ДАРҮССӘЛАМ, Танзанија. 2013-ҹү ил 12 ијул тарихиндә Танзанијанын ән али мәһкәмә инстансијасы олан Танзанија Апеллјасија Мәһкәмәси јекдилликлә гәрара алды ки, Мбеја вилајәтиндәки мәктәбләр 127 шаҝирдин дин азадлығы һүгугуну позмушдур. Бу шаҝирдләр виҹданларына әсасланараг дөвләт һимнини охумагдан имтина етдикләри үчүн мәктәбдән хариҹ едилмиш вә ја ҹәзаландырылмышдылар.

2007-ҹи илдә Шикула Мәктәб Шурасы дөвләт һимнини охумагдан имтина едән 5 шаҝирди мәктәбдән хариҹ етмишдир. Һәмин әразидә јерләшән диҝәр мәктәбләр исә 122 ибтидаи вә орта синиф шаҝирдини ејни сәбәбә ҝөрә ҹәзаландырмышды. Шаҝирдләрин тәһсил мәмурларына вә баш назирә шикајәти һеч бир нәтиҹә вермәди. Бундан сонра 127 шаҝирд Танзанијанын Али Мәһкәмәсинә (өлкәнин икинҹи ән али мәһкәмә инстансијасы) мүраҹиәт едәрәк дәјмиш зәрәрин әвәзинин өдәнилмәсини истәди. Али Мәһкәмә шаҝирдләрин мәктәбдән хариҹ едилмәси барәдә гәрары дәстәкләди, һалбуки мәһкәмәнин гәрары јекдил дејилди. Нәтиҹәдә, 2010-ҹу ил 2 декабр тарихиндә шаҝирдләр Апеллјасија Мәһкәмәсинә мүраҹиәт етдиләр. Мәһкәмә сәнәдләриндә гејд олунур ки, Апеллјасија Мәһкәмәсинин гәрары Али Мәһкәмәнин гәрарыны вә онун бүтүн нәтиҹәләрини ләғв едир.

Танзанијадакы Јеһованын Шаһидләринин нүмајәндәси Задок Мваипвиси гејд едир: «Мәһкәмәнин гәрары вә бу ҝәнҹләрин виҹданларына әсасланан мөвгеләрини дәстәкләмәси бизи севиндирди. Бу гәләбә нәинки Јеһованын Шаһидләринин, һәм дә бүтүн Танзанија вәтәндашларынын конститусија илә мүдафиә олунан дини азадлыг һүгугуну бир даһа тәсдигләди».

Әлавә мәлумат:

Бејнәлхалг: мәлумат хидмәти, Ҹ.Р. Браун, тел.: +1 718 560 5000

Танзанија: Задок Мваипвиси, тел.: +255 22 2650592