2014-ҹү ил 22 јанвар тарихиндә Твер Вилајәт Мәһкәмәсинин үч һакиминдән ибарәт коллеҝијасы Јеһованын Шаһидләринин рәсми jw.org сајтыны гадаған едән ашағы инстансија мәһкәмәсинин гәрарыны ләғв етди *. Русија мәһкәмәләринин сон илләр әрзиндә Јеһованын Шаһидләри илә бағлы ишләрдә вердији гәрарлар онларын әлејһинә олса да, бу вилајәт мәһкәмәси сајтын гадаған олунмасы үчүн дәридән-габыгдан чыхан прокурора ујмады.

Москвадан тәхминән 160 километр шимал-гәрбдә јерләшән Твер шәһәринин ашағы инстансија мәһкәмәсинин 2013-ҹү ил 7 август тарихли гәрарындан сонра Русија дөвләтинин тәшәббүсү илә Јеһованын Шаһидләринин тәгиб олунмасы даһа да шиддәтләнди. Ҹәми 25 дәгигә давам едән динләмәдән сонра мәһкәмә сајтын гадаған олунмасы барәдә гәрар чыхартды. Јеһованын Шаһидләринин нүмајәндәләринә динләмәнин олаҹағы барәдә хәбәр верилмәмишдир, о ҹүмләдән јерли прокурорун ирәли сүрдүјү иттиһамлары тәгзиб етмәјә вә илк инстансија мәһкәмәсиндә өзләрини мүдафиә етмәјә имкан верилмәмишдир. Јеһованын Шаһидләри бу гәрар барәдә апелјасија шикајәтинин верилмә мүддәтинин битмәсинә бир нечә саат галмыш, јәни 2013-ҹү ил 12 сентјабр тарихиндә күтләви информасија васитәләриндән хәбәр тутмушдулар. Онлар дәрһал Твер Вилајәт Мәһкәмәсинә шикајәт әризәси илә мүраҹиәт етдиләр.

2014-ҹү ил 22 јанвар тарихиндә апелјасија шикајәти үзрә динләмә заманы вилајәт мәһкәмәси етираф етди ки, сајтын саһиби олан Ҝөзәтчи Гүлләси, Мүгәддәс Китаб вә Трактатлар Ҹәмијјәтинин (Нју-Јорк) һүгуглары позулмушдур вә тәрәфләрин һәр биринин өз дәлилләрини тәгдим етмәси үчүн јени динләмә тәјин етди. Әдлијјә вә Дахили Ишләр Назирликләринин Идарәләринин нүмајәндәләринин дәстәјинә архаланан прокурор мәһкәмәдән хаһиш етди ки, мәһкәмә сајтын «екстремист» олдуғуну бәјан етсин вә ону Русија Федерасијасынын әразисиндә гадаған етсин. Вилајәт мәһкәмәси онун аргументләрини рәдд етди.

Русија әразисиндә Јеһованын Шаһидләрини тәгиб етмәк үзрә кампанија: Јеһованын Шаһидләринин фәалијјәтини мәһдудлашдырмаг мәгсәдилә екстремизм барәдә ганунун дүзҝүн тәтбиг едилмәмәси. 2009-ҹу илдә Русија һөкумәти «Екстремист фәалијјәтинә мүгавимәт» барәдә федерал ганунунун гејри-дәгиг ифадәсиндән истифадә едәрәк Јеһованын Шаһидләринә гаршы тәшкил олунмуш кампанијаја башламышдыр. Әввәлләр бу кими һадисәләр тәк-түк һалларда олурду, инди исә бүтүн өлкәдә баш верир. Һөкумәт нөвбәти һаллара бәраәт газандырмаг үчүн екстремизм барәдә гануну дүзҝүн тәтбиг етмәмишдир:

• 1600-дән чох Јеһованын Шаһидинин һәбс едилмәсинә

• Тәхминән 70 дини нәшрләрин гадағасына

• 171 ев вә ибадәт јериндә ахтарышларын апарылмасына

• 69 дини ҝөрүшүн позулмасына

Твер мәһкәмәсиндә динләмә заманы прокурор сајтдакы нәшрләрдән алтысынын «екстремист» олдуғуну әсас ҝәтирәрәк сајтын гадаған олунмасына наил олмаг истәјирди. Твер Вилајәт Мәһкәмәси екстремизм барәдә гануна әсасланараг 2013-ҹү ил 7 август тарихиндә жw.орҝ сајтынын гадаған олунмасы барәдә гәрар чыхарды вә ону федерал екстремист материаллар сијаһысына дахил етди.

Бу гәрар өз мәгсәдилә гејри-мүтәнасиб иди, белә ки, бу гәрарда һеч бир алтернатив, мәсәлән, «екстремист» әдәбијјатлары сајтдан чыхармаг кими вариантлар нәзәрдә тутулмурду. Вилајәт мәһкәмәси биләндә ки, сајтын саһибләри «екстремист» дамғасы вурулан бүтүн нәшрләри Русија әһалисинин әлдә етмәмәси үчүн сајтдан ҝөтүрүб, дәрһал о нәтиҹәјә ҝәлди ки, сајтын гадаған олунмасы үчүн һеч бир гануни әсас јохдур. Бунунла бағлы гәрар артыг гүввәјә миниб, лакин прокурор алты ај әрзиндә кассасија шикајәти верә биләр.

Дүзәлиш олунасы чох шеј вар. Твер Вилајәт Мәһкәмәсинин гәрары вә вердији објектив гијмәт Русијанын диҝәр мәһкәмәләринин Јеһованын Шаһидләринә гаршы ҝөрдүјү репрессив тәдбирләрин там әксидир. Авропа Инсан Һүгуглары Мәһкәмәси (АИҺМ) Шаһидләрин дин азадлығы һүгугуну поздуғуна ҝөрә Русија һөкумәтини бир нечә дәфә мүһакимә едиб. АИҺМ-нын гәрарына ујғун давранмаг әвәзинә, Русија инсан һүгугларыны позмаға давам едир. Дин азадлығы һүгугларыны мүдафиә етмәјә чалышан Јеһованын Шаһидләри Русијаја гаршы АИҺМ-ја 23 шикајәт әризәси верибләр.

Твер Вилајәт Мәһкәмәсинин гәрары вәзијјәтин јахшылыға доғру дәјишәҹәјинә үмид етмәјә әсас верирми? Јеһованын Шаһидләри Русијанын бу гәрара, еләҹә дә АИҺМ-нын верәҹәји гәрарлара мүнасибәтини диггәтлә изләјәҹәкләр.