Һизгијал 20:1—49
20 Једдинҹи илин бешинҹи ајынын онунҹу ҝүнүндә Исраил ағсаггалларындан бир нечәси Јеһоваја мүраҹиәт етмәк үчүн јаныма ҝәлиб гаршымда әјләшдиләр.
2 Бу вахт мәнә Јеһованын сөзү назил олду:
3 «Еј бәни-адәм, Исраил ағсаггалларына де ки, Күлли-Ихтијар Јеһованын сөзү будур: “Сиз Мәндән сөз сорушмаға ҝәлмисиниз? Варлығыма анд олсун, — дејир Күлли-Ихтијар Јеһова, — сизә бир кәлмә дә ҹаваб вермәјәҹәјәм”.+
4 Онлары мүһакимә етмәјә һазырсан? Еј бәни-адәм, һазырсанмы онлары мүһакимә етмәјә? Ата-бабаларынын ијрәнҹ әмәлләрини бир-бир онлара сөјлә.+
5 Де ки, Күлли-Ихтијар Јеһованын сөзү беләдир: “Исраили сечдијим+ ҝүн Јагуб нәслинин өвладларына анд ичдим, Мисир өлкәсиндә онлара Өзүмү танытдым.+ Бәли, онлара анд ичиб дедим: “Мән Јеһовајам, сизин Аллаһыныз”.
6 Һәмин ҝүн анд ичиб сөз вердим ки, онлары Мисирдән чыхарыб онлар үчүн тапдығым сүд-бал ахан дијара апараҹағам.+ Бу дијар дүнјанын ән дилбәр ҝушәси иди.
7 Онда онлара дедим: “Гој һәр кәс ҝөзүнү дикдији ијрәнҹ бүтләри тулласын. Өзүнүзү Мисирин ијрәнҹ бүтләри илә мурдарламајын.+ Мән сизин Аллаһыныз Јеһовајам”.+
8 Онлар исә Мәнә гаршы үсјан етдиләр, Мәнә гулаг асмаг истәмәдиләр. Бағландыглары мәнфур шејләри атмадылар, Мисирин ијрәнҹ бүтләриндән әл чәкмәдиләр.+ Онда сөз вердим ки, онлары һиддәтимә туш едәҹәјәм, бүтүн гәзәбими Мисир торпағында үзәрләринә јағдыраҹағам.
9 Амма адым наминә һәрәкәтә кечдим ки, араларында јашадыглары халгларын јанында адыма ләкә ҝәлмәсин.+ Онлары Мисир торпағындан чыхаранда бу халгларын гаршысында Өзүмү онлара танытдым.+
10 Беләҹә, онлары Мисир өлкәсиндән чыхарыб сәһраја апардым.+
11 Орада онлара ганунларымы билдириб һөкмләрими ашкар етдим,+ о ганун вә һөкмләри ки онлара әмәл едән онларын сајәсиндә јашајыр.+
12 Бундан әлавә, Өзүмлә онлар арасында бир әламәт олараг онлар үчүн шәнбәни+ тәсис етдим ки,+ билсинләр: онлары мүгәддәс едән Мәнәм, Јеһова.
13 Лакин Исраил әһли сәһрада Мәнә аси чыхды.+ Ганунларымла отуруб дурмадылар, һөкмләрими рәдд етдиләр, о ганун вә һөкмләри ки онлара әмәл едән онларын сајәсиндә јашајыр. Мәним шәнбәләрими һеч јеринә гојдулар. Одур ки, Мән дә сәһрада гәзәбими онларын үстүнә төкмәјә, онлары мәһв етмәјә гәрар вердим.+
14 Буну адым наминә етдим. Истәмәдим онлары чыхартмағымын шаһиди олан халгларын јанында адыма ләкә ҝәлсин.+
15 Һәм дә сәһрада анд ичдим ки, онлары сөз вердијим торпаға,+ сүд-бал ахан дијара,+ дүнјанын ән дилбәр ҝушәсинә апармајаҹағам,
16 чүнки Мәним һөкмләрими рәдд етдиләр, ганунларымла јашамадылар, шәнбәләрими һеч етдиләр, ијрәнҹ бүтләринә көнүл вердиләр.+
17 Анҹаг јазығым ҝәлди онлара, мәһв етмәдим, сәһрада көкләрини кәсмәдим.
