Сон илләрдә Африкадан, Јахын Шәргдән вә ҹәнуби Асијадан хејли сајда гачгын Мәркәзи Авропаја көч едиб. Онлара көмәк етмәк мәгсәдилә дөвләт органлары, јерли көнүллү тәшкилатлары онлары гида илә, чадырларла тәмин едир вә онлара тибби јардым ҝөстәрирләр.

Тәбии ки, гачгынларын физики јардымдан савајы башга еһтијаҹлары да вар. Онлардан чоху травма јашајыр, буна ҝөрә дә онларын һәм дә тәсәлли вә үмидә еһтијаҹлары вар. Мәркәзи Авропадакы Јеһованын Шаһидләри гачгынлары динләмәјә вә онлара Мүгәддәс Китабдакы тәсәлливериҹи хәбәри чатдырмаға чалышырлар.

2015-ҹи илин август ајындан етибарән, Јеһованын Шаһидләринин Австрија вә Алманијадакы 300-дән чох јығынҹағынын үзвләри гачгынлара тәсәлли вермәк үчүн әлләриндән ҝәләни едирләр. Шаһидләр фикир вермишләр ки, гачгынлара хүсусилә дә ашағыдакы суаллара Мүгәддәс Китабдан ҹаваб тапмаг мараглы ҝәлир:

• Нијә дүнјада бу гәдәр әзаб әзијјәт вар?

• Инсан өләндән сонра нә баш верир?

• Мүгәддәс Китабда һансы хош хәбәр вар?

• Аллаһын ады вармы?

• Јеһованын Шаһидләри кимләрдир?

2015-ҹи илин август ајындан октјабр ајына кими јерли Јеһованын Шаһидләри Мәркәзи Авропа филиалындан дөрд тондан чох Мүгәддәс Китаба әсасланан әдәбијјат сифариш едиб. Бу әдәбијјатлар пулсуз олараг гачгынлара верилиб.

Гачгынларын чоху јалныз ана дилләриндә даныша билирләр. Буна ҝөрә дә Јеһованын Шаһидләри јүзләрлә дилдә мәгалә вә видеоларын јерләшдији jw.org сајтындан истифадә едирләр. Алманијанын Ерфурт шәһәриндә көнүллү кими хидмәт едән Матијас вә Петра дејирләр: «Бәзән биз жестләрлә, шәкилләрлә вә ја шәкил чәкәрәк үнсијјәт гуруруг». Гачгынлара Мүгәддәс Китабдакы хош хәбәри онларын доғма дилләриндә чатдыра билмәк үчүн Јеһованын Шаһидләри һәмчинин «JW Language» дил өјрәнмә програмындан истифадә едирләр. Бундан башга чохдилли «JW Library» програмындан истифадә едиб Мүгәддәс Китаб ајәләрини охујур вә видеолар ҝөстәрирләр.

Алманијанын Швајнфурт шәһәриндән јашајан Јеһованын Шаһиди олан бир ҹүтлүк дејир: «Ҹамаат бизи әһатәјә алмышды. Биз ики саат јарым әрзиндә гачгынлара тәхминән 360 әдәбијјат пајладыг. Онлардан бир нечәси тәзим едәрәк миннәтдарлыгларыны билдирдиләр». Алманијанын Дитс шәһәриндә јашајан Уолфганг бөлүшүр: «Гачгынлар әтрафларында онлары дүшүнән инсанларын олдуғуну ҝөрәндә севинирләр. Бәзән онлар биздән беш-алты дилдә әдәбијјат истәјирләр».

Чоху әдәбијјатларымызы ҝөтүрән кими охумаға башлајыр. Башгалары исә гајыдыб бизә миннәтдарлыгларыны билдирирләр. Алманијанын пајтахты Берлиндән олан Јеһованын Шаһиди Илонка дејир: «Ики ҝәнҹ оғлан бир нечә әдәбијјат ҝөтүрдү. Јарым саат сонра онлар гајыдыб бизә бир аз чөрәк вердиләр. Онларын миннәтдарлыгларыны билдирмәк үчүн бундан башга һеч нәләри јох иди».

Сосиал ишчиләр, дөвләт рәсмиләри вә гоншулар Јеһованын Шаһидләринин бу тәшәббүсүнү чох гијмәтләндирирләр. 300 гачгынын гејдинә галан бир сосиал ишчи деди: «Сағ олун! Әҹнәби сакинләримизин рифаһы илә марагландығыныз үчүн чох сағ олун!» Гачгын дүшәрҝәсиндә олан диҝәр бир сосиал ишчи исә гачгынлара охумалары үчүн онларын ана дилләриндә әдәбијјатлар вердикләринә ҝөрә Јеһованын Шаһидләринә демишди: «Индијә кими онларын һәјатында ҝүндә үч дәфә јемәк јемәкдән башга һеч нә јох иди».

Австријада јашајан Марион вә әри Стефан патрул чәкән ики полис әмәкдашына бу көнүллү хидмәтләринин мәгсәдини изаһ етдиләр. Полисләр онлара миннәтдарлыгларыны билдирдиләр вә охумаг үчүн ики китаб ҝөтүрдүләр. Марион дејир: «Полис дәфәләрлә бизә тәшәккүр етди».

Гачгынлара һәмишә јардым едән Австријадан олан бир гадын фикир вермишди ки, һава шәраитиндән асылы олмајараг, Јеһованын Шаһидләри гачгынлара көмәк етмәјә һазырдылар. Бир ҝүн о, Јеһованын Шаһидләринә дејир: «Сөз јох ки, гачгынларын мадди көмәјә еһтијаҹлары вар. Анҹаг онлар ән чох үмидә еһтијаҹ дујурлар. Сиз онлара мәһз буну верирсиниз».