Һизгијал 4:1—17
4 Сән дә, еј бәни-адәм, бир кәрпиҹ ҝөтүр габағына гој. Үстүндә Јерусәлим шәһәрини чәк.
2 Шәһәри мүһасирәјә ал,+ мүһасирә бәнди гур,+ тәпә дүзәлт,+ ордуҝаһлар гур, дивардәләнләрлә әһатәјә ал.+
3 Бир тава ҝөтүр вә өзүнлә шәһәр арасына дәмир һасар кими гој. Үзүнү шәһәрә тәрәф дөндәр. Шәһәр мүһасирәдә олаҹаг. Ону сән мүһасирәјә алаҹагсан. Бу, Исраил әһли үчүн бир әламәтдир.+
4 Сонра сол бөјрүн үстә узан вә Исраил әһлинин ҝүнаһыны өз үстүнә гој.+ Онларын ҝүнаһыны бөјрүн үстә узандығын ҝүнләрин сајы гәдәр дашыјаҹагсан.
5 Ҝүнаһлы олдуглары илләрә мүвафиг олараг сәнин үчүн үч јүз дохсан ҝүн тәјин едирәм.+ Сән Исраил әһлинин ҝүнаһыны дашыјаҹагсан,
6 та бу мүддәтин сонуна кими.
Бундан сонра јенә узан, амма бу дәфә сағ бөјрүн үстә. Гырх ҝүн әрзиндә Јәһуда әһлинин ҝүнаһыны дашыјаҹагсан.+ Бир илә бир ҝүн. Сәнин үчүн бир илә бир ҝүн тәјин етмишәм.
7 Үзүнү мүһасирәдә олан Јерусәлимә чевир,+ голун чылпаг олсун. Шәһәрин әлејһинә пејғәмбәрлик ет.
8 Мән сәни кәндирлә бағлајаҹағам ки, мүһасирә ҝүнләри битмәјинҹә бир бөјрүн үстүндән о биринә чеврилә билмәјәсән.
9 Буғда, арпа, пахла, мәрҹи, дары, пәринҹ ҝөтүр, онлары бир габа гој. Өзүн үчүн онлардан чөрәк бишир. Бөјрүн үстә узандығын үч јүз дохсан ҝүн әрзиндә бу чөрәји јејәҹәксән.+
10 Һәр ҝүн ијирми шекел* чөрәк чәкиб тәјин олунмуш вахтларда јејәҹәксән.
11 Сују да өлчүјлә, һинин алтыда бири* гәдәр өлчүб тәјин олунмуш вахтларда ичәҹәксән.
12 Чөрәји јумру арпа чөрәјини једијин кими је. Ону һамынын ҝөзү гаршысында гурумуш инсан нәҹисинин үстүндә бишир».
13 Јеһова сөзүнә әлавә едиб деди: «Исраиллиләр онлары сәпәләјәҹәјим халгларын ичиндә чөрәкләрини бу ҹүр, мурдар һалда* јејәҹәкләр».+
14 Онда мән дилә ҝәлдим: «Амандыр, Јеһова! Ја Күлли-Ихтијар! Ҝәнҹлијимдән бу јашымадәк дилимә нә өлмүш, нә парчаланмыш һејван әти,+ нә дә башга мурдар әт вуруб өзүмү мурдарламамышам».+
15 О, мәнә деди: «Јахшы, инсан нәҹиси әвәзинә мал тәзәји ишләт. Чөрәјини онун үстүндә бишир».
16 Сонра деди: «Еј бәни-адәм, будур, Мән Јерусәлимин әрзаг еһтијатларыны мәһв едирәм.+ Чөрәк пајларыны гысым-гысым*,+ сыхынты ичиндә јејәҹәкләр, су пајларыны гуртум-гуртум* дәһшәт ичиндә ичәҹәкләр.+
17 Бу ондан өтрү олаҹаг ки, ҝүнаһларына ҝөрә чөрәк вә су гытлығы чәкә-чәкә, бир-биринә дәһшәтлә баха-баха әријиб ҝетсинләр.
Һашијәләр
^ Тәх. 230 г. Б14 әлавәсинә бах.
^ Тәх. 0,6 л. Б14 әлавәсинә бах.
^ Гануна ҝөрә мурдар һалда.
^ Һәрфән: чәки илә.
^ Һәрфән: өлчү илә.
