Испанијада Јеһованын Шаһидләри мүнтәзәм олараг 68 һәбсханаја баш чәкирләр вә 600–ә јахын мәһбусла Мүгәддәс Китаб өјрәнмәси кечирирләр.

Онлардан бири Јеһованын Шаһиди олмаздан әввәл өмрүнүн 12 илини дәмир бармаглыглар архасында кечирән Миҝелдир. Инди о, һәр һәфтә вахтилә јатдығы һәбсханаја баш чәкир. Бәс о, буну нәјә ҝөрә едир? Миҝел истәјир ки, она көмәк етдикләри кими, о да башга мәһбуслара һәјат тәрзләрини дәјишмәјә көмәк етсин.

Сон сәккиз ил әрзиндә Миҝел бир чох мәһбусла Мүгәддәс Китаб өјрәнмәси кечириб. О дејир: «Јатдығым һәбсханадакы мәһбуслара көмәк етмәк хошума ҝәлир. Онларын ҹинајәт аләминдән ҹанларыны гуртармаг истәкләрини ҝөрәндә чох севинирәм».

Миҝелин дөрд јашы оланда сәрхош бир сүрүҹү атасыны вуруб өлдүрүр. Дул галан анасы аиләни доландырмаг үчүн сәһәрдән ахшама гәдәр ишләмәли олур.

Миҝел вә онун бөјүк гардашы дәрсләри бурахмаға вә евләрдән, машынлардан оғурлуг етмәјә башлајырлар. 12 јашында Миҝел хырда ҹинајәтләр төрәдир. Артыг 15 јашында исә о, наркотик алверчиси кими калан пул газаныр. Миҝел ҝероин вә кокаинә гуршаныр. Баһа баша ҝәлән вәрдишинин хәрҹләрини өдәмәк үчүн о, даһа чох оғурлуг етмәјә башлајыр. 16 јашындан етибарән исә о, дәфәләрлә һәбсханаја дүшүр. Чох кечмир ки, гаты ҹинајәткар олур. Миҝел данышыр: «Мән әмин идим ки, ја һәбсханада өләҹәјәм, ја да артыг доза гәбул етмәкдән. Өзүмү һөрүмчәк торуна дүшмүш милчәк кими һисс едирдим».

Лакин 1994-ҹү илдә Миҝел һәбсханада икән досту Јеһованын Шаһидиндән она мәктуб јазмасыны хаһиш едир. Һәмин мәктубдан Миҝел өјрәнир ки, Аллаһ јер үзүндә Ҹәннәти бәрпа етмәк нијјәтиндәдир. Бу мәктубу јазан Шаһид Миҝели һәјат тәрзини дәјишмәјә тәшвиг едир, чүнки јалныз бу һалда о, һәмин вәдин јеринә јетмәсини өз ҝөзләри илә ҝөрә биләр. Миҝел бөлүшүр: «Онун сөзләри үрәјимә тәсир етди. Һәмин ҝүн мәним үчүн һәр шеј дәјишди вә мән Мүгәддәс Китабы өјрәнмәк гәрарына ҝәлдим, һалбуки бунун һеч дә асан олмајаҹағыны билирдим».

Миҝелин белә дүшүнмәсинә сәбәб онун наркотик вә түтүнә алудә олмасы иди. Һәбсханада бунлары тапмаг чәтин дејилди. Миҝелин камера јолдашы һәр ҝүн она наркотик тәклиф едирди. О, зәрәрли вәрдишинин өһдәсиндән ҝәлмәк үчүн даима Јеһова Аллаһа дуа едир вә она ҝүҹ вермәси истәјирди. Нәтиҹәдә, Миҝел галиб ҝәлди.

Үч ај сонра Миҝел өјрәндикләрини диҝәр мәһбуслара да данышмаға башлады. Нөвбәти ил о азадлыға бурахылды вә вәфтиз олараг Јеһованын Шаһиди олду. О, евләнмәји планлашдырырды, амма ҝөзләнилмәдән проблем јаранды. Тоја бир ај галмыш Миҝелә истинтагда олан ишләрлә әлагәдар 10 ил иш кәсдиләр. Лакин үч ил јарымдан сонра нүмунәви давранышына ҝөрә ону азад етдиләр. Нәһајәтдә о евләнди. Миҝел даһа һеч вахт ҹинајәт јолуна гајытмады.