2013-ҹү ил октјабрын 5-и, шәнбә ҝүнү Ҝөзәтчи Гүлләси, Мүгәддәс Китаб вә Трактатлар Ҹәмијјәтинин (Пенсилванија) сајҹа 129-ҹу иллик ҝөрүшү кечирилиб. 21 өлкә вә әразијә јајымланан програмы ҹанлы вә ја бирбаша Интернет-јајым васитәсилә 257 294 нәфәр изләмишди. Базар ҝүнү ҝөрүшүн тәкрарына башга Шаһидләр дә бахмышды. Үмумиликдә исә бу ҝөрүшү изләјәнләрин сајы 31 өлкә вә әразидә 1 413 676 нәфәр олуб. Бу ил кечирилән ҝөрүш иштиракчыларын сајына ҝөрә 2013-ҹү ил апрелин 28-дә Мексикада вә Мәркәзи Америкада 1 327 704 нәфәрин иштиракы илә кечирилән хүсуси ҝөрүшү өтүб кечмишди вә индијәдәк Јеһованын Шаһидләринин кечирдији ән бөјүк ҝөрүш олду.

1920-ҹи илләрдән етибарән Јеһованын Шаһидләри конгресләрини телефон хәтләри вә ҝениш радиошәбәкә васитәсилә дүнјанын бир чох јерләринә јајымлајырдылар. Лакин инди Интернет технолоҝијалары сајәсиндә узагларда јашајанлар белә ҝөрүшләри истәр ҹанлы, истәрсә дә програмын битмәсиндән гыса мүддәт сонра һәм ҝөрә, һәм дә ешидә билирләр. АБШ-да јашајан Уилјам адлы Јеһованын Шаһиди 1942-ҹи илдә Ричмондда (Вирҝинија штаты) кечирилән конгресдә иштирак етмиш вә програма телефон бағлантысы васитәсилә гулаг асмышды. Сонунҹу дәфә кечирилән иллик ҝөрүшү изләјән Уилјам һәмин конгреси хатырлајараг дејир: «Програмы ҝөрмәк даһа чох фајда ҝәтирир. Бунун јерини һеч нә вермир».

Јеһованын Шаһидләринин мүхтәлиф филиалларынын үзвләри бу ҝөрүшүн онлајн-јајымыны тәшкил етмәк үчүн бир илдән чох ишләјиб вә минләрлә саат сәрф едибләр. Ҹанлы јајым олан ҝүн мүтәхәссисләр ҝөрүшә Бруклиндәки (Нју-Јорк) идарәетмә мәркәзиндән нәзарәт едирдиләр вә ҝөрүшүн 15 саат гуршағында јерләшән әразиләрә јајымланмасы үчүн ијирми дөрд саат нөвбә чәкмишдиләр. Јајымын тәшкил вә нәзарәт едилмәсиндә көмәк едән Рајан дејир: «Јухусуз галсаг да, чохлу инсанын бу ҝөрүшдән фајдаланаҹағыны билмәк нәјә десән дәјәрди».