2015-ҹи ил мајын 20-си Ҹәнуби Русијанын бөјүк шәһәри олан Ростов-Донун администрасија рәһбәри Јеһованын Шаһидләринә тәшәккүр мәктубу јазыб «шәһәрин јаз имәҹилик ишләриндә фәал иштирак етдикләринә ҝөрә» онлары тәрифләди.

Ростов-Дон шәһәринин ҝөзәлләшмәси үчүн иҹтимаи фәалијјәт чәрчивәсиндә Јеһованын Шаһидләринин дөрд јығынҹағындан олан Шаһидләр шәһәрин сәкиләриндә вә чајкәнары әразиләриндә зибилләри вә шүшә гырынтыларыны топладылар. Бир нечә саат әрзиндә онлар 300 зибил торбасы долдуруб автомобиллә дашыдылар.

Јеһованын Шаһидләри нәјә ҝөрә инсанлара јардым едирләр? 67 јашлы Раиса дејир: «Бу мәсәләјә биҝанә гала билмәздим. Истәјирәм шәһәримиз тәмиз олсун ки, һамы тәмиз шәраитдә јашасын. Ҝөрдүјүмүз иши аз инсанын мүшаһидә етмәсинә бахмајараг, мән бу ишдән севинҹ дујурам. Бундан әлавә, етдијимиз иши Јеһова Аллаһ ҝөрүр». Александр адлы Јеһованын Шаһиди дејир: «Биз инсанлара тәкҹә тәблиғ етмирик, һәмчинин онлара лазыми көмәк дә ҝөстәририк. Башгалары үчүн нә исә едәндә өзүмү хошбәхт һисс едирәм, бундан мәмнунлуг дујурам».

Кәнардан мүшаһидә едәнләр Јеһованын Шаһидләринин һәвәслә ишләдијини ҝөрүб, онлара тәшәккүр етдиләр. Сакинләрдән бири Јеһованын Шаһидләринин бу ишләрә ҝөрә һеч бир мәваҹиб алмадығыны өјрәнәндә тәәҹҹүбләнди. О, бу тәмизлик ишиндә онлара гошулду. Һәмин сакин сонрадан өз мүшаһидәсини бөлүшдү: «Һеч ағлыма белә ҝәтирмәздим ки, тәмизлик етмәк инсана бу гәдәр севинҹ вә мәмнунлуг ҝәтирә биләр!» О әлавә едир: «Онлардан бәзиләри бурада јашамыр, анҹаг бизим үчүн бураны тәмизләјирләр!»

Бир шәһәр рәсмиси гејд етди ки, Шаһидләрдән ибарәт кичик бир груп ағла ҝәлмәјәҹәк гәдәр зибил топлады. Онлар долдурдуглары зибил торбаларыны дашыјаркән шәһәр рәсмиси онларын шәклини чәкди ки, «башгаларына неҹә ишләмәли олдугларыны» ҝөстәрсин.