2015-ҹи илдә тәхминән 175 000 нәфәр Јеһованын Шаһидләринин Мексикадакы Мәркәзи Америка филиалыны зијарәт етди. Бура һәр ҝүн орта һесабла 670 нәфәр ҝәлирди. Зијарәтчиләрин чоху кирајәләдикләри автобусларда бөјүк групларла бир нечә ҝүн јол ҝәлмишдиләр. Бәзиләри бу сәјаһәти ајлар өнҹә планлашдырмышды.

Бејтел кими танынан филиалы зијарәт етмәк үчүн бәзиләри мүәјјән гурбанлар вермишдиләр. Мисал үчүн, Веракрусдакы бир јығынҹағын әксәр үзвләринин 550 километрлик јолу ҝетмәк үчүн автобус пулуну өдәмәјә имканы чатмырды. Буна ҝөрә дә онлар «Бејтел пројекти» адлы план һазырлајырлар. Онлар груплар тәшкил едиб һазырладыглары јемәкләри сатыр, һәмчинин пластик габлары топлајыб тәкрар емал мүәссисәләринә тәһвил верирдиләр. Беләҹә, үч ајын ичиндә јол пулу јыға билдиләр.

Бәс бу әзијјәтләрә дәјәрди? Онлар әмин идиләр ки, дәјәрди. Мисал үчүн, Лусио адлы бир ҝәнҹ дејир: «Бејтели зијарәт едәндән сонра гаршыма руһани мәгсәдләр гојмаг гәрарына ҝәлдим. Һал-һазырда јығынҹағын ишләринә әввәлкиндән даһа чох ҹан јандырырам». 18 јашлы Елизабета исә дејир: «Бејтелдә Јеһованын хидмәтчиләринә хас олан әсл мәһәббәти ҝөрә вә дуја билдим. Аллаһ үчүн даһа чох шеј етмәк истәјим аловланды вә мән өнҹүл хидмәтинә башладым».

Бәзән бир ҝүндә минләрлә зијарәтчи ҝәлир. «Бејтел туру» масасындакы ишчиләр һамыны меһрибан гаршыламаг үчүн әлләриндән ҝәләни едир. Лиза дејир: «Бу гәдәр чохлу гонаг ҝөрмәк олдугҹа хошдур. Онларын Бејтели неҹә гијмәтләндирдикләрини ҝөрмәк, бура ҝәлмәк үчүн мин бир әзијјәтдән кечдикләрини билмәк иманымы мөһкәмләндирир».

Бәзән Бејтелин мүхтәлиф шөбәләринин ишчиләри дә екскурсијаја ҝәлән минләрлә зијарәтчијә бәләдчилик едир. Бу, әлавә иш олса да, онлар ҹани-көнүлдән чалышыр. Хуан дејир: «Турдан сонра гонагларын үзүндәки севинҹи ҝөрәндә зәһмәтимин һәдәр ҝетмәдијини баша дүшүрәм».

Ушаглар да Бејтели зијарәт етмәкдән зөвг алыр. Компүтер шөбәсиндә ишләјән Норико дејир: «Екскурсија заманы ушаглардан сорушурам “Бејтелдә хидмәт етмәк истәјирсиз?” Онларын һамысы “һә” дејирләр». Ушагларын Бејтелдә ән чох севдији јерләрдән бири «Јеһованын досту ол» адлы ҹизҝи филминин гәһрәманлары Емин вә Нәрминин там өлчүлү макетләринин гојулдуғу ҝушәдир. Бурада онларла шәкил чәкдирирләр. Нурико дејир: «Ушагларын онлардан өтрү үрәји ҝедир».

Бу балаҹалар бејтеллиләрә зәһмәтләринә ҝөрә миннәтдарлыг билдирир. Мәсәлән, Мексикадан олан Һенри адлы бир ушаг дахыла пул јығырды ки, Бејтелә ҝәләндә ианә етсин. Ианәси илә бирликдә вердији мәктубда нөвбәти сөзләри јазмышды: «Истәјирәм бу пулларла чохлу журналлар чап едәсиниз. Јеһова үчүн ишләдијинизә ҝөрә чох сағ олун».

Јеһованын Шаһидләри бүтүн дүнјадакы филиал вә чапханаларында пулсуз екскурсијалар кечирир. Сизи филиалларымызы зијарәт етмәјә дәвәт едирик. Әминик ки, мәмнун галаҹагсыныз. Екскурсијалар барәдә әтрафлы мәлумат әлдә етмәк үчүн ҺАГГЫМЫЗДА > ФИЛИАЛЛАР ВӘ ЕКСКУРСИЈА бөлмәсинә дахил олун.