НЈУ-ЈОРК. 2014-ҹү ил 20—22 вә 27—29 ијун тарихләриндә Јеһованын Шаһидләри Шәрги Рутерфорддакы (Нју-Ҹерси) «Метлајф» стадионунда «Аллаһын Падшаһлығыны һәр шејдән үстүн тутун!» адлы бејнәлхалг конгресә топлашмышдылар. Бејнәлхалг конгресләр ардыҹыл олараг инҝилис вә испан дилләриндә кечирилмишди.

Бу ики конгресдә иштирак едәнләрин ән јүксәк сајы 118 000 олмушдур. Бу конгресләр Нју-Јоркда вә әтраф шәһәрләрдә Јеһованын Шаһидләринин сон бир нечә ониллик әрзиндә кечирдији ән бөјүк конгресдир. Диҝәр шәһәрләрдә исә видеојајым васитәсилә конгресин мүәјјән һиссәләрини 407 000-дән артыг инсан изләмишди. Үмумиликдә, 525 500-дән чох инсан бу конгресдә иштирак етмишди.

Конгресин әксәр һиссәси Мүгәддәс Китаб принсипләринин практики тәтбигини ҝөстәрән сәһнәҹикләрдән вә видеочархлардан ибарәт иди. Конгресләрин һәр ҝүнүнүн сонунда Јеһованын Шаһидләринин Рәһбәрлик Шурасынын үзвү јекун мәрузә илә чыхыш етмишди. 20—22 ијун тарихләриндә Девид Сплејн, 27—29 ијун тарихләриндә исә Ҹефри Ҹексон мәрузә сөјләмишди.

Һәмчинин һәр ики конгресдә вәфтиз мәрасими дә олмушду. Конгресләрин кечирилдији стадионда 1255 нәфәр, конгресләрин јајымландығы јерләрдә исә 2930 нәфәр вәфтиз олунмушду. Онларын үмуми сајы 4185 нәфәр олмушду.

Конгресә Арҝентина, Австралија, Белиз, Бөјүк Британија, Чили, Коста-Рика, Ел-Салвадор, Алманија, Јунаныстан, Гватемала, Һондурас, Италија, Малајзија, Мексика, Никарагуа, Панама, Перу, Испанија вә Венесуеладан гонаглар дәвәт олунмушду.

Јеһованын Шаһидләринин нүмајәндәси Ҹ. Р. Браун дејир: «Бу конгресләр чохларымыза 1958-ҹи илдә Нју-Јоркда кечирилән конгреси хатырлатды. О вахт “Јанки” вә “Поло Граундс” стадионларында кечирилән конгресләрдә 253 000-дән чох инсан иштирак етмишди. Бу ил “Метлајф” стадионунда кечирилән конгресләр Јеһованын Шаһидләринин тарихинә әламәтдар һадисә кими јазылаҹаг».