18 Сәһрада икән+ оғулларына дедим: “Ата-бабаларынызын гајда-гануну илә ҝетмәјин,+ һөкмләринә риајәт етмәјин, өзүнүзү онларын ијрәнҹ бүтләри илә мурдарламајын.
19 Мән сизин Аллаһыныз Јеһовајам. Мәним ганунларымла ҝедин, Мәним һөкмләримә әмәл един, онлара риајәт един.+
20 Шәнбәләрими мүгәддәс тутун,+ онлар сизинлә Мәним арамда әламәт олаҹаг ки, биләсиниз: Мән сизин Аллаһыныз Јеһовајам”.+
21 Амма өвладлары да Мәнә гаршы галхдылар.+ Ганунларымла отуруб-дурмадылар, һөкмләримә әмәл етмәдиләр, о ганун вә һөкмләрә ки онлара әмәл едән онларын сајәсиндә јашајыр. Мәним шәнбәләрими һеч јеринә гојдулар. Буна ҝөрә дә сөз вердим ки, онлары һиддәтимә туш едәҹәјәм, бүтүн гәзәбими сәһрада үзәрләринә јағдыраҹағам.+
22 Лакин Өзүмү сахладым,+ адымы дүшүндүм,+ дедим, онлары чыхартмағымын шаһиди олан халгларын јанында адыма ләкә ҝәлмәсин.
23 Онлара сәһрада анд ичдим ки, онлары халглар арасына сәпәләјәҹәјәм, өлкәләрә пәрән-пәрән едәҹәјәм,+
24 чүнки һөкмләримә әмәл етмәдиләр, ганунларымы рәдд етдиләр,+ шәнбәләрими һеч етдиләр, ата-бабаларынын ијрәнҹ бүтләринә тапындылар.+
25 Мән дә онлары башлы-башына бурахдым ки, ҝедиб фајдасыз гајдалара, инсаны јашатмаға гадир олмајан һөкмләрә ујсунлар,+
26 илкинләрини одда јандырараг гурбан версинләр вә бунунла өзләрини мурдарласынлар.+ Буну етдим ки, онлары аҹынаҹаглы һала салым вә билсинләр ки, Мән Јеһовајам”.
27 Буна ҝөрә дә, еј бәни-адәм, Исраил әһлинә сөјлә ки, Күлли-Ихтијар Јеһова белә дејир: “Сизин ата-бабаларыныз да беләҹә Мәнә хәјанәт едәрәк күфр етдиләр.
28 Онлары анд ичиб сөз вердијим өлкәјә ҝәтирдим.+ Онлар исә һүндүр тәпәләри, сыхјарпаглы ағаҹлары+ ҝөрәндә башладылар өз гурбанларыны вә Мәни тәһгир едән тәгдимәләрини ҝәтирмәјә. Орада хош әтирли гурбанларыны, шәраб тәгдимәләрини тәгдим етдиләр.
29 Онда Мән онлардан сорушдум: “Бу јүксәклик нәдир белә? (Бу ҝүнә кими ора Јүксәклик* адланыр.)”+
30 Исраил әһлинә сөјлә ки, Күлли-Ихтијар Јеһова белә дејир: “Сиз дә өзүнүзү аталарыныз кими ләкәләјирсиниз? Онларын ијрәнҹ бүтләринә бағланыб Мәнә хәјанәт едирсиниз*?+
31 Сиз һәлә дә мурдар бүтләринизә гурбанлар ҝәтирәрәк — оғулларынызы одда јандырараг өзүнүзү ләкәләјирсиниз?+ Бунлардан сонра да дејирсиниз, Мән сизә ҹаваб верим, еј Исраил әһли?”+
“Варлығыма анд олсун, — Күлли-Ихтијар Јеһова бәјан едир, — сизә ҹаваб вермәјәҹәјәм.+
32 Дејирсиниз: “Гој биз дә башга халглар кими, башга өлкәләрдә јашајан, ағаҹа, даша баш әјән тајфалар кими олаг”.+ Хејр, бу олмајаҹаг”».
33 «“Варлығыма анд олсун, — Күлли-Ихтијар Јеһова бәјан едир, — ҝүҹлү әлимлә, гүввәтли голумла, гејз-гәзәблә үзәриниздә падшаһлыг едәҹәјәм.+
34 Ҝүҹлү әлимлә, гүввәтли голумла, күкрәјән гәзәбимлә сизи халгларын арасындан чыхараҹағам, пәрән-пәрән дүшдүјүнүз өлкәләрдән топлајаҹағам.+
35 Сизи халгларын сәһрасына ҝәтирәҹәјәм, үзбәсурәт сизинлә һагг-һесаб чәкәҹәјәм.+
36 Мисир сәһрасында ата-бабаларынызла һагг-һесаб чәкдијим кими, сизинлә дә чәкәҹәјәм, — Күлли-Ихтијар Јеһова бәјан едир. —
37 Сизи чобан кими, чомағымын алтындан кечирәҹәјәм,+ әһдин бојундуруғу алтына салаҹағам.
38 Амма үсјанкарлары, Мәнә гаршы ҝүнаһ едәнләри араныздан ајыраҹағам.+ Онлары гүрбәт өлкәдән чыхараҹағам, анҹаг Исраилә ајаг басмајаҹаглар,+ онда биләҹәксиниз ки, Мән Јеһовајам”.
39 Сизин барәниздә исә, еј Исраил әһли, Күлли-Ихтијар Јеһова белә дејир: “Сиз ки Мәнә гулаг асмырсыныз, ҝедин баш әјин өз ијрәнҹ бүтләринизә.+ Анҹаг мәлумунуз олсун ки, даһа гурбанларынызла, ијрәнҹ бүтләринизлә адыма ләкә ҝәтирә билмәјәҹәксиниз”.+
40 “Бүтүн Исраил әһли, һамы мүгәддәс дағымда, Исраилин һүндүр дағында+ Мәнә ибадәт едәҹәк,+ — Күлли-Ихтијар Јеһова бәјан едир. — Мән онлардан разы галаҹағам. Онда сиздән бәхшишләри, ән јахшы тәгдимәләри, мүгәддәс тәгдимәләри гәбул едәҹәјәм.+
41 Сизи халгларын ичиндән чыхаранда, пәрән-пәрән дүшдүјүнүз өлкәләрдән јығанда+ гурбанларынызын хош әтрини дујуб сиздән разы галаҹағам, сизин васитәнизлә бүтүн халгларын ҝөзү гаршысында мүгәддәслијими әјан едәҹәјәм”.+
42 “Сизи Исраилә, ата-бабаларыныза сөз вериб анд ичдијим өлкәјә ҝәтирәндә биләҹәксиниз ки, Мән Јеһовајам.+
43 Орада сизә ләкә ҝәтирән һәрәкәтләриниз, әмәлләриниз јадыныза дүшәҹәк,+ бүтүн пис әмәлләринизә ҝөрә өзүнүз өзүнүздән ијрәнәҹәксиниз.+
44 Бах онда, еј Исраил әһли, биләҹәксиниз ки, Мән Јеһовајам, чүнки ҝөрәҹәксиниз ки, Мән сизинлә бәд әмәлләринизә, позғун ишләринизә ҝөрә рәфтар етмирәм, нә едирәмсә, Өз адым наминә едирәм”,+ — Күлли-Ихтијар Јеһова бәјан едир».
45 Мәнә јенә дә Јеһованын сөзү назил олду:
46 «Еј бәни-адәм, үзүнү ҹәнуба чевириб хитаб ет. Ҹәнуб мешәләринә пејғәмбәрлик ет.
47 Ҹәнубдакы мешәләрә белә де: “Ешидин вә аҝаһ олун, ҝөрүн Јеһова нә дејир. Күлли-Ихтијар Јеһованын сөзү будур: “Сәнин ичиндә елә од галајаҹағам ки,+ атәши сөнмәјәҹәк, јаш, гуру демәјиб, бүтүн ағаҹлары јандыраҹаг.+ Ҹәнубдан тутмуш шимала гәдәр һамыны гарсыдаҹаг.
48 Һамы ҝөрәҹәк ки, бу оду Мән Јеһова јандырмышам. Одур ки, атәши сөнмәјәҹәк”».+
49 Онда мән дедим: «Ај Аллаһ, еј Күлли-Ихтијар Јеһова, онлар мәним барәмдә дејирләр “бу, елә тапмаҹаларла* данышыр”».
Һашијәләр
^ Бүтпәрәстләрин сәҹдәҝаһына верилән ад.
^ Һәрфән: онларла зина едирсиниз.
^ Јахуд мәсәлләрлә.
