Һизгијал 37:1—28
37 Јеһованын руһу* үзәримә енди. Јеһованын руһу мәни дүзәнлијин ортасына апарды.+ Ора сүмүкләрлә долу иди.
2 О, мәни сүмүкләрин әтрафында ҝәздирди. Ҝөрдүм ки, дүзәнликдә хејли сүмүк вар, һамысы да гупгуру.+
3 О, мәндән сорушду: «Еј бәни-адәм, сәнҹә, бу сүмүкләр ҹанлана биләр?» Мән дедим: «Еј Күлли-Ихтијар, Јеһова, буну Сән биләрсән».+
4 Онда О, мәнә деди: «Пејғәмбәрлик едиб сүмүкләрә де: “Сиз, еј гуру сүмүкләр, Јеһованын сөзүнү ешидин:
5 “Күлли-Ихтијар Јеһова сүмүкләрә белә дејир: “Мән сизә нәфәс үфүрәҹәјәм, ҹанланаҹагсыныз.+
6 Сизи әзәлә илә, әтлә өртәҹәјәм, үстүндән дә дәри чәкәҹәјәм. Сизә нәфәс үфүрәҹәјәм, ҹанланаҹагсыныз вә биләҹәксиниз ки, Мән Јеһовајам”».
7 Неҹә дејилмишдисә, елә дә пејғәмбәрлик етдим. Сөзүм һәлә ағзымда икән шаггылты сәси ҝәлди, сүмүкләр бир-биринә битишмәјә башлады.
8 Сонра ҝөрдүм ки, үстләринә әзәлә, әт ҝәлди, онлары дәри өртдү. Амма һәлә һеч бириндә нәфәс јох иди.
9 Аллаһ мәнә деди: «Күләјә пејғәмбәрлик ет. Еј бәни-адәм, пејғәмбәрлик едиб күләјә сөјлә ки, Күлли-Ихтијар Јеһова белә дејир: “Ҝәл, еј рузиҝар*, гәтл едилмиш бу адамларын үстүнә дөрд сәмтдән әс, гој онлар һәјата гајытсынлар”».
10 Неҹә дејилмишдисә, елә дә пејғәмбәрлик етдим. Нәфәс* онларын ҹанына долду, онлар ҹанланыб ајаға галхдылар.+ Бу, һәдди-һүдуду ҝөрүнмәјән бөјүк бир гошун иди.
11 Аллаһ мәнә деди: «Еј бәни-адәм, бу сүмүкләр Исраил евидир.+ Онлар дејирләр: “Сүмүкләримиз гурујуб, үмидимиз үзүлүб,+ јалгыз галмышыг”.
12 Сән исә пејғәмбәрлик едиб онлара сөјлә ки, Күлли-Ихтијар Јеһова белә дејир: “Еј халгым, Мән гәбирләринизи ачыб+ сизи орадан чыхараҹағам, сизи Исраил торпағына ҝәтирәҹәјәм.+
13 Гәбирләринизи ачыб сизи орадан чыхаранда, еј халгым, биләҹәксиниз ки, Мән Јеһовајам”.+
14 “Дахилинизә руһуму гојаҹағам, ҹанланаҹагсыныз.+ Сизи өз торпагларыныза гајтараҹағам. Онда биләҹәксиниз ки, Мән Јеһова дедим, дедијими дә етдим”, — Јеһова бәјан едир».
15 Мәнә јенидән Јеһованын сөзү назил олду:
16 «Еј бәни-адәм, бир чубуг ҝөтүр, үстүнә “Јәһуда вә онунла олан* Исраил халгы үчүн” сөзләрини јаз.+ Сонра башга бир чубуг ҝөтүр, үстүнә “Әфраимин чубуғу Јусиф үчүн вә онунла олан Исраил еви үчүн”+ јаз.
17 Сонра онлары бир-биринә бирләшдир ки, әлиндә бир чубуг олсун.+
18 Сојдашларын сәндән бунун мәнасыны сорушанда
19 онлара сөјлә ки, Күлли-Ихтијар Јеһова белә дејир: “Мән Әфраимин әлиндә тутдуғу Јусифин вә онунла олан Исраил гәбиләләринин чубуғуну ҝөтүрүб Јәһуданын чубуғуна бирләшдирәҹәјәм.+ Онлар Мәним әлимдә бир чубуг олаҹаглар”.
20 Үстүндә јазы јаздығын чубуглары әлиндә тут ки, ҝөрсүнләр.
21 Сонра онлара сөјлә ки, Күлли-Ихтијар Јеһова белә дејир: “Исраиллиләри сәпәләндикләри халгларын арасындан топлајаҹағам, онлары һәр тәрәфдән јығыб өз јурд-јуваларына гајтараҹағам.+
22 Онлары бу дијарда, Исраил дағларында ваһид халг едәҹәјәм,+ башларында бир һөкмдар дураҹаг,+ артыг ики халг олмајаҹаглар, ики дөвләтә бөлүнмәјәҹәкләр.+
23 Даһа ијрәнҹ бүтләри, мәнфур әмәлләри вә ҝүнаһлары илә өзләрини мурдарламајаҹаглар.+ Онлар хәјанәт едиб ҝүнаһа батдылар, Мән исә бу хәјанәти онлардан узаглашдырыб, онлары тәмизләјәҹәјәм. Онлар Мәним халгым олаҹаг, Мән исә онларын Аллаһы.+
24 Онларын падшаһы гулум Давуд олаҹаг,+ һамысынын бир чобаны олаҹаг.+ Һөкмләримлә јашајаҹаг, гајда-ганунларыма дәгигликлә риајәт едәҹәкләр.+
25 Ата-бабаларынызын мәскән салдығы, гулум Јагуба вердијим мәмләкәтдә јашајаҹаглар.+ Орада һәмишәлик сакин олаҹаглар,+ өзләри дә, өвладлары да, өвладларынын өвладлары да орада јашајаҹаг.+ Гулум Давуд онлара башчы олаҹаг.+
26 Онларла сүлһ әһди бағлајаҹағам,+ бу, әбәди әһд олаҹаг. Онлара торпагларыны гајтараҹағам, сајларыны артыраҹағам,+ мәбәдими һәмишәлик араларында јерләшдирәҹәјәм.
27 Чадырым* онларла олаҹаг, Мән онларын Аллаһы олаҹағам, онлар да Мәним халгым.+
28 Бәли, мәбәдим һәмишәлик онларын арасында олаҹаг, онда халглар биләҹәкләр ки, Исраили мүгәддәс едән Мән Јеһовајам”».+
Һашијәләр
^ Һәрфән: әли.
^ Јахуд нәфәс; руһ. Лүғәтдә «руһ» сөзүнә бах.
^ Јахуд руһ.
^ Јахуд онун мүттәфиги.
^ Јахуд мәскәним; евим.
