ФОРТ-ЛОДЕРДЕЈЛ (Флорида штаты, АБШ). 2014-ҹү ил нојабрын 14-ү, Јеһованын Шаһидләри Америка жест дили (АЖД) тәрҹүмә групунун Патерсондакы Ҝөзәтчи Гүлләсинин Тәлим Мәркәзиндән (Нју–Јорк) Форт-Лодердејлә (Флорида) көчүрүлмәсинә һазырлашырдылар. Онлар Патерсонда 1995-ҹи илдән бәри Мүгәддәс Китаб вә она әсасланан әдәбијјатлары АЖД-ә тәрҹүмә едирләр. Сон бир нечә ај әрзиндә Јеһованын Шаһидләри Форт-Лодердејлдә јени офисләр вә сәсјазма студијалары тикиб гуртарыблар. 2015-ҹи илин мајында АЖД тәрҹүмә офиси артыг иш үчүн һазыр иди.

Бу АЖД видеолары jw.org сајтында вә ДВД форматда әлчатандыр. Бу видеолар һәмчинин мүнтәзәм олараг, дүнјанын дөрд бир ҝушәсиндә кечирилән 500-дән чох јығынҹаг ҝөрүшләриндә, һабелә реҝионал (илдә бир дәфә) вә рајон (илдә ики дәфә) топлантылары кими бөјүк ҝөрүшләрдә истифадә олунур.

Флоридадакы Јеһованын Шаһидләринин АЖД тәрҹүмә групунун координатору Јонатан Галвез дејир: «Бизим мәгсәдимиз мәншәјиндән вә тәһсилиндән асылы олмајараг, әксәр истифадәчиләримизин видеоларымызы асан баша дүшмәсини тәмин етмәкдир. Ади данышыг дилиндә ләһҹәләр олдуғу кими, тәхминән 45 өлкәдә истифадә олунан АЖД-нин дә өзүнәмәхсус ләһҹәләри вар. Тәрҹүмә офисинин Форт-Лодердејлә көчмәси лап јеринә дүшдү. Чүнки бурада АЖД-дән истифадә едән чохлу милләтдән олан инсанлар вар».

2014-ҹү илдә сосиал-мәдәни вә антроположи дилчилик үзрә докторант Франк Бетчер Јеһованын Шаһидләринин Ричмондда (Вирҝинија) кечирдији Америка жест дилли реҝионал топлантысында иштирак етмишди. Ҝәлишинин мәгсәди жест дили вә ешитмә габилијјәтиндән мәһрум олмуш инсанларла бағлы лингвистик вә антрополоҝија саһәсиндә арашдырма апармаг иди. Др. Бетчер вурғулајыр: «Ричмонддакы топлантыда ајдын ҝөрүнүрдү ки, тәшкилатыныз АЖД-нин тәрҹүмәсинин кејфијјәтинә өнәм верир. Бу хүсусилә кејфијјәтли һазырланмыш Мүгәддәс Китаб ајәләринин видео тәрҹүмәсиндән дәфәләрлә истифадә олунмасындан ҝөрүнүрдү. Тәрҹүмәнизә сөз ола билмәз». О әлавә едир: «Мүгәддәс Китабы АЖД-ә тәрҹүмә етдикләринә ҝөрә Јеһованын Шаһидләринә чох миннәтдарам. Чүнки бу, ҹәмијјәтимиздә вә дүнја тарихиндә чох гијмәтли бир әсәрдир. Фикримҹә, дүнјанын инкишафына тәсир едән бу гијмәтли әсәр һамыја олдуғу кими, ешитмә гүсурлу адамлар үчүн дә әлчатан олмалыдыр».

Јеһованын Шаһидләринин үмумдүнја тәрҹүмә офисләри тәхминән 80 жест дилиндә сајсыз-һесабсыз видеонәшрләр һазырлајырлар. Бу видеонәшрләр пулсуздур. Јеһованын Шаһидләри һәмчинин «JW Library Sign Language» програмыны һазырлајыблар. Бунун сајәсиндә истифадәчиләр асанлыгла jw. org сајтында јерләшән жест дилиндә олан видеолара баха вә онлары јүкләјә биләрләр.

Әлагә үчүн:

Бејнәлхалг: мәлумат хидмәти, Ҹ. Р. Браун, тел.: +1 718 560 5000