НЈУ–ЈОРК. Өлүмҹүл Ебола вирусу Гәрби Африкада түғјан едир. Јеһованын Шаһидләри өз диндашларыны бу хәстәликлә вә онун профилактикасы илә бағлы мәлуматландырыр.

Ебола вирусунун Гвинејада баш галдырдығы вә илдырым сүрәтилә гоншу Либерија вә Сјерра–Леонедә јајылдығы барәдә мәлум оланда Јеһованын Шаһидләринин һәмин әразидәки филиаллары дәрһал һәмин өлкәләрдәки јығынҹаглара хәбәрдарлыг мәктубу ҝөндәрди. Мәктубда һөкумәт органларынын хәстәликлә бағлы ҝөстәриш вә мәсләһәтләриндән савајы, вирусун нә дәрәҹәдә тәһлүкәли олдуғу, неҹә кечдији вә онун јајылмамасы үчүн лазым олан профилактик тәдбирләр барәдә јазылмышды. Јеһованын Шаһидләринин Сјерра–Леонедәки нүмајәндәси Колин Атик дејир: «Бурада инсанларын дахили хәстәликләр барәдә мәлуматы чох аздыр, ејни заманда Ебола вирусунун мәншәји барәдә чохлу јалан мәлуматлар јајылыб. Буна ҝөрә дә әввәл-әввәл инсанлар чашгынлыг ичиндә идиләр, билмирдиләр нә етсинләр. Анҹаг Падшаһлыг залларында сәсләнән ҝөстәришләри ешидән јығынҹаг үзвләримиз дәрһал онлара әмәл етмәјә башладылар».

Ијул ајында Јеһованын Шаһидләринин сәјјар тәмсилчиләри Сјерра–Леонедәки вә Гвинејадакы һәр јығынҹаға ики ҝүн әрзиндә баш чәкмишләр. Онлар һәр бир јығынҹагда «Итаәткарлыг һәјаты хилас едир» адлы мәрузә илә чыхыш етмишдиләр. Мәгсәд динләјиҹиләрә хәстәликдән горунма јолларыны изаһ етмәк вә ән сон ҝөстәришләрә әмәл етмәјә тәшвиг етмәк иди. Бу програм 2014-ҹү илин нојабр ајына кими давам едәҹәк. Јеһованын Шаһидләри һәмчинин Гвинејада, Либеријада вә Сјерра–Леонедә ибадәт јерләринин ҝиришиндә дезинфексијаедиҹи маје гатылмыш су илә тәҹһиз едилмиш әлүзјујанлар гојублар. Бу өлкәләрдәки Јеһованын Шаһидләринин әксәријјәти өз евләриндә дә бу ҹүр әлүзјујанлар гојублар.

Үмумдүнја Сәһијјә Тәшкилатынын (ҮСТ) 2014-ҹү ил октјабр ајынын 1-дә дәрҹ етдији мәлумата ҝөрә, Ебола вирусу бу дәфә түғјан едәндә Гәрби Африкада 7178 јолухма һалы гејдә алыныб вә 3300 адам һәјатыны итириб. Анҹаг бу рәгәмин артаҹағы ҝөзләнилир. Октјабрын 2-си үчүн олан мәлумата ҝөрә, Гвинеја вә Сјерра–Леонедә јашајан 2800 Јеһованын Шаһидиндән јалныз бир нәфәр, тибб баҹысы ишләјән бир гадын Ебола вирусуна јолухмуш вә 2014-ҹү ил сентјабрын 25-дә вәфат етмишди. Либеријада јашајан 6365 Јеһованын Шаһидиндән 10 нәфәри јолухма нәтиҹәсиндә һәјатыны итириб, онлардан 6-сы сәһијјә ишчиси олуб. Вирус тәзәликҹә Ниҝеријада да јајылыб, амма Јеһованын Шаһидләриндән һеч ким бу вируса јолухмајыб. Бу өлкәләрдә хидмәт едән хүсуси тәјинатлы мүждәчиләрин бу вируса јолухма һаллары мүшаһидә олунмајыб. Вирус јајылмаға башлајанда онлардан чоху мәзунујјәтдә, јахуд Авровада вә Бирләшмиш Штатларда конгресдә олублар. Онлардан бәзиләри бу јахынларда хидмәт етдикләри јерә гајыдыблар. Онлар еһтијат тәдбирләринә вә филиалын ҝөстәришләринә риајәт едир. Диҝәрләри исә авиарејсләр тәхирә салындығындан вә ја башга сәбәбләр уҹбатындан һәлә ки гајыда билмирләр.

Јеһованын Шаһидләринин сырасындан олан көнүллүләрдән ибарәт јардым комитәләри һәмиманлыларына өз аиләләринин, еләҹә дә Гәрби Африканын Ебола вирусундан даһа чох зәрәр чәкмиш өлкәләриндә јашајан баҹы-гардашларынын еһтијаҹларыны өдәмәјә көмәк едирләр. Либеријадакы Јеһованын Шаһидләринин тәмсилчиси Томас Најин дејир: «Мүгәддәс Китабын тәмизлик вә карантинлә бағлы гајдаларына риајәт етмәк бизә үзләшдијимиз вәзијјәтин өһдәсиндән ҝәлмәјә көмәк едир. Үстәлик, биз Мүгәддәс Китаба зидд ҝедән дәфн адәт-әнәнләриндән гачырыг. Бу, бүтүн диндашларымызы горујур, хүсусилә дә белә чәтин анларда».

Сјерра–Леоне радиоларындан бириндә Јеһованын Шаһидләринин өз диндашларына вә башга инсанлара Ебола вирусуна јолухмамаг үчүн неҹә көмәк етдикләри барәдә данышылмышды. Һәмин өлкәнин һөкүмәт нүмајәндәләри Јеһованын Шаһидләриндән хаиш етмишдиләр ки, онларын јардым комитәләри дөвләт органларына көмәк етсинләр.

Јеһованын Шаһидләринин Нју-Јоркдакы баш идарәсинин бејнәлхалг тәмсилчиси Ҹејмс Браун дејир: «Гәрби Африкадакы диндашларымызын еһтијатла даврандығыны, ејни заманда руһани фәалијјәтдән галмадыгларыны вә әлләриндән ҝәлдији гәдәр Мүгәддәс Китабын маарифләндирмә иши илә мәшғул олдугларыны ҝөрмәк чох хошдур. Биз Ебола епидемијасы илә мүбаризә апаран руһани баҹы-гардашларымызы вә башга инсанлары даим хатырлајыр вә онлар үчүн дуа едирик».

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000

Гвинеја: Терри Пуртје, тел.: +224 631 40 96 50

Либерија: Томас Најин, тел.: +231 886 513 414

Ниҝерија: Пол Ендрју, тел.: +234 7080 662 020

Сјерра–Леоне: Колин Атик, тел.: +232 77 850 790