ЗЕЛТЕРС, Алманија. 2013-ҹү илин ијунун 21-дә Лаутертал-Рајһенбаһда мәрһум Макс Либстерин адына гојулан абидәнин тәнтәнәли ачылышы баш тутмушду. Јеһованын Шаһиди олан Макс Либстер 5 илдән чох фашист һәбс дүшәрҝәләриндә олуб. Мерин вә шәһәр администрасијасынын диҝәр нүмајәндәләринин иштиракы илә баш тутмуш ачылыш мәрасиминдә јерли сакинләр, еләҹә дә мәрһумун ханымы Симон Либстер дә иштирак етмишди. Ханым Либстер дә Јеһованын Шаһидидир.

Миллијјәтҹә јәһуди олан Макс Либстер Һитлер режими дөврүндә, 1939-ҹу илдә ҝестапо тәрәфиндән һәбс едилмишди. О, беш алман һәбс дүшәрҝәсиндә — Заксенхаузен, Нојенгамме, Освентсим, Буна вә Бухенвалдда олуб. Онун аилә үзвләриндән сәккиз нәфәр дүшәрҝәләрдә һәлак олуб. Онларын арасында ҹәсәдини өз әли илә Заксенхаузен крематоријасына апардығы атасы да вар иди.

Һәбс дүшәрҝәләриндә Макс Либстер Јеһованын Шаһидләри олан мәһбусларла таныш олду. 1945-ҹи илдә азадлыға чыхандан сонра о вәфтиз олунуб Јеһованын Шаһиди олмушду. Абидәнин үзәриндәки тунҹ лөвһәҹикдә гејд олундуғу кими, Макс Либстерин иманы она «һәр шејә таб ҝәтирмәјә ҝүҹ верди». О, 2008-ҹи илдә, 93 јашында вәфат едиб.

Абидәнин гојулма мәрасими үчүн тәртиб олунан дәвәтнамәдә гејд олунурду ки, Макс Либстер Мүгәддәс Китабда әкс олунан «илаһи дәјәрләрин инсанда ән јахшы хүсусијјәтләри үзә чыхармаға гадир олдуғуна үрәкдән инанырды». Јеһованын Шаһидләринин Алманијадакы нүмајәндәси Волфрам Слупина дејир: «Биз чох шадыг ки, дини дөзүмсүзлүјә рәғмән өз иманына садиг галан чохсајлы һәмиманлыларымыздан биринин ҹәсарәти бу ҝүн һөрмәтлә јад едилир. Бу абидә бир даһа ону сүбут едир ки, Јеһованын Шаһидләринин сәдагәтлә әмәл етдији Мүгәддәс Китабын сүлһ вә бирлик тәлими бөјүк гүввәјә маликдир».

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000

Алманија: Волфрам Слупина, тел.: +49 6483 41 3110