САНКТ-ПЕТЕРБУРГ, Русија. 2014-ҹү илин нојабрында Светлана Немчинова адлы Јеһованын Шаһиди күчәдә ичиндә 6000 авро (6800 АБШ долларындан чох) пул олан зәрф тапыб. О, узун чәкән ахтарышдан сонра саһибинә пулу ҝери гајтара билиб. Светлананын бу хејирхаһлығы барәдә телевизорда, радиода вә бир нечә интернет хәбәрләриндә мәлумат верилмишди.

Светлана Немчинова Москва шәһәриндән тәхминән 450 километр шималда јерләшән Вологда шәһәриндә сүпүрҝәчи ишләјир. О ишләјәркән бир зәрф ҝөрүр. Зәрфин ичинә баханда ҝөрүр ки, ичиндә јүксәк мәбләғдә пул вар. Үч ушағы илә бирликдә 12 квадрат метрлик садә бир евдә јашамасына бахмајараг Светлана дејир: «Пулу өзүмә ҝөтүрмәк ағлымдан белә кечмәди. Һәмин ан пулу итирән инсанын өзүнү неҹә пис һисс етдијини фикирләшдим».

Пулун саһибини тапмаг мәгсәдилә Светлана илк өнҹә гоншу биналарда јашајанлара билдирди. Һеч кәсдән бир хәбәр чыхмадығына ҝөрә, о, пулу јахынлыгдакы банка (зәрфин ичиндә һәмин банка аид олан гәбз) апарды. Банк мүәјјән етди ки, пул Павел Смирнова аиддир. Бир нечә ҹәһддән сонра ахыр ки, банк ишчиләри онунла әлагә јарада билдиләр вә пулу Светлана Немчинованын тапдығыны дедиләр.

Русијанын «Премиер» гәзетиндә бу һагда дәрҹ олунмуш мәгаләдә дејилир: «Светлана етдији һәрәкәтдә гејри-ади һеч нә ҝөрмүр. О, диндар инсандыр вә мүнтәзәм олараг Мүгәддәс Китаб охујур». Светлана «Премиер» гәзетинә вердији мүсаһибәдә демишди ки, тәтбиг етдији Гызыл гануна, Мәтта 7:12 ајәсинә әсасән белә давранмышды: «Буна ҝөрә дә инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един».

Хүсуси тәркибли боја иҹад едән рәссам Павел Смирнов бу пулу боја илә бағлы нөвбәти тәдгигатларыны апармагдан өтәри ләвазимат алмаг үчүн јығмышды. Павел Смирнов дејир: «Светланаја нә гәдәр миннәтдар олдуғуму сөзләрлә ифадә едә билмирәм. Светлананын еләдикләриндән сонра инсанлара олан етибарым артды. Јалныз бир шеј дејә биләрәм: “Һәгигәтән дә, Аллаһ вар”».

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000

Русија: Јарослав Сивулскиј тел.: +7 812 702 2691