндә ишләдим».
20 Онда Наимә ҝәлининә деди: «Дириләрдән вә өлүләрдән мәһәббәтини әсирҝәмәјән Јеһова+ она хејир-дуа версин». Сонра деди: «О, гоһумумуздур,+ үзәринә гоһумлуг борҹу дүшән адамдыр*».+
21 Муаби Рут деди: «Һәм дә о, мәнә деди ки, ишчиләри бүтүн мәһсулу јығана гәдәр онларын јанында галым».+
22 Наимә ҝәлини Рута деди: «Гызым, онун гарабашлары илә ишләмәјин лап јахшы олду, јохса башга зәмиләрдә сәни инҹидәрдиләр».
23 Беләҹә, Рут арпа вә буғда бичини баша чатана кими+ Буәзин гарабашларынын јанында башаг јығды. Рут гајынанасы илә јашајырды.+
Һашијәләр
^ Һәрфән: Јеһова сизинлә олсун.
^ Диҝәр вариант: дәрзләрин арасындан сүнбүл јығмаг.
^ Диҝәр вариант: дәрзләрин.
^ Ефа 22 литрлик габын тутумуна бәрабәрдир. Б14 әлавәсинә бах.
^ Һәрфән: ҝери сатыналанымыздыр. Лүғәтдә «ҝери сатыналан» ифадәсинә бах.
