Пангасинан дилинә тәрҹүмә едилән вә 2012-ҹи илдә ишыг үзү ҝөрән «Мүгәддәс Китаб һекајәләри» китабы Филиппин мәктәбләриндә бу дилдә тәһсил алан ушаглара тәдрис едилир. Филиппинин тәһсил шөбәсинин гәрары илә инди ибтидаи синиф шаҝирдләри ана дилләриндә тәһсил алырлар.

Филиппинин әһалиси 100-дән чох дилдә данышыр вә узун илләр әрзиндә ушагларын һансы дилдә тәһсил алмалары мәсәләси мүзакирә олунурду. 2012-ҹи илдә Тәһсил шөбәсинин вердији әмрдә гејд олунурду ки, ушагларын евдә данышдыглары дилдә тәһсил алмалары онларын програмы даһа јахшы вә даһа тез мәнимсәмәләринә көмәк едир. Нәтиҹәдә, «Ана дилиндә чохдилли тәһсил» програмы гүввәјә минди.

Сечилән дилләрин арасында Пангасинан дили дә вар иди. Амма ортаја проблем чыхды. Бир мәктәб директору ҝилејләнирди ки, бу дилдә ушаглар үчүн китаб чох аздыр. Буна ҝөрә дә Јеһованын Шаһидләринин Пангасинан дилинә тәрҹүмә етдикләри «Мүгәддәс Китаб һекајәләри» китабы дүз вахтында чыхды. Бу китабын бурахылышы һагда 2012-ҹи илин нојабр ајында кечирилән вилајәт конгресләриндә елан едилди.

Һәмин конгресләрдә бу китабын 10 000-дән чох нүсхәси пајланды. Балаҹа ушаглар вә онларын валидејнләри доғма дилләриндә белә бир китаб алдыгларына ҝөрә чох севиндиләр. Бир әр-арвад демишди: «Ушагларымыз бу китабы севирләр, чүнки дилини там баша дүшүрләр».

Конгресдән дәрһал сонра бир нечә Шаһид өз китабларыны Дагупан шәһәриндәки мәктәбә апардылар. Пангасинан дилиндә охумаг үчүн материал тапмајан мүәллимләр бу китабы ҝөрәндә чох севиндиләр. 340-дан чох китаб пајланды. Ушаглара охумағы өјрәтмәк үчүн онлар дәрһал бу китабдан истифадә етмәјә башладылар.

Бу китабдан тәһсилдә истифадә олунмасы Јеһованын Шаһидләрини чох севиндирир. «Мүгәддәс Китаб һекајәләри»нин тәрҹүмәсиндә иштирак едән бир тәрҹүмәчи демишди: «Үрәкләрә јол тапан инсанларын доғма дилләриндәки нәшрләрин нә гәдәр дәјәрли олдуғуну јахшы билирик. Буна ҝөрә дә Јеһованын Шаһидләри Мүгәддәс Китабы вә она әсасланан нәшрләри јүзләрлә дилләрә тәрҹүмә етмәк үчүн бөјүк сәј ҝөстәрирләр».