СЕУЛ, Ҹәнуби Кореја. «Геллап» сорғусунун нәтиҹәләринә әсасән, Ҹәнуби Корејада инди даһа чох адам һөкумәтин етигадларына ҝөрә һәрби хидмәтдән имтина едәнләрә алтернатив хидмәтин вермәсини истәјир. Сорғу 2013-ҹү ил 4—7 нојабр тарихләриндә 1211 киши вә гадын арасында апарылмышды. Иштиракчыларын 68 фаизи етигадларына ҝөрә һәрби хидмәтдән имтина едәнләрә һәбс ҹәзасы кәсилмәси әвәзинә, алтернатив хидмәтин верилмәсинин тәрәфдары олдуғуну деди. Бу сорғу иҹтимаи рәјин мүһүм шәкилдә дәјишдијини ҝөстәрди, чүнки 2008-ҹи илдә апарылан ејни сорғунун нәтиҹәләринә ҝөрә, јалныз 29 фаиз инсан алтернатив хидмәтин тәрәфдары иди.

Ҝөрүнүр, Корејанын һүгуг саһәсиндә чалышанларын бәзиләри дә һәбсдән савајы, башга чыхыш јолунун олмасынын тәрәфдарыдыр. Сеул Милли Университетинин һүгуг факүлтәсинин профессору Һан Ин-соп «Етигадлара ҝөрә һәрби хидмәтдән имтина илә бағлы јаранан суаллар» адлы мәгаләсиндә јазмышды: «Чәтин ки, етигадларына ҝөрә һәрби хидмәтдән имтина едәнләри етик вә ја иҹтимаи гајда-ганунлары позмагда ҝүнаһландыран һаким тапылсын. Онларын сахланылмасы барәдә әмр белә верилмир, чүнки гачмајаҹагларына әминдирләр. Һәр дәфә тәгсирлик һаггында вердикт чыхаранда һакимләр өзләрини пис вә ҝүнаһкар һисс едирләр».

Бу јахынларда Инсан Һүгуглары үзрә Кореја Милли Комиссијасы бу мәсәләни ишыгландыран бир мүстәгил филм һазырламышды. Филмин «Буз чајы» адланан һиссәси һәрби хидмәтдән имтина едән бир Јеһованын Шаһидиндән бәһс едир. Филмин режиссору һәр ил етигадларына ҝөрә һәрби хидмәтдән имтина едән јүзләрлә Јеһованын Шаһидинин һәбс едилдијини өјрәндикдән сонра филми чәкмәјә гәрар вердијини билдирди. 2013-ҹү ил ијун ајында дәрҹ едилән БМТ-ин Инсан Һүгуглары Шурасынын һесабатына әсасән, бүтүн дүнјада етигадларына ҝөрә һәрби хидмәтдән имтина етдикләри үчүн һәбс едиләнләрин 93 фаизи Ҹәнуби Корејанын пајына дүшүр.

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000

Кореја Республикасы: Де Ил Һонг, тел.: +82 31 690 0055