2—24 ијул 2016-ҹы ил тарихләриндә дүнјаҹа мәшһур 103-ҹү «Тоур де Франҹе» велојүрүшү ҝәрҝин бир атмосфердә кечирилмишдир. Өтән ил Франсада төрәдилән силсиләви террор актларынын 100-дән чох гурбаны олмушдур. Үстәлик, 14 ијул 2016-ҹы ил Нитса шәһәриндә милли бајрам заманы бир террорист јүк машыныны атәшфәшанлығы сејр едән издиһамын үзәринә сүрмәси нәтиҹәсиндә 86 нәфәр һәјатыны итирди вә чохлу сајда инсан хәсарәт алды.

Бу ҹүр горху вә һүзн долу мүһитдә Јеһованын Шаһидләри Франсанын сарсылмыш әһалисинә үмид вә гәлб раһатлығы вермәјә ҹан атырды. Шаһидләр «Тоур де Франҹе» велојүрүшүндә мәрһәләләр арасы әдәбијјат арабалары гурурду. Јеһованын Шаһиди олан 1400-дән чох көнүллү бу ишдә иштирак етди вә һәјати ваҹиб суалларына ҹаваб ахтаран инсанлара Мүгәддәс Китаба әсасланан 2000-дән чох нәшр пајланды.

Јарышы шәһәрбәшәһәр изләјән азаркешләр әксәр јерләрдә Јеһованын Шаһидләрини ҝөрдүкләринә тәәҹҹүбләнирдиләр. «Тоур де Франҹе»ын тәшкилатчыларындан бәзиләри бир нечә дәфә Јеһованын Шаһидләринин уғурлу тәшкилатчылыгларына ҝөрә: «Сизә јарышын бүтүн мәрһәләләриндә, демәк олар ки, һәр јердә раст ҝәлирик!» — дејә тәрифләмишдиләр. Азаркешләрин чоху әдәбијјат арабаларыны ҝөрән кими уҹадан дејирдиләр: «Бурада да Јеһованын Шаһидләри?!» Һәмчинин, јарыш ҝүнләри әрзиндә бир автобус сүрүҹүсү она тәклиф олунан буклетдән нәзакәтлә имтина едәрәк, артыг дөрд буклет алдығыны билдирмишди!

Бәзи инсанларда Јеһованын Шаһидләринин мүнтәзәм иштиракынын мараг доғурмасы онлары әдәбијјат арабасындан нәшрләр ҝөтүрмәјә тәшвиг етмишди. Ејни шеји өтән ил «Тоур де Франҹе»да Јеһованын Шаһидләрини ҝөрдүјүнү хатырлајан телевизија идман каналларынын ишчиси барәдә дә демәк олар. Бу дәфә о арабаја јахынлашыб, онун үчүн өнәмли мөвзу олан «Аилә хошбәхтлијинин сирри» китабыны ҝөтүрмәк гәрарына ҝәлир. Китабы бир аз охујандан сонра әдәбијјат арабасы һагда әмәкдашларына данышыр вә онлар да өзләри үчүн мүхтәлиф мөвзуларда нәшрләр ҝөтүрүрләр.

Тәдбирә ҝәлән бәзи иштиракчылар Јеһованын Шаһидләринин јанына ҝәлиб, онлара өз һиссләри барәдә данышырды. Бир ҝәнҹ гадын бүтүн үмидләрини итирдијини, һәтта интиһар етмәк үчүн дәфәләрлә өзүнү гатарын алтына атмаг истәдијини етираф етмишди. Лакин Мүгәддәс Китабдан ҝөзәл ҝәләҹәјә зәманәт верән хош хәбәри ешидәндә гәлб раһатлығы тапдығыны вә фикриндән дашындығыны билдирмишди. Башга бир гадын Шаһидләрә белә сөјләмишди: «Сиз јахшы иш ҝөрүрсүнүз, буну давам етдирин!»

Голтугағаҹыјла ҝәзән бир киши етираф едир ки, адәтән, јад инсанлардан еһтијат едир, амма бир дәфә ләјагәтли ҝејимдә олан бир ханымын Јеһованын Шаһиди олдуғуну биләндән сонра онун көмәк әлини гәбул етмишди. О нөвбәти сөзләри сөјләмишди: «Ҝүләр үзүнүз вә әдәбли ҝејиминиз тәрифәлајигдир. Сиз инсанда етибар ојадырсыныз».