ЈЕРЕВАН, Ермәнистан. 12 нојабр 2013-ҹү илдә Ермәнистан һәрби хидмәтдән имтина етдикләри үчүн һәбс едилмиш Јеһованын Шаһидләриндән галан 14 нәфәри дә азад етди. Үмумиликдә, октјабрын 8-дән бу јана етигадларына ҝөрә һәрби хидмәтдән имтина едән 28 Јеһованын Шаһиди азадлыға бурахылыб. Баш верәнләр Ермәнистан һөкумәтинин етигадларына ҝөрә һәрби хидмәтдән имтина едәнләрин һүгугларына мәһәл гојмамаг сијасәтини дәјишдирдијини ҝөстәрир. Бу сијасәт уҹбатындан 20 ил әрзиндә 450-дән чох ҝәнҹ Јеһованын Шаһиди һәбс едилмишди. 1993-ҹү илдән бу јана илк дәфәдир ки, етигадларына ҝөрә һәрби хидмәтдән имтина етдији үчүн һеч бир Јеһованын Шаһиди һәбс олунмајыб.

12 нојабрдан әввәл, октјабрын 8-и вә 9-у ҹәза мүддәтини 6 ај азалдан гануна әсасланараг, сәккиз Јеһованын Шаһиди азад едилмишди. Даһа 6 нәфәр исә октјабрын 24-ү азадлыға бурахылды. Һәмин 6 нәфәр Ермәнистанын 2013-ҹү ил ијунун 8-и алтернатив мүлки хидмәт ганунуна етдији дәјишикликләрдән јарарланан илк шәхсләрдир. Бу дәјишикликләр сајәсиндә артыг етигадларына ҝөрә һәрби хидмәтдән имтина едәнләр һәбс олунмајаҹаг; инди онлар һәрби гүввәләрин нәзарәти алтында олмајан алтернатив хидмәт үчүн әризә илә мүраҹиәт едә биләрләр.

Бу јени програм үчүн 90-дан чох Јеһованын Шаһиди мүраҹиәт едиб. 2013-ҹү ил 23 октјабр вә 12 нојабр тарихләриндә Ермәнистан Республика Комиссијасы 71 ҝәнҹин мүраҹиәтинә бахыб тәсдигләди. Комиссија галан әразиләрә дә гыса вахт әрзиндә бахаҹағыны билдирмишди.

Јеһованын Шаһидләринин Нју-Јоркда јерләшән үмумдүнја баш идарәләриндәки медиа нүмајәндәси Девид Симониан бу һагда демишди: «Биз чох шадыг ки, Ермәнистан һөкумәти бу ҝәнҹләри азад етди вә узун мүддәт давам едән бу проблем артыг өз һәллини тапмагдадыр».

Әлагә үчүн:

Бејнәлхалг: мәлумат хидмәти, Девид Симониан, тел.: +1 718 560 5000

Ермәнистан: Тигран Һарутјунјан, тел.: +374 93 900 482