НЈУ-ЈОРК. Лилиан Гобитас Клозе 2014-ҹү ил 22 август тарихиндә, 90 јашында Ҹорҹија штатынын Фејетвил шәһәриндәки евиндә вәфат етди. О, мәктәб илләриндә бајрағы саламламадығы үчүн Бирләшмиш Штатларын Али Мәһкәмәси онун барәсиндә мәһкәмә иши ачмышды.

Јеһованын Шаһиди олан Лилиан Гобитас вә кичик гардашы Уилјам 1935-ҹи ил 6 октјабр тарихиндә дөвләт радиосунда Мүгәддәс Китабын бүтпәрәстлијә гаршы мүнасибәти барәдә верилиши динләјәндән сонра даһа бајрағы саламламадылар. Бунун үстүндән бир нечә һәфтә кечәндән сонра онлар мәктәбдән говулдулар. Аталары Уолтер ушагларыны мүдафиә етмәк үчүн мәһкәмәјә мүраҹиәт етди вә јерли мәһкәмәләрдә гәләбә газанды. 1940-ҹы ил 3 ијун тарихиндә мәктәб комитәси Али Мәһкәмәјә шикајәт етди вә «Мајнерсвилл Мәктәб Рајону Гобитисә гаршы» мәһкәмә ишиндә Гобитас аиләсинин әлејһинә гәрар верилди. (Мәһкәмә сәнәдләриндә Гобитас аиләсинин сојады сәһв јазылыб.) Үч ил сонра, 1943-ҹү ил 14 ијун тарихиндә, Бајраг Ҝүнүндә Али Мәһкәмә 1940-ҹы илдә «Гобитис» мәһкәмә ишиндә чыхардығы гәрары ләғв етди вә «Гәрби Вирҹинија Штатынын Тәһсил Комитәси Барнеттә гаршы» мәһкәмә ишиндә гәрар верди ки, Јеһованын Шаһидләри олан ушаглар јенидән мәктәбә гајыда биләрләр. АБШ-ын тарихиндә илк дәфә иди ки, Али Мәһкәмә гыса вахт әрзиндә өз гәрарыны дәјишмишди.

Лилиан Гобитас 1923-ҹү ил нојабрын 2-си Пенсилванија штатынын Мајнерсвилл шәһәриндә дүнјаја ҝөз ачмышды. Атасынын ады Уолтер, анасынын ады Рут иди. О, 1935-ҹи ил мартын 4-ү Јеһованын Шаһиди кими вәфтиз олунмушду. 20 јашында икән Лилиан таммүддәтли Мүгәддәс Китаб мүәллими олду (Јеһованын Шаһидләри онлары даими пионер адландырырлар). Сонралар, 1946-ҹы илин февралындан 1953-ҹү илин апрелинә кими Јеһованын Шаһидләринин Бруклиндәки Баш идарәсиндә ишләмишди.

Лилиан 1951-ҹи илдә Јеһованын Шаһидләринин Авропада кечирдији конгресдә оларкән Алманија филиалында Ервин Клозе илә таныш олду. Ервин Нју-Јоркда, Саут-Лансингдә Ҝөзәтчи Гүлләсинин Мүгәддәс Китаб Мәктәби Ҝиладда тәһсил алдығы мүддәтдә онлар бир-бириләрини јахындан таныдылар. Ервин 1952-ҹи илдә мәзун олду вә Вјанаја (Австрија) тәјинат алды. Лилиан да 1954-ҹү илин февралында Јеһованын Шаһидләринин хүсуси тәјинатлы мүждәчиләр мәктәбини битирди.

1954-ҹү ил мартын 24-ү Вјанада Ервинлә аилә гурду вә бирликдә орада хүсуси тәјинатлы мүждәчи кими хидмәт етдиләр. Лакин Јеһованын Шаһиди олдуғуна ҝөрә насист һәбс дүшәрҝәсиндә амансыз рәфтара мәруз галан Ервинин сәһһәтиндә проблем јарандығы үчүн онлар елә һәмин илин ахырында Бирләшмиш Штатлара гајытмалы олдулар. Сонралар онларын Стефан Пол вә Јудит Дебора адында ики ушағы олду. 1967-ҹи илдә Клозе аиләси Ҹорҹија штатынын Ривердал шәһәринә көчдү. Онлар бу шәһәрдә Мүгәддәс Китаб үзрә маарифләндирмә ишини ҝениш мигјасда һәјата кечирдиләр.

Лилианын гызы Јудит Клозе, баҹылары Ҹинни Фрај вә Грејс Рејниш вә гардашы Пол Гобитас һәлә дә сағдыр. О, әриндән, валидејнләриндән, гардашы Уилјам Гобитасдан, баҹысы Ҹој Јубетадан вә гардашы Стефан Пол Клозедән габаг вәфат етди.

Әлагә үчүн:

Бејнәлхалг мәлумат хидмәти: Ҹ. Р. Браун, тел.: +1 718 560 5000