АККРА, Гана. 2015-ҹи ил август ајынын сонунда Јеһованын Шаһидләри Гананын пајтахты Аккра шәһәриндә баш вермиш дашгынла бағлы јардым ишләрини тамамладылар. Гејд едәк ки, дашгын 200 нәфәрин һәјатына сон гојмуш вә евләрә ҹидди зијан вурмушду.

Јеһованын Шаһидләриндән өлән олмаса да, онлардан 250-си дашгына ҝөрә евләрини тәрк етмәли олдулар. Дашгындан бир ҝүн сонра, 2015-ҹи ил ијунун 4-ү Јеһованын Шаһидләринин Ганадакы филиалы тәбии фәлакәтдән зәрәр чәкәнләрә јардым комитәси јаратды. Бу комитә зәрәр чәкәнләрә јорған-дөшәк, палтар вә су вермәклә онларын әсас еһтијаҹларыны өдәјирди. Комитә һәмчинин зәрәр дәјмиш евләрин тәмирини вә тәмизләнмәсини тәшкил етди. Аккрада јашајан диҝәр Јеһованын Шаһидләри мүвәггәти сығынаҹаг кими гапыларыны зәрәр чәкмиш һәмиманлыларынын үзүнә ачдылар.

Дашгын уҹбатындан бир јанаҹаг долдурма мәнтәгәсиндә баш вермиш партлајыш нәтиҹәсиндә Адабракадакы су борулары сырадан чыхмышды. Буна ҝөрә бир нечә әрази сусуз галмышды. Филиал һәм Јеһованын Шаһидләрини, һәм дә гоншулары су илә тәмин етмәк үчүн Адабракадакы ибадәт евинә (Јеһованын Шаһидләринин ибадәт етдији јер) су чәни гојдулар.

Ијунун 6-сы, шәнбә ҝүнү филиал Алахо вә Адабракадакы һәмиманлылара вә диҝәр зәрәр чәкәнләрә тибби јардым ҝөстәрмәк үчүн Јеһованын Шаһидләриндән ибарәт 2 тибби јардым групу (5 һәким вә 2 тибб баҹысы) ҝөндәрди. Онлар малјарија, дөш гәфәси инфексијалары вә диареја (исһал) кими хәстәликләри мүалиҹә едирдиләр. Һәм филиал нүмајәндәләри, һәм дә јерли Јеһованын Шаһидләри һәмиманлыларына баш чәкәрәк онлара руһани вә мәнәви дәстәк олурдулар.

Јеһованын Шаһидләринин Ганадакы нүмајәндәси Натаниел Гбедема дејир: «Аккрадакы дашгында һәјатларыны итирән вә зәрәр чәкәнләрә ҝөрә тәәссүф һисси кечиририк. Бүтүн дүнјадакы Јеһованын Шаһидләри кими, биз дә бу фәлакәтдән әзијјәт чәкән инсанларын мәнәви, физики вә руһани тәләбатларыны өдәмәк үчүн әлимиздән ҝәләни едирик».

Әлагә үчүн:

Бејнәлхалг мәлумат хидмәти: Ҹ. Р. Браун, тел.: +1 718 560 5000

Гана: Натаниел Гбедема, тел.: +223 30701 0110