Бөјүк Британијадакы Јеһованын Шаһидләри Ессекс графлығындакы Челмсфорд шәһәри јахынлығында јени филиалын тикинтисинә башламышлар. Мәнзәрәси ҝөзәл олан бу әрази бир нечә һејван нөвүнүн мәскәнидир. Һәмин һејван нөвләри Бирләшмиш Краллыгда 1981-ҹи илдә гәбул олунан вәһши тәбиәтин вә кәнд тәбиәтинин мүдафиәси илә бағлы акта әсасән горунурлар. Бәс тикинти заманы Јеһованын Шаһидләри бу акты позмамаг вә тәбиәтә зәрәр јетирмәмәк үчүн нәләр едирләр?

Јеһованын Шаһидләри тикинтијә јарарлы олмајан тахталардан гозлуг сүлејсинләр үчүн тикинти әразисиндән кәнарда балаҹа јувалар тикибләр. Онлар һәмчинин сүлејсинләр үчүн хүсуси көрпү тикибләр. Филиалын ҝиришинә ҝедән әсас јолда асылан бу көрпү ағаҹларда вә ҹанлы чәпәрләрдә (ағаҹлардан вә коллардан ибарәт сых чәпәр, һасар) јашајан сүлејсинләрин раһат ҝедиш-ҝәлишини тәмин едир. Бундан әлавә, Јеһованын Шаһидләри ҹанлы чәпәрләрин мүдафиәси илә бағлы програмдакы ҝөстәришләрә әмәл едирләр. Бу програм хүсусилә сүлејсинләрин мүдафиәси үчүн нәзәрдә тутулуб. Сүлејсинләр гыш јухусуна ҝедәндә ҹанлы чәпәрләрин бәзи һиссәләри кәсилир. Һәр ил ҝөрүлән бу просес заманы ишчиләр максимум чалышырлар ки, сүлејсинләри ојатмасынлар вә онларын кифајәт гәдәр гидалары олсун.

Јеһованын Шаһидләри һәмчинин ади суиланларыны, диридоған кәртәнкәләләри вә ҹылыз корамал кими танынан ајагсыз кәртәнкәләләри дә горујурлар. Екологлар дам плитәләринин алтында мүвәггәти сығынаҹаг тапан бу сүрүнәнләри ҝөтүрүб тикинти әразисиндән тәһлүкәсиз әразијә апардылар. Һәмин әразидә сүрүнәнләр үчүн гышлама камералары вә хүсуси горујуҹу һасарлар да вар. Јеһованын Шаһидләри мүтәмади олараг һәмин һасарлары јохлајырлар ки, сүрүнәнләр һәјатлары үчүн тәһлүкәли олан тикинти әразисинә кечмәсинләр.

Һамарбурун јарасаларын актив ҝеҹә һәјатына мане олмамаг үчүн тикинти әразисиндә һәрәкәтә һәссас ЛЕД лампалары гурашдырылыб. Бу лампалар јалныз машын һәрәкәтә дүшәндә јаныр. Галан вахтларда исә әтраф гаранлыг олур. Јарасалар јемләрини ҝеҹә вахты әразинин әтрафында олан ҹанлы чәпәрләрдә ахтарырлар. Буна ҝөрә дә чәпәрләрин әксәријјәтинин горунмасы вә ики километр јарымдан артыг узунлугда јениләринин әкилмәси планлашдырылыр. Бәзи ағаҹлары кәсмәк лазым ҝәлдији үчүн ишчиләр јарасалар үчүн јува тикмәли олдулар.

Јеһованын Шаһидләри нәглијјатдан елә истифадә едирләр ки, чохлу сајда гијмәтли, гоҹаман ағаҹларын көкләрини зәдәләмәсинләр. Бу гоҹаман ағаҹлар онурғасызларын, јарасаларын вә гушларын еви сајылыр. Јеһованын Шаһидләри бу јолларла Челмсфорддакы вәһши тәбиәти горујур.