Бу ҝүн Јеһованын Шаһидләринин әксәр нәшрләри рәнҝли шәкилләрлә зәнҝиндир. Амма бу, һәмишә белә олмајыб. 1879-ҹу илдә ишыг үзү ҝөрән «Сион Ҝөзәтчи гүлләси»нин илк сајы үмумијјәтлә шәкилсиз иди. Бундан сонра да узун илләр әрзиндә нәшрләримиз, тәк-түк иллүстрасијасы вә ја ағ-гара шәкли олан мәгаләләри чыхмаг шәртилә, тамамилә мәтндән ибарәт олуб.

Лакин индики нәшрләримизин чоху шәкил вә иллүстрасијаларла зәнҝиндир. Әдәбијјатларымызда, еләҹә дә бу сајтда ҝөрдүјүнүз фотошәкилләрин вә иллүстрасијаларын әксәријјәти фотографларымызын вә рәссамларымызын әл ишидир. Әлбәттә ки, онларын әрсәјә ҝәлмәсиндә диггәтли вә әсаслы арашдырмалар бөјүк рол ојнајыр. Бунлар ади шәкилләр дејил, бунлар тарихдән ибрәт ҝөтүрмәјә вә ваҹиб Мүгәддәс Китаб һәгигәтләрини баша дүшмәјә көмәк едән вәсаитләрдир.

Бурадакы иллүстрасијаја диггәтлә бахын. Илк дәфә бу иллүстрасија «Аллаһын Падшаһлығы һаггында ‘әтрафлы шәһадәт верин’» китабынын 19-ҹу фәслиндә чап едилиб. Һадисә јери гәдим Коринф шәһәридир. «Һәвариләрин ишләри» китабынын 18-ҹи фәслиндән билдијимиз кими, һәвари Павел бима, јәни һаким күрсүсү гаршысына ҝәтирилир. Тәдгигатчылар Павелин гаршысына ҝәтирилдији вали Галлионун дурдуғу мәрмәр күрсүнүн јери вә рәнҝи һагда рәссама археоложи мәлуматлар тәгдим етмишдиләр. Һәмчинин биринҹи әсрин Рома ҝејимләри һагда верилән мәлуматларын сајәсиндә рәссам вали Галлиону (шәклин мәркәзиндә) о вахтлар аристократлара хас олан ҝејимдә чәкә билмишди. Онун әјниндә туника вә енли бәнөвшәји золағы олан тога, ајагларында исә калсеј адланан ајаггабы ҝөрмәк олар. Тәдгигатчылар тәјин етмишләр ки, Галлио бимада оларкән, чох ҝүман ки, үзү шимал-гәрбә тәрәф дурурду. Бу мәлумат сајәсиндә рәссам сәһнәнин ишыгландырылмасыны дүзҝүн мүәјјән едә билмишди.

Тәдгигатлары сәнәдләшдирмәк вә шәкилләри ҝәләҹәкдә тәкрар истифадә етмәк үчүн биз онлары каталога дахил едирик. Узун илләр әрзиндә шәкил вә иллүстрасијалары онларын чап едилдији нәшрләрә ујғун олараг бөјүк зәрфләрдә сахлајырдыг. Фотошәкилләр мөвзуја ујғун груплашдырылмышды. Зәрфләрин сајы артдыгҹа лазым олан шәкли тапмаг вә ону тәкрарән истифадә етмәк чәтинләширди.

1991-ҹи илдә тәләбатларымыза ҹаваб верән шәкил базасынын ахтарыш системини ишләјиб-һазырладыг. Шәкил Хидмәт Системи ады верилән бу базада 440 000-дән чох иллүстрасија сахланылыр. Нәшрләримиздә чап едилән иллүстрасијалардан башга, орда минләрлә фотошәкилләр дә вар ки, онлардан ҝәләҹәкдә фајдаланмаг олар.

Иллүстрасијанын чап едилдији нәшрин ады, тарихи, орадакы һәр бир деталын ады, шәкилдә тәсвир олундуғу һадисәнин еһтива етдији дөвр — бир сөзлә, һәр шеј гејдә алыныр. Јени нәшр һазырлананда гыса вахт әрзиндә мүнасиб шәкилләр тапмаг чох ваҹибдир.

Бәзән һансыса шәкил вә ја иллүстрасијадан истифадә етмәздән өнҹә, өзәл мәнбәләрдән иҹазә алмаг лазым ҝәлир. Туталым, «Ојанын!» журналында чап едиләҹәк бир мәгалә үчүн Сатурн планетинин һалгаларынын шәкли лазымдыр. Көмәкчиләримиз мүнасиб шәкили тапанда саһиби илә әлагә јарадыб ондан истифадә етмәк үчүн иҹазә истәјирләр. Мүгәддәс Китаб үзрә үмумдүнја маарифләндирмә ишимизи нәзәрә алараг, бәзиләри ондан пулсуз, диҝәрләри исә пул өдәмәк вә ја шәклин алтында мәнбәни гејд етмәк шәрти илә истифадәсинә иҹазә верирләр. Шәклин саһиби илә разылыға ҝәлдикдән сонра һәмин шәкил әдәбијјатымызда чыхыр вә мәлумат базасынын каталогуна дахил едилир.

Бу ҝүн нәшрләримиздән бәзиләри, әсас етибарилә, иллүстрасијалардан ибарәтдир. Нүмунә үчүн бу сајтда чыхан «Мүгәддәс Китаб һекајәләри шәкилләрлә» рубрикасыны, еләҹә дә һәм сајтымызда јер алан, һәм дә чап олунан «Аллаһын сөзүнә гулаг ас» кими рәнҝли брошүралары ҝәтирмәк олар. Онларын өзәллији ондадыр ки, сөзләрә аз јер верилиб. Бунунла белә, орада чох ваҹиб ибрәт дәрсләри вар. Бу, еләҹә дә сајтымызда чыхан вә чап едилән нәшрләримизин һамысы Мүгәддәс Китабы танытмаг үчүндүр